Poland Dekenai “Kohu Namodia” Gogoa Gaukarana

POLAND idia gwauraia Katolik taudia momo gabuna. Gavamani ena ripoti ta ia gwau, taunimanima 100 100 amo 93 93 be Katolik Dubu taudia. To vanegai, gavamani be ia idau bona mauri ena dala ia idau dainai, taunimanima edia lalohadai ia haidaua bona edia tomadiho kara ia haidaua danu. Ripoti idia gwau, hari, taunimanima 100 100 amo 50 50 sibona idia gwau Katolik tomadiho idia badinaia.

May 1989 ai, Poland dekenai gavamani be gwaumaoro ia henia Iehova ena Witness taudia edia orea idia rejista totona. Unai nega amo ia mai hari, Basileia ena sivarai namona harorolaia pablisa taudia matamatadia be 11,000 bamona. Hari, edia Basileia pablisa taudia iboudiai be 106,000 ia hanaia, edia kongregesen iboudiai be 1,300 ia hanaia, bona lagani 1991 ai Keriso ena Memorial hebouna dekenai idia lao taudia edia namba be 200,422. Unai dainai, peroveta herevana ia guguru noho, ia gwau ‘bese ena kohu namodia’ do idia gogoa, bona unai bamona ia vara Poland dekenai. (Hagai 2:7) Vanegai, tanobada ibounai dekenai Iehova ena Witness taudia edia hebouhebou idia karaia neganai nius dekenai idia torea, Poland dekenai unai hebouhebou idia karaia danu. To namona be unai tano ena taoni haida edia sivarai do ita tahua, bena do ita diba gogoa gaukarana be edena bamona ia heau.

Pioneer Taudia ese Dala Idia Kehoa

Sztum be taoni ta bona ia lalonai taunimanima 10,000 bamona idia noho, bona Vistula Sinavai be Baltic Davara dekenai ia vareai gabuna kahirakahira dekenai unai taoni ia noho. Daudau herea lalonai unai taoni dekenai haroro gaukara karaia be ia auka momokani. Lagani 1987 ai unai gabu dekenai pablisa 8 sibona idia haroro. To, pioneer eiava nega ibounai Basileia harorolaia taudia idia mai gaukara neganai, unai kara ia idau. Hebou namba 5 be muvini piksa rumana dekenai idia karaia neganai, kamonai taudia 100 idia mai hebou totona! Lagani rua lalodiai idia gaukara bada murinai kongregesen ta idia haginia. Hari, edia pablisa taudia be 90 bona sibodia edia Kingdom Hall idia abia, bona hanaihanai hebou totona idia mai taudia be 150.

Ita diba hegeregerena, daudau lasi murinai Katolik Dubu dekena amo dagedage karana ia vara. Dubu ese “gaukara dagina” ia henia nun ta dekenai, bona ia ese Witness hadikaia herevadia ia harorolaia, ia gwau hahediba koikoi herevadia idia hadibaia. To nega momo ia vara bamona, ena hereva koikoi ese taunimanima edia lalona ia kehoa. Idia ura diba daika ena hereva be ia maoro. Idia momo be hereva momokani dekenai idia vareai bona hari regular pioneer gaukara idia karaia! Idia gwau: ‘Hereva momokani ai idia hadibaia noho neganai, ai laloa Witness taudia ai idia ura lao taudia iboudiai be edia hadibaia tauna bamona do idia karaia, anina be pioneer gaukara do idia karaia.’ Unai dainai kongregesen taudia ibounai be pioneer gaukara idia ura henia.

Unai dainai, unai taoni dekenai Bible stadi 180 idia karaia. Mauri Hanaihanai Paradaiso Lalonai bukana amo, haida idia hadibaia duahiduahi idia diba totona. Unai nega tamona lalonai, idia be hereva momokani idia hadibaia. Dibura taudia be dibura dekena amo idia mai neganai, dala idia daroa totona, hanaihanai idia dekenai Bible stadi be miniti 10 bamona lalonai idia karaia. Nega ta, hahine ia raka hanaia neganai ia ese Witness hahine ia gwau henia, bena dibura tauna ta ia mai Witness hahine ia durua totona. Taihu ia heau henia, ia dekena amo Mauri Hanaihanai buka ia kokia, ia abia isi bona unai gwaugwau hahine dekenai ia gwau: “Oi duahiduahi diba lasi, a? Inai hereva be dahaka ia gwau? Oi be mauri hanaihanai Paradaiso dekenai do oi abia diba! Guna unai bamona hereva oi diba eiava lasi? Dahaka dainai Dirava bona iena tomadiho henia taudia oi gwau henidia?”

