Lalokau Ena Dala Hereadaena Badinaia

IEHOVA DIRAVA be lalokau. (1 Ioane 4:8) Iena Natuna, Iesu Keriso, ia gwau namona be ita ese Dirava bona iseda dekena tauna ita lalokau henidia. (Mataio 22:​37-40) Oibe, Dirava ese tanobada bona guba ibounai be mai lalokau danu ia haheaua! Unai dainai, bema mauri hanaihanai ita ura neganai namona be lalokau ena dala ita gavaia.

Dirava ese lalokau ia hahedinaraia Israel besena dekenai, to gabeai edia abidadama lasi kara dainai unai bese ia dadaraia. Gabeai ia ese Iesu ena diba tahua taudia edia kongregesen be Iena orea matamata ai ia halaoa. Edena dala amo? Lauma helaga amo ia hasiahudia bena idau gadodia bona peroveta herevadia idia gwauraia. Bona Pentekoste 33 C.E ai, Iuda taudia bona Iuda tomadiho idia abia dae idau bese taudia ibounai 3,000 ese tomadiho gunana idia rakatania bona Dirava ena tomadiho matamatana dekenai idia vareai. (Kara 2:​1-41) Unai lauma helaga ena harihari gaudia be Iesu ese ia siaia diho ena aposetolo taudia dekenai, unai dainai idia mase murinai unai bamona siahu ibounai idia ore. (Kara 8:​5-18; 19:​1-6) To lauma helaga amo idia davaria harihari gaudia ese idia hahedinaraia Dirava ese unai lauma Israel ia lalokau henia bada. ​—Galatia 6:16.

Lauma helaga ena siahu amo idia vara hoa karadia ese namo idia havaraia. To lalokau bona ma haida edia ura atoa guna kara edia namo ese lauma helaga ena harihari gaudia abia karana ena namo ia hanaia. Aposetolo Paulo ese unai ia hahedinaraia Korinto tadikaka dekenai ena toretore ginigunana ia siaia lao neganai (c.55 C.E.). Unai toretore lalonai ia ese lalokau ena “dala namo herea” ia hahedinaraia. (1 Korinto 12:31) Unai dala be 1 Korinto karoa 13 lalonai ia torea.

Bema Iseda Lalokau Ia Noho Lasi, Ita be Anina Lasi Gauna Ta Bamona

Paulo be inai bamona ia sisiba: “Bema taunimanima edia gado idauidau lau hereva diba, aneru edia gado danu, to lauegu lalokau be lasi neganai, lauegu hereva be auri idia botaia, o gaba idia toua kava bamona.” (1 Korinto 13:1) Bema lalokau ia noho lasi neganai, lauma helaga ena siahu amo idau gadodia eiava aneru edia gado herevalaia be anina lasi momokani. Bema Paulo be hahegoada hereva namodia ima sibona ia herevalaia unai be namo, taunimanima idia diba lasi gado ta ai hereva tausen tausen momo ia gwauraia kava be namo lasi. (1 Korinto 14:19) Lalokau lasi taudia be hegeregere “auri idia botaia”​—badu havaraia regena​—eiava “gaba idia toua kava” bamona. Idau gadodia herevalaia karana be lalokau lasi karana bona unai ese ta lauma dalanai do ia durua diba lasi bena Dirava do ia imodaia lasi eiava ena taunimanima do ia durudia lasi. Hari inai negai lalokau ita hahedinaraia dala be iseda Keristen hesiai gaukara lalonai taunimanima ese idia manadalaia gadona ta ita gaukaralaia.

