Iehova Ena Dala be Mauri Dalana Hereadaena

ERKKI KANKAANPÄÄ ESE SIVARAI IA GWAURAIA

LAU BE natuna matamata negana amo, lau ura bada gauna be Iehova ena Witness taudia edia Finland branch opesi, eiava idia gwauraia Betele, dekenai lau gaukara. Unai dainai lagani 1941 ena siahu negana ai, loaloa naria tauna be lau dekenai ia henanadai neganai, “Gabeai oi ura dahaka do oi karaia?” lau haere, lau gwau: “Lau ura Betele dekenai lau lao.”

Ia gwau: “Namona be unai oi laloaboio; oi do idia boiria lasi.” Lau lalohisihisi bada, to unai gauna be Iehova ena imana dekenai lau rakatania. Hua haida murinai, Betele dekenai gaukara totona lau idia boiria.

November 1941 ena keru momokani dinana ta ai, lau be Helsinki branch opesi ena iduara dekenai gaba lau botaia; unai neganai lau be lagani 17, hemarai merona, bona daudau gabuna amo lau mai. Branch naria tauna, Kaarlo Harteva, ese lau ia abia vareai. Unai neganai, Finland ena branch opesi ese Witness taudia 1,135 ia naridia.

Keristen Dalana ai Diba Lau Abia

Lagani 1914 ai, lauegu tamana be Watch Tower ena buka ta, The Divine Plan of the Ages, ia abia. To, tanobada ibounai tuarina ginigunana be unai nega sisina murinai ia matamaia, bona unai buka ia duahia lasi.

Finland taudia be idia sibodia idia lohiaia toho dainai hekwakwanai ia vara. Mai siahu bada oreadia rua​—⁠White taudia bona Red taudia​—⁠idia haginia. White taudia ese kapitalis bona bisinesi taudia edia ura idia gwauraia, bona Red taudia be gaukara taudia edia ura idia gwauraia. Lauegu tamana ia ura lasi kahana ta dekenai ia gini, ia be unai orea rua amo ia gini siri. To, unai orea rua idia laloa ia kerere, unai dainai iena ladana idia torea lista dekenai.

Nega rua, idia gwau tamagu ia mase be namo, White taudia be unai bamona idia hereva guna bena gabeai Red taudia be unai bamona idia hereva. Nega ta, tau ta idia alaia mase bona ala-ala tauna idia dogoatao diba lasi, unai dainai uhau ten, lauegu tamana danu, be mase ena kota hereva idia abia. Lauegu tamana ena tisa tauna ta be kota ena hahemaoro henia tauna ta bona ia be tamagu dainai mase ena hahemaoro hereva ia hanaia toho, bona unai bamona idia karaia. Unai uhau ma 9 idia hamasedia.

Ma nega ta ai, tamagu be kota ena mase hahemaoro herevana ia hanaia lou. Unai murinai ia ura ia lao hehuni, bona ia komu, tano ena henunai! Ia bona iena tadina be tano lalonai guri idia geia bona guhi amo idia koua, bona unuseniai idia noho ela bona tuari ia ore. Idia mauri noho totona, edia tadina mero ese aniani bona inuinu gaudia ia mailaidia.

Lagani 1918 lalonai, tuari ia ore murinai, tamagu ia headava bona unai guri kahirakahira ai ruma ta ia haginia. Gabeai, unai guri lau diba momo, badina unuseniai lau gadara momo. Tamagu ese lau ia hamaoroa unuseniai tano lalonai ia hunia neganai ia guriguri momo. Ia be Dirava dekenai ia gwauhamata, ia gwau bema Ia ia hesiai henia totona diba do ia abia, momokani do ia karaia.

Ia headava negana sisina murinai, tamagu ia ura bisinesi laolao ta dekenai duahia gauna ta ia abia lao. Atai daiutuna lalonai, ia be lagani momo gunanai ia hoia gauna, The Divine Plan of the Ages bukana, ia davaria. Ia kehoa “Iehova Ena Dina” ena karoa dekenai bona ia duahia. Sibona dekenai ia hereva loulou: ‘Inai be hereva momokani, inai be hereva momokani.’ Atai daiutuna amo ia diho mai, bona lauegu sinana ia hamaoroa: “Lau be tomadiho momokanina lau davaria.”

