Gado Idauidau Ena Harihari Gauna be Keristen Momokani Karana ta, A?

BILL bona ma taunimanima 6 be haroro tauna vairanai dubu ena patapata kahirakahira dekenai idia noho hebou neganai, Bill ia gwau: “Gado idauidau dekenai ia guriguri lau kamonai henia neganai, lau abia mamina be hodahoda dekenai siahu ta ia noho bamona.” Unai bamona mamina idia abia be Keristen ginigunadia edia nega lalonai lauma helaga ena siahu karana hegeregerena, a? Unai kara be Bible ia gwauraia tomadiho karana hegeregerena, a? Bible ena hereva ita tahua namonamo neganai unai henanadai edia haere ita davaria diba.

Bible ena sivarai ese idia hahedinaraia ta ese hoa dalanai lauma helaga ena harihari gauna ena siahu ia abia neganai, aposetolo taudia 12 amo ta ia noho eiava aposetolo Paulo be ia noho. Gado idauidau dekenai hereva karana ena sivarai be toi, ginigunana be Pentekoste 33 C.E. ai ia vara, Iesu ena hahediba taudia 120 be Ierusalem dekenai idia hebou neganai. (Kara 2:​1-4) Lagani toi mai kahana murinai, kopina utua lasi Italy taudia haida ese Petro ena haroro herevana idia kamonai henia neganai, lauma helaga idia davaria bona “gado idauidau dekenai idia hereva, bona Dirava idia hanamoa” hamatamaia. (Kara 10:​44-48) Bona lagani 19 Pentekoste murinai, lagani 52 C.E. ai bamona, Paulo ese Efeso dekenai taunimanima haida ia hereva henidia neganai, ena imana be hahediba taudia 12 latanai ia atoa. Idia danu be “gado idauidau dekenai idia hereva, bona peroveta hereva idia gwauraia.”​—Kara 19:6.

Gado Idauidau Ena Harihari Gauna Ena Badina be Dahaka?

Guba dekenai do ia daekau gwauraia neganai, Iesu be ena hahediba taudia dekenai ia gwau: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai . . . bona tanobada ena kahana ibounai [dekenai].” (Kara 1:8) Inai oi laloa, ia ese unai haroro gaukara badana do idia karaia diba dalana ia hahedinaraia​—lauma helaga ena heduru amo do idia karaia.

Hari inai nega lalonai, saiens aonega be ia bada dainai, tanobada ibounai dekenai gado idauidau dekenai sivarai ita siaia diba, to idau negai idia be unai bamona idia karaia diba lasi. Sivarai namona be edia ududia amo idia harorolaia, bona hoa dalanai gado idauidau ena harihari gauna be heduru bada gauna. Keristen ginigunadia edia nega lalonai, Keristen taudia be Pentekoste 33 C.E. ai, Iuda taudia bona Iuda tomadiho idia abia dae idau bese taudia idia haroro henidia neganai, Patia, Media, Elam, Krete, Arabia, Mesopotamia dekenai idia noho taudia, Iudea, Kapadokia, Ponto, bona Asia distrik taudia, bona vadivadi taudia Roma dekena amo danu, ese “Dirava ena hoa gaudia” be ta ta edia gado edia gado dekenai idia kamonai henia, bona unai hereva idia lalo-pararalaia. Kara haraga taunimanima 3,000 be abidadama taudia ai idia lao.​—Kara 2:​5-11, 41.

Nega momo taunimanima idia laloaboio gauna ta be inai: Aposetolo Paulo ese Keristen Korinto taudia ia tore henidia neganai, ia ese lauma helaga ena gaukara 9 ia herevalaidia, idia ta be gado idauidau dekenai hereva karana. Ena be Paulo ia laloa gado idauidau dekenai hereva karana ena namo be ia maragi, to unai kara ese Keristen ginigunadia edia kongregesen taudia ia durua bada Dirava ena guba Basileia ena sivarai namona idia harorolaia totona. Unai “harihari gauna” ena heduru dainai Keristen kongregesen matamatana ia bada ia lao bona ia goada ia lao.​—1 Korinto 12:​7-11; 14:​24-26.