Unai aposetolo ma ia gwau: “Bema peroveta siahuna lau abia, bona Dirava ena hunia gaudia lau diba, aonega ibounai danu, bona bema lauegu abidadama dekena amo ororo lau kokia diba, to lauegu lalokau be lasi neganai, lau be anina lasi gauna bamona.” (1 Korinto 13:2) Hoa karana amo peroveta kara, hehuni herevadia gwauraia hedinaraia kara, bona lauma helaga ena amo aonega idia abia diba kara ese haida do idia hanamoa, to bema unai kara ibounai idia karaia taudia ese lalokau idia gaukaralaia lasi idia sibodia be namo do idia davaria lasi. Paulo ese ia diba hehuni gaudia helagadia ia gaukaralaidia ma haida durudia totona, hegeregere, lauma helaga ese ia henia lalo-parara amo ia ese vanagi ena mutu amo do idia roho mauri taudia ia perovetalaidia. (Kara 27:​20-44; 1 Korinto 4:​1, 2) To bema ia ese ‘aonega ibounai bona abidadama ibounai’ ia abia, to ena lalokau be lasi, Iehova ena matanai ia be gau ta lasi bamona.

Hari, Iehova ena lauma helaga ese ena Witness taudia ia durudia Buka Helaga ena peroveta herevadia bona hehuni hereva edia anina idia diba totona bona ma haida dekenai idia hadibaia totona. (Ioel 2:​28, 29) Lauma helaga ena amo danu abidadama ia mai bena unai amo hekwakwanai badadia do ita hanaia diba. (Mataio 17:20) Unai heduru karadia ibounai be lauma helaga ese ia havaraia, unai dainai ita heagi lasi. Bema gau ibounai ita karaia Dirava hanamoa totona bona ia bona taunimanima ibounai ita lalokau henidia totona, ita bona iseda gaukara be mai edia anina.​—Galatia 5:6.

Lalokau Lasi Henia Karana ese Henia Tauna Ia Hanamoa Lasi

Paulo ia gwau: “Bema lauegu kohu ibounai ogogami taudia dekenai lau henia, bona bema lauegu tauanina lau henia, do idia gabua ore totona, to lauegu lalokau be lasi neganai, lau be namo lasi.” (1 Korinto 13:3) Herevana ena kohu bona aniani ibounai haida dekenai ia henia neganai, bema Paulo dekenai lalokau ia noho lasi, davana namo do ia abia diba lasi. Oibe, davana o hairai bada kohu, eiava Anania bona Sapira bamona ladana badana tahua karana ita laloa lasi to mai iseda lalokau ibounai danu gau haida ita hariharilaia dainai Dirava ese davana namona do ia henia ita dekenai. (Kara 5:1-11) Paulo be haheitalai hereadaena badina ia be mai ena lalokau danu Iudea dekenai kohu ai idia dabu kamonai taudia ia durudia.​—1 Korinto 16:​1-4; 2 Korinto 8:​1-24; 9:7.

Ena be ta be hereva momokani dainai ena mauri ia haboioa, to bema unai tauna be ia lalokau lasi neganai, Dirava vairanai ena mase be anina lasi. (Hereva Lada-isidia 25:27) Iesu ese ena boubou karana ia herevalaia to ia hekokorokulaia lasi. Momokani, ia hekokoroku lasi to mai ena lalokau bada danu ia ura ena mauri ia henia. (Mareko 10:45; Efeso 5:2; Heberu 10:5-10) Iena lauma tadikaka danu ese ‘edia tauanina do idia henia Dirava dekenai. Boubou gauna bamona do idia henia,’ sibodia edia ladana abia isi totona lasi, to mai manau bada danu idia ura edia lalokau bona hahenamo idia hahedinaraia Iehova dekenai.​—Roma 12:​1, 2.

Lalokau Dainai Ita Karaia Karadia Haida

Paulo be inai bamona ia torea: “Lalokau be ia dekenai ia kara dika tauna davana ia laloa lasi. Lalokau be mai ena bogahisihisi, haida durua totona.” (1 Korinto 13:4a) Adam ia kara dika hamatamaia negana amo Dirava be ia haheauka dainai taunimanima momo idia helalo-kerehai bona hahemauri ena dala idia davaria vadaeni. (2 Petero 3:9, 15) Bema ita dekenai lalokau ia noho neganai mai eda ura bada danu hereva momokani be haida dekenai do ita hadibalaidia. Oibe, do ita hesiku lasi bona badu lasi to dika ita gwauatao heheni diba. (Mataio 18:​21, 22) Lalokau be mai ena hebogahisi, bona Dirava ena hebogahisi karana ese ita ia veria ia dekenai. Iena lauma helaga ena huahua, hebogahisi, dainai ita ese ma haida ita doridia momo lasi badina ia ese ita dekenai unai bamona ia karaia lasi. (Efeso 4:32) Oibe, ena be taunimanima haida ese iseda kara namo idia laloa lasi, to lalokau dainai hebogahisi ita hahedinaraia diba idia dekenai.​—Luka 6:35.

