Iehova Ena Witness Taudia East Europe Tanodia Dekenai

MAGASIN ta, ladana Asiaweek, ia gwau November 1989 ai Berlin Wall (Berlin dekenai idia haginia haba badana) idia hamorua neganai, “East Berlin ese ena hetoana ia kehoa dina rua murinai, East Germany taudia milion rua bamona be edia tano ena west kahana dekenai idia lao.” Dahaka idia ura karaia?

Idia taga sisina taudia idia ura kohu idia hoia. Ma taunimanima haida edia ura be sitoa edia kohu do idia itaia bona sibodia edia dala abia hidi ena mamina matamatana idia abia gwauraia. Idia momo be Berlin ena dala dekenai bona ma hanua haida lalonai Iehova ena Witness taudia idia davaria bona buka bona magasin be idia amo idia abia. Unai nega amo, idia haida ese leta be Watch Tower Society ena branch opesi dekenai idia siaia, unai opesi be Selters, Frankfurt am Main hanuana kahirakahira dekenai ia noho. Unai leta lalonai idia torea gaudia haida be idau momokani.

Leta ta lalonai ia gwau: “West Berlin lau vadivadi henia nega ginigunana ai, Iehova ena Witness taudia haida dala dekenai idia ese Gima Kohorona magasin ta harihari gauna bamona lau idia henia. Unai nega amo, lau ese Bible lau duahia matamaia lou, bona ena be lau be mai egu hekwakwanai momo herea, to hari tau ta lau davaria lou, ia ese helaro namona bona moale egu mauri lalonai lau ia henia. Bema Memero Kekeni​—⁠Moale Umui Davaria Dalana bukana lau duahia diba, do lau moale bada herea. Danu, lau ura Iehova ena Witness taudia ese lau do idia vadivadi henia.”

Ma vadivadi tauna ta ia toretore, ia gwau: “Lau be henuna dala dekenai lau raka Nuremberg hanuana ena train gabuna badana dekenai, bona unai neganai hahine ta ese Noga! bona Gima Kohorona magasin haida be lau dekenai ia henia. Lau duahidia murinai, lau moale bada herea. Idia hanai dinadia haida lalonai, dina ta ta iboudiai Bible lau duahia lou.”

June ia lao August 1990 bamona ai, Iehova ena Witness taudia be East Europe tanodia edia hanua badadia dekenai hebouhebou idia karaia. Edia hebouhebou ta be Olympia Stadium dekenai idia karaia. Unai negai unai steidiam ena gabu ena ladana be West Berlin. Unai hebouhebou dekenai Witness taudia be bese idauidau momo amo idia mai, Germany ena east kahana amo danu. Reana taunimanima 44,532 be unai hebouhebou dekenai idia lao, bona idia 30,000 bamona be Germany ena east kahana amo idia mai. Niuspepa ta ladana Berliner Morgenpost lalonai ia gwau Witness taudia 1,017 be Olympic nahu gabuna lalonai idia bapatiso, bona unai negai edia tauanina ibounai ranu lalonai idia atoa diho; unai dala amo “idia bapatiso taudia ese Keristen taudia ginigunadia edia kara idia tohotohoa namonamo.

Germany ena east kahana dekenai mauri dalana be edena bamona idia haidaua? March 1990 lalonai, East Germany niuspepa idia gwau gavamani ia gwauraia hedinarai Iehova ena Witness taudia edia orea ese gavamani ena taravatu ia utua lasi. East Germany niuspepa ta ladana Mitteldeutsche Zeitung lalonai hereva kwarana ta be “Gavamani Ena Taravatu ese Iehova Ena Witness Taudia Ia Abia Dae Lou.” Unai hereva henunai ia gwau: “Lagani 40 lalonai ia noho taravatuna ta be March 14 ai idia kokia. Unai dina ai Iehova ena Witness taudia haida Germany amo ese G[erman] D[emocratic] R[epublic] Dubu Karadia Ia Naria State Secretariat ena opesi idia rakatania bona edia poketi lalonai gavamani pepana ta ia noho, ia gwau unai tomadiho orea taudia ese gwaumaoro idia abia lou, GDR lalonai edia tomadiho dalana idia badinaia totona.”