Maoromaoro, tamagu be ia diba gaudia ma haida dekenai ia harorolaia, iena varavara bona dekena taudia dekenai ia hereva guna. Bena ia be pablik tok haida ia henia hamatamaia. Nega sisina murinai unai gabu taudia be ia danu idia gaukara hebou. Bible Student taudia, unai neganai Iehova ena Witness taudia edia ladana be unai, be ia davaria murinai, tamagu be 1923 lalonai bapatiso ia abia. Ai vara murinai​—⁠ai, ena natudia ibounai, be hani​—⁠tamagu be ai ia hadibaia totona ia laloaboio lasi. Kongregesen idia karaia murinai, ia gwau hebou ibounai dekenai do ai lao.

Gunanai Idia Vara Gaudia Lau Laloatao

Lau laloatao gauna ginigunana be lauegu lagani be ia 5 neganai, aiemai kongregesen be lagani 1929 lalonai hebouhebou ta idia karaia. Kahirakahira idia noho kongregesen amo taunimanima momo idia mai, bona branch opesi taudia ese tadikaka ta idia siaia. Unai neganai, idia karaia karana ta be hebouhebou dekenai natudia idia hanamoa; unai kara be Finland dekenai idia karaia. Unai dainai Betele tadikakana ese natudia ia hanamoa, Iesu be iena hesiai gaukarana negana ai ia karaia hegeregerena. Unai kara lau laloaboio lasi.​—⁠Mareko 10⁠:⁠16.

Lau matamata neganai ia vara gauna ma ta lau laloatao, unai be lagani 1931 lalonai Iehova ena Witness ena ladana idia abia neganai. Lauegu tamana, ia diba unai be mai anina bada negana, be mai hemataurai bada ida kongregesen dekenai ladana matamatana abia dae herevana ia duahia.

Lau laloatao diba negana amo, haroro gaukara dekenai lauegu tamana ida lau lao. Lau hamatamaia neganai, ia badinai lau gari bona lau kamonai sibona, to gabeai lau be unai gaukara lau karaia diba. Lagani 1935 lalonai, loaloa naria elda ta ese ai ia vadivadi henia neganai, lauegu dekena taudia ibounai dekenai lau lao bona hebou dekenai iboudiai lau boiridia mai. Idia dekenai buklet lau henidia toho, bona taunimanima haida ese unai buklet idia abia dae.

Sikuli bona Lalohadai Badana Ta

Sikuli dekenai ai natudia hani sibona be mai emai Witness tamana bona sinana, bona nega momo ai idia hevasehalaia badina ma memero bona kekeni ida Keristen lasi karadia ai karaia lasi. Ena be sikuli taudia be lau idia veria toho kuku lau ania totona, to lau karaia lasi. Hemataurai lasi dalana dekenai ai idia gwauraia Russell taudia (Russell be Watch Tower Society ena presiden ginigunana) eiava Harteva taudia (Harteva be unai neganai Finland ena branch opesi naria tauna). Lau moale badina guna ai idia hevasehalaia memero kekeni haida be gabeai Witness taudia ai idia lao.

Lauegu tisa tauna ese lau ia hagoadaia lauegu sikuli lau karaia noho totona, bona nega ta lau ura enjinia tauna ai lau lao. To Pori dekenai, 1939 ena keru sisina negana ai, Iehova ena Witness hebouhebou idia karaia, bona unai be lauegu mauri ia haidaua. Lauegu tadina, Tuomo, bona lau be Iehova ai gwauhamata henia bona May 28, 1939 dekenai unai hebouhebou dekenai ranu bapatiso amo unai ai hamomokania. Bena, September ia matamaia neganai, Tanobada Ibounai Tuarina Iharuana ia matamaia.

Europe dekenai noho toana ia idau haraga. Finland bona Soviet Union be kahirakahira idia hepapahuahu. Lauegu tamana ena hereva badana be Aramagedono be kahirakahira, bona ai ia hagoadaia ai pioneer totona. Unai dainai, December 1940 lalonai, lauegu tamana bona lau be Finland ena north kahana dekenai pioneer gaukara ai karaia.

Pioneer bona Betele Gaukara

Ai pioneer neganai, nega momo Yrjö Kallio ida ai noho. Ia be lagani 30 gunanai, Pennsylvania, United States dekenai Bible Student tauna ai ia lao. Yrjö be mai hebogahisi bada herea, bona ia hekwarahi bada aiemai noho ia namo totona. Iena tadikaka, Kyösti Kallio, be 1937 ia lao 1940 neganai, ia be Finland ena presiden tauna. Yrjö ese ai ia hadibaia iena tadikaka dekenai ia haroro namonamo, bona ia hamaoroa Dirava ena Basileia sibona be gavamani namona ia haginia diba, bona tanobada ibounai ena maino hanaihanaina ia karaia diba.