Paulo ma ia gwau: “Lalokau be kohu momo tauna ia mama henia lasi. Lalokau be ia heagi lasi, bona ia hekokoroku lasi.” (1 Korinto 13:4b) Mama be tauanina ena kara ta bona unai kara ese ta ena vareai dala Dirava ena Basileia lalonai do ia koua diba. (Galatia 5:19-21) Lalokau dainai ita ese iseda tadikaka ena kohu eiava ena noho namo dainai ita mama henia lasi. Bema tadikaka ta be kongregesen ai oi ese oi ura henia dagi ta ia abia, vadaeni lalokau dainai ia danu do umui moale hebou, bona iseda heduru bona hahegoada do ita henia bona Dirava ita tanikiu henia bona ita noinoi henia unai tadikaka ena gaukara ese kongregesen do ia durua bada totona.

Lalokau “ia heagi lasi,” anina be Dirava ena hesiai gaukara ai ita karaia gaudia dainai ita hekokoroku be maoro lasi. Korinto taudia haida be idia heagi, hegeregere lauma ena harihari gaudia idia sibodia idia havaraia bamona, to idia laloaboio unai gaudia be Dirava ena amo idia mai, hegeregere hari inai negai ita davaria hahenamo be iena hakaua orea ena amo idia mai bamona. Namona be Dirava ena orea lalonai iseda dagi ita heagilaia lasi, to ita naria namonamo ita moru garina. (1 Korinto 1:31; 4:7; 10:12) Lalokau be “ia hekokoroku lasi,” to lalokau lasi tauna ia laloa ia be taunimanima badana ta. Bema ta be lalokau tauna ia ese ma haida atai ai sibona ia atoa diba lasi.​—1 Korinto 4:​18, 19; Galatia 6:3.

Haida Ia Hadikaia Lasi, Sibona Ena Gau Ia Tahua Lasi, Dika Ia Laloatao Noho Lasi

Lalokau “be haida hadikaia ia ura lasi. Lalokau be sibona ena gau ia tahua lasi, ia badu haraga lasi.” (1 Korinto 13:5a) Lalokau ese kara namo, Dirava ena kara tohotohoa, gunalaia taudia matauraia karana bona Keristen hebou dekenai kara namo bona hemataurai ia hahedinaraia. (Efeso 5:​3-5; 1 Korinto 11:​17-34; 14:40; Iuda 4, 8-10 itaia danu.) Kongregesen ibounai be tauanina ena rege ta ta ibounai bamona, bema lalokau ia noho neganai tadikaka ese maino bona laga-ani do idia davaria badina lalokau ese taunimanima ibounai ia haboua. (1 Korinto 12:​22-25) Lalokau dainai nega momo ita ese sibona eda namo ita moia tao bona ma ‘haida edia namo’ ita tahua guna. (Filipi 2:​1-4) Lalokau dainai ‘taunimanima idauidau ibounai edia mauri dalana dekenai ita vareai, dala idauidau ibounai dekena amo haida do ita veria mauri totona,’ iseda haroro gaukara amo.​—1 Korinto 9:​22, 23.

Lalokau “ia badu haraga lasi.” Badu haraga be kara dika tauanina ena kara ta, to lalokau dainai ita “badu haraga lasi.” (Iakobo 1:19; Galatia 5:​19, 20) Ena be iseda badu be mai anina to lalokau dainai unai badu ia noho daudau lasi badina bema ia noho daudau neganai Diabolo ena dala ita kehoa unai. (Efeso 4:​26, 27) Bema edia turadia, kamonai taudia, ese elda taudia edia ura gauna ta idia karaia lasi, gau badana be elda taudia idia badu lasi.

