Basileia Haroro Ripoti
Sivarai Namona Eastern Europe Amo
EASTERN Europe dekenai haroro gaukara dekenai moale gaudia momo idia vara noho. Moale bada gauna ta be Zagreb dekenai, intenesenel hebouhebou idia abia, August 16-18, lagani 1991 lalonai; Witness taudia 7,300 ese bese idauidau 15 amo idia mai tadikaka idia hanamodia bada. Idia hebou taudia iboudiai be 14,684. Unai gabu dekenai hekwakwanai momo idia vara, to unai hebouhebou dekenai lalokau bona lalo-tamona idia hahedinaraia bada!
Eastern Europe dekenai Witness taudia idia bisi bada herea Iehova ena Basileia ena sivarai namona be ma haida dekenai idia harorolaia noho totona, badina idia diba ia sibona ese maino momokani do ia havaraia. Gabu haida dekenai tadikaka idia davaria ia auka momokani idia be tanobada ena lalohadai amo idia gini siri totona. To, nega momo taunimanima idia kamonai, bona Witness taudia ese ekspiriens namodia momo idia ripotilaidia.
Taoni ta dekenai, ena mauri lagani be 16 kekenina ta be unai taoni ena Iehova ena Witness tamona amo sivarai namona ia kamonai. Unai amo Bible stadi idia hamatamaia, bena unai kekeni ena ura hereva momokani totona ia bada ia lao. Gau namodia ia dibaia murinai, ia ura dikadika ma haida ia hamaorodia, ena sikuli turadia ia haroro henidia, to idia ura lasi kamonai bona idia hevaseha henia. Ena sikuli turana ta ese ia ura henia lasi momokani, to ia hoa bada badina ena be idia hereva dika henia to unai Bible stadi kekeni matamata ia badu diba lasi. Gabeai, Bible stadi ia abia kekenina ese ena sikuli turana ia haroro henia namonamo bena ia lalo-parara ena kara be maoro lasi. Vadaeni, Bible stadi ia dekenai idia hamatamaia, bena ena be edia tama sina ese idia badu henidia, edia tisa bona sikuli turadia danu, to idia ruaosi ese ma haida idia haroro henidia.
Edia haroro gaukara dainai edia sikuli turana ma ta ese hereva momokani ia abia dae. Vadaeni, hari idia ibounai be toi sikuli rumana dekenai, bona idia toi idia ura bada ma haida idia durudia, bona idia toi huanai lalokau bada idia hahedinaraia. Vadaeni, ma kekeni ta ese ia bamodia.
Gabeai, idia hani be sikuli dekenai, helai gabuna ta dekenai idia helai hebou bona Bible idia kikilaia hebou. Haida idia hoa badina edia namba ia bada ia lao. Kekeni ta, edia kalasi lalonai, be edia kara namodia ia itaia dainai Bible stadi lalonai ia vareai danu. Idia ima ese ma haida idia boiridia, edia sikuli turadia bona tisa taudia danu, idia ida idia hebou totona. To unai kekeni be edia tama sina amo hekwakwanai momo idia davaria. Edia tama sina ese edia Bible bona buka idia gabudia bona idia kara dika henidia edia Bible stadi karana idia hadokoa totona.
Vadaeni, hereva momokani ia ura henia kekeni matamata tamona ena haroro gaukara amo dahaka ia vara? Idia amo kekeni ta be lagani 1990 ena distrik hebouhebou dekenai ia bapatiso, bona idia hani be 1991 ena sekit hebouhebou dekenai idia bapatiso. Unai be moale bada ia havaraia momokani! Hari unai kekeni ima ibounai be regular pioneer gaukara idia karaia noho! Unai kara ia vara ena taoni dekenai, hari pablisa ibounai be 11, idia amo 8 be pioneer taudia.
Iehova ese ena Witness taudia Eastern Europe dekenai ia naridia bona ia hanamodia noho. Momokani, ita itaia diba unai tanobada ena kahana dekenai kudou-maoro taudia huanai hereva momokani do ia tubu daekau noho.