Lagani 1990 ai, Witness tauna ta Leipzig dekenai ese leta ta ia siaia, ia gwau: “Wiki ta gunanai, ai be hehuni dalanai lauma aniani sisina be emai tano lalonai ai abia vareai. Hari [March 14, 1990], gavamani ia gwau aiemai orea ese taravatu ia utua lasi! Kahirakahira, buka momo be taraka ta amo do ai kokia, idia iboudiai edia metau be 4 tonnes!” To momokani, East Germany lalonai ia vareai taraka ginigunana latanai, Bible bona Bible buka momo idia atoa, edia metau be 23 tonnes, bona hua rua gabedia lalonai ma buka momo idia siaia danu, edia metau be 230 tonnes. Lagani 40 lalonai, edia tomadiho dalana idia koua dainai, unai Witness taudia edia hitolo lauma dalanai be bada herea!

Nazi taudia (lagani 1933 ia lao 1945 ai) bona Komiunis taudia ese Witness taudia edia gaukara Germany lalonai idia koua toho. Unai ita laloa lou neganai, Witness taudia edia kara gunadia bona hari idia karaia gaukara badadia ese idia hamomokania idia be kara maoromaoro dekenai idia gini auka bona Dirava ese ia hanamodia.

Iehova Ena Witness Taudia Soviet Union Lalonai

December 1989 lalonai, Mikhail Gorbachev bona Pope John Paul Iharuana be Vatican dekenai idia hebou. Soviet niuspepa Pravda lalonai ia gwau Gorbachev ese edia herevahereva inai bamona ia gwauraia: “Ai kikilaia gaudia be mai dobudia bona mai anina bada gaudia. . . . Ai ese tomadiho ai kikilaia, bona Europe dekenai, tanobada dekenai, bona Soviet Union dekenai idia vara gaudia danu.” Vatican ena niuspepa badana, L’Osservatore Romano, lalonai ia gwau Mr. Gorbachev be pope dekenai ia hereva neganai ia gwau: “Tomadiho momo amo idia mai taudia, Keristen taudia, Muslim taudia, Iuda taudia, Buddhist taudia bona ma tomadiho haida taudia danu be Soviet Union dekenai idia noho. Idia iboudiai be mai edia maoro, edia ura gaudia lauma dalanai idia abia totona. Nega sisina murinai, aiemai tano dekenai Taunimanima ese Edia Lalohadai Idia Badinaia Diba Taravatuna do ai karaia.”

Unai hegeregerena, September 1990 lalonai Soviet taravatu karaia taudia ese taravatu ta idia karaia, dala ia kehoa taunimanima ese edia lalohadai idia badinaia diba totona. Unai taravatu ena Hereva Namba 3 ia gwau: “Taunimanima be mai edia maoro edia lalohadai idia badinaia diba totona. Unai hegeregerena, taunimanima ta ta iboudiai ese sibona edia ura hegeregerena edia lalohadai tomadiho dekenai idia badinaia. Idia be mai edia maoro idia sibona eiava ma taunimanima haida danu tomadiho ta idia badinaia totona o tomadiho ta idia badinaia lasi totona; bona idia be mai edia maoro tomadiho idia lalohadailaia dalana idia gwauraia hedinarai totona, bona ma taunimanima haida dekenai danu idia gwauraia.”

Witness taudia tausen tausen Soviet Union dekenai be mai edia moale danu tomadiho koua lasi negana idia naria. (Rau 30 itaia.) Lagani 1990 ena “Gado Goevadaena” Distrik Hebouheboudia idia karaia neganai, Witness taudia 17,000 bona ma haida be Soviet Union amo Warsaw dekenai idia mai, bona unuseniai hebouhebou herevadia Russia gado ai idia kamonai. Idia be Soviet Union ena gabu iboudiai lalonai idia noho Witness taudia hegeregeredia. Soviet Union dekenai hebouhebou idia karaia diba negana be mai edia moale danu idia naria noho.

Poland Lalonai Gaukara Idia Habadaia

May 1989 lalonai, Poland dekenai gavamani ia gwau Iehova ena Witness taudia edia gaukara be taravatu lasi. Unai nega murinai, branch opesi ta idia kehoa bona Warsaw hanuana kahirakahira dekenai branch rumadia badadia idia haginia noho. Guna, Witness taudia matamatadia handred handred be dibura rumadia ai idia negea vareai, badina idia be Keristen taudia dainai bona tuari bona politikol karadia lalonai idia vareai lasi. To hari, bema setifiket maorona idia hahedinaraia, gavamani ese ia doridia lasi tuari gaukarana idia karaia totona, bona panisi ia henidia lasi.

