Iehova Ena Hesiai Gaukara Lalonai, Mauri Namona Lau Abia
LEO KALLIO ESE IA SIVARAILAIA
Lagani be 1914, bona ai noho gabuna Turku, Finland ena siti ta ai, ia siahu sisina dina namona be ia ore gwauraia. To, karaharaga unai maino mamina ia ore, badina idia gwau tuari badana ia vara. Daudau lasi dala be taunimanima amo idia honu bona idia vara gaudia idia kikilaia momo. Tau bona hahine edia vaira idia auka dainai ai natudia ai diba lasi dahaka do ia vara. Unai neganai lauegu lagani be 9, bona lau laloatao natudia be edia gadara idia haidaua, tuari gadara idia karaia.
ENA BE Finland be Tanobada Ibounai Tuari Ginigunana (1914-18) lalonai ia vareai lasi, to lagani 1918 ai, unai tano taudia be sibodia idia tuari heheni. Edia politikol lalohadai be idau dainai, varavara taudia bona guna idia turana heheni taudia idia tuari heheni. Aiemai ruma bese taudia be 7 bona unai inai heheni karana ena mamina ai abia. Egu tamana be sisina hereva auka tauna, bona pulisi idia dogoatao bona kota ia gwau lagani 7 lalonai dibura rumana dekenai do ia noho. Gabeai, kota ese dibura rumana amo ia idia ruhaia, to madi gorere ia davaria vadaeni.
Unai nega dikana lalonai aiemai ruma bese ia hitolo bona gorere ai davaria. Lauegu taihu maragidia toi idia mase. Egu tamana ena kakana be Tampere siti dekenai ia noho, bona ia kamonai emai noho ia dika neganai, egu tamana, sinana, bona ai natudia rua ia boiria mai ia ida do ai noho totona.
Lagani momo idia ore murinai, Tampere dekenai ai do noho neganai, kekeni namona ta ladana Sylvi lau davaria. Ia dekenai idia vara gaudia be ai dekenai idia vara gaudia bamona. Iena tamana be emai tano ena tuari lalonai ia mase, bona murinai edia ruma bese turana namona, Kaarlo (Kalle) Vesanto, ese ia bona ena kakana bona edia sinana ia abidia dae iena ruma dekenai, unai be Pori taoni dekenai. Dala ia hegaegaelaia Sylvi ena sinana be moni gaukara ia karaia bona kekeni be sikuli dekenai idia lao totona. Gabeai, Sylvi be Tampere hanua dekenai ia lao moni gaukara ia karaia totona, bona unuseniai ai hedavari.
Lauegu Mauri Ia Haidaua Hanuaboina Ta
Lagani 1928 ai, Sylvi be lauegu maoheni kekeni ai ia lao, bona dina ta dekenai ai lao Pori hanua dekenai, Kalle Vesanto bona iena ruma bese taudia ai vadivadi henidia totona. Unai ese lauegu mauri ia haidaua bada. Guna, Kalle be mai ena trotting hosi bona heau helulu dekenai ia atodia, to unai bisinesi ia rakatania vadaeni. Ia bona ena hahine be Dirava ena Basileia ena sivarai namona harorolaia goadagoada taudia ai idia lao. Buka ta 1990 Yearbook of Jehovah’s Witnesses lalonai, ia hahedinaraia unai tau be taunimanima dekenai moni ia henia bona iena stori rua rumana ena murimuri kahana haba dekenai inai hereva idia torea, “Hari Idia Noho Taudia Milion Momo be Do Idia Mase Lasi.” Unai toretore be bada dainai, idia heau haraga train ese unai gabu idia hanaia neganai, idia lalodiai idia helai taudia be unai hereva idia duahia diba.
