Sivarai Gwauhamata Tanona Amo

Sinai—Mose ena Ororo

SINAI Ororona oi laloa neganai, reana Mose danu oi laloa, badina be Mose ese Dirava ena taravatu ia abia, Sinai tanona ena ororo ta ai. Reana unai be atai laulauna ai ia hedinarai ororona.a

Sinai tanona ena diho kahanai, Davara Kakakakana ia aru parara gabunai, be ororo nesena ta mai ena dorina rua. Unai gabu ena toana be Baibel ese Mose ena sivarai lalonai ia gwauraia gabuna ena toana hegeregerena. Ororo dorina ta ena ladana be Jebel Musa, anina be “Mose ena Ororo.”

Nega ta Mose ese Ietero ena mamoe ia naridia neganai, Iehova ena aneru ese ia hahedinarai henia, lahi hururuhururuna ai, lahi be au ginigini ai. Baibel ia gwau unai ia vara “Dirava ena ororo ena ladana Horeb” ai, ena ladana ma ta be Sinai Ororona. (Esodo 3:​1-10; 1 Hanua Pavapavadia 19:8) Mose ese Dirava ena bese taudia Aigupito amo ia hakaudia lao unuseni. Esodo 19:​2, 3 ia gwau: “Israela taudia idia kampa ororo ena vairana dekenai. Mose ese ororo dekenai ia daekau Dirava hedavari totona. Iehova ese ororo dekena amo Mose dekenai ia boiboi.”

Mose be Sinai Ororona ai ia daekau negana ginigunana be unai. Baibel ia gwau: “Iehova be ia diho, Sinai ororo ena dorina dekenai. Iehova ese Mose dekenai ia boiboi, ororo dorina dekenai do ia daekau mai totona. Vadaeni Mose ia daekau.”​—Esodo 19:20.

Hari inai negai laolao taudia momo be hanuaboi ai idia daekau unai ororo dorina ai, idia naria dina ia daekau toana itaia totona, bena dabai idia diho. To Dirava ese Mose ia hamaoroa, ia gwau: “Lau dekenai oi daekau mai ororo dekenai, lau dekenai oi naria. Lau be nadi palaka oi dekenai do lau henia. Inai nadi latanai taravatu . . . lau torea vadaeni.” Unai neganai Mose be “dina 40 bona hanuaboi 40 edia lalonai unuseni ia noho.”​—Esodo 24:​12-18.

Hari ororo be “hebogahisi ororona” ita gwauraia danu be maoro, badina be Mose be unuseniai ia noho neganai, taora ai idia noho taudia idia kara kava. (Reana unai be laulau ai ia hedinarai taorona ladana er-Raha ai ia vara.) Mose ena kakana Aaron idia doria dainai, ia gwau: “Golo gaudia . . . edia taiadia amo umui kokidia oho, lau umui henia.” Bena golo amo boromakau laulauna ta ia karaia, tomadiho gauna. Dirava korikorina idia habadua dainai, daha daha ia hamasedia. (Esodo 32:​1-35) To dahaka dainai ia ese Aaron ia bogaia hisi, ia hamasea lasi?

Dirava ena hereva Esodo 32:10 ai ese ia hahedinaraia ia laloa lasi Aaron be unai kerere havaraia tauna. Mose ia hereva neganai, “Levi ena natuna iboudiai,” Aaron danu, be Dirava ena kahanai idia gini. (Esodo 32:26) Ena be Aaron be mai ena kerere, to Dirava ese ia bogaia hisi, Sinai Ororona badi-tanona ai.

Gabeai, Mose ia gwau ia ura Iehova ena dala do ia diba namonamo bona Iena hairai do ia itaia. (Esodo 33:​13, 18) Ena be dala be lasi Mose ese Dirava ena vairana do ia itaia, to Iehova ese ena hairai sisina ia hahedinaraia, bona ia gwau “do ia bogaia hisi gwauraia tauna be do ia bogaia hisi.” (Esodo 33:​17–34:7) Dirava ese ena hebogahisi ia gwauraia be namo, badina be nega momo Baibel ia gwau Dirava ese Israel taudia, Sinai ai ia gwauhamata henidia taudia, ia bogadia hisi.​—Salamo 103:​7-13, 18.

Hari inai negai, Sinai Ororona badi-tanona ai tomadiho rumana ta ia gini, to unai ruma ese tomadiho momokanina, unai ororo ai Mose ese ia dibaia tomadihona, ena toana ia hahedinaraia lasi. Unai ruma ai idia tomadiho taudia ese kaivakuku bona laulau idia lalodia bada. Lauri kahanai be edia laulau ta; ena ladana be “Paradaiso Ia Lao Henia Vadavadana.” Mani oi itaia, laulau ai demoni ese haroro taudia haida idia veridia diho hel ena lahi lalonai, hisihisi do idia ania hanaihanai totona. To Baibel ena hereva be unai bamona lasi!​—Kohelete 9:​5, 10; Ieremia 7:31.

Siahu Ibounai Diravana be ‘hebogahisi bona hariharibada Diravana; ia badu haraga lasi, ena hebogahisi bona ena kara momokani be bada herea.’ (Esodo 34:6) Sinai Ororona ai Mose be hari hebogahisi Diravana dekenai ia raka kahirakahira lao.

[Footnotes]

[Picture Credit Line on page 8]

Pictorial Archive (Near Eastern History) Est.

[Picture Credit Line on page 9]

Pictorial Archive (Near Eastern History) Est.

[Picture Credit Line on page 9]

Pictorial Archive (Near Eastern History) Est.