Uiti Ena Anina Gogoa Neganai Lau Heduru

WINIFRED REMMIE ESE SIVARAI IA GWAURAIA

“UITI ena anina abia negana ia ginidae vadaeni, to utua taudia be momo lasi.” Unai hereva be iseda Lohiabada Iesu ese ia gwauraia badina taunimanima hutuma ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, idia naria lasi mamoedia bamona. Lau danu unai bamona lau mamia, bona lagani 40 idia lao vadaeni lalonai, lau ese uma Biaguna ena hereva lau kamonai uiti lau gogoa totona.​—Mataio 9:​36, 37.

Lau be West Africa dekenai lau vara bona lauegu kakadia bona tadidia ibounai be 7, ai ibounai be kekeni sibona. Aiemai tamana bona sinana be manau taudia to taravatu idia atoa; danu idia be dubu idia lao momo taudia. Pura ta ta iboudiai dekenai dubu dekenai bona Sunday sikuli dekenai ai lao sibona; ai lao o lasi ai hepapahuahulaia diba lasi. Lau dekenai unai be hekwakwanai ta lasi badina lauma gaudia lau ura bada dainai. Lauegu mauri lagani be 12 neganai, lau idia abia hidi Sunday sikuli ena klas lau hakaua totona.

Headava bona Gabu Idauidau Dekenai Ai Lao

Lagani 1941 lalonai, lauegu mauri lagani be 23 neganai, Lichfield Remmie lau adavaia, ia be akaun gaukara ia karaia gavamani opesi dekenai. Aiemai kohu bona moni be momo, to gabu idauidau dekenai ai ura ai lao kohu ai habadaia totona, unai dainai lagani 1944 lalonai, Liberia dekenai ai lao. Lagani 1950 lalonai, Iehova ena Witness misinari tauna ta, Hoyle Ervin, ese ai ia hedavari henia neganai lauegu adavana ena mauri bona lauegu mauri ia haidaua. Pura toi ai stadi murinai, lauegu adavana be haroro gaukara ia karaia.

Lauegu adavana be dubu lao henia karana ia hadokoa neganai lau lalohisihisi. Ia be Protestan abidadama tauna namona ta, danu dina 40 Ista vairanai anivaga karana ia karaia. Nega ginigunana ia lao haroro totona bona ena imana dekenai baege ia dogoatao neganai, lau itaia bona lau badu dikadika momokani. Lau gwau: “Dahaka ia vara oi dekenai? Oi be lada bada tauna bona unai kavakava taudia danu oi lao haroro!” Badu dalanai lau hereva henia neganai, mai manau danu ia noho sibona.

Unai dina murinai, Tadikaka Ervin ia mai aiemai ruma dekenai Lichfield ia stadi henia totona. Stadi idia karaia neganai, nega hanaihanai lau karaia bamona lau gini oho. Reana unai bamona lau karaia dainai Tadikaka Ervin ese lau ia henanadai henia, ia gwau sedira lau be duahiduahi bona toretore lau diba lasi. Lau badu badina duahiduahi bona toretore lau diba. Unai be lau ia hahemaraia henanadaina! Lauegu aonega ia dekenai do lau hahedinaraia! Unai tomadiho koikoi do lau hahedinaraia!

Hereva Momokani Lau Abia Dae

Nega sisina murinai aiemai ruma ena pata latanai Let God Be True bukana lau itaia. Lauegu lalona dekenai lau gwau: ‘Unai buka ena hereva kwarana be kavakava momokani. Dirava be hanaihanai ia momokani, ani?’ Unai buka ena rau haida lau itaia noho lalonai, haraga herea maumau herevana ena badina ma ta lau davaria. Unai hereva ia gwau, taunimanima be mai edia souli lasi, idia be souli! Sisia bona pusikasi danu be souli! Unai ese lau ia habadua momokani. Lauegu lalona dekenai lau gwau: ‘Unai be hahediba hereva kavakavana momokani!’

Lauegu adavana ruma dekenai ia ginidae neganai, mai badu danu lau hereva henia, lau gwau: “Unai koikoi taudia idia gwau, taunimanima be mai edia souli lasi. Idia be peroveta koikoi taudia!” Lauegu adavana be lau danu ia heai lasi; to mai manau danu ia haere, ia gwau: “Winnie, hereva iboudiai be Bible lalonai.” Gabeai, Tadikaka Ervin be mai ena haheauka ida lauegu Bible amo lau dekenai ia hahedinaraia, ita be souli bona iseda souli be ia mase diba, lau hoa bada momokani. (Esekiel 18:4) Lauegu lalona ia kehoa momokani gauna be unai siri Genese 2:​7 dekenai, ia gwau: “Taunimanima [Adam] be mauri tauna [souli] ia karaia vadaeni.”