Lagani 1989 bona 1990 lalonai Poland dekenai idia karaia hebouheboudia ese unuseniai idia noho Witness taudia edia lalona idia hagoadaia bada. Sivarai ta ia gwau lagani 1990 ai, hua ta ta iboudiai dekenai, Poland lalonai idia gaukara noho Witness taudia edia namba ia bada daekau ela bona 97,000 ia hanaia. Kahirakahira, Poland lalonai Witness taudia edia namba do ia daekau lao ela bona 100,000 ia hanaia, bona unai do ia vara neganai unai bamona tano namba 12 ai do ia lao.a April 1990 dekenai, Iesu ena mase idia laloatao totona Anibou idia karaia neganai, taunimanima 188,861 idia mai.

Romania Lalonai Tomadiho Ta Idia Koua Lasi

Witness taudia Romania lalonai idia moale dikadika badina idia kamonai April 1990 ai gavamani be gwaumaoro taravatuna amo edia association ia abia dae. (Rau 27 dekenai idia atoa herevadia oi itaia.) Nega sisina murinai unai tano ena gabu iboudiai dekenai sekit hebouhebou idia hegaegaelaia, bona ena be unai neganai Romania tanona dekenai Witness taudia iboudiai be 19,000 sibona, to unai hebouhebou haida dekenai taunimanima 44,000 bona ma haida idia mai. Momokani, Romania taudia momo ese Basileia sivaraina idia kamonai henia bona idia abia dae.

Brasov bona Cluj-Napoca hanuadia dekenai distrik hebouheboudia idia karaia, bona lagani 1990 ai tanobada ibounai lalonai idia karaia hebouheboudia hegeregerena, edia hereva badana be “Gado Goevadaena.” Hebouhebou herevadia iboudiai be Romania bona Hungary gadodia ai idia henia. Taunimanima 36,000 bona ma haida be unai hebouhebou dekenai idia mai bona taunimanima 1,445 idia bapatiso.

Romania gado ena January 1, 1991 Gima Kohorona be English gado gauna danu nega tamona idia printaia bona ena lalonai kala ibounai idia atoa danu. Unai be nega ginigunana unai bamona idia karaia.

Bulgaria be Romania kahirakahira dekenai ia noho. Unai tano lalonai taunimanima momo ese Eastern Otodoks tomadihona idia badinaia. Unuseniai, gavamani ese Witness taudia edia tomadiho ia do abia dae lasi, to Witness taudia ese daiutu haida idia rentalaia edia kongregesen hebou idia karaia totona. Idia 200 bona ma haida be Salonika, Greece dekenai idia lao “Gado Goevadaena” Hebouhebouna Bulgaria bona Greek gado ai idia karaia totona.

Sivarai Namona Hungary Amo

June 27, 1989, be dina badana Hungary Witness taudia dekenai. Magyar Nemzet niuspepa lalonai ia gwau: “Gavamani Ena Dubu Karadia Naria Opesi ia gwau gavamani ese gwaumaoro ia henia, Iehova ena Witness taudia ese edia orea Hungary dekenai idia gaukaralaia totona. Unai gwaumaoro be Witness taudia ese edia tomadiho do idia karaia taunimanima ese edia tomadiho idia abia dae diba taravatuna hegeregerena.” Reidio bona televisen dekenai unai sivarai be taunimanima dekenai idia gwauraia. Hungary taudia idia kamonai gavamani ese Jehova Tanúi (Iehova ena Witness taudia) edia gaukara ia koua lasi.

Hungary tanona ena gabu badadia lalonai idia noho taudia durudia totona, “Gado Goevadaena” Hebouheboudia be Pecs, Miskolc, Debrecen, bona Budapest hanuadia dekenai idia karaia. Hungary gado idia gaukaralaia taudia 2,000 bamona be Czechoslovakia bona Soviet Union tanodia amo idia mai. Tanobada ibounai lalonai Iehova ena Witness taudia edia lalo-tamona idia hahedinaraia goevagoeva totona, Witness taudia 700 be Finland amo idia mai. Hungary dekenai unai hebouhebou dekenai idia mai taudia iboudiai be 21,568 bona unai taudia amo taunimanima 2,000 bona ma haida be Romania amo idia mai.

January 1990 amo, Hungary gado ena Gima Kohorona bona Noga! magasin lalodiai kala ibounai idia atoa bona Hungary Witness taudia ese unai magasin nega ibounai idia abia, bona unai magasin be English gado gaudia danu nega tamona idia hahanaia.