Paulo danu ese lalokau ia gwauraia: “Haida ese idia kara dika henia, to lalokau ese edia dika ia laloatao noho lasi.” (1 Korinto 13:5b) Lalokau ese taunimanima edia kara kerere edia lista ia torea lasi. Ia ese kamonai tadikakadia edia namo ia itaia bona herevana edia dika ia noho eiava ta ese ia laloa ia noho, unai dika ena davana ia henidia lasi. (Hereva Lada-isidia 20:22; 24:29; 25:​21, 22) Lalokau ese ita ia durua “maino daladia do ita tahua” totona. (Roma 14:19) Paulo bona Banaba idia heai bona Dirava ena hesiai gaukarana lalonai edia gaukara idia hapararaia, to lalokau dainai unai heai idia hadokoa bona ta ese ta ena dika davana ia henia lasi to idia hetura lou.​—Levitiko 19:​17, 18; Kara 15:​36-41.

Kara Maoromaoro bona Hereva Momokani Ia Ura Henia

Lalokau ia herevalaia neganai, Paulo ma ia gwau: “Lalokau be kara gagevagageva ia moalelaia lasi. To Dirava ena kara bona iena hereva momokani ia moalelaia.” (1 Korinto 13:6) Taunimanima haida ese kara gagevagageva idia moalelaia bada dainai “idia mahuta lasi ela bona kara dika ta idia havaraia.” (Hereva Lada-isidia 4:16) To Dirava ena orea lalonai bema kara dika ese ta ia abia neganai tadikaka idia badu henia lasi, eiava unai ta ia moru dainai idia moale lasi. (Hereva Lada-isidia 17:5; 24:​17, 18) Bema Korinto kongregesen lalonai Dirava bona kara maoromaoro lalokau henidia karana bema bada, unuseniai idia karaia kara mirona ia vara lasi. (1 Korinto 5:​1-13) Ma gau ta be, bema kara maoromaoro lalokau henia karana ia noho ita ese televisen, muvini piksa bona tanobada edia drama dikadia ita ura lasi ita itadia.

Lalokau ese “hereva momokani ia moalelaia.” Inai siri lalonai hereva momokani bona kara gagevagageva edia idau ia gwauraidia. Anina be lalokau ese ita ia doria ita moale bema hereva momokani ese taunimanima ia durudia kara maoromaoro idia karaia totona. Ita ese moale ita davaria bema gau ta ese taunimanima ia durudia idia goada totona bona hereva momokani bona kara maoromaoro karadia idia habadaia. Lalokau ese ita ia koua hereva koikoi gwauraia karana amo, ita ia hamoalea kota dekenai kara maoromaoro taudia idia gwauraidia maoro neganai, bona ita ia hamoalea Dirava ena hereva momokani ia kwalimu neganai.​—Salamo 45:4.

Lalokau be Gau Iboudiai Dekenai Ia Gaukara Ena Dala

Paulo ese lalokau ena anina ia gwauraia noho lalonai, ia gwau: “Lalokau be gaukara bona metau ibounai ia goadalaia. Nega ibounai iena abidadama ia goada noho. Nega ibounai Dirava ena nega namona ia naria noho mai moale danu. Bona metau ibounai lalonai ia gini goada noho.” (1 Korinto 13:7) Lalokau be ‘gaukara bona metau ibounai ia goadalaia’ dainai, badu idauidau ia koua, hegeregere guhi namona ese medu ia koua bamona. Bema ta ese iseda lalona ia hametaua, bona ia noinoi ena kara dika ita gwauatao totona, lalokau ese ita ia durua unai dika ita haheaukalaia, bona ita ia kara dika henia tauna ena kara dika ita gwauatao, namo lasi ma haida dekenai ita kikilaia loaloa. Lalokau dainai ita ura ‘iseda tadikaka edia lalona ita hamaoromaoroa.’​—Mataio 18:​15-17; Kolose 3:13.