Idia Kikilaia Momo

Guna, Poland ena taoni badana ena ladana be Kruszwica, unuseniai Katolik taudia be momo. Lagani 1995 lalonai unuseniai idia noho taudia be 9,300, to Witness taudia be momo lasi. To Iehova ese Basileia harorolaia taudia edia gaukara ia hanamoa bada.

Lauma dalanai edia hakaua taudia edia koikoi herevadia idia itaia dainai taunimanima momo herea​—memero kekeni danu—​be Witness taudia dekenai idia lao edia henanadai idia haerelaia totona. Daudau lasi murinai, Bible stadi 20 idia karaia hamatamaia. Unai gabu ena fada tauna ia haroro neganai, Iehova ena Witness taudia ia gwau henidia dikadika, to unai ese kudou-maoro taudia ia hagaridia lasi, idia be hebou dekenai idia mai noho. Sitoa, uma bona dubu dekenai taunimanima ese Witness taudia edia kara idia kikilaia momo. Hua 6 murinai, buka stadi grup badadia rua idia haginia. Hari, Kruszwica dekenai kongregesen ta ia noho bona taunimanima 35 ese Iehova idia tomadiho henia. Idia ese Bible stadi 75 idia karaia bona idia gaukara bada “kohu namodia” idia gogoa totona, guna tomadiho koikoi ese ia guidia taudia idia gogodia noho unai.

Idia ta be lagani 23 merona ta, ena ladana be Bogdan, ia be Katolik tomadiho idia goadalaia ena ruma bese tauna ta. Ia gwau: “Guna lau inuinu, kuku lau ania, bona lau sihari kava. Lau idia gwauraia dagedage tauna bona taravatu utua kava tauna, bona lau laloa taunimanima ese lauegu namo idia tahua lasi. To, Bible stadi lau dekenai idia hamatamaia neganai, egu sinana ia badu bona ia gwau bema stadi lau hadokoa lasi ia ese sibona do ia poisini henia. Unai lalo-metau lau abia dainai Witness taudia lau koudia. Gabeai, special pioneer taudia edia hebogahisi heduru kara dainai, guna lau karaia kara dikadia lau rakatania diba. Lagani 1991 ena ‘Mauri Namona Idia Ura Henia Taudia’ Distrik Hebouhebou dekenai bapatiso lau abia, bona lau ura nega ibounai hesiai gaukarana do lau karaia, lau be egu bapatiso negana amo heduru pioneer gaukara lau karaia noho.”

Ena mauri lagani 21 merona, Sławomir, be lauma dikadia hereva henia bona Satana tomadiho henia karadia ia karaia, to Bible ese unai kara ia gwauraia dika ia diba neganai, ia ese unai kara ia rakatanidia. To ia gwau: “Satana be lau ia rakatania lasi. Ena be Diabolo tomadiho henia kohu ibounai be egu ruma amo lau negea vadaeni, to hanuaboi ta, ena be lau kehoa lasi, to rekodi gadaralaia masini be sibona ia heau matamaia bona Satana ena miusik ia lasi. Lau guriguri Iehova dekenai, bona ia ese lau ia durua lauma dalanai lau goada totona. Guna, egu tamana bona sinana edia ura dainai lau ese kwarana gorere ia tahua doketa dekenai lau lao, bona lau stadi noho lalonai sisina sisina lau namo ela bona doketa ia gwau egu gorere ia ore vadaeni. Egu gorere ena ripoti kadi dekenai ia torea herevana be inai: ‘Iehova ena Witness taudia ese idia hanamoa.’ ”

