Sivarai Namona be Hanua Maragidia Dekenai Idia Harorolaia South Africa Ai

IDIA badu dikadika taudia hutuma, polisi taudia bona hodahoda mai muramura. Daudau lasi gunanai, lagani haida lalodiai South Africa ena taoni bona siti be unai bamona hekwakwanai idia davaria. Hanua maragidia mai hairaidia danu​—unai gabu dekenai South Africa taudia iboudiai 100 100 amo 40 40 idia noho—​be politikol pati edia amo dika idia davaria momo. Ena be unai bamona kara idia vara noho, to Iehova ena Witness taudia be “Sivarai Namona mai mainona” idia harorolaia noho.​—Efeso 6:15.

Idia hanai lagani momo lalodiai ia mai hari, Iehova ena Witness taudia be lagani ta ta ibounai hua toi lalonai hanua maragidia dekenai idia noho taudia idia haroro henidia. Hegeregere lagani 1990 lalonai Basileia pablisa taudia 12,000 bona ma haida be kongregesen 334 dekena amo idia mai bona unai haroro gaukara dekenai idia vareai. Momokani, idia ese hekwakwanai momo idia hanaia guna, gabeai idia be South Africa ena hanua maragidia dekenai do idia ginidae totona.

Bona Witness taudia be gau haida dainai, kastom karadia idauidau bona gado idauidau dainai danu idia hekwarahi edia gaukara dekenai. Bona unai gado bona kara idauidau be momo herea! Hegeregere, haida be nao gado dekenai idia hereva biru taudia, haida be Afrikaans gado dekenai idia hereva biru taudia, bona Pedis, Sothos, Tsongas, Tswanas, Vendas, Xhosas, bona Zulu taudia idia noho danu. Unai hanua ta ta be mai edia kastom karadia idauidau bona gado idauidau idia kikilaia. Bona unai hanua lao henia gabudia be daudau herea bona dala be idia namo momokani lasi. Idia sibodia edia goada idia henia unai gaukara idia karaia totona bona idia ese nega bada bona moni bada idia halusia unai gaukara idia karaia totona. To, Iehova ese hahenamo bada ia henidia edia hekwarahi dainai. Ai ese inai haroro gaukara namona idia hekwarahilaia bona kwalimulaia sivaraina do ai kikilaia sisina.​—Malaki 3:10 itaia danu.

“Sunday” Sikuli Zululand Tanona Dekenai

Zululand ena gabu bogaraginai be koura ta ia noho bona unuseniai sinavai ta ladana Umvoti ia noho. Ororo dekenai oi gini neganai, gabu daudau dekenai rei amo idia karaia rumadia, Zulu rumadia dekenai, oi itaia diba. Lagani 1984 dekenai, Sunday ta dekenai Basileia harorolaia taudia rua be unai koura dekenai idia ginidae, idia be gagevagageva bona kahu amo ia honu dalana amo idia raka mai. Unai gabu be siahu momokani dainai ena ladana idia atoa Kwa-Sathane (Satana ena gabu)​—unai ladana amo idia gwauraia gauna be hahediba koikoi herevana, hel ena lahi, Satana ese ia havaraia gauna unai!

Mai siahu bada bona varahu bada danu unai tadikaka ese hahine ta ladana Doris idia davaria, ia be Sunday sikuli klas ta ia hakaua noho. Basileia ena sivarai ia kamonaia murinai, Doris be haraga herea unai Witness taudia rua ia hamaorodia iena klas memero bona kekeni 40 bamona do idia hereva henidia. Bona dahaka ia vara? Unai tadikaka rua be pura murinai unai sikuli dekenai idia giroa lao bona idia ese Lau Egu Bible Sivarai Buka 70 idia abia lao, unai hanua ena sikuli taudia ese idia gaukaralaia totona. Pura haida murinai, Sunday sikuli ena kara idia haidaua bona Bible stadi grup bamona ai idia halaoa. Idia ese dubu anedia idia anelaia lasi, to idia ese mai moale bona rege mamina namona danu, Basileia anedia idia anelaia, Africa taudia edia ane abia dalana amo, bona mai regena namo herea danu. Nega sisina murinai grup be ia bada daekau 60 bamona. Tadikaka ta be mai moale danu ia gwau: “Inai eksipirens be kudou hamoalea gauna badina inai Sunday sikuli be tomadiho momokanina gabuna dekenai ai halaoa!”