Lau kerere bada momokani! Dubu gunalaia taudia ese lau idia koia bada momokani dainai, dubu dekenai lau giroa lasi. To, Iehova ena Witness taudia edia Keristen heboudia dekenai lau lao. Edia lalokau karana lau itaia neganai, lau hoa bada momokani! Unai be tomadiho momokani.

Uiti Gogoa Cape Palmas Dekenai

Hua toi bamona murinai, lauegu adavana be mai ena dala iena gaukara kampani dekena amo moni bada ia henaoa diba​—to ia henaoa lasi. Iena gaukara turadia ese hevaseha dalanai idia hereva henia, idia gwau: “Remmie, mai ogogami danu do oi mase.”

To, iena kara momokani dainai, iena gaukara biaguna ese gaukara badana ia henia bona idia siaia lao Cape Palmas dekenai, unuseniai opesi matamata ta do ia kehoa totona. Unuseniai ai haroro goadagoada, bona hua rua sibona murinai, grup maragina ta ai karaia bona idia ibounai be Bible ena hereva idia ura bada momokani. Gabeai, Lichfield be unai gabu ena taoni badana, Monrovia dekenai ia lao neganai, opesi matamatana ena kohu haida ia hoia totona, bapatiso ia abia. Ia ese Society ia noia haida do idia siaia lao Cape Palmas dekenai, hereva momokani idia ura kamonai henia taudia do idia naridia totona.

Society ese unai noia hereva idia kamonai bona idia ese Tadikaka bona Taihu Faust idia siaia lao Cape Palmas dekenai. Taihu Faust be lau ia durua bada momokani, bona lagani 1951 ai, December lalonai, Iehova dekenai lau gwauhamata bona lau bapatiso. Hari lauegu lalona lau hadaia ‘huahua lau haboua mauri hanaihanai totona.’ (Ioane 4:​35, 36) April, 1952 lalonai, pioneer gaukara lau karaia bona hanaihanai haroro gaukara lau karaia.

Iehova be haraga herea lauegu hekwarahi dainai hahenamo ia henia; lagani tamona lalonai, taunimanima ima lau durudia bona idia ese edia mauri idia gwauhamatalaia Iehova dekenai bona idia bapatiso. Idia ta be Louissa Macintosh, ia be unai negai Liberia ena presiden W. V. S. Tubman ena varavara hahine ta. Ia bapatiso bona hanaihanai haroro gaukara ia karaia, bona Dirava dekenai ia abidadama noho ela bona lagani 1984 lalonai ia mase. Nega haida lalonai ia ese unai presiden ia haroro henia danu.

Lower Buchanan Dekenai Ai Lao

Lagani 1957 lalonai, distrik naria tauna ena vadivadi neganai, lauegu adavana bona lau be idia boiria special pioneer gaukara do ai karaia totona. Ai herevaherevalaia bona gurigurilaia murinai, unai gaukara ai abia dae. Lichfield be hua haida lalonai ena moni gaukara Cape Palmas dekenai ia hadokoa, unai dainai lau lao guna Lower Buchanan dekenai, guna unuseniai idia haroro lasi bona haroro gaukara lau hamatamaia.

Unuseniai lau ginidae neganai, Maclean ruma besena edia ruma dekenai lau noho. Unai dina murinai, vaia hanua ena kastom hegeregerena, lau idia abia lao Pele iduhu ena lohia tauna ta dekenai. Lohia tauna bona ena ruma bese ese mai moale ida lau idia abia dae, bona iena ruma dekenai taunimanima haida lau haroro henidia. Unai dina dekenai lau hereva henidia taudia 6 bona ma haida be gabeai Iehova ena Witness taudia ai idia lao, unai lohia tauna bona ena adavana danu be Witness taudia ai idia lao.

Daudau lasi murinai lau ese Gima Kohorona stadi lau hakaua taunimanima 20 mai kahana ida. Iehova dekenai lau tabekau momokani, bona ia ese goada bona aonega lau dekenai ia henia iena mamoe taudia lau durudia totona. Lau hesiku eiava lauegu lalona ia metau neganai, guna abidadama taudia lau lalodia, hahine haida hegeregere, Debora bona Hulda, idia be gari lasi ida Iehova ena taravatu gaukara idauidau idia karaia noho.​—Hahemaoro Taudia 4:​4-7, 14-16; 2 Hanua Pavapavadia 22:​14-20.

March, 1958 lalonai, hua toi sibona Lower Buchanan ai lau noho sisina murinai, revareva ta lau abia bona sekit naria tauna John Charuk ena vadivadi negana lau idia hadibaia. Taunimanima momo idia hebou diba daiutuna ta ruma henunai lau rentaia. Bena Upper Buchanan dekenai lau lao Tadikaka Charuk lau hedavari henia totona, to ia ginidae lasi. Lau naria ela bona dibura neganai, bena mai hesiku danu Lower Buchanan dekenai lau giroa lao.

