Sivarai Gwauhamata Tanona Amo

Sinai ai Ia ese Israel Taudia Ia Naria

MANI oi laloa​—tatau, hahine bona natudia milion momo be “unai tano gagaena badana bona gari bada gabuna” idia lao henia noho, bona unai tano gagaena dekenai be “gaigai dikadia bona doadoa (scorpion) idia noho gabuna, bona tano be ia kaukau momokani bona ranu be lasi”!

Unai hereva iboudiai be Dirava ena hereva Deuteronomi 8:15 dekenai, bona idia hahedinaraia Israel taudia be Aigupito idia rakatania neganai, idia be unai tano gagaena dekenai idia raka lao Sinai ena gabu dekenai bona reana unai be laolao mai hekwarahina bamona idia dekenai. Hekwakwanai badana ta ia noho: Daika ese aniani bona ranu do ia henidia.

Israel taudia be Nile sinavai gabuna dekenai idia noho neganai, idia be hesiai taudia, to gau ta dekenai idia dabu lasi. Idau negai mase kohua edia haba haida dekenai grapes idauidau, meleni idauidau, bona ma aniani idauidau momo, gwarume bona kokoroku danu, edia laulau idia torea, unai ese ia hahedinaraia Israel taudia be aniani idauidau idia ania. Unai dainai, tano gagaena dekenai edia maumau herevana be Bible ese ia hahedinaraia maoro, idia gwau: “Daika ese vamu do ia henia ita ania totona, a? Ai laloatao Aigupito dekenai gwarume ai ania davana lasi, bona cucumber, meleni, leek, onion bona garlic momo ai ania!”​—Numera 11:​4, 5; 20:5.

Israel taudia ese Davara Kakakakana idia hanaia murinai, idia ese Sinai ena gabu toana idia dibaia namonamo. Taunimanima idia lao edia kohu idauidau idia hoihoilaia dalana dekenai idia lao lasi, unai be mirigini kahana dekenai, to davara ai idia lao. Tano gagaena dekenai kilomita 80 bamona idia raka lao neganai idia ranu mase momokani. Idia davaridia ranudia be idia inua diba lasi badina ia idita bona reana gorere ia havaraia diba. Mai taitai danu idia gwau: “Dahaka dohore ai inua?” Dirava be edia hereva ia kamonai bona ranu ena mamina ia hanamoa.​—Esodo 15:​22-25.

Atai dekenai kamelo edia raka dalana mani oi itaia. Mani oi laloa, Israel taudia be edena bamona tano gagaena idia hanaia bona Sinai Ororona dekenai idia lao diba. Edena bamona idia ese ranu​—bona aniani—​idia abia diba bona edia mamoe bona boromakau edena bamona do idia hamauridia?​—Esodo 12:38.

Diho kahana ai idia lao bona nega sisina murinai, gabu ladana Elima dekenai ranu namona bona aniani idia davaria. (Esodo 15:27) To, unai be idia lao henia noho gabuna lasi. Idia be “Dirava [momokanina] ena ororo,” Sinai Ororona idia lao henia noho. (Esodo 3:1; 18:5; 19:2; 24:​12-18) Ena daudau be kilomita 120 bamona​—unai be tano dikana bona siahu masemase tanona dekenai do idia raka lao.

Unai taunimanima hutuma bada be Sinai Ororona idia raka henia kahirakahira noho neganai, tano namona badana ta dekenai idia ginidae, unai gabu ladana be Feiran. Unai gabu ena kahana sisina be rau kahana dekenai ia hedinarai.a Ia be tano gagaena ia hanaia dalana ai ia lao, ia be Davara Kakakakana (Gulf of Suez) dekenai ia lao. Unuseniai laga-ani namona idia davaria!

Ena be Sinai ena tano gagaena “be badana bona gari bada gabuna,” to Feiran ena au momo bona ranu gabuna dekenai, Israel taudia be niu audia bona ma au haida edia ikerukeru idia moalelaia. Unuseniai idia ese mamina namo au huahua (dates) idia abia idia anidia totona, bona haida idia abia diba gabeai idia ania totona.

Unai ibounai be idia vara diba badina Feiran ena gabu dekenai ranu be tano amo ia lohilohidae. Mani oi laloa bema oi be tano gagaena dekenai oi raka lao noho, bena ranu namona oi davaria, oiemu mamina be edena bamona! Unai ese ia hahedinaraia Sinai ena gabu haida dekenai ranu idia davaria diba. Nega haida ranu guri idia geia neganai ena dobu be bada herea momokani. Unai amo baketi eiava uro amo ranu idia abia daekau, bona edia mamoe bona boromakau idia henidia. Hari inai nega lalonai, Sinai dekenai idia noho Bedouin taudia be ranu guri dekenai idia lao ranu idia utua idia bona edia kamelo totona.​—Genese 24:​11-20; 26:​18-22 itaia danu.

Oibe, ena be nega haida idia maumau edia dabu gaudia dekenai, to Iehova ese Israel taudia dekenai ranu bona aniani ia henidia. Nega haida Dirava ese hoa dalanai unai gaudia ia henidia. (Esodo 16:​11-18, 31; 17:​2-6) Ma nega haida ia ese ia naridia ela bona edia “lagani-ani gabudia” idia davaria bona unuseniai edia ura gaudia idia abia. (Numera 10:​33-36) Nega ibounai ia ese mai edia abidadama taudia edia Gwauhamata Tanona ia hegaegaelaia, unuseniai gau namodia momo idia abia diba.​—Deuteronomi 11:​10-15.

[Footnotes]

[Picture Credit Line on page 24]

Pictorial Archive (Near Eastern History) Est.

[Picture Credit Line on page 24]

Pictorial Archive (Near Eastern History) Est.

[Picture Credit Line on page 24, 25]

Pictorial Archive (Near Eastern History) Est.

[Picture Credit Line on page 25]

Pictorial Archive (Near Eastern History) Est.