Mai Edia Kahu Gunika Gabudia

Dubu taudia be politikol taudia danu idia gaukara hebou momo dainai, kopi kurokuro biru taudia momo be idia naria namonamo bema ta ese Bible ena sivarai idia kikilaia idia dekenai. Johannesburg dekenai grup ta be 640 kilomita bamona idia lao Transvaal ena gabu haida dekenai sivarai namona idia harorolaia totona. Edia ripoti mani ita itaia.

“Ai be north ena gunika kahana dekenai hora 4 bamona motuka amo ai heau noho. Africa ena dina henunai aiemai matana amo laulau haida ai itaia hegeregere idia mavaru noho bamona, to unai be gabu kavakava sibona. Bona haraga herea ai be pisi dalana ai rakatania, bena tano kavakava dalana dekenai ai heau noho, bona dala be dika momokani. Unai murinai miri dalana dekenai ai lao bona imea ta dekenai ai ginidae.

“ ‘Daba namona, Meneer [Taubada],’ ai ese mai tauani bada biru tauna ta ai hanamoa noho.

“ ‘Namo,’ ia haere, mai badu toana danu. ‘Gau ta dekenai umui lau durua diba, a?’

“Ai hedavari henia murinai, ai vadivadi ena badina ai gwauraia. Aiemai hereva ai do gwauraia ore lasi neganai ia boiboi badabada ia gwau: ‘Lauegu dominee [pasto] tauna ese lau ia hadibaia do lau naria namonamo umui dekenai! Umui ibounai be Komiunis taudia bona Iesu dadaraia taudia. Lauegu gabu amo umui siri haraga eiava gau ta do lau . . . !’

“Unai biru tauna ena toana bona kara amo ai diba do ia badu dikadika momokani bona kara ta do ia karaia. Ma dala ta be lasi dainai, unai gabu ai rakatania, bona ‘kahu be aiemai aena amo ai kokia.’ (Mataio 10:14) To momokani kahu korikori momo ia noho aiemai aena dekenai.

“Imea iharuana dekenai ai ginidae neganai edia kara be imea ginigunana ena kara bamona. Bona unai neganai ai lalo-parara, unai gabu dekenai telefon laini be ia bisi noho badina Dutch Reform Dubuna ena pasto tauna be telefon amo ‘iena mamoe’ ia hadibadia vadaeni ‘dika havaraia taudia’ be edia hanua kahirakahira dekenai idia loaloa noho. Unai murinai ai ese biru tauna ta ai davaria, bona ena be ia ura lasi kamonai to ia gwau: ‘Oibe, lauegu gaukara taudia umui hereva henidia diba.’

“Ai be unai bamona ia kehoa dalana ai naria noho. Wattle au badadia edia badinai be raro amo idia karaia rumadia 10 idia noho. Buka bona magasin be motuka ena murina latanai ai haboua noho lalonai, ruma lalonai mata haida be matu amo ai dekenai idia roharoha noho, bona ai idia raraia ena mamina ai abia. Gabu ta dekenai ta ai haboua gaudia be Bible, ma gabu ta dekenai be Mauri Hanaihanai Paradaiso Lalonai bukana, bona Lau Egu Bible Sivarai Buka momo bona buklet idauidau ai atodia hedinarai. Unai hanua dekenai ia noho merona ta ia heau lao bona ai ginidae herevana be hanua taudia dekenai ia hadibaia. Bona unai murinai taunimanima 30 bamona be aiemai motuka badinai idia gini hegaegae, sivarai idia kamonaia totona.