Keristen ginigunadia edia nega lalonai, lauma helaga ena gaukara ibounai, gado idauidau dekenai hereva karana danu, ese idia hahedinaraia ena be Dirava ese lagani 1,500 lalonai Israel kongregesen be iena abia hidi besena, to hari ia gaukaralaidia lasi. Ita daradara lasi, hari ia be iena Natuna vara edeana ese ia haginia Keristen kongregesen matamatana sibona ia abia dae.​—Heberu 2:​2-4 itaia danu.

Lauma helaga ena siahu ese ia havaraia gaudia be heduru badana unai idau negai Keristen kongregesen matamatana ia haginia totona, bona ia durua ia tubu goada totona. Paulo ia gwau hoa dalana amo idia vara harihari gaudia ese edia badina idia hagugurua neganai, unai hoa karadia do idia ore, ia gwau: “Peroveta hereva be do idia ore. Idau momokani gadodia danu do idia doko.”​—1 Korinto 13:8.

Oibe, Bible ese ia hahedinaraia goevagoeva gado idauidau dekenai hereva karana be do ia ore. To edena negai? Kara 8:18 ese ia hahedinaraia lauma helaga ena harihari gaudia idia abia totona “aposetolo taudia be edia imana taunimanima latanai idia atoa.” Vadaeni, unai anina be aposetolo tauna ginigabena ia mase neganai, lauma helaga ena harihari gaudia henia hanai karana do ia ore​—gado idauidau dekenai hereva karana danu. Unai dainai, aposetolo taudia dekena amo unai harihari gaudia idia abia taudia be tanobada amo idia mase ore neganai, unai hoa havaraia harihari gaudia edia siahu do ia ore. Unai ia vara neganai, Keristen kongregesen ia tubu goada vadaeni bona unai tomadiho be tano idauidau dekenai idia abia lao vadaeni.

“Taunimanima Idia Diba Lasi Gadodia” bona Edia Anina

Hari inai negai, gado idauidau dekenai hereva karana be hari ia bada ia lao bona “haida idia gwau lalo-manoka taudia ese unai kara idia karaia taunimanima edia matadia idia dekenai idia veria totona, bona taunimanima ma haida idia gwau unai gado idauidau dekenai idia hereva karana be Aposetolo taudia edia nega lalonai hegeregerena.” Hari inai nega lalonai, dubu dekenai idia hebou bona “taunimanima idia diba lasi gadodia” dekenai idia herevahereva neganai, nega momo edia hereva be mai edia moale hisidae ida to idia regerege kava sibona. Unai dainai, tau ta ia gwau: “Gado idauidau herevalaia harihari gauna lau abia, to nega momo lau sibona lau noho neganai lau gaukaralaia egu diba hagoadaia totona. . . . Lau hemarai taunimanima vairanai lau karaia totona.” Ma tau ta ia gwau: “Lauegu hereva regena lau kamonai, to edia anina lau diba lasi, gau ta ese egu malana ia doria lau herevahereva totona.”

Taunimanima idia diba lasi gadodia dekenai idia hereva neganai, dahaka sivarai namona idia hahedinaraia bona edia anina be dahaka? Unai regerege kava herevadia edia anina idia hahanaia diba gwauraia taudia ese anina idauidau idia herevalaia. Dahaka dainai idia lalo-tamona lasi? Idia gwau unai gado idia hahanaia neganai idia lalo-tamona lasi badina “Dirava ese tau ta dekenai unai gado ena anina ta ia henia bona ma tau ta dekenai ena anina be ma ta ia henia.” Taunimanima ta ia gwau: “Nega haida lau itaia gado idia hahanaia kerere.” D. A. Hayes ese ena buka The Gift of Tongues lalonai, ia gwau nega ta hahine be taunimanima idia diba lasi gadona dekenai ia herevahereva neganai, tau ta ia ura lasi iena hereva ia hahanaia badina ia gwau, unai “hereva be dika herea momokani.” Keristen ginigunadia edia nega lalonai edia kara be idau, gado idauidau dekenai idia hereva neganai idia be kongregesen idia hagoadaia!​—1 Korinto 14:​4-6, 12, 18.

