Ita Hagoadaia Heheni Noho

“Hereva mirodia do umui gwauraia lasi, hereva namodia sibona. Vadaeni . . . emui hereva dekena amo manoka taudia do umui hagoadaia.”​—EFESO 4:29.

1, 2. (a) Dahaka dainai ita gwau diba herevahereva karana be hoa gauna? (b) Dahaka sisiba ita abia iseda malana ita biagua namonamo totona?

“HEREVAHEREVA karana ese turadia, ruma bese bona taunimanima ia hatamonaia . . . Iseda lalohadai bona iseda [malana] idia gaukara hebou dainai ita be lalokau, mama, hemataurai bona iseda lalohadai ena mamina idauidau ita herevalaia diba.”​—Hearing, Taste and Smell.

² Iseda malana be ita ia durua aniani ita hadonoa eiava ena mamina ita abia totona, to unai sibona lasi; ia dekena amo iseda lalohadai bona iseda lalona ena mamina be ma haida dekenai ita herevalaia diba. Iakobo ia gwau: “Mala be gau maragina.” Ma ia gwau: “Mala dekena amo iseda Lohiabada [Iehova] bona Tamana ita hanamoa noho. Bona mala dekena amo danu taunimanima, Dirava ese iena toana bamona ia karaia taudia, ita hadikaia noho.” (Iakobo 3:​5, 9) Oibe, iseda malana be dala namodia ai ita gaukaralaia diba, hegeregere Iehova ita hanamoa diba. To ita be kara dika taudia dainai, reana iseda malana ita gaukaralaia kerere, hegeregere haida ita hereva dika henidia eiava hahegoada lasi herevadia ita gwauraidia. Iakobo ia gwau: “Varavara e, inai bamona kara ia vara be dika.”​—Iakobo 3:10.

3. Iseda herevahereva lalonai dahaka gaudia rua ita lalodia be namo?

³ Ena be taunimanima ta ese edia malana idia biagua goevagoeva diba lasi, to namona be ita goada karaia ita biagua toho totona. Aposetolo Paulo ese ita ia sisiba henia, ia gwau: “Hereva mirodia do umui gwauraia lasi, hereva namodia sibona. Vadaeni emui hereva idia kamonai taudia ese durua bona namo do idia davaria, bona emui hereva dekena amo manoka taudia do umui hagoadaia.” (Efeso 4:29) Unai oda hereva ena kahana be rua: ita hekwarahi dahaka do ita karaia lasi totona bona dahaka ita karaia totona danu be namo. Namona be unai gaudia rua edia anina ita herevalaidia.

Hereva Mirodia Dadaraia

4, 5. (a) Dahaka dainai namona be Keristen taudia idia goada karaia hereva mirodia karana idia dadaraia totona? (b) Dahaka haheitalai be “hereva mirodia” danu ia hegeregere?

⁴ Efeso 4:29 be ita ia hadibaia inai bamona: “Hereva mirodia do umui gwauraia lasi.” Unai ita karaia be auka reana. Badina tamona be inai tanobada lalonai hereva mirodia gwauraia karana be ia bada momokani. Keristen memero kekeni taudia momo be nega ibounai hereva dikadia idia kamonai, badina edia sikuli turadia idia laloa unai bamona idia karaia neganai, idia be goada taudia. Hereva mirodia ita kamonai lasi be auka, to namona be ita hekwarahi hereva mirodia ita abia dae lasi totona. Iseda lalohadai dekenai bona iseda uduna dekenai idia noho be namo lasi.

⁵ Paulo ena sisiba hereva lalonai, Greek hereva ta ia gaukaralaia, ena anina be gwarume bodagana eiava au huahua dikana. Mani, inai oi laloa: Oi ese tau ta oi itaia ia badu sisina ela bona ia badu dikadika momokani. Bena ena badu ena siahu ia halasia bona oi itaia gwarume bodagana be ena uduna amo ia lasi. Bena murinai ena uduna amo bonana dika, au huahua bodagana be ia badinai idia gini taudia ibounai dekenai ia mumutaia. Ia be daika? Bema ia be ita ta, unai be dika momokani! To, bema ‘hereva miro ta be iseda uduna amo ia lasi,’ ita be unai haheitalai tauna bamona.