Tanobada Ena Siahu Idia Dadaraia

Kruszwica ena diho lahara kahanai Środa Śląska taoni ia noho. Unai taoni maragina ena taunimanima 9,000 dekena amo “kohu namodia” idia hedinarai danu. Lagani hani gunanai, iseda taihu tamona sibona lauma dalanai be unuseniai ia noho. To, hari, Basileia pablisa taudia idia daekau 47 dekenai. Unai taoni dekenai idia noho Witness taudia momo be guna lauma dikadia idia hereva henia, drag dikadia idia ania, bona kara bodaga idia karaia. Idia laloa guna unai kara idia karaia badina dubu dekenai lauma dalanai heduru idia abia lasi, dubu dekenai lauma dalanai taunimanima idia gwau dika henidia sibona, idia durudia lasi edia kerere idia rakatania totona. To Witness taudia ese taunimanima idia durudia momokani.

Kongregesen ena memero bona kekeni edia teritori be sikuli dekenai, unuseniai idia haroro. Ena mauri lagani 18 kekenina, Kasia, ia gwau: “Egu sikuli turadia be nega momo lau dekenai idia gwau: ‘Oiemu matamata negana oi negea kava.’ To lau hekwakwanai momo lasi, bona lauegu mauri be mai ena anina. Sikuli dekenai Bible stadi haida lau karaia, to egu homwok bona sibona egu stadi lau reaia lasi. ‘Egu matamata negana lau negea kava’ idia gwauraia kekenidia be hari mai edia natudia, bona edia hekwakwanai be momo.”

Sikuli dekenai memero bona kekeni be Watch Tower oreana ia halasia buka bona magasin idia ura henia bada. Sivarai ta be inai: Poland gado ia hadibaia tisa ta be ia hadibaia memero bona kekeni ia hamaorodia sikuli totona sivarai idia torea neganai, namona be Noga! ena hereva auka lasi torea dalana idia tohotohoa. Heduru pioneer kekeni, Ewa, ia gwau Sikuli bona Iehova ena Witness Taudia buklet ena heduru be bada. Ia gwau: “Unai buklet lau moalelaia bada. Lau hadibadia dainai egu tisa taudia be unai buklet ena hereva idia diba vadaeni. Hebouhebou dekenai lau lao totona hanaihanai gwaumaoro lau idia henia klas lau reaia totona.” Unai bamona memero bona kekeni edia kara namona ese Iehova ena kudouna idia hamoalea bada.​—Hereva Lada-isidia 27:11.

Raskol Dibura Taudia Dikadia Edia Kara Idia Haidaua

Środa Śląska ena mairiveina kahana dekenai Strzelce Opolskie taoni ia noho, unuseniai dibura ruma rua idia noho. Dibura ruma ta dekenai idia durua diba lasi raskol dikadia idia koua momokani, idia heau boio lasi totona. Witness taudia be hanaihanai unai dibura ruma rua dekenai idia lao hereva momokani be dibura taudia dekenai idia harorolaia totona, idia momo be guna Babulono Badana, tomadiho koikoi ibounai oreana, ese idia ia guia.​—Apokalupo 18:​1-5.

Witness taudia be unai dibura taudia ta ta bona haida idia haboua tamona idia stadi henidia totona, bona idia haida be bapatiso idia abia vadaeni. Ena be dibura dekenai do idia noho ela bona edia hahemaoro negana ia ore, to dibura taudia dekenai sivarai namona idia harorolaia. Dibura tauna ta ia hegaegae bapatiso do ia abia totona, bona ena kara ia haidaua bada dainai, dibura naria taudia be pura ta ta iboudiai dina tamona idia henia ena ruma dekenai ia giroa lao totona. Ma haida be edia ruma bese taudia idia tore henidia bona idia gwau idia ura dibura rumana idia rakatania neganai, idia be raskol taudia lasi, to idia be Iehova ena Witness taudia.