Unai hanuaboi dekenai, Kalle bona lau ai kiki noho ela bona daba ia rere. Lau henanadai momo, lau gwau “Dahaka dainai? Dahaka dainai? Dahaka dainai?” bona Kalle ese egu henanadai ia haerelaidia. Unai hanuaboi tamona lalonai Baibel ena hereva badadia momo lau diba. Hahediba hereva edia anina idia hamomokania Baibel siridia iboudiai lau toredia. Gabeai, ruma dekenai lau giroa lao neganai, noutbuk ta lau abia bona ia lalonai unai Baibel siri edia hereva ta ta iboudiai lau toredia hedinarai. Baibel gaukaralaia dalana lau do diba namonamo lasi dainai, egu moni gaukara gabuna dekenai, ruma haginia gaukara taudia dekenai lau haroro totona, lau ese unai noutbuk lau gaukaralaia. Tomadiho edia hahediba koikoi lau hahedinaraia neganai, nega momo lau be Kalle bamona lau gwau: “Turagu e, umui idia koia unai!”
Tampere hanua ai, ia bada lasi rumana dekenai Bible Student taudia 30 bamona be hebou idia karaia, bona unai gabu be Kalle ese lau ia hadibaia. Unuseniai, ruma biaguna, Tadikaka Andersson, badinai iduara kahirakahira dekenai ai helai. Nega haida lau lao lasi, to guriguri ese lau ia durua. Moni gaukara dekenai hekwakwanai bada lau davaria neganai, nega ta inai bamona lau guriguri: “Dirava e, bema lau oi durua inai hekwakwanai lau hanaidia totona, oi lau gwauhamata henia hebou iboudiai dekenai do lau lao.” To egu hekwakwanai ia dika ia lao. Bena lau lalo-parara Iehova dekenai taravatu lau atoa be namo lasi, unai dainai egu guriguri lau haidaua, lau gwau: “Herevana dahaka do ia vara, to oi lau gwauhamata henia hebou iboudiai dekenai do lau lao.” Unai lau karaia murinai hekwakwanai idia ore, bona hanaihanai hebou dekenai lau lao.—1 Ioane 5:14.
Guna Laganidia Dekenai Ai Haroro Dalana
Lagani 1929 ai, Sylvi bona lau ai headava, bona lagani 1934 ai, ai ruaosi be Iehova dekenai ai gwauhamata bona ranu dekenai bapatiso ai abia. Unai nega lalonai, ai haroro neganai phonograph masini bona rekodi ai abia lao taunimanima edia ruma dekenai, bona mai hemataurai danu ai hamaorodia bema idia ura, davana lasi dekenai rekodi amo Baibel ena hereva do idia kamonai henia diba. Taunimanima momo ese ai idia abia dae edia ruma dekenai, bona rekodi amo hereva idia kamonai henia murinai, ai kiki hebou bona buka idia abia.
Siahu taudia ese ai dekenai gwaumaoro idia henia dainai, hanua ena laga-ani uma gabudia dekenai rege habadaia masini amo bona hanua lalonai rege ia habadaia maua ai atodia bena unai Baibel herevadia be rekodi amo ai gadaralaidia. Ma nega haida, taunimanima momo be gohu gabunai idia mai neganai unai rekodi ai gadaralaidia idia kamonai totona. Rege habadaia masini ai atodia vanagi dekenai bona metairametaira ai bara ai lao kone kahirakahira dekenai. Sunday dinadia dekenai, rege habadaia masini bona buka bona magasin momo ai abia bona basi dekenai ai guia, gunika hanua dekenai ai lao haroro totona.
Aiemai Abidadama Ia Tohoa Karana
Lagani 1938 ai, lau be pioneer, ful-taim haroro gaukarana lau karaia, to danu biriki atodia gaukarana lau karaia noho. Tubutubu gaudia idia gara lou negana lalonai, Society ena brens opesi amo revareva lau davaria, idia ura loaloa haroro tauna ta ai lau lao, hari idia gwauraia sekit naria tauna. Unai gaukara do lau abia dae be ia auka, badina Tampere ena kongregesen taudia ida lau gaukara neganai lau moale. Danu, ai be mai emai ruma; emai natuna mero Arto ena lagani be 6, bona daudau lasi sikuli dekenai do ia lao; bona Sylvi be sitoa dekenai ia karaia moni gaukarana ia moalelaia. To, ai kikilaia hebou murinai, lau ese unai Basileia hesiai gaukarana lau abia dae.—Mataio 6:33.