Czechoslovakia Lalonai Gaukara Idauidau Idia Karaia

Ororo badadia bona taora mai tubutubu gaudia momo be unai tano hairaina lalonai idia noho. Unuseniai, Iehova ena Witness taudia idia gaukara goadagoada edia dekena taudia idia durua, Bible ena hereva idia diba namonamo totona. Edia gaukara ia herevalaia sivaraina ta ia gwau: “Haroro gaukara be hehuni gabunai idia karaia lasi to taunimanima edia vairanai idia karaia noho bona hebou badadia idia karaia danu.”

Lagani 1989 ena dokonai, East Europe dekenai gau momo idia haidaua matamaia; unai murinai, Witness taudia Czechoslovakia dekenai idia kara haraga bona dala idia hegaegaelaia, April ia lao June 1990 dekenai, sekit hebouheboudia idia karaia totona. Unai dainai, niuspepa ese Witness taudia idia hanamoa; unai be nega ginigunana unai bamona ia vara. Hari, Czechoslovakia dekenai Witness taudia iboudiai be 21,000 bona ma haida, bona lagani 1990 lalonai taunimanima 40,295 be Anibou dekenai idia mai, Keriso ena mase laloatao totona. Edia kongregesen iboudiai rua rua amo, tamona tamona bona ma haida ese ruma o daiutu idia rentalaia, unuseniai edia hebou idia karaia diba totona, bona kongregesen 12 be mai edia Kingdom Hall ta ta.

August 1990 ai, hebouhebou ta idia karaia Prague dekenai. Taunimanima 23,876 idia mai bona taunimanima 1,824 idia bapatiso. Unai hebouhebou idia hegaegaelaia neganai, steidiam ena toana idia hanamoa totona, Witness taudia 9,500 bona ma haida be mai edia ura danu hora 58,000 bona ma haida idia haorea steidiam idia hagoevaia bona idia penia totona. Czechoslovakia televisen tauna ta ia gwau: “Gadara badadia momo ai vadivadi henidia vadaeni, to inai steidiam dekenai emui gaukara karaia dalana ai matauraia bada. Hari be unai bamona hebouhebou umui hegaegaelaia nega ginigunana, to emui kara dainai ai hoa bada.” Vadivadi tauna ta ia gwau: “Lauma gaudia umui laloa bada, umui tura heheni namonamo, bona tadikaka bamona umui lalokau heheni; unai dainai umui lau matauraia bada. Hebouhebou dekenai lau mai neganai, emui turana ta bamona lau mai; to hari, lau rakatania neganai, emui turana badana ta bamona lau rakatania.”

Czech bona Slovak gadodia edia Gima Kohorona bona Noga! magasin lalonai kala ibounai idia atoa, bona unai gado rua lalonai Gima Kohorona be English gado gauna danu idia printaia nega tamona. Ita diba unai gau idaudia be hoa gaudia, badina guna, lagani 1989 ai, Witness taudia edia gaukara idia koua toho.

Gabeai Do Idia Vara Diba Gaudia

Tano haida lalonai matamata taudia idia hadibaia vadaeni Dirava be lasi. Unai bamona tano lalodiai dahaka do ia vara diba? Sivarai ta ia gwau: “Taunimanima momo be Bible bona Dirava idia diba namonamo lasi. To gau namona ta be inai: Tomadiho hadibaia hereva koikoidia ese taunimanima idia koidia lasi, badina idia dekenai idia noho lasi. Toana be taunimanima momo be hereva momokani lalonai do idia vareai.”

Vadaeni, Iehova ena Witness taudia idia ura dahaka Bible sivaraina East Europe taudia dekenai idia henidia? Hereva gabena ese haere do ia henia.b

[Footnotes]

[Box on page 22, 23]

Tomadiho Idia Abia Hidi Diba Negana Ia Ginidae Inai!

July 1990 ai, Witness taudia haida be gabu ta, ena ladana gunana be East Germany, amo idia mai “Gado Goevadaena” Hebouhebouna, Berlin dekenai. Edia hereva haida be inai:

“Egu ladana be Lydia. Egu mauri lagani be 8, bona lau be GDR [German Democratic Republic] tanona amo lau mai. Lau moale bada herea inai distrik hebouhebouna dekenai lau mai dainai, badina lagani tamona gunanai, aiemai tano hetoana idia kehoa lasi. Anibou ai karaia neganai, hehuni dalanai ai karaia. To hari, aiemai dala idia koua lasi! Tadikaka iboudiai ese ane idia abia matamaia neganai, lau tai. Lau moale dikadika dainai sikuli dekenai inai sivarai do lau gwauraia!”