Nega ia heau noho lalonai, Betele tauna ta ai lau lao totona lauegu ura ia bada noho. Lau moale, badina ena be loaloa naria tauna ena sisiba be unai ura lau laloaboio, to Betele dekenai hesiai gaukara karaia totona aplikesen lau henia neganai, lau idia abia dae. Unuseniai lauegu gaukara ginigunana be gau haida lau abia lao eiava lau abia mai. To, nega sisina murinai, lauegu gaukara namona ta be faktori dekenai. Unuseniai, dipatmen momo dekenai lau gaukara, unai be printa masini ruma dekenai bona Shipping Department.

Kahana Ta Dekenai Lau Gini Lasi

Lagani 1942 lalonai, lau be lagani 18 neganai, lau idia boiria tuari gaukara totona. Unai gaukara lau dadaraia dainai, nega momo bona nega daudau lalonai lau idia henanadai henia, nega rua lau dekenai ipidi idia poinia. Ma nega haida lau idia botaia. Danu, henanadai negana lalonai, lau idia hadiburaia idia hasiahua lasi daiutuna lalonai, bona unuseniai lauegu tauanina ia keru bada herea.

Gabeai, January 1943 lalonai, nega ia ginidae lau bona ma Witness haida, idia kota henia totona. Ai ia henanadai henia ami tauna ia ura ai idia hadiburaia negana be lagani 10 bona ma haida. Ami lalonai tomadiho naria tauna ia ura kota ena hahemaoro aukana momokani ai abia, revareva ta lalonai ia gwau namona be ai ‘idia hamasea eiava edia tano idia dadaraia taudia be Russia dekenai idia siaia parachute amo unai tano dekenai idia diho noho idia spai karaia totona [unai gaukara idia karaia taudia momo herea idia mase], ia gwau unai bamona ia vara be namo.’

Koikoi kota karana idia karaia. Lau idia boiria kota vairanai bona mase abia totona kota herevana idia henia lau dekenai. To, unai bamona idia karaia lau idia hagaria toho totona, badina gabeai, unai dina dekenai kota momokani vairanai lau idia boiria lou bona kota ena hahemaoro be lagani toi bona kahana lalonai dibura ai do lau lao. Unai kota herevana dekenai lau apil, bona kota ese dibura negana idia hamaragia lagani rua dekenai.

Dibura rumana lalonai, aniani be bada lasi, bona dibura taudia haida be mai dagedage danu lau idia hagaria gwauraia. Nega rua, tatau ida idia mahuta hebou tataudia be lau idia hadikaia toho, to lau heau siri diba. Ta ia gwau bema iena ura lau karaia lasi, lau do ia alaia mase. To lauegu hetoho ibounai lalonai lau karaia hegeregerena, Iehova lau noinoi henia, bona lau ia durua. Unai dibura tauna be lau ia alaia gwauraia herevana be gau maragina lasi, badina guna ia be tau ta ia alaia mase vadaeni. Idia ruhaia murinai, unai tau be ma taunimanima ta ia alaia mase bona idia hadiburaia lou.

Taunimanima idia diba Iehova ena Witness taudia idia koikoi lasi, bona reana unai dainai gaukara ta lau idia henia. Lauegu gaukara be dibura taudia dekenai aniani lau hariharilaia, bona dibura gabuna dekenai lau raka loaloa diba bona lau idia koua lasi. Unai dainai, lauegu aniani be hegeregere bona unai sibona lasi to danu lauegu Keristen tadikaka lau durudia diba edia aniani ia hegeregere totona. Tadikaka ta be dibura dekenai ia noho neganai, iena tauanina ia habadaia sisina, bona unai be nega momo ia vara diba lasi badina aniani ia hegeregere lasi dainai!

September 1944 neganai dibura amo lau idia ruhaia, unai be Tadikaka Harteva idia ruhaia dinana hegeregerena. Lau idia ruhaia dainai anina be Betele hesiai gaukara dekenai lau giroa lou diba. Lau laloa, ‘Betele bona dibura ena mauri lau hahegeregea neganai, Betele dekenai hora 16 lau gaukara bada be gau maragina.’ Unai negana amo gaukara lau maumauraia lasi!