Gabeai, hekwakwanai negana ma ta ia vara. November 30, 1939 ai, Soviet ami taudia be Finland dekenai idia vareai neganai, tuari ia matamaia. Unai tuari idia gwauraia Keru Nega Ena Tuari, bona tuari ia noho ela bona March 1940 ai, unai negai Finland be maino karaia pepana ia abia dae. Unai tuari negana lalonai, keru ena nega be bada herea danu, guna unai bamona keru lau mamia lasi. Keru ia bada ia lao ela bona -30° C ena maka ia davaria, unai keru bada lalonai lau be baisikele amo kongregesen ta ta dekenai lau lao!
Lagani 1940 ai, Iehova ena Witness taudia edia gaukara Finland dekenai idia taravatua. Unai neganai Finland Witness memero kekeni momo be dibura rumana dekenai idia atodia bona dika idauidau momo idia davaria. Lau moale badina tanobada ibounai tuari iharuana lalonai, lagani 1939 ia lao 1945 ai, lau be kongregesen iboudiai dekenai lau vadivadi noho diba. Nega momo Sylvi bona Arto lau rakatanidia bona lau giroa mai lasi ela bona hua haida idia ore. Ma danu, aiemai haroro gaukara idia taravatua dainai, lau laloa momo gauna be lau idia dogoatao diba.
Reana taunimanima idia daradara lau idia itaia neganai, badina egu baisikele lau haheaua neganai, sutkeisi lau atoa, baege mai ena buka lau huaia, bona phonograph masini bona rekodi danu. Unai phonograph rekodi lau dekenai idia noho, badina bema pulisi be lau idia dogoatao, do idia diba lau be haroro tauna, bena idia laloa lasi lau be parachute amo peleini amo lau diho mai Russia taudia edia spai gaukarana lau karaia totona. Lau hereva diba, bema parachute amo peleini amo lau diho, unai rekodi do idia makohi momokani.
Nega ta ai, hanua taudia idia hamaorodia spai tauna ta ia loaloa, bona unai gabu dekenai lau ginidae neganai, Witness ruma bese taudia idia laloa lau be unai spai tauna. Keru hanuaboina ta dekenai edia iduara dekenai lau pidipidi neganai, idia gari bada dainai iduara idia kehoa lasi. Unai dainai unai hanuaboi dekenai boromakau edia ruma dekenai lau vareai, bona lau keru momokani lasi totona, boromakau edia aniani, rei kakoro, amo egu tauanina lau koua bona lau mahuta. Daba ia rere neganai, ruma taudia idia diba lau be spai tauna lasi, bona egu vadivadi negadia ibounai lalonai unai ruma taudia ese lau idia naria namo herea momokani!
Tuari idia karaia laganidia lalodiai, Tadikaka Johannes Koskinen bona lau sibona be Finland bogaraginai bona not kahana dekenai idia noho kongregesen ai vadivadi henidia. Ai ta ta ai naria gabudia be bada herea, ai loaloa gabuna ena bada be kilomita 600. Ai vadivadi henia kongregesen idauidau be momo dainai, idia ta ta iboudiai dekenai dina rua eiava toi sibona ai noho diba. Train be nega korikori dekenai idia ginidae lasi, bona basi be momo lasi bona idia dekenai taunimanima momo idia guia dainai, ai lao henia gabudia dekenai ai ginidae be hoa gauna bamona.
Nega Momo Kahirakahira Dika Lau Davaria
Nega ta ai, unai Keru Nega Ena Tuari lalonai, Helsinki ena brens opesi dekenai lau lao bona gavamani idia taravatua bukadia be lau abidia, unai maua hani be metau herea. Train amo lau abidia lao kongregesen ta ta dekenai lau henidia totona. Riihimäki train siteisini dekenai ai naria noho neganai, dika ta ia mai dainai taunimanima hadibadia alarm ia regerege bada. Train lalonai ami taudia be keru ia koua dabuadia idia karaia, bona train idia guia taudia idia hamaorodia karaharaga train idia rakatania bona siteisini kahirakahira dekenai ia noho rei gabuna dekenai do idia lao.