Dibura ta ia naria tau badana ia maumau, ia gwau guna Katolik pris taudia idia mai to edia gaukara amo gau ta ia vara lasi. Ia ese Witness taudia ia henanadai henidia, ia gwau: “Edena bamona umui be inai dibura taudia umui durudia diba edia kara idia haidaua totona bona kara namona idia karaia totona?” Dibura tauna ta ena toretore iena ruma bese taudia dekenai ese unai henanadai ia haerelaia, ia gwau: “Inai dibura rumana dekenai, Iehova ena Witness taudia ese Dirava ena gwauhamata hereva namona lau idia hadibaia, idia gwau gavamani matamatana, Iehova ena Basileia, be kahirakahira inai tanobada dekenai do ia lohia. Iniseniai lau noho dainai, guna lau karaia karadia bona Bible ena hereva unai kara dekenai lau lalohadailaidia momo. Hari lau diba egu kara gunadia be dika momokani, bona lau ura dikadika dibura amo lau raka lasi bona Dirava ena Basileia henunai do lau noho. Lau bapatiso vadaeni bona hari lau be Iehova ena Witness tauna ta.”

Dibura rumana ma ta dekenai, momo herea be ala-ala taudia dainai idia abia hahemaoro be lagani 25 lalonai dibura dekenai do idia noho. Unai bamona tatau 12 dekenai hanaihanai Bible stadi idia karaia. Idia ta be ena mauri Iehova dekenai ia gwauhamatalaia bona bapatiso ia abia, bona ma haida idia hegaegae gabeai do idia hegeregere bapatiso do idia abia totona. Iehova ena Witness taudia edia hadibaia dalana be ia namo bona dibura taudia idia durudia dainai, dibura naria tauna badana ia moale, ia gwau: “Lau naria dibura taudia be 12 sibona lasi. Idia be 600. Mani emui kara lau umui durua unai taudia ita hadibaia totona bena reana edia kara gunana do idia rakatania diba. Emui ura gaudia ibounai do lau henia umui dekenai, to mani emui kara karaia dalana umui hegaegelaia. Idia umui durudia!”

Vadaeni tadikaka be unai bamona idia karaia. Idia be Bible dekena amo program ena hereva idia hegaegaelaia. Unai program lalonai mauri ena badina, dina vairai ena helaro namona, bona kara dika karadia idia rakatania be gau badana herevadia idia kikilaia. Danu sivarai haida idia gwauraia hedinarai, sivarai ta be inai: Guna dibura dekenai ia noho tauna ta be Iehova ena Witness tauna ta ai ia lao bona gabeai idia abia hidi kongregesen elda dagina ia abia totona. Danu, Witness taudia ese hereva momokani idia abia dae taudia rua, guna idia ta be diamond nadidia ia henaodia tauna bona drag dikadia ia ania tauna, edia sivarai idia gwauraia hedinarai.a Unai program ena hereva idia kamonai henia taudia 20 ese hereva ibounai idia moalelaia bona henanadai momo idia gwauraia, idia haida idia noinoi idia dekenai Bible stadi idia karaia totona.

Edia Abidadama bona Haheauka Idia Tohoa

Lubaczów be taunimanima 12,000 idia noho taoni maragina ta, Ukraine ena tano hetoana kahirakahira dekenai. Lagani 1988 ai, pioneer taudia be unuseniai idia lao pablisa taudia 12 idia durudia totona, unai neganai haroro gaukara ia bada ia lao. Hari, Basileia gaukara idia karaia pablisa taudia be 72, bona lagani 1991 ai idia haginia Kingdom Hall matamatana dekenai taunimanima 150 be Memorial hebouna dekenai idia lao.

June 1991 ai, Pope John Paul Iharuana be Lubaczów ia vadivadi henia. To unai ese taunimanima edia abidadama korikori karana ia hagoadaia lasi. Idia momo ese mauri ena badina bona dina vairai ena helaro namona dekenai idia do daradara bona idia henanadai momo. Dubu gunalaia taudia ese edia henanadai idia haerelaia lasi neganai, idia lao Iehova ena Witness taudia dekenai. Ena be hamatamaia neganai taunimanima edia lalona ena mamina ia dika edia tomadiho idia rakatania dainai, to Bible ena hereva momokani idia diba neganai, idia diba dala maorona idia abia hidi.