Hesiai Gaukara Idauidau

Gabeai, 1944 lalonai, lau be Margit, mai hairai pioneer taihu matamatana ta, lau davaria bona lau ura henia dainai ai be February 9, 1946 dekenai ai headava. Ai headava lagani ginigunana lalonai, Betele dekenai lau gaukara bona Margit be Helsinki dekenai ia pioneer. Bena, January 1947 lalonai, sekit gaukara dekenai ai idia siaia.

Loaloa gaukara dekenai, nega momo ruma bese taudia ida ai noho bona idia ida daiutu tamona lalonai ai noho. Ai diba ai dekenai idia henia gaudia be edia gau namodia, bona ai maumau lasi. Unai neganai sekit edia gabu idia maragi, bona kongregesen haida lalonai, bapatiso Witness taudia be lasi momokani!

Lagani 1948 lalonai ai idia boiria Betele hesiai gaukara dekenai ai giroa lao totona. Lagani rua murinai, Wallace Endres be United States amo ia mai Finland dekenai, bona unai nega sisina murinai branch naria gaukara idia henia. Mai hebogahisi danu ai ia hagoadaia English gado ai stadilaia noho totona, bona unai ai karaia. Unai dainai, ai idia boiria Watchtower Bible School of Gilead ena misinari klas namba 19 dekenai, unai be South Lansing, New York, dekenai ia matamaia, February 1952 ai.

Unai sikuli ena kosi ai karaia haorea murinai Finland dekenai ai idia siaia giroa. To, United States ai do rakatania lasi neganai, lau idia hadibaia Iehova ena Witness taudia edia intenesenel hedikwota dekenai, Brooklyn, New York dekenai, printa masini gaukara lau karaia totona.

Finland dekenai ai giroa neganai, ai idia siaia loaloa naria gaukara dekenai, to lagani 1955 lalonai ai idia boiria lou Finland ena branch dekenai. Unai lagani lalonai lau be faktori naria tauna ai lao lao, bona lagani rua murinai, 1957 lalonai, branch naria tauna ena dagi lau idia henia. Lagani 1976 amo, lau be Finland Branch Komiti ena naria tauna gaukarana lau karaia.

Lau moale badina lauegu tamana bona sinana be Iehova dekenai idia abidadama noho ela bona idia mase. Nega ia lao murinai, tamagu ena varavara taudia handred bona kahana be Witness taudia ai idia lao. Bona ema bona hari, lauegu tadina bona taihudia bona edia ruma besedia be Iehova idia hesiai henia, lauegu taihuna be pioneer ta.

Gaukara Namo, Mai Anina Maurina

Lauegu mauri laganidia lalonai lau gaukara momo, to unai gaukara be Dirava ena gaukara dainai, ia be gaukara namo bona mai davana namo herea. (1 Korinto 3⁠:​6-9) Lauegu mauri lalonai nega haida lau hekwarahi. Nega haida dika bona hekwakwanai idia vara. Lau matamata negana amo, lau diba gauna be oi sibona emu ura be nega haida oi koua be namo. Nega ibounai oi sibona oiemu ura oi karaia be namo lasi. Nega momo sisiba lau abia, bona sisina sisina lau be mauri dalana maorona lau diba.

Haheitalai ta be, tuari lalonai lau mamia hetoho bona lau dabu negadia ese lau ia hadibaia kohu momo lasi neganai lau noho hegeregere diba. Lau lalo-parara gau ta lau hoia be namo eiava lasi. Nega momo lau sibona lau henanadai, bema inai gauna eiava unai gauna lau abia, unai be namo eiava lasi. Bena, bema lau laloa unai be gau badana lasi, lau hoia lasi.

Ia hedinarai goevagoeva Iehova be iena orea amo hakaua dalana ia henia. Lau moale badina Finland branch dekenai lau noho neganai, lau itaia unuseniai Iehova ena Witness taudia edia namba be 1,135 amo ia bada ia lao bona 18,000 ia hanaia! Momokani, lau itaia lauegu gaukara ia hanamoa, to lau diba unai bamona ia vara ia be iseda gaukara dainai lasi to ia vara badina ia be Iehova ena gaukara dainai. (1 Korinto 3⁠:​6, 7) Lau matamata neganai Iehova ena dala lau abia hidi, bona ia hamomokania unai be mauri dala hereadaena.

[Picture on page 23]

Hari inai be Erkki Kankaanpää, bona iena adavana Margit