Hanuaboi maloki momokani lalonai, iduara dekenai pidipidi regena lau kamonai. Iduara lau kehoa neganai, sekit naria tauna bona lauegu adavana danu lau itaia, ia bona Tadikaka Charuk be nega tamona idia ginidae bona lau hoa. Edena bamona lau idia davaria? Idia ese labana tauna ta idia davaria bona idia henanadai henia bema taunimanima dekenai Iehova ia harorolaia hahinena ta ia diba. Ia haere, ia gwau, “oibe,” bona lau noho gabuna ia hadibadia. Lau moale bada herea badina hua toi sibona lalonai lauegu diari be Lower Buchanan dekenai ia bada herea momokani!​—Mataio 5:​14-16.

Tadikaka Charuk ena vadivadi lalonai taunimanima 40 idia hebouhebou ai moalelaia. Nega daudau lasi murinai kongregesen goadana ta ia vara, bona ai ese Kingdom Hall namo hereana ta ai haginia. To, mauri ena hekwakwanai haida idia noho. Hegeregere lagani 1963 lalonai, Kolahun dekenai, tomadiho dagedage henia karana ia vara, polisi taudia ese lauegu adavana idia abia lao bona dibura ruma dekenai idia atoa. Lauegu adavana idia botaia bada dainai, hospital dekenai idia abia lao.

Hospital dekena amo ia raka lasi bona nega daudau lasi murinai, unai lagani lalonai, hebouhebou badana Gbarnga dekenai ai abia. Hebouhebou ena dina dokona dekenai, ami taudia idia vareai, ai ibounai idia haboua bona ai idia oda henia pepe do ai saluti henia. Edia hereva ai kamonai lasi neganai, ai idia oda henia aiemai imana be atai dekenai do ai abia isi bona maoromaoro guba dekenai dina do ai raraia. Edia ipidi badadia amo ai haida idia botaia. Dirava dekenai lau abidadama noho totona, Basileia anedia lau anelaia hegeregere, “Umui Gari Henidia Lasi!” Unai murinai ami taudia ese mai bonana bada bona miro bada dibura rumana dekenai ai idia taoa vareai. Dina toi murinai, idau tano haida amo idia mai Witness taudia be dibura rumana amo idia hakaudia lasi, gavamani ese unai gabu amo lau bona Lichfield idia lulua lao Sierra Leone dekenai. Unai gabu idia noho Witness taudia be unai dina murinai idia ruhaia.

Hahenamo Momo Ma Haida

Sierra Leone ena south kahana ai, ai idia hamaoroa Bo Kongregesen danu ai gaukara hebou. Lagani 8 aiemai hesiai gaukara unuseniai ai karaia murinai, ai idia siaia lao Njala dekenai. Njala dekenai ai noho neganai, lauegu adavana idia abia hidi nega haida sekit naria gaukara do ia karaia totona, bona unai hesiai gaukara dekenai ia danu lau gaukara hebou. Bena, lagani 1970 ena ihuana lalonai ai idia siaia lao East Freetown Kongregesen dekenai.

Lau stadi henidia taudia momo lau itadia hereva momokani idia ura henia bada neganai, lau moale bada herea. Lauegu lauma natudia bona lauma tubudia be 60 mai kahana bona idia be lauegu “revareva” bamona. (2 Korinto 3:1) Idia haida be edia mauri idia haidaua bada, idia ta be Victoria Dyke, ia be Aladura tomadiho edia peroveta hahine ta. Ioane Ginigunana 5:​21 ia duahia bona ia laloa namonamo murinai, ia ese ia tomadiho henia bona ia matauraia bada kaivakuku idauidau ia negedia. Iehova dekenai ia gwauhamata bona bapatiso ia abia, daudau lasi murinai special pioneer gaukara ia karaia, ena varavara taudia momo ia durudia hereva momokani idia abia dae totona.

April, 1985 lalonai, lauegu adavana ia mase, aiemai headava laganidia ibounai 44 ia abia gwauraia neganai lau haboioa. To lau be sibona lau noho kava lasi. Lau ia Durua Tauna, Iehova, ena hesiai gaukara lau karaia noho, nega ibounai ena hesiai gaukara lau karaia. Lau durudia Iehova idia diba taudia be lau ura henidia bada momokani. Idia be hegeregere lauegu varavara taudia bamona. Lau lalokau henidia bona idia ese lau idia lalokau henia danu. Lau gorere neganai, haraga herea idia mai lau idia durua, bona idia lau durudia danu.

Lau daradara lasi, bema unai gaukara ibounai lau karaia lou, mai moale danu egu ilapa lau abia bona uiti gogoa gaukara dekenai do lau vareai, Iehova ida gaukara taudia ta bamona.

[Picture on page 23]

Winifred Remmie hari inai negai