‘Lalokau Dainai Sisiba Henia’
LAGANI 60-61 C.E. bamona ai, ia heau boio hesiai tauna ta be Roma ia rakatania bona 1,400 kilomita ia raka lao ela bona iena hanua Kolose dekenai, unai siti be Asia Minor ena southwest kahanai ia noho. Revareva ta ia abia lao ena biaguna dekenai ia henia totona, aposetolo Paulo ese unai revareva ia torea. Hari inai nega lalonai, unai be Bible ena revareva ta bona Paulo ia tore henia tauna ena ladana idia henia, unai be Filemona.
Filemona ia abia revareva ena hereva be namo herea, taunimanima ia durudia idia laloa maoromaoro totona. To, mai anina bada gauna be inai, ena hereva momo be hari inai negai idia noho Keristen taudia idia durua bada diba, bona ena hereva ta be Keristen lalokau dainai Keristen taudia idia sisiba heheni be namo. Namona be unai mai anina bada revareva kwadogina ena hereva ita tahua namonamo.
Ia Heau Boio Tauna Ia Giroa Lou
Filemona be Keristen tauna ta bona Kolose kongregesen taudia ese ia idia lalokau henia bada. (Filemona 4, 5) Oibe, kongregesen taudia ese iena ruma idia gaukaralaia edia hebou idia karaia totona! (Siri 2) Ma danu, Filemona be Paulo ia diba namonamo; reana aposetolo Paulo ese ia durua Keristen tauna ai ia lao totona. Momokani, Paulo ia hereva hegeregere Kolose dekenai ia haroro lasi. (Kolose 2:1) To, ia be lagani rua Efeso dekenai ia noho, bona unuseniai ia haroro momo dainai “Asia tano [Kolose danu] dekenai idia noho taudia . . . ibounai [be] Lohiabada ena hereva idia kamonai.” (Kara 19:10) Filemona be reana iena haroro herevana ia kamonaia bona ia abia dae tauna ta.
To, unai nega lalonai idia noho taga taudia momo hegeregeredia, Filemona be mai ena igui hesiai taudia. Idau negai, nega momo igui hesiai gaukara be hemarai gauna ta lasi. Iuda taudia edia kara be inai: Tau ta ese sibona eiava ena ruma bese tauna ta ia henia diba igui hesiai gaukarana karaia totona, unai amo edia abitorehai idia henia lou diba. (Levitiko 25:39, 40) The International Standard Bible Encyclopedia bukana ese idau negai Roma ena sivarai ia gwauraia, ia gwau: “Badina idauidau dainai taunimanima momo herea be sibodia idia hoia lao igui hesiai gaukara idia karaia totona. Unai badina badadia haida be inai: Igui hesiai lasi taudia edia mauri be ia auka bona idia ogogami dainai, idia ura lasi unai bamona idia noho, to idia ura mauri namona bona noho namona idia abia; idia ura gaukara namodia idia abia; bona idia ura taunimanima idia lalo-namo henidia. . . . Roma lasi taudia momo herea be sibodia idia henia Roma korikori taudia edia igui hesiai gaukara idia karaia totona, badina idia diba, Roma ena taravatu hegeregerena, edia igui hesiai amo idia ruhaia neganai, idia be Roma korikori taudia do idia gwauraidia.”
To, hekwakwanai ta ia vara Filemona ena igui hesiai tauna ta, ladana Onesimo, be ia dekena amo ia heau boio bona Roma dekenai ia lao neganai, ia heau lao totona reana Filemona dekena amo moni ia henaoa danu. (Siri 18) Roma dekenai aposetolo Paulo be dibura rumana dekenai ia noho neganai, Onesimo be unuseniai ia davaria.
Gunaguna, unai igui hesiai tauna ena gaukara be “namo lasi momokani” bona ia heau boio, to gabeai ia be Keristen tauna ai ia lao. Aposetolo Paulo be dibura rumanai ia noho neganai Onesimo ese sibona ia henia Paulo ena ura ia karaia totona, bona ia totona hesiai gaukara namodia momo ia karaia. Unai dainai, Onesimo be Paulo ena “kudouna . . . lalonai ia noho” bona ia be Paulo ena “varavara ta” be hoa gauna ta lasi!—Siri 11, 12, 16.
Aposetolo Paulo ia ura Onesimo be ia danu do ia noho. To taravatu hegeregerena, Filemona be Onesimo ena biaguna. Unai dainai, Onesimo be ena biaguna dekenai do ia giroa lou be maoro. To, ia giroa lou neganai Filemona be edena bamona do ia kara henia? Mai ena badu ida bona mai ena maoro dainai panisia aukana do ia henia, a? Onesimo ese ia hadibaia ia be ena Keristen tadikakana ta neganai, Filemona be ena hereva do ia abia dae, a?
