Guna Ia be Hospital to Hari Ia be Kingdom Hall Namona

LAGANI 1770 ai, tano matamata ia tahua loaloa England tauna, Lieutenant James Cook, be 369-ton bouti mai ena palai, ladana Endeavour, be ia taria lao Australia ena kone kahirakahira dekenai, guna tau ta unai gabu ia tahua lasi, bena June 11, hanuaboi kahanai, unai motumotu badana ena mirigini kahana dekenai bouti ese davara ena nadi ia botaia. Oak auna amo idia karaia bouti ena kopina ia hadikaia bada. Bouti ena gaukara taudia idia roho mauri totona gau badana be bouti idia hanamoa haraga. Sinavai ta be davara dekenai ia aru lao ena gabu kahirakahira be namo herea edia bouti idia hanamoa totona, wiki 6 lalodiai idia gaukara edia bouti idia hanamoa totona. Lagani 103 unai nega murinai, taunimanima ese unai gabu dekenai golo idia davaria. Golo tahua negana ia ginidae! Taunimanima tausen tausen momo idia mai unai kohu idia tahua bona idia taga totona. Hanua ta ladana Cooktown ia vara unai.

Lagani 1879 ai, gavamani ese gwaumaoro ia henia unai gabu dekenai hospital ta idia haginia gorere taudia bona golo idia tahua taudia be aksiden idia abia neganai idia durudia totona. Unai lagani tamona lalonai, tanobada ena kahana ta dekenai, July 1 lalonai, Zion’s Watch Tower magasin ginigunana idia halasia. Unai nega amo ia mai hari, unai magasin ese Dirava idia gari henia taudia milion momo ia durudia lauma dalanai idia goada totona. Unai nega lalonai taunimanima idia diba lasi unai magasin idia halasia orea be gabeai unai Cooktown hospital do idia gaukaralaia.

Lagani 100 ia hanaia murinai, unai Cooktown Hospital ia dika dainai matamatana ta idia haginia gwauraia. Gavamani ena moni ia noho hospital matamatana ta idia haginia totona, unai dainai idia ura diba daika ia ura unai Hospital gunana do ia kokia bona davana hida do idia henia. The National Trust of Queensland oreana taudia ese unai ruma gunana idia laloa bada. To, unai ruma idia kokia bona ma gabu ta dekenai idia atoa bona idia hanamoa be davana bada dainai idia hegeregere lasi idia karaia totona. Ta ese unai gaukara idia ura lasi karaia.

Unai nega lalonai, Iehova ena Witness kongregesen maragina, Cooktown dekenai, ese gabu ta idia tahua hebou idia karaia totona. Edia tano be lasi bona edia moni be K776 sibona. Kingdom Hall be edena bamona do idia haginia diba? Unai kongregesen gunalaia taudia be gavamani taudia dekenai idia gwau unai ruma do idia kokia bona ma gabu ta dekenai do idia atoa, to davana do idia henia diba lasi. Iehova be edena bamona do ia durudia? Sivarai be namo herea! Gavamani ese gwaumaoro ia henia idia abia totona!

Hari, gau badana be tano ta idia abia unai ruma do idia atoa totona. Oibe, idia henanadai neganai, gavamani ia gwau tano ta ia noho bona davana lasi dekenai do idia abia diba, to gau tamona be unai ruma idia hanamoa ena toana gunana hegeregerena. To, unai hanua taudia haida be idia maumau, idia ura lasi Witness taudia ese idia abia. Pepa ta idia hegaegaelaia bona idia ura hanua taudia iboudiai idia sainia Witness taudia ese tano do idia abia lasi totona bona edia palani idia koua totona. Koikoi herevana ta idia loalaia, idia gwau Iehova ena Witness taudia ese Cooktown ibounai do idia biagua, inuinu rumadia bona laki gadara bamona idia karaia rumadia iboudiai do idia koudia, bona taravatu do idia karaia kuku idia hoia diba lasi totona. Momokani, unai ia vara lasi, to gwaumaoro pepana tano idia abia bona ruma hanamoa gaukarana idia karaia totona ena dala be ia auka sisina. Unai hospital do idia kokia ena dina ginigabena be ia kahirakahira mai. Queensland ena State Gavamani ena heduru idia tahua. (Roma 13:2 itaia danu.) Kara haraga gavamani ese gwaumaoro ia henia tano idia abia totona, bona ruma haginia gaukara ena permit idia henia. Vadaeni, tano bona ruma idia abia, to hari be dahaka do idia karaia?