Lalokau be ‘nega ibounai ena abidadama ia goada noho’ Dirava ena Hereva dekenai, bona unai amo “hesiai tauna mai ena kamonai bona mai ena kara maoromaoro” oreana ese lauma aniani idia hegaegaelaia dainai ita moalelaia bada. (Mataio 24:​45-47) Ena be haida ese ita idia koia haraga diba lasi, to lalokau ese ita ia durua kudou-namo ita abia iseda tadikaka ita lalohadailaidia kerere lasi totona. (Kohelete 7:​21, 22) Lalokau be “nega ibounai Dirava ena nega namona ia naria noho mai moale danu,” hegeregere, Bible ese Dirava ena Basileia do ia vara momokani herevana ita abia dae. Hekwakwanai idia vara neganai lalokau ese ita ia doria dainai iseda helaro ita dogoatao noho bona ita guriguri namo do ia vara totona. Danu, lalokau ese ita ia doria iseda helaro ena badina be haida dekenai ita hadibaia totona. (1 Petero 3:15) Ma danu, lalokau be “metau ibounai lalonai ia gini goada noho,” haida ese ita idia kara dika henia neganai danu. (Hereva Lada-isidia 10:12) Danu, Dirava ita lalokau henia dainai, dagedage bona ita idia tohoa gaudia ibounai ita haheaukalaidia diba.

Paulo be ma ia gwau: “Lalokau be do ia doko lasi.” (1 Korinto 13:8a) Iehova ia doko diba lasi hegeregerena lalokau ia doko diba lasi. Iseda noho hanaihanai Diravana be lalokau momokanina dainai, unai kara be do ia ore lasi. (1 Timoteo 1:17; 1 Ioane 4:16) Guba bona tanobada be hanaihanai lalokau ese do ia biagudia. Unai dainai namona be Dirava dekenai ita guriguri ita do ia durua iseda kara gunadia haida ita hanaia totona bona ia doko lasi lauma huahuana, lalokau, ita hahedokilaia.​—Luka 11:13.

Do Idia Ore Gwauraia Gaudia

Vaira negana totona, Paulo ia gwau: “Peroveta hereva be do idia ore. Idau momokani gadodia danu do idia doko. Aonega danu be do ia boio.” (1 Korinto 13:8b) ‘Peroveta hereva’ idia gwauraia taudia ese ma peroveta herevadia matamatadia idia gwauraia diba. Dirava ena Keristen kongregesen oreana idia haginia murinai, peroveta hereva gwauraia karana ena siahu be ia ore, to Dirava ena peroveta siahuna ia ore lasi, bona iena Hereva dekenai ita ia naria peroveta herevadia ibounai idia noho. Lauma helaga ena siahu amo idau gadodia dekenai hereva karana danu ia doko vadaeni, bona idia perovetalaia hegeregerena, aonega dalana ta danu ia “boio.” To Iehova ena Hereva ibounai ese ita ia hadibaia dahaka do ita karaia hahemauri do ita abia totona. (Roma 10:​8-10) Ma danu, Dirava ena taunimanima be lauma helaga amo idia honu dainai lauma helaga ena huahua idia hahedinaraia.

Paulo ma ia gwau: “Badina be unai peroveta bona aonega dalana be kahana sibona ita diba. To gabeai diba goeva momokani ia mai neganai, unai kahana sibona ita diba gaudia be do idia ore.” (1 Korinto 13:​9, 10) Aonega henia dalana idauna bona peroveta edia hariharibada karana be kahana sibona. Sedira unai peroveta hereva ena anina ibounai ia gwauraia lasi, bona unai peroveta taudia ta ta be vaira neganai do idia vara gaudia edia kahana sibona idia gwauraia, edia aonega be ia hegeregere lasi peroveta hereva ibounai idia gwauraia totona. To, hari inai negai, unai peroveta herevadia edia kahana ibounai edia anina idia hedinarai namonamo noho. Hegeregere, Bible ena peroveta herevana ese ia hamomokania, Iesu be lagani 1914 lalonai siahu ia abia taunimanima ibounai ia lohiadia hamatamaia totona. Unai nega amo ema bona hari, ita be “dokona negana” lalonai ita noho, bona lauma dalanai iseda diba bona lalo-parara Bible ena peroveta herevadia dekenai ia bada ia lao noho. (Daniel 12:4) Unai dainai, ita be diba hereadaena kahirakahira do ita davaria, unai anina be peroveta bona aonega ‘ena kahana ibounai’ do ia hedinarai goevagoeva.