Hari, regular pioneer gaukara ia karaia hahinena ta, Honorata, ena ekspiriens be namo. Guna, lagani ta bamona, fada tauna dekenai ena kerere ia gwauraia hedinarai neganai, ia nanadaia Dirava ena ladana be daika. Fada tauna ia haere: “Dirava be lalokau​—unai be iena hairai ladana.” Nega sisina murinai ma ia gwau: “Oi be baketi mai ena ranu namona bona lalonai haida ese inika idia bubua bamona. Unai be haidaua diba lasi gauna ta.” Haere ia abia unai. Honorata ia gwau: “Unai nega lalonai egu lalona lau hadaia Iehova ena Witness hahinena ai do lau lao totona. Unai danu be haidaua diba lasi gauna ta.”

Lubaczów dekenai hereva momokani idia kamonai henia taudia kahirakahira iboudiai ese dagedage dikana idia haheaukalaia. To unai ese ia koudia lasi, idia ese Bible ena hereva momokani idia abia dae bona Iehova ena kahana dekenai idia gini goada.

Elżbieta ia gwau: “Guna ruma dekenai lau idia dadabaia. Gabeai egu ruma bese taudia be mai edia badu danu Kingdom Hall dekenai idia vareai. . . . Lau idia abia lao ruma dekenai bona au gagevana amo lau idia dadabaia, lau idia ‘sisiba henia totona.’ Iehova ena Witness taudia lau bamodia dainai egu tauanina ibounai dekenai lau idia dadabaia bona aena amo lau idia botaia. Lau idia dadabaia dikadika dainai lau mase garina lau idia abia lao hospital dekenai. Iehova ese lau ia durua, bona lau namo lou. Egu ruma bese taudia ese lau idia dadaraia. Fada tauna dekenai unai sivarai lau hadibaia neganai, lau ia kirikirilaia, ia gwau: ‘Ena be oi idia botaia sisina to dahaka dainai lau dekenai oi maumauraia?’ ”

Ma taihu ta ia laloa, ia gwau: “Guna, lagani ta ta iboudiai lau ese Częstochowa dekenai lau lao bona egu tuina dekenai lau raka Korosi ena Dala dekenai, lau laloa unai be abidadama Katolik taudia edia maduna. Unai kara dainai egu tuina dekenai kipara idia do noho.” Ena mauri lagani be 18 neganai, hereva momokani ia diba bona fada tauna bona ena ruma bese taudia ia hadibadia dubu dekenai do ia giroa lao lasi. Ia gwau idia dadabaia “dikadika dainai egu harana idia hadikaia sisina. To hospital dekenai lau namo sisina dainai ‘Mauri Namona Idia Ura Henia Taudia’ Distrik Hebouhebou dekenai lau lao diba. Unuseniai lalo-tamona bona lalokau momokani kara bona dagedage lasi kara lau itaia neganai mai moale danu lau tai​—Częstochowa dekenai unai bamona kara lau itaia lasi. Lau moale badina Iehova ena namo lau mamia bona ia dekenai lau abidadama dainai.” Edia maduna Iehova dekenai idia tahoa kau taudia Iehova ese ia hagoadaia bona ia durua.​—Salamo 55:22.

Inai Katolik taudia momo tanona be idau tano taudia hegeregeredia, guna Babulono Badana ese ia guidia, to hari idia momo herea ese ia dekena amo “umui raka siri” boiboi herevana idia badinaia. Bema Iehova ia ura neganai, gari lasi dekenai iena taunimanima be Poland ena gabu ibounai dekenai “kohu namodia” eiava taunimanima namodia do idia gogoa noho. Oibe, reana ma taunimanima momo herea ese inai boiboi herevana do idia badinaia: “ ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.”​—Apokalupo 18:4; 22:17.

[Footnotes]

[Map on page 24]

(For fully formatted text, see publication.)

POLAND

Sztum

Kruszwica

Poznan

Warsaw

Środa Śląska

Częstochowa

Strzelce Opolskie

Lubaczów

[Picture on page 26]

Kruszwica, Poland dekenai, Basileia sivaraina idia harorolaia