“Kaset masini amo kiki herevana ta Tswana gado dekenai ai halasia. Unai taudia idia moale dikadika badina edia gado dekenai Dirava ena Basileia sivaraina bona Paradaiso helarona idia kamonai! Bona mai moale danu idia herevahereva unai buka bona buklet idauidau ai hariharilaidia neganai. Unai murinai buka bona buklet momo idia abia dainai ai gaukara bada. Tau buruka ta be davana ia gwauraia unai kaset masini do ia hoia totona. Ai moale bada badina idia ese hereva momokani idia moalelaia karana be dala idauidau amo idia hahedinaraia​—idia kiri mai hemarai danu, sisinasisina ai idia dogoatao, meitairametaira idia gwau, ‘tanikiu.’

“Unai hanua natu maragidia be sibodia edia ura dekenai laini dekenai idia gini bona edia sene bamahuta anena idia anelaia ai totona. Unai murinai, kahu dalana dikana dekenai ai heau noho bona taunimanima sisina momo idia ura lasi karana ena metau ia ore bamona. Ai diba emai hekwarahi ibounai be mai anina bada!”

Hanua Ena Lohia ese Oda Ta Ia Karaia!

Kongregesen ta Soweto dekenai gaukara maduna ta idia henia east kahana taoni Piet Retief dekenai idia noho bese badana ta do idia haroro henidia. Kastom karana unai gabu dekenai be vadivadi tauna ena lao badina ia gwauraia guna induna (hanua ena lohia) tauna dekenai. Tadikaka be unai hereva hegeregerenai idia karaia. Tadikaka idia hoa badina hanua ena lohia ese ia abidia dae bona ia hamaorodia iena ruma dekenai idia noho diba! Unai sibona lasi to ia ese nout ta ia torea bona ena stamp amo ia stampaia bona ia hamomokania; unai nout dekenai ia gwau pablisa taudia be ruma ta ruma ta dekenai idia lao diba. Nout ia gwau: “Idia be Dirava ena Basileia idia harorolaia taudia. Emui ruma dekenai umui abidia dae, bona umui kamonai henidia.”

Momo herea idia kamonai dainai, Sunday adorahi dekenai Witness taudia be idia hegaegae hanua lohiana ena ruma ariarana dekenai pablik tok ta idia karaia. Unai lohia ena ruma ariarana be ia honu masemase momokani, bona guriguri amo hebou idia kehoa bona idia koua. Hanua maragidia dekenai idia lao tadikakadia ma haida danu be unai bamona ekspiriens idia moalelaia.

Unai bamona ia moale tauna ta be Nathaniel, ia be hanua maragina ta ladana Pitsedisulejang dekenai ia noho bona unai gabu dekenai medu ia diho momo lasi bona ia be Bophuthatswana ena doe gabuna dekenai. Ia be komiuniti durua gaukarana ia karaia, bona ia ese hanua taudia uma aniani namodia havaraia dalana namodia idauidau ia hadibadia. Ia ura be unai gabu kavakava be paradaiso ai do ia halaoa. To inai tanobada ibounai be paradaiso ai do ia lao sivaraina ia kamonai neganai, ena matana ia hapapaia momokani. Pablisa taudia ese idia hahedinaraia henia siridia ibounai ia torea. Maoromaoro, Nathaniel ena ladana be unai gabu kahirakahira dekenai ia noho kongregesen ta dekenai idia hadibaia bona idia ese ia idia vadivadi henia, ena gabu amo kongregesen ena daudau be 30 kilomita bamona.

Mai Moale Danu Hereva Momokani Idia Tahua Taudia Momo Ai Durudia

Monika be pioneer taihu ta, anina be, nega ibounai Basileia ia harorolaia; ia gwau: “Iehova be ita dekenai ia hahedinaraia, ogogami ese lauma dalanai ia hitolo tauna ia koua lasi hereva momokani ia dibaia totona.” Ia be unai pioneer ena grup taihu ta bona idia be Orange Free State dekenai imea ta ta dekenai idia haroro loaloa noho, unai gabu ena bogaragina dekenai. Unai pioneer taudia be edena bamona idia laloa, sibodia idia henia neganai sivarai namona idia abia lao bena unai taudia durudia totona? Idia haere idia gwau: “Daika ese davana do idia karaia diba ai diba gaudia dekenai?” Oibe, pioneer taudia be lauma dalanai davana namona idia davaria, edia gaukara goada dainai.