Lalokau amo Hekwakwanai Idia Hamaoromaoroa
Paulo ese Filemona dekenai Onesimo ena kara sivaraina ia tore. Vaia ena kara hegeregerena, iena seketere ia gaukaralaia, to unai revareva ia torea neganai be ia sibona ena imana amo ia torea. (Siri 19) Namona be nega sisina oi atoa Filemona bukana kwadogina ena siri ibounai oi duahia totona. Do oi itaia, Paulo ese ena ladana ia torea bona Filemona mai ena ruma bese taudia iboudiai dekenai “hariharibada bona maino” herevana ia torea murinai, Filemona ia hanamoa badina ia ese ‘Dirava ena helaga taudia ia lalokau henia, bona ia ese Lohiabada Iesu ia abidadama henia’ dainai.—Siri 1-7.
Paulo be aposetolo tauna dainai, iena siahu ia gaukaralaia diba ‘Filemona do ia oda henia dala maorona do ia badinaia totona,’ to Paulo be unai bamona ia karaia lasi bona ia be ‘lalokau dainai ia noia sibona.’ Paulo ia hahedinaraia Onesimo be edia Keristen tadikakana ta ai ia lao, bona Onesimo ese ia durua bada ena sivarai ia gwauraia hedinarai goevagoeva. Unai aposetolo tauna ia gwau: “Lauegu ura korikori be [Onesimo] do lau dogoatao, vadaeni dibura rumai Sivarai Namona dainai lau noho neganai ia ese lau do ia durua noho. Unai dekena amo ia ese oiemu gabu do ia abia bamona, lau durua totona.” Paulo ma ia gwau, “To bema oiemu gwau maoro lau abia guna lasi neganai, ia do lau dogoatao lasi. Lau ura lasi oi do lau oda henia. Lasi momokani. Lau ura be oiemu ura dainai inai kara namona do oi karaia.”—Siri 8-14.
Unai hereva amo aposetolo tauna ese Filemona ia hagoadaia ena igui hesiai tauna gunana do ia abia dae lou ia be ena tadikakana ta dainai. Paulo ia torea, ia gwau: “Onesimo do oi abia dae lau do oi abia dae hegeregerena.” Ita gwau lasi Onesimo be igui hesiai amo do ia ruhaia. Paulo be ia doria lasi unai nega lalonai idia karaia karana ia haidaua totona. (Efeso 6:9; Kolose 4:1; 1 Timoteo 6:2 itaia danu.) To, Keristen ena kara ese igui hesiai tauna, Onesimo, bona biaguna tauna, Filemona, ia hatamonaia dainai, namo dalanai do idia kara heheni. Filemona be Onesimo do ia laloa “hesiai mai guia danu tauna bamona lasi. To . . . ia be varavara ta, [ena] lalokau tauna” bamona ia laloa.—Siri 15-17.
To, reana Onesimo be ena biaguna amo ia henao, unai davana ia henia lou karana be edena bamona? Paulo ese Filemona ia tura henia dainai, ma ia noia, ia gwau: “Bema gunaguna Onesimo ese oi ia hadikaia o oi dekena amo ia abitorehai neganai, iena abitorehai be lauegu ladana dekenai do oi atoa.” Paulo ia diba Filemona be Onesimo ena kerere do ia gwauatao, bona Paulo ena noinoi do ia kamonai henia sibona lasi, to kara ma haida do ia karaia danu. Paulo ia laloa kahirakahira dibura dekena amo ia do idia ruhaia, unai dainai, Filemona ia hamaoroa daudau lasi do ia mai iena ruma dekenai do ia mahuta totona. Vadaeni, hanamoa herevadia haida ia torea bona Filemona dekenai ia gwau, “Lohiabada Iesu Keriso ena hariharibada umui ibounai dekenai do ia noho” ia torea murinai, Paulo ese ena revareva ia hadokoa.—Siri 18-25.
Sisiba Keristen Taudia Totona
Filemona buka dekenai sisiba hereva momo idia noho hari inai negai Keristen taudia totona. Gau ta be inai, ita ia hadibaia ena be emu bamona abidadama tauna ta be oi ia kara dika henia, to namona be ena kara kerere oi gwauatao. Iesu Keriso ia gwau: “Bema taunimanima edia dika umui gwauatao neganai, emui Tamana guba dekenai ia noho ese emui dika danu do ia gwauatao.”—Mataio 6:14.
Keristen kongregesen lalonai dagi idia abia taudia ese Filemona bukana amo heduru bada idia abia diba. Namo gauna ta be inai, Paulo ese iena aposetolo dagina ia gaukaralaia lasi, Filemona ia oda henia ia ese dala maorona ia badinaia totona. Danu, Paulo ia gwau lasi namona be Onesimo be Roma dekenai ia noho iena hesiai gaukara ia karaia totona. Paulo ese taunimanima edia siahu edia kohu dekenai ia matauraidia. Danu, ia diba bema ia oda henia kara ta do ia karaia totona, reana unai oda do ia badinaia, to ia diba dala namona be Filemona be ena kudouna amo kara namona do ia karaia. Lalokau dekena amo ia noia iena kudouna amo dala maorona do ia badinaia totona.
