‘Ekalesia Orea Gunalaia Tauna ese Sibona Do Ia Biagua’

“Ekalesia orea gunalaia tauna ese . . . ia sibona ena tauanina do ia naria bona biagua.”​—TITO 1:​7, 8.

1, 2. Edena bamona William of Orange ese haheauka ia hahedinaraia, bona ena haheauka amo dahaka namo ia vara?

TANOBADA ena sivarai ta ese tauanina biagua bona haheauka toana ia hahedinaraia namonamo. Lagani 1500 bona 1600 huanai, Dutch lohia tauna, ladana William of Orange, be France ena Pavapava Henry Iharuana ida idia lao labana. Unai pavapava ese William ia hadibaia ia bona Spain ena pavapava ese palani ta idia hegaegaelaia France bona Netherlands dekenai​—Kerisendom ibounai lalonai​— idia noho Protestant taudia iboudiai do idia hamasedia totona. Pavapava Henry ia laloa hari William be ia bamona, Katolik tomadiho ia goadalaia tauna bona unai dainai iena palani iboudiai ia gwauraia hedinarai. To William be unai hereva ia kamonaia neganai ia hoa bada herea bona ia lalohisihisi danu, badina ia ena turana namodia momo be Protestant taudia. To ia sibona ena mamina ia hahedinaraia lasi bona ia haheauka; ia sibona ena lalona ia biagua bona ia gwau ia ura ia diba unai pavapava ena palani ibounai be dahaka, hegeregerena do ia durua totona.

² To dala ia kehoa neganai, William ese ma palani ta ia hegaegaelaia unai kara dika ia koua totona, bena ia ena kara dainai, murinai Netherlands tanobadana be Spain ena Katolik Dubu ena siahu amo ia siri diba. William ese unai palani ia kamonaia neganai sibona ena lalona ia biagua bona ia haheauka dainai, ena ladana matamatana ta idia henia, “William, Regerege Lasi Tauna.” Unai lohia, William of Orange, be ena mauri lalonai ia kwalimu momo dainai, taunimanima idia gwau: “Ia be Dutch ena gavamani edia gini goada ia havaraia tauna.”

3. Keristen elda taudia ese haheauka idia hahedinaraia neganai, daidia ese namo idia davaria?

³ Ia be mai ena haheauka dainai, William, Regerege Lasi Tauna, be ia sibona ena mauri bona ena taunimanima edia mauri ia hanamoa bada. Unai bamona danu, namona be hari inai negai Keristen elda taudia eiava naria taudia ese lauma helaga ena huahua, haheauka, idia hahedinaraia. (Galatia 5:​22, 23) Haheauka idia hahedinaraia neganai, idia ese idia sibodia edia mauri bona kongregesen ena mauri idia hanamoa. To, bema idia haheauka lasi, dika bada herea do idia havaraia diba.

Haheauka​—Elda Edia Kara Badana

4. Aposetolo Paulo ese dahaka sisiba ia henia elda taudia dekenai idia ese haheauka idia hahedinaraia totona?

⁴ Paulo, ia danu be elda tauna ta, ese haheauka ena namo ia diba. Efeso amo, ia dekenai idia mai elda taudia ia sisiba henidia neganai, ia gwau: “Umui sibona umui naria namonamo, bona mamoe orea ibounai danu.” Sibodia idia naria namonamo neganai gau badana be idia haheauka, edia kara idia naria namonamo unai. Timoteo ia toretore henia neganai, Paulo be unai lalohadai ia gwauraia, ia gwau: “Oi sibona oiemu kara do oi naria namonamo, oiemu hadibaia hereva danu.” Unai sisiba amo Paulo ia hahedinaraia ia diba tadikaka haida idia ura bada haida idia hadibaia to idia ura bada lasi unai idia hadibaia herevana idia badinaia. Unai dainai, iena hereva gunana bona badana idia dekenai be idia sibodia idia naria namonamo.​—Kara 20:28; 1 Timoteo 4:16.

5. Edena dala amo Keristen elda taudia ese edia dagi ena gwaumaoro idia abia, bona Bible lalonai edena siridia ese edia dagi abia totona karadia idia gwauraidia?