Ena be duahiduahi ia diba lasi, to unai ese lauma dalanai ia hitolo tauna ia koua lasi Bible ena hereva momokani ia diba totona. Unai buklet namo hereana ladana Mauri Hanaihanai Tanobada Dekenai Oi Abia! be idia siaidia lao sisina idia duahiduahi diba taudia dekenai bona idia duahiduahi diba lasi taudia dekenai danu. Matamata taudia bona buruka taudia be Paradaiso ena kala piksa idauidau idia moalelaia bada. Nega ibounai hesiai gaukara ia karaia tauna ta, magasin bona buka idauidau printa gaukara ia naria tauna unai, ia gwau: “Inai buklet ese taunimanima ia durudia bena idia ese Paradaiso idia itaia hegeregerena ia be gau korikorina ta, bona idia ese Bible idia hahelagaia bona matauraia bada.”

Unai hegeregerena, Lau Egu Bible Sivarai Buka be taunimanima momo idia ura abia. Gabu daudau hanuana ta ladana Lebowa dekenai, iseda orea taihu rua be idia hoa badina idia davaria, ia itaia namonamo lasi tau burukana ta bona ena adavana be edia Sepedi gado ai unai buka idia abia. Unai tau bona hahine ese unai buka idia gaukaralaia unai hanua dekenai idia noho natu maragidia hadibaia totona. Unai buka be idia stadilaia namonamo bona idia makaia namonamo dainai kahirakahira do ia dika momokani. Idia moale bada herea badina idia ese unai buka matamatana ta idia abia diba dainai!

Unai dainai Keristen korikori taudia edia buka bona magasin idauidau ese hereva momokani dekenai idia hitolo taudia idia durudia bada noho. Watch Tower Society ese magasin, buklet bona buka idauidau momo idia printaia Africa ena south kahana hanua idauidau gadodia dekenai. Lagani 1990 sibona lalonai, Society ese idia printaia buka, buklet bona magasin iboudiai 113,529 be South Africa ena hanua maragidia dekenai idia hariharilaidia.

Gaukara Ena Huahua

Unai ekspiriens bona buka bona buklet bona magasin idauidau idia hariharilaia karana, South Africa ena hanua maragidia dekenai, ese hanaihanai do idia noho huahua namodia ia havaraia, a? Oibe, huahua momo ia havaraia. Lagani 1989 amo, kongregesen 4 bona grup 9, gabu daudau dekenai idia karaia idia ese sivarai namona South Africa ena hanua maragidia dekenai idia harorolaia dainai. Nega sisina lalonai idia special pioneer bona idia regular pioneer taudia ese unai gaukara momo idia karaia.

Doris bona ena Sunday sikuli taudia, unai gabu daudau tanona Zululand dekenai oi lalodia tao, a? Hari, ia be gwauhamata, bapatiso Iehova ena Witness hahine ta. Bona unai gabu dekenai Basileia pablisa taudia 9 be idia gaukara goada bona lauma dalana dekenai idia tubu daekau noho. Kamonai matamata taudia momo be Doris ena ruma dekenai hebou totona idia lao, bona ia danu Bible stadi idia karaia taudia 7 be lagani 1990, December ena hebouhebou badana, Durban dekenai, idia bapatiso.

Unai huahua namodia dainai Basileia pablisa taudia ia hagoadaia, South Africa dekenai. Idia ese aposetolo Paulo ena hereva idia laloatao, ia gwau: “Unai dainai, dala ita davaria neganai, taunimanima ibounai dekenai kara namodia do ita karaia.” (Galatia 6:10) Oibe, Iehova ena hesiai taudia be mai edia ura ibounai danu idia ura kara maoromaoro kudou-namo taudia idia tahua noho, bona hanua maragidia, “tanobada ena kahana ibounai” dekenai danu idia tahudia​—Kara 1:8.

[Maps/Pictures on page 24]

(For fully formatted text, see publication)

Lebowa

TRANSVAAL

Soweto

Piet Retief

Bophuthatswana

ORANGE FREE STATE