Hari inai nega lalonai, taunimanima haida idia gwau gado hahanaia hereva namodia edia anina idia gwauraia diba, bona idia laloa Dirava ese unai harihari gauna ia gaukaralaia badina “ia ura taunimanima dekenai sivarai ta ia hadibadia totona.” To Iesu Keriso bona aposetolo taudia ese Dirava ena sivarai ita dekenai idia hahedinaraia vadaeni, ma sivarai ta do ita tahua be anina lasi, ani? Paulo be lauma helaga ena harihari gauna ia abia, bona ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia. Unai hereva momokani dainai Dirava ena tau ena goada be hegeregere momokani, vadaeni kara namodia ibounai do ia karaia diba mai kwalimu danu.”​—2 Timoteo 3:​16, 17.

Momokani gauna ta be inai, Keristen kongregesen be nega daudau ia noho bona ia goada, unai dainai Dirava ese idia dekenai gau haida ia hahedinaraia eiava hoa dalana amo lauma helaga ia henia harihari gaudia edia heduru idia abia be anina lasi. Bible ena sisiba be inai: “Bema ai ese, o guba ena aneru ta ese sivarai idauna, guna ai haroro gauna bamona lasi, ai harorolaia neganai, Dirava ese ai bona idia do ia hadikaia ore be namo.”​—Galatia 1:8.

Hoa dalana amo gado idauidau dekenai hereva karana be anina lasi hari, bona Bible ese ia hahedinaraia lasi hari inai negai unai be Keristen momokani ena kara ta. Bible be idia torea haorea vadaeni bona taunimanima momo herea idia abia diba, unai dainai Dirava ena Hereva ia hegeregere vadaeni ita ia durua totona. Ia be diba korikori Iehova bona iena Natuna dekenai ia hahedinaraia bona unai ese mauri hanaihanai dalana ia kehoa.​—Ioane 17:3; Apokalupo 22:​18, 19.

Keristen ginigunadia edia nega lalonai, aposetolo Paulo ese Korinto kongregesen dekenai revareva ta ia siaia edia lalohadai kerere gado idauidau herevalaia harihari gauna dekenai ia hamaoromaoroa totona. Reana, idia haida be gado idauidau herevalaia harihari gauna idia laloa hanaihanai, bona idia be natudia maragi bamona, lauma dalanai idia beibi bamona. ‘Gado idauidau dekenai’ herevalaia karana idia laloa bada. (1 Korinto 14:​1-39) Paulo ia hereva goada, ia gwau Keristen ginigunadia edia nega lalonai Keristen taudia haida sibona be hoa dalana amo gado idauidau dekenai idia herevahereva. Unai be edia hahemauri dalana lasi. Unai kara idia karaia negana lalonai, gado idauidau herevalaia harihari gauna ena namo ese hoa peroveta karana ena namo ia hanaia lasi. Guna, bona harihari danu, ita gwau lasi gado idauidau dekenai hereva karana be Keristen taudia do idia abia mauri hanaihanai ena dala.​—1 Korinto 12:​29, 30; 14:​4, 5.

Hari, Taunimanima Idia Diba Lasi Gadodia Herevalaia Karana Ena Siahu

Haida idia gwau tomadiho dalanai mai edia siahu dubu gunalaia taudia ese edia memba taudia idia hagoadaia gado idauidau herevalaia karana ena diba idia abia totona. Nega haida edia lalona idia hekwarahi bona idia laloa namonamo lasi neganai idia karaia diba. Cyril G. Williams be Tongues of the Spirit bukana dekenai, ia gwau “nega momo unai kara be edia orea taudia idia hereaia ena toana” bona unai taudia be “orea taudia vairanai bona sibodia edia matana dekenai idia be mai edia siahu.” Unai dainai, reana idia karaia badina idia ura taunimanima idia diba lasi gadodia herevalaia oreana dekenai idia vareai.