⁵ Lagani idia hanai lalodiai, Bible ese ia gwauraia elda gaukarana ena anina ia hedinarai sisina sisina ela bona ia hedinarai namonamo. Hari inai negai, ita diba elda ena dagi be gwaumaoro amo idia abia. Elda ese edia dagi idia abia gwaumaorona be Iehova ena Witness edia Hakaua Oreana amo, eiava unai orea ese idia abia hidi taudia amo. Unai Hakaua Oreana be edia siahu idia abia “hesiai tauna mai ena kamonai bona mai ena kara maoromaoro” oreana amo. (Mataio 24:​45-47) Aposetolo Paulo ese Keristen naria taudia, eiava elda taudia, edia kara ia gwauraidia 1 Timoteo 3:​1-7 bona Tito 1:​5-9 dekenai.

6, 7. Dahaka dagi abia karadia idia karaia totona elda taudia ese haheauka idia hahedinaraia guna be namo?

⁶ Paulo be 1 Timoteo 3:​2, 3 dekenai ia gwau, namona be naria tauna be lalo namona sibona ia badinaia. Unai bamona do ia karaia totona bona gaukara do ia taria namonamo totona, namona be elda tauna ia haheauka diba. Naria gaukara ena dagi ena gwaumaoro ia abia tauna be heatu bona heai tauna lasi. Bema ia be heatu bona heai tauna lasi anina be ia haheauka diba. Danu, bema elda ia ura lasi vine ranuna ia inua momo bona ia ura lasi kekero dagedage tauna ai ia lao, namona be ia haheauka noho.

⁷ Paulo be Tito 1:​7 dekenai, ia gwau naria tauna ese sibona ena tauanina ia naria bona ia biagua. To, mani oi laloa unai siri iboudiai lalodiai kara momo edia badina be haheauka. Haheitalai ta be inai: Naria tauna ena mauri toana be namo dainai tau ta ese ena kerere ta ia gwauraia diba lasi. Ita daradara lasi, bema elda ese ena lalona ia biagua namonamo lasi, unai kara namona ia karaia diba lasi.

Haida Ita Kara Henidia Neganai

8. Sisiba henia karana idia karaia totona elda ese dahaka kara idia manadalaia guna be namo, unai dainai namona be idia haheauka?

⁸ Bena danu, naria tauna be iena tadikaka taihu ia kara henidia neganai, namona be edia kara ia hesikulaia lasi bona ia doridia haragaharaga lasi. Unai bamona ia karaia totona, namona be haheauka ia hahedinaraia. Hegeregere, Galatia 6:1 ia gwauraia bamona, ia gwau: “Lauegu varavara taudia e, bema tau ta ia kerere neganai, umui Lauma kamonai henia taudia [momo be elda taudia] ese unai tau do umui hakaua lou, mai manau danu. To oi naria namonamo, hedibagani ese oi danu do ia koia garina.” Bema ita haheauka lasi do ita manau karaia diba lasi. Ita diba danu, bema ita ura ita sibona iseda kara ita naria namonamo, ita haheauka be gau badana. Danu, bema elda tauna ese lalo-hekwarahi tauna ta ia durua, namona be ia haheauka. Herevana elda ena lalohadai be dahaka unai tau dekenai, namona be ia hebogahisi henia, ia gwau henia lasi to mai ena lalo-parara ida unai tau ia durua toho. Namo lasi ia sisiba henia haraga, to namona be ia naria bona unai tau ena hereva ia kamonai henia guna, ena lalonai idia noho gaudia ia veridia toho, bona ena hekwakwanai ena badina momokanina do ia tahua.

9. Elda ese mai ena lalohisihisi tadikakadia idia durudia toho neganai, dahaka sisiba idia laloa be namo?

⁹ Bema tau ta ia lalohisihisi bada neganai, Iakobo 1:19 ena sisiba be mai ena anina bada, ia gwau: “Lauegu varavara e, lauegu lalokau, inai sisiba umui laloaboio lasi. Umui ta ta ibounai hereva umui kamonai haraga, to hereva do umui gwauraia haraga lasi. Bona do umui badu haraga lasi.” Io, bema ta ese badu eiava lalohisihisi herevadia ia halasia neganai, namona be elda ia naria namonamo, idau ia danu ia hereva henia mai baduna ida. Bema ita haheauka ta ia badu neganai, do ita badu henia lasi bona ‘kara dika davana do ita karaia lasi.’ (Roma 12:17) Bema ena badu ena dika davana ita henia, unai ese unai dika ia habadaia. Unai dainai, ita itaia, Dirava ena Hereva ese sisiba namo herea ia henia elda taudia dekenai, bona danu ia haganidia “ta ita haere henia neganai, bema mai iseda manau danu ita haere, badu ita koua diba.”​—Her. 15:1.