Ami taudia lau hamaorodia egu maua dekenai idia noho gaudia be mai anina bada, bona lau noidia do idia huaia lao totona. Idia hani ese maua ta ta idia abia isi, bona sinou ia koua tanona dekenai mita 200 bamona ai heau. Tano dekenai sibona ai hamorua neganai, tau ta be lau dekenai ia boiboi, ia gwau: “Oi, ami lasi tauna e, oi mareremarere lasi! Bema peleini taudia ese ia mareremarere gauna ta idia itaia, ita latanai edia bomu do idia hamorudia.” Lau ura itaia dainai, metairametaira egu kwarana lau giroa guba lau raraia totona, bona peleini 28 lau duahidia!
Karaharaga, idia hamorua bomu idia pou dainai tano ia mareremarere. Ena be siteisini ia dika lasi, to bomu ese ai guia train ia botaia dainai ia dika. Train ia dika bona ia latanai ia heau auri gaudia idia gageva toana be dika herea momokani! Daba ia rere neganai mai egu maua ida train ta dekenai lau guia bona lau lao, bona ami taudia be train idauna ta dekenai idia lao. Tuari ia ore murinai unai ami tauna ta be Witness tauna ta ai ia lao, bona lau ia hamaoroa, guna ami taudia ese mai ena maua tauna ena sivarai idia kikilaia.
Gabeai, Tadikaka Koskinen, be kongregesen maragina ta, Rovaniemi siti, Finland ena not kahana ai, ia vadivadi henia totona ia lao, to train ia ginidae neganai pulisi ese idia dogoatao. Dibura rumana dekenai idia atoa, bona unuseniai idia dagedage henia bada. Unai kongregesen lau vadivadi henia negana ia ginidae neganai, dala lau hegaegaelaia Koivu siteisini maragina dekenai train lau rakatania totona. Unuseniai Taihu Helmi Pallari ese dala ia hegaegaelaia dainai, rata ia laohaia taraka dekenai lau guia diba egu laolao orena lau karaia totona. Rovaniemi Kongregesen lau vadivadi henia be namo herea. To, unai gabu lau rakatania neganai hekwakwanai ia vara.
Train siteisini dekenai ai lao neganai, lau bona egu turana be ami taudia rua ai itadia, idia be taunimanima edia gaukara gwaumaoro pepadia idia sekedia. Lau gwau: “Idia dekenai oi raraia lasi. Emu matana be vairai kahana sibona oi raraia.” Idia huanai ai raka hanai, hegeregere idia noho lasi bamona. To ai murinai idia heau mai. To, train siteisini lalonai taunimanima hutuma idia noho dainai lau hunia diba ela bona ia heau lao train dekenai lau roho bona lau guia. Unai nega lalonai, sekit naria taudia edia gaukara lalonai, lalona hahoaia kara idauidau idia vara!
Nega ta lau idia dogoatao bona ami ena vareai opesi dekenai lau idia abia lao. Idia ura tuari gabuna dekenai lau idia siaia. To telefon ia regerege, bona lau do ia henanadai henia ami ofesa ese ia abia isi. Ia hereva tauna ena gadona lau kamonai, ia boiboi ia gwau: “Dahaka dainai hanaihanai mai edia gorere bona idia gaukara diba lasi taudia ai dekenai oi siaidia? Ai gaukaralaidia diba lasi dainai ai siaidia lou. Ai ura idia gaukara goadagoada diba taudia ai abidia!” Lau moale, badina lau dekenai medikal pepa ia noho, bona lau davaria gorere ia hahedinaraia. Unai pepa ia dekenai lau hahedinaraia neganai, lau idia dogoatao lasi bona kongregesen lau vadivadi henidia gaukarana lau karaia noho diba!