Loyola University ena presiden, Donald P. Merrifield, ia gwau “ta be gado idauidau dekenai ia hereva neganai moale hisidae kava ena mamina ia abia, eiava, haida idia gwau bamona, ia be diabolo ena mamina ia abia.” Haroro tauna Todd H. Fast ia gwau: “Gado idauidau dekenai hereva karana be hepapahuahu herevana ta. Diabolo ena kara be idauidau ita ia hakererea totona.” Bible ese ita ia sisiba henia, ia gwau Satana bona ena demoni be mai edia siahu taunimanima idia veria bona edia gado idia biagua totona. (Kara 16:​17, 18) Demoni ta ese tau ta ia abia dainai ia boiboi bada herea bona tano dekenai ia moru kava, to Iesu ese kara ta ia karaia unai demoni ia lulua totona. (Luka 4:​33-35) Paulo ia sisiba, ia gwau ‘Satana be sibona diari aneruna ena kopina ia atoa diba.’ (2 Korinto 11:14) Hari inai nega lalonai, ena be Dirava ese ena taunimanima dekenai gado idauidau ena harihari gauna henia karana ia hadokoa, to unai diba idia do tahua taudia be dala idia kehoa Satana ia koidia totona, ia ese “hoa bona toa karadia idauidau momo dekena amo” taunimanima ia koidia.​—2 Tesalonika 2:​9, 10.

Gado Idauidau Herevalaia Karana bona Keristen Momokani Karana

Keristen ginigunadia edia nega lalonai, gado idauidau herevalaia harihari gauna idia abia taudia ese idia gaukaralaia Dirava ena hoa karadia idia hahedinaraia totona. Gau badana be gado idauidau herevalaia karana amo idia abia sivaraina ena anina idia hahedinaraia goevagoeva kamonai taudia iboudiai idia lalo-pararalaia totona bona momo edia diba habadaia totona. (1 Korinto 14:​26-33) Paulo ia sisiba, ia gwau: “Bema umui emui hereva anina be idia hedinaraia lasi, daika ese hereva ena mamina do ia abia?”​—1 Korinto 14:9.

Dirava ese Keristen ginigunadia dekenai gado idauidau herevalaia harihari gauna ia henidia, to idia herevalaia gaudia be taunimanima idia hahanaia diba, idia be hereva kavakavadia lasi. Paulo ena sisiba hegeregerena, lauma helaga ena siahu amo hereva idauidau dekenai idia hereva diba, bona unai amo sivarai namona be haraga herea “tanobada ibounai dekenai [idia] harorolaia.”​—Kolose 1:23.

Hari inai nega dokona ia herevalaia neganai, Iesu Keriso ena hahegani be inai: “[Basileia ia lohia vadaeni ena] Sivarai Namo bese ibounai dekenai be do idia haroro henia guna.” (Mareko 13:10) Keristen ginigunadia edia nega lalonai hegeregerena, tanobada ibounai dekenai Basileia ena sivarai do idia harorolaia taunimanima iboudiai do idia kamonai henia totona. Unai ia vara diba badina Bible ibounai eiava ena kahana ta be kahirakahira gado idauidau 2,000 lalonai idia hahanaia vadaeni. Keristen ginigunadia edia nega lalonai, lauma helaga ena siahu amo gari lasi dekenai gado idauidau dekenai idia hereva goadagoada diba, bona hari inai nega lalonai, unai lauma helaga ese Iehova ena Witness orea taudia ia durudia edia gaukara badana bona namona idia karaia totona. Idia ese edia uduna hereva amo, bona Bible ena hereva momokani be idia printaia buka bona magasin edia amo, “gado goevadaena” idia herevalaia. Unai sivaraina be tano bona motumotu idauidau 200 bona ma haida dekenai idia harorolaia. Ia hedinarai goevagoeva Iehova ena Witness taudia sibodia be Dirava ena lauma helaga ena siahu amo goada idia abia Dirava ena hoa gaudia idia hahedinaraia totona.​—Sefania 3:9; 2 Timoteo 1:13.

[Pictures on page 7]

Ruma ta ruma ta gaukara Japan dekenai

Bouti ta bouti ta gaukara Colombia dekenai

Henuai: Bible stadi Guatemala dekenai

Ma henuai: Gunika ai idia haroro Netherlands dekenai