Elda bona Hahemaoro Komiti Edia Hebou Dekenai Haheauka Hahedinaraia

10, 11. Guna, nega haida, elda edia hebou dekenai dahaka ia vara, unai amo ia hedinarai unai hebou lalodiai idia haheauka be namo?

¹⁰ Keristen naria taudia be ma kara ta lalonai idia haheauka karaia be namo. Unai be elda taudia edia hebou dekenai. Nega haida hereva momokani bona hahemaoro maoromaoro karaia totona elda ia hereva be sisina auka, bona haheauka bada be namo. Bona danu, ia haheauka, idau ia hereva auka bona ma elda haida edia hereva ia koua toho garina. Bema elda ta ese unai bamona ia karaia hanaihanai, namona be ma elda ta, mai ena manau ida, ese ia sisiba henia.​—3 John 9 oi hahegeregerea.

¹¹ Ma danu, elda edia hebou dekenai, reana elda goadana ta be do ia lalohisihisi sisina bona reana ia hereva badabada danu. Unai bamona ia karaia neganai ia hedinarai iena haheauka ia haboioa! Unai neganai ia sibona ena hereva be dala rua amo ia hamorua bamona. Dala ginigunana be inai: Ia ese sibona ena lalona ia biagua namonamo lasi dainai, ena badu ese ena aonega lalohadaina ia koua. Dala iharuana be inai: Ia ese ena badu lalohisihisina ia hahedinaraia dainai, reana idia hebou elda taudia haida do ia hahisihisidia diba eiava ia habadudia diba. To, danu, bema elda taudia idia naria namonamo lasi, edia orea be badu amo idia hapararaia diba. Unai kara ese idia ia hadikadia bona kongregesen danu ia hadikaia.​—Kara 15:​36-40 danu hahegeregerea.

12. Dahaka karadia idia karaia negadiai namona be elda taudia idia haheauka?

¹² Danu, elda idia haheauka idau tadikaka haida idia ura henia bada bona haida idia ura henia maragi garina, eiava edia dagi idia gaukaralaia kerere garina. Haraga herea idia be hedibagani lalonai idia moru diba bona sibodia edia lalohadai kereredia idia gaukaralaia, kara haida karaia eiava hereva haida gwauraia totona, to unai be maoro lasi badina idia be goevadae lasi! Nega momo, elda taudia edia natudia eiava edia varavara ta idia kara dika neganai, elda taudia haida be kara ta idia karaia lasi eiava sisina idia hunia bamona. Bema idia ura hahemaoro maoromaoro idia karaia sibodia edia natudia eiava varavara dekenai, namona be idia haheauka bona idia karaia maoromaoro.​—Deuteronomi 10:17.

13. Dahaka dainai hahemaoro komiti idia karaia negadiai elda taudia ese haheauka idia hahedinaraia be gau badana?

¹³ Elda taudia ese hahemaoro komiti idia karaia neganai, haheauka be gau badana. Namona be elda taudia ese haheauka bada idia hahedinaraia idau kerere taudia edia hekwarahi bona lalohisihisi dainai idia hebogahisi kava bona edia hahemaoro maoromaoro karana idia karaia namonamo lasi. Ena be kerere taudia idia taitai, to elda taudia ese edia hahemaoro gaukara do idia karaia be namo. Danu, namo lasi elda tauna ia badu bema kerere taudia be ia dekenai idia dagedage bona iena ladana idia hadikaia toho neganai. Nega momo unai bamona ia vara bema kerere taudia be iseda orea idia dadaraia neganai. Unai bamona ia vara neganai Paulo ena hereva be mai edia anina bada, ia gwau: “Lohiabada ena hesiai tauna be do ia heai lasi, to taunimanima ibounai dekenai do ia bogahishisi henia.” Taunimanima idia dagedage neganai ita do hebogahisi henidia be sisina auka; bema ita haheauka lasi, unai bamona ita karaia diba lasi. Paulo ma ia gwau namona be “Lohiabada ena hesiai tauna” be inai bamona: “Ia be hadibaia tauna namona, mai ena haheauka. Ia ese, iena hereva idia utua taudia do ia sisiba henidia mai ena manau danu.” To taunimanima ese hereva momokani idia gwau-edeede henia neganai, elda tauna ese manau ia hahedinaraia totona, namona be ia sibona ena lalona ia biagua namonamo.​—2 Timoteo 2:​24, 25.