Witness taudia handred momo be Queensland ena kahana idauidau amo idia mai, idia be ruma haginia gaukara idia diba taudia bona heduru taudia, idia ese edia nega idia henia davana lasi bona Kingdom Hall haginia haraga gaukarana idia diba momo. Unai gaukara be sisina ia auka: hegeregere, unai stori rua hospital ena kahana ta ta ibounai idia kokia bona tano matamatana dekenai idia haginia lou. Medu bada negana be kahirakahira ia mai, bona medu bada ia diho gwauraia. Unai gaukara do idia haorea haraga diba, a? Unai hanua taudia haida idia laloa unai gaukara idia do haorea lasi neganai medu do ia diho. Ena be haida idia laloa idia karaia diba lasi, to unai gaukara idia haorea haraga. April 1986 ai, unai ruma ibounai idia kokia vadaeni bona ena gabu matamatana dekenai idia haginia bona ena toana gunana hegeregerena idia hanamoa.

Taunimanima ese unai gaukara badana idia laloa momo, badina Cooktown ena Anglican Newsletter dekenai inai hereva idia torea. Ena hereva kahana ta ia gwau: “Ena be inai hereva dainai lau do idia sisiba henia, to . . . Dubu lalonai oi itaia, taunimanima momo lasi idia mai, to [Iehova ena Witness] orea taudia edia hebou dekenai momo idia lao . . . , unai taudia be guna Anglican bona Roman Katolik taudia. . . . Reana oi diba, orea ta ese . . . Hospital gunana idia hoia bona idia hanamoa lou, bona unai bamona dubu lalonai idia hebou badina guna School dekenai idia hebou gabuna be ia maragi, ani? . . . Ai manoka momokani, badina guna ai koudia lasi.”

Lagani ta ta iboudiai dekenai taunimanima tausen momo ese Cooktown idia vadivadi henia. Idia mai badina au momo tubu hebou gabu badana bona Great Barrier Reef ena davara hairaina idia ura itaia, bona guna unai gabu dekenai idia vara sivaraidia idia kamonai henia totona. Idia momo idia ura Captain Cook Museum idia itaia. Lagani 1989 dekena amo unai Cooktown Hospital gunana be Iehova ena Witness taudia edia Kingdom Hall ai idia halaoa, bona vadivadi taudia momo herea idia ura unai ruma idia itaia danu. Sitoa dekenai mereki hakaukaua dabua dekenai bona T-shirt dekenai unai Cooktown Hospital-Kingdom Hall ena laulau idia printaia. Vadivadi taudia momo idia mai negana lalonai, wiki ta ta iboudiai, taunimanima 600 ia lao 1,000 bamona ese unai ruma idia vadivadi henia, lagani 1879 dekenai idia haginia ruma ena toana idia itaia totona.

Hari, vadivadi taudia ese unuseniai magasin ta, ladana Gima Kohorona [English gado gauna] idia abia diba. Lagani 1879 amo unai magasin hariharilaia ena namba ia bada ia lao noho. Hari, hua ta ta iboudiai dekenai nega rua bona gado 111 bona ma haida dekenai unai magasin milion 15 idia hariharilaidia. Unai magasin ese taunimanima ia durudia Bible ena gwauhamata idia laloa totona, unai gwauhamata be lagani 1914 uru taudia ese tauanina bona lauma dalanai taunimanima do idia namo lou ena nega do idia itaia diba. (Isaia 33:24) Gabeai, taunimanima milion momo be mai edia ura danu inai tanobada ibounai be paradaiso ai do idia halaoa. (Salamo 37:29) Namona be oiemu gabu dekenai Kingdom Hall do oi vadivadi henia, ani? Unuseniai do oi davaria gauna be davana bada, guna Cooktown dekenai idia davaria golo ibounai ena davana ia hereaia momokani.​—Hereva Lada-isidia 16:16.