Hari inai nega lalonai, namo lasi Keristen elda taudia ese edia dagi idia gaukaralaia kerere eiava mamoe orea taudia be hereva auka eiava oda hereva amo idia hereva henidia bona ‘lohia bamona edia orea do idia gunalaia lasi.’ (1 Petero 5:1-3) Iesu ia gwau: “Umui diba lohia taudia be mai siahu danu edia taunimanima idia biagua karaia bona gunalaia taudia be do idia lohia edia taunimanima dekenai. To umui be unai bamona umui laloa lasi.” (Mataio 20:25, 26) Kongregesen naria taudia idia davaria mamoe seri taudia be mai lalokau danu idia noidia neganai edia kamonai karana be ia bada, to idia oda henidia neganai edia kamonai karana be ia bada lasi. Lalo-metau taudia idia moale bema naria taudia be nega idia henia mai hebogahisi danu edia hekwakwanai sivaraina idia kamonai henia totona bona mai lalo-parara danu sisiba idia henia neganai.
Paulo ena revareva ese elda taudia ia hadibaia namona be taunimanima edia kara dainai idia hanamodia bona aonega dalanai idia hereva henidia ena namo ia hahedinaraia. Iena hereva ginigunana lalonai ia gwau Filemona ese ‘Keristen taudia ibounai ia lalokau henia bada dainai idia edia lalona ia hagoadaia noho.’ (Siri 7) Paulo be ena kudouna amo unai hahenamo herevana ia henia dainai, reana Filemona ena lalona ia hamoalea. Unai hegeregerena, hari inai nega lalonai, sisiba eiava heduru hereva idia henia neganai, namona be idia dekenai hahenamo hereva namodia idia henia. Bona namo lasi unai sisiba be hereva auka eiava aonega lasi dalanai idia henia, to “mai laloa namona bona mai gado namo” amo idia henia, unai neganai taunimanima dekenai sisiba ena mamina do ia namo.—Kolose 4:6.
Aposetolo Paulo ia diba Filemona be dala maorona do ia badinaia, badina ia gwau: “Lau diba momokani, oi ese lauegu noinoi do oi kamonai henia. Unai dainai inai revareva oi dekenai lau torea inai. Lau diba lauegu noinoi gaudia do oi karaia, to do oi hanaia danu.” (Siri 21) Elda taudia e, emui Keristen tadikakadia be unai bamona umui lalodia, a? Unai ese idia ia durudia dala maorona idia ura badinaia totona, ani?
Danu, nega momo tama sina taudia idia davaria edia natudia idia hanamodia neganai idia ura edia hereva idia badinaia. Tama sina idia diba natudia be mai edia ura danu idia kamonai—anina be, edia tama sina edia hereva idia badinaia kava sibona lasi, to idia ura ma kara namo haida danu idia karaia be namo, unai dainai edia natudia idia hemataurai henidia diba. Tama sina taudia be edia natudia dekenai taravatu idia henia eiava idia hereva henidia neganai gau ta do idia karaia totona, bema mai dalana, namona be mai edia hebogahisi bona mai edia lalokau danu idia hereva henidia. Namona be natudia edia lalona ena mamina idia diba, bona edia hereva ena badina idia dekenai idia hahedinaraia goevagoeva. Natudia edia kara idia namo neganai, edia tama sina ese idia hanamodia be namo bona namona be edia kara maragimaragi ibounai idia maumauraia lasi; taunimanima vairanai unai idia karaia be dika herea.
Unai lalohadai hegeregerena, namona be headava tatau be laloa namonamo bona hebogahisi karadia idia hahedinaraia, bona idia hegaegae noho edia adavadia idia hanamoa totona. Unai neganai edia tau ena kwarana siahu henunai idia ura noho bona edia hemami be ia namo bona idia moale!—Hereva Lada-isidia 31:28; Efeso 5:28.
Ita diba lasi Paulo ena revareva ia davaria neganai, Filemona ena lalohadai be dahaka. Ena be ita diba maoro lasi, to Paulo ia laloa ia ese dala maorona do ia badinaia, bona reana unai bamona ia karaia. Unai hegeregerena, namona be hari inai nega lalonai, Keristen elda taudia, tama sina, bona headava tatau iboudiai be edia gaukara dekenai do idia kwalimu, to doria karana amo, oda hereva amo, eiava hereva aukadia amo lasi, to ‘lalokau amo sisiba oi henia.’
[Picture on page 23]
Paulo be aposetolo tauna dainai iena siahu ia gaukaralaia diba, to unai bamona ia karaia lasi to lalokau dainai Filemona ia sisiba henia