Hahine Dekenai Elda Taudia ese Edia Lalona Idia Biagua Namonamo

14. Namona be elda taudia ese dahaka sisiba namona idia badinaia hahine idia kara henia neganai?

¹⁴ Namona be elda taudia ese edia lalona idia biagua namonamo hahine dekenai kara ta idia karaia neganai. Namo lasi elda tauna be sibona ia lao taihu ta ia vadivadi henia ia durua totona bona idia sibodia mo idia noho. Namona be ma elda tauna ta eiava hesiai tauna ta danu idia lao hebou. Reana unai hekwakwanai ia vara diba dainai, Paulo ese elda tauna, Timoteo, ia sisiba henia, ia gwau: “Hahine badadia do oi hereva henia, idia be oiemu sinana bamona. Kekeni taudia do oi hereva henia, oiemu taihuna do oi hereva henia bamona, mai oiemu laloa goevagoeva danu.” (1 Timoteo 5:​1, 2) Nega haida ita itaia elda taudia haida ese edia imana idia atoa taihu edia kopina dekenai, hegeregerena idia be edia tamana bamona. To, sedira idia be sibodia idia koia, bona reana unai kara be Keristen ena tadikaka huanai lalokauna hahedinaraia karana lasi, to tau bona hahine huanai ia vara mamina idia tahua toho.​—1 Korinto 7:1 oi hahegeregerea.

15. Elda ta ia haheauka lasi sivaraina ta ese Iehova ena ladana hadikaia karana be edena bamona ia hahedinaraia?

¹⁵ Dika bada herea ia vara badina elda taudia haida be idia haheauka lasi kongregesen ena taihu haida dekenai! Lagani haida gunanai, elda tauna ta be orea murimurinai idia atoa badina ia be Keristen taihu danu ia heudahanai, unai taihu ena adavana korikorina be Witness lasi tauna. Kongregesen lalonai unai elda gunana ena atoa murimuri herevana idia gwauraia hanuaboina dekenai, unai kerere taihu ena adavana be Kingdom Hall dekenai ia raka vareai bona ena hahine bona unai kerere elda gunana ia pididia toho. Idia mase lasi, bona haraga herea ia ena amo ipidi gauna idia kokia, to murina dinanai, niuspepa badana ta ena vairana rauna dekenai ‘dubu dekenai haida idia pidia toho’ sivaraina idia halasia. Unai elda ia haheauka lasi dainai kongregesen ena ladana bona Iehova ena ladana dekenai dika bada herea ia mailaia!

Haheauka Karana Ma Kara Haida Dekenai

16. Elda taudia ese pablik tok idia karaia neganai dahaka dainai namona be idia haheauka?

¹⁶ Elda tauna ese pablik tok ia karaia neganai namona be ia haheauka. Pablik tok ia karaia tauna be ia gini namonamo bona gari lasi dekenai ia hereva be gau badana. Haida idia ura kamonai taudia idia hamoaledia bona hereva momo idia karaia idia kiri totona. Kamonai taudia idia ura kamonai henia herevadia sibona ia herevalaia be maoro lasi. Elda taudia be unai bamona idia karaia neganai, idia be haheauka lasi taudia. Bema elda tauna be hanaihanai ena tok ena nega ia hanaia, reana unai be haheauka lasi dainai bona hegaegae lasi dainai.

17, 18. Elda tauna ese ena maduna idauidau ia huaia totona, dahaka dainai haheauka ia hahedinaraia be namo?

¹⁷ Gaukara goadagoada elda tauna be ia ura ena gaukara ibounai ia karaia namonamo, ena be ena nega bona ena goada ia haorea diba. Ena lalona ia biagua namonamo neganai unai bamona ia karaia diba, bona sibona ia hametaua momo lasi to gaukara badadia ia karaia namonamo diba. Elda taudia haida be edia kongregesen gaukara idia laloa momo dainai, idia ese edia ruma bese idia naridia namonamo lasi. Unai dainai taihu ta ese elda tauna ena adavana ia hadibaia unai elda ese ia vadivadi henia neganai bona lauma dalanai ia durua dainai ia moale bada, bena vadaeni, unai elda ena adavana ia gwau: “Namona be nega ta lau dekenai ia vadivadi bona lauma dalanai lau ia durua!”​—1 Timoteo 3:​2, 4, 5.