“Ai moale bada bona Dirava ai tanikiu henia badina Iehova ese ai ia boiria mai Berlin dekenai bona tanobada ibounai lalonai tadikaka bamona idia noho orea taudia edia huanai ai noho dainai.”​—⁠Bernd.

“GDR tanona amo idia mai tadikakadia danu ese hereva idia henia dainai gau badana ta ia hedinarai: Ena be gavamani haida ese Iehova ena orea taudia edia gaukara idia koua toho, to unai negai danu Iehova ese ena orea taudia ia hadibadia bona ia durudia edia gaukara idia karaia namonamo totona.”​—⁠Gottfried.

“Tadikaka ese hereva idia hanamoa bona ane idia abia neganai, ia hedinarai idia iboudiai idia moale. Unai kara idia karaia neganai regerege be bada herea, bona aiemai kudou ia hamarerea bada. Iehova ia moale bada herea unai!”​—⁠Egon.

“Lau bapatiso murinai, tadikaka bona taihu haida ese lau idia nanadaia ranu ia keru momokani eiava lasi. Lau haere neganai lau gwau lau diba lasi. Iehova ese lau ia hanamoa dainai egu mamina be hegeregere lau siahu bamona bona unai dainai lau laloa lasi ranu ia keru o ia siahu.”​—⁠Heidrun.

“Aiemai mahuta gabudia dekenai tadikaka edia kara bona edia mamina be ia namo herea momokani! Denmark, Mozambique, England, California, Germany diho kahana, Spain, GDR amo idia mai tadikakadia​—⁠ai ibounai ese ane ai abia hebou, ai ibounai ese ‘gado goevadaena’ ai gwauraia unai.”​—⁠Jutta.

“Lagani 1958 bona 1960 lalonai idia karaia Berlin hebouheboudia edia sivarai be emai natudia dekenai nega momo ai gwauraia vadaeni. Unai laganidia murinai Berlin hebouheboudia dekenai ai mai diba lasi. To hari ai itaia gaudia ese ai lalodia tao gaudia bona ai tahua gaudia idia hanaia momokani.”​—⁠Wolfgang.

“Ai moalelaia bada gauna be inai: Tadikaka tausen tausen idia gini toreisi ane idia abia bona Iehova idia hanamoa totona, bona ane bona guriguri ginigabena idia karaia neganai, lau moale bada herea. Aiemai matana ranudia ai koua diba lasi.”​—⁠Monika bona Reinhard.

[Box on page 27]

“Kara Kererena Ta Idia Hamaoromaoroa Vadaeni”

Unai hereva kwarana be Romania niuspepa Tineretul liber (Mauri Namona Matamata Taudia), August 11, 1990 gauna, lalonai idia printaia. Unai hereva henunai nius sivaraina ta ia gwau: “Oibe, kara kererena ta idia hamaoromaoroa vadaeni. Taunimanima momo ese idia gwauraia dika tomadiho oreana ‘Iehova ena Witness taudia,’ be lagani 40 bona ma haida lalonai idia gini goada bona Keriso idia badinaia. Harihari gavamani ese unai orea ia koua lasi bona gwaumaoro taravatuna amo ia gwau idia gaukara diba; unai hegeregerena, gwaumaoro pepana idia henia. Unai orea ena Hakaua Oreana ese ena gaukara ia naria bona ia biagua, bona tanobada ibounai lalonai, tano bona motumotu 210 dekenai, ena gaukara ia karaia.” Unai nius sivaraina ena hereva dokodia lalonai, August dekenai idia karaia hebouheboudia Brasoc bona Cluj-Napoca dekenai ia gwauraia.

[Pictures on page 23]

Hebouhebou karadia: (lauri henuna kahanai ia noho laulauna ai herevalaia guna, bena gabeai atai kahana bona idiba kahana edia laulau ai herevalaia) buklet matamatana Warsaw dekenai ia halasia; Hungary taudia edia platfom bona Romania taudia edia platfom, Budapest dekenai; hebouhebou herevadia idia torea, Berlin dekenai; hebouhebou idia do karaia lasi neganai steidiam ena toana idia hanamoa, Prague dekenai

[Pictures on page 24]

Hebouhebou karadia: (lauri henuna kahanai ia noho laulauna ai herevalaia guna, bena gabeai atai kahana bona idiba kahana edia laulau ai herevalaia) bapatiso, Romania dekenai; steidiam, Prague dekenai; ruma bese ta Berlin dekenai ese “ Mankind’s Search for God” bukana idia hahedinaraia; haroro tauna ta, Budapest dekenai; Poland dekenai Bible idia tahua