Kota Dekenai Lau Heduru
Tuari dainai taunimanima idia do badu noho, bona egu turana Ahti Laeste idia dogoatao. Iena hahine ese lau ia boiria mai. Iena ruma dekenai lau ginidae neganai, iena pepa idauidau dekenai pepa ta lau davaria, ia gwau pulisi ese Ahti dekenai gwaumaoro idia henia, siti ena laga-ani uma dekenai, rekodi amo haroro hereva ia gadaralaia totona. Unai pepa be kota dekenai ai abia lao. Kota lalonai, Ahti idia samania ena badina idia duahia hedinarai murinai, unai pepa be Tadikaka Laeste dekenai lau henia. Diadi tauna ese ami tauna ia hamaoroa phonograph bona rekodi ena Baibel hereva haida do ia mailaidia kota lalonai idia noho taudia ese do idia kamonai henidia totona. Idia ta ta idia kamonai murinai, diadi tauna ia gwau unai rekodi dekenai hereva dikana ta ia davaria lasi.
Vadaeni, Ahti, iena hahine, bona lau idia siaia murimuri ai kota ena hahemaoro herevana ai naria totona. Mai gari danu ai gini hebou. Murinai, gado ta ia boiboi, ia gwau: “Samania tauna e, mani kota daiutuna lalonai oi vareai lou.” Bena kota ia gwau Tadikaka Laeste be ia kerere lasi! Emai haroro gaukara ai karaia noho lalonai ai be emai kudouna ibounai ida Iehova ai hanamoa. Tadikaka bona Taihu Laeste ese edia gaukara kongregesen lalonai idia karaia noho, bona lau be loaloa naria gaukara lau karaia noho.
Tuari Ia Ore—Ai Haroro Noho
Tuari ia ore neganai, haroro gaukara dekenai taravatu idia kokia bona tadikaka be dibura rumana amo idia ruhadia. Lagani momo herea lalonai lau haroro, bona lau itaia Keristen taihu be Basileia gaukara idia karaia goadagoada bona edia tatau idia durua namo herea, unai dainai lau moale. Sylvi ese gau momo ia reaia bona lau ia durua bada dainai lau moale. Ena heduru dainai, lau be lagani 33 lalodiai loaloa naria gaukara lau karaia diba, bona murinai special pioneer gaukara lau karaia diba.
Sylvi bona lau be Arto ai hagoadaia sikuli do ia haorea neganai pioneer gaukara do ia karaia, English gado do ia diba, bona United States dekenai Watchtower Bible School of Gilead dekenai do ia lao totona. Lagani 1953 ai, Gilead ena kosi ia karaia. Murinai, ia ese Eeva ia adavaia, bona idia ruaosi be ful-taim haroro gaukara idauidau idia karaia, hegeregere, sekit, Betele, bona special pioneer gaukaradia. Lagani 1988 ai, Tampere, ai noho gabuna dekenai idia mai Sylvi bona lau idia naria totona, to idia be special pioneer gaukara idia karaia noho.
Sylvi bona lau be emai mauri lalonai hahenamo momo ai davaria, bona ena be hari emai tauanina idia goada momokani lasi, to unai nega namodia ai laloa neganai unai ese ai ia hagoadaia. Haroro gaukara ia bada ia lao ai itaia dainai ai moale. Lagani 1939 ai, kongregesen lau vadivadi henidia hamatamaia neganai, Finland dekenai Basileia ena pablisa taudia be 865 sibona, to hari, pablisa taudia edia namba be 18,000 ia hanaia!
Lagani 1938 ai, ful-taim haroro gaukara lau karaia hamatamaia neganai, ena be lau diba lasi, to lagani 55 lalodiai unai gaukara do lau karaia, bona lau do karaia noho. Ena be ai buruka ai lao, to Iehova ena siahu dekenai ai gaukara noho diba, bona ai naria noho ia gwauhamatalaia davana namona do ai davaria totona. Salamo torea tauna ena hereva dekenai ita abidadama, ia gwau: “Iehova be namo; ena hebogahisi be ia hesiriu hanaihanai, bona ena heabidadama ela bona uru iboudiai.”—Salamo 100:5.
[Picture on page 21]
Leo bona Sylvi Kallio be lagani 1934 ai, bapatiso amo edia gwauhamata idia hahedinaraia
[Picture on page 23]
Vanegai idia abia foto, Leo bona Sylvi be kahirakahira lagani 60 lalodiai hesiai gaukara idia karaia goadagoada