¹⁸ Danu, namona be elda tauna be ia haheauka bona sibona ena stadi negana bona ena haroro gaukara, bona tadikaka vadivadi henidia lauma dalanai ia durudia gaukarana ia karaia negana ia sikeilia namonamo. Badina ita ibounai iseda kudou ia koikoi momo dainai, elda tauna be ia naria namonamo idau ia moalelaia momo gauna dekenai nega bada herea ia haorea garina. Bema ia be buka ia ura henidia bada, reana nega bada ia haorea sibona ena stadi karaia totona, bona ma gaukara haida ia karaia namonamo lasi. Bema ia be ruma ta ruma ta haroro gaukara ia moalelaia bada lasi, reana ia ese ekskius haida do ia tahua bona ia lao tadikaka ia vadivadi henidia lauma dalanai ia durudia totona, to ruma ta ruma ta haroro gaukara ia karaia momo lasi.

19. Elda taudia edia gaukara badana be dahaka, unai dainai idia haheauka be gau badana?

¹⁹ Elda ena taravatu ta be tadikaka ese sibodia edia daradara bona lalohisihisi herevadia ia dekenai idia gwauraia hedinarai neganai, ia ese ma tadikaka haida dekenai ia gwauraia kava lasi, unai dainai ia ese haheauka ia hahedinaraia be gau badana. Unai gau dekenai inai sisiba be mai anina: “Tau ta ese ena lalona herevana oi ia henia neganai, ma tau ta dekenai oi herevalaia kava lasi.” (Hereva Lada-isidia 25:9) Ia hedinarai vadaeni, reana elda taudia momo ese unai taravatu idia makohia. Bema elda ta be mai ena lalokau bona aonega adavana, bona idia ruaosi idia herevahereva namonamo diba, reana nega haida ia laloa namonamo lasi bena herevalaia kava lasi gaudia haida ia ida idia kikilaia. Unai be maoro lasi bona aonega lasi karana. Unai kara ese elda dekenai ia hereva tauna ena lalona ena hereva badana be ma ta dekenai ia herevalaia kava. Lauma dalana badinaia tadikakadia bona taihudia idia lao elda taudia dekenai heduru idia abia totona, bona edia lalona dekenai idia noho gaudia idia gwauraia hedinarai badina idia laloa elda taudia ese unai hereva be ma haida dekenai, idia gwauraia lou kava lasi. Unai gwauraia lou kava lasi herevadia be adavana dekenai ia gwauraia elda tauna ta ia kerere, ia aonega lasi bona lalokau ia hahedinaraia lasi, badina unai ese maduna metauna ia atoa ena adavana hahinena dekenai.​—Hereva Lada-isidia 10:19; 11:13.

20. Dahaka dainai elda taudia ese haheauka karana idia hahedinaraia be gau badana?

²⁰ Ita diba vadaeni, haheauka be gau badana ita ibounai dekenai, to ia be gau badana momokanina elda taudia dekenai! Iehova ena orea taudia idia gunalaia ena maduna idia abia dainai, Dirava vairanai idia gini bona idia gaukara namo eiava lasi ia hedinarai. Gau momo ia henidia dainai, idia dekena amo gau momo ia tahua. (Luka 12:48; 16:10; Iakobo 3:1 danu oi hahegeregerea.) Elda edia maduna namona be taunimanima vairanai haheitalai namona idia karaia, unai taudia ese elda edia kara idia tohotohoa totona. Unai mo sibona lasi, to danu elda ena dagi idia abia taudia ese namo bada idia karaia diba, to idia kerere neganai dika bada herea idia havaraia diba. Nega momo, bema idia haheauka, namo bada idia havaraia, to bema idia haheauka lasi, dika bada idia havaraia. Unai dainai Paulo ia gwau: “Ekalesia orea gunalaia tauna ese . . . ia sibona ena tauanina do ia naria bona biagua diba.”

Inai Oi Laloatao, A?

◻ Bible ia gwau namona be elda taudia ese dahaka dagi abia karadia idia hahedinaraia dainai idia haheauka be gau badana?

◻ Elda taudia ese edia tadikaka taihu idia kara henidia neganai, dahaka dainai idia haheauka be namo?

◻ Elda edia hebou dekenai haheauka edena bamona idia hahedinaraia be namo?

◻ Dahaka dainai ia auka sisina elda taudia ese herevalaia kava lasi herevana be ma haida dekenai idia gwauraia lasi?

[Picture on page 20]

Elda edia hebou dekenai gau badana be elda taudia ese haheauka idia hahedinaraia

[Picture on page 23]

Namona be Keristen elda taudia idia haheauka bona herevalaia kava lasi herevana be ma ta dekenai idia herevalaia lasi