Kara Hereadaena Ia Do Noho

Kongregesen ena tubu dalana ia herevalaia neganai, Paulo ia gwau: “Lau mero neganai mero bamona lau hereva, mero bamona lau laloa, bona mero bamona hereva ena anina lau tahua. To hari lau be tau dainai mero ena kara lau rakatania vadaeni.” (1 Korinto 13:11) Beibi maragina ena diba be sisina sibona bona ena tauanina be manoka dainai, do idia doria kahana kahana dekenai, hegeregere kiapa dekenai oi doria bamona. To tau badana ena tauanina ia goada, ena aonega be bada, bona nega momo idia hamarerea haraga diba lasi. Ena maragi negana lalohadaidia bona karadia idauidau ia negea vadaeni. Unai hegeregerena, Dirava ena tanobada oreana be ia tubu goada neganai, Ia gwau lauma helaga ia henia hariharibada gaudia, unai be peroveta herevadia, gado idaudia dekenai hereva karana, bona aonega abia haraga karadia haida do idia doko. Unai kongregesen ena lagani be bada herea, to ena be ena memba taudia be unai hariharibada gaudia hari idia tahua lasi, to idia be mai moale danu lauma helaga ena hakaua siahuna henunai Dirava ena hesiai gaukara idia karaia.

Paulo ma ia gwau: “Harihari hevarivari lalonai ita itaia goeva momokani lasi. To nega gabeai ita ese Dirava ena vairana do ita itaia momokani. Harihari lau be kahana sibona lau diba. To gabeai do lau diba momokani, Dirava ese lau ia diba momokani bamona.” (1 Korinto 13:12) Kongregesen ia do matamata negana lalonai unai be Dirava ena nega lasi diba haida do ia hahedinaraia totona. Unai dainai, edia anina idia itaia namonamo lasi, unai Keristen taudia be auri hevarivari dekenai idia itaia bamona, idia itaia namonamo lasi. (Kara 1:​6, 7) To ita itaia namonamo diba. Ia hedinarai goevagoeva peroveta herevadia bona idia laulaulaia gaudia be idia guguru noho, badina hari be Dirava ena nega unai gaudia edia anina ia hahedinaraia totona. (Salamo 97:11; Daniel 2:28) Ena be Paulo be Dirava ia diba, to ena diba Iehova dekenai, bona ena turana karana ia dekenai do ia bada momokani lasi ela bona unai aposetolo tauna be guba dekenai ia toreisi lou. Unai nega lalonai ia ese ena Keristen kara ena davana namona ibounai ia abia.

Iena hereva lalokau ena anina dekenai ia haorea totona Paulo ia torea, ia gwau: “Vadaeni, inai gau toi idia noho hanaihanai: abidadama, bona Dirava ena nega namona naria noho kara, bona lalokau. To namo herea momokani gauna be lalokau.” (1 Korinto 13:13) Ena be lauma helaga ena hariharibada hoa karadia idia ore, to hari kongregesen ena diba be ia bada sisina bona edia abidadama, helaro, bona lalokau edia badina idia abia. Mai edia abidadama Dirava ese ia gwauhamatalaia gaudia iboudiai do idia guguru. (Heberu 11:1) Dirava ena Hereva lalonai idia perovetalaia gaudia idia guguru neganai abidadama karadia haida, unai gaudia dekenai, do idia ore. Ita helaro henidia gaudia haida do idia vara neganai, bona unai gaudia ita itaia neganai, unai gaudia dekenai do ita helaro noho lasi. To lalokau karana be do ia noho ela bona hanaihanai. Unai dainai, namona be Iehova ena Witness taudia iboudiai be lalokau dalana hereadaena do idia badinaia noho.