6. Efeso 4:29 ena anina be dahaka maumau bona hagoadaia lasi herevadia dekenai?

⁶ Efeso 4:29 ena hereva ena anina ma ta be, namo lasi nega ibounai gau iboudiai ita gwauraidia dika. Momokani, ita ibounai iseda lalohadai be idauidau bona dahaka ita ura bona ita ura lasi be idauidau, to oi be tau ta danu oi noho bona ia be taunimanima, gabu, eiava gau iboudiai dekenai hagoadaia lasi herevana (eiava hereva momo) ia gwauraia, a? (Roma 12:9; Heberu 1:9 itaia danu.) Ena hereva be ta ia moia diho, lalohisihisi ia havaraia, eiava ta ia hadikaia. (Salamo 10:7; 64:​2-4; Hereva Lada-isidia 16:27; Iakobo 4:​11, 12) Reana ia diba lasi, to ia be Malaki ese ia gwauraia gau ibounai idia gwauraia dika taudia bamona. (Malaki 3:​13-15) Bema ia badinai ia gini tauna ese ia hamaoroa, gwarume bodagana eiava au huahua bodagana ta be ena uduna amo ia lasi, do ia hoa mai gari danu!

7. Ita sibona dekenai dahaka henanadai ita henia be namo?

⁷ Ena be oi diba haraga bema tau ta ese hagoadaia lasi eiava maumau herevadia ia gwauraia momo neganai, to namona be oi sibona oi nanadaia, ‘Lau be unai bamona lau karaia, a? Momokani, lau karaia, a?’ Nega ta ta ai, iseda hereva daladia ita laloa lou be aonega karana. Idia be hagoadaia lasi herevadia momo eiava maumau herevadia momo, eiava? Iseda hereva be Iobu idia hebogahisi koikoi turadia toi edia hereva bamona, a? (Iobu 2:11; 13:​4, 5; 16:2; 19:2) Namona be taunimanima hagoadaia herevadia ita herevalaia, ani? Bema emu kiki be tau ta eiava gau ta ia maumauraia, namona be kiki do oi haidaua taunimanima hagoadaia herevadia oi gwauraia totona, ani?

8. Herevahereva karana dekenai Malaki 3:16 ese dahaka ia hadibaia ita dekenai, bona edena bamona ita hahedinaraia diba ita ese unai sisiba ita badinaia?

⁸ Malaki ese inai kara rua ia herevalaia: “Bona Iehova garina idia gari taudia idia hereva heheni, bona Iehova ese ia hakala henidia bona ia kamonai henidia. Bona Iehova garina idia gari taudia bona iena ladana idia laloa taudia edia ladana ia laloatao totona buka ta idia torea.” (Malaki 3:16) Oi itaia, Iehova ese hagoadaia herevana ia kamonai henia, ani? Reana unai herevahereva ese dahaka ia havaraia idia kamonai taudia dekenai? Unai kara ese ita ia sisiba henia dina ibounai lalonai iseda hereva do idia namo totona. Ita bona ma haida ese namo do ita davaria bema ita herevalaia gaudia be ‘Dirava dekenai hanamoa herevadia, boubou gauna ta bamona.’​—Heberu 13:15.

Oi Hekwarahi Haida Hagoadadia Totona

9. Badina be dahaka Keristen heboudia be nega namona haida ita hagoadadia totona?

⁹ Kongregesen heboudia be nega namona iseda hereva namodia amo ‘kamonai taudia ita hagoadaia bona namo idia davaria totona.’ (Efeso 4:29) Unai ita karaia diba hebou dekenai ita ese Bible dekena amo hereva ta ita henia neganai, haheitalai ta ita karaia neganai, eiava haere ita henia neganai. Unai bamona ita karaia neganai Hereva Lada-isidia 20:15 ena hereva ita hamomokania, ia gwau: “Aonega bibinadia be davana bada urona bamona.” Bona ita diba lasi taunimanima hida edia kudou ita hamarerea eiava ita hagoadaia, ani?

10. Hebou dekenai daidia oi hereva henidia oi laloa murinai, reana emu kara be edena bamona do oi haidaua be namo? (2 Korinto 6:​12, 13)

¹⁰ Hebou vairanai bona murinai be nega namona iseda hereva namodia amo ma haida ita hagoadaia totona. Unai nega be ita moalelaia bada varavara bona turadia dekenai ita haorea be ia auka lasi. (Ioane 13:23; 19:26) To, Efeso 4:29 ena hereva hegeregerena namona be ma haida ita tahua idia danu ita herevahereva totona, ani? (Luka 14:​12-14 itaia danu.) Namona be ita hegaegae kamonai matamata taudia bona buruka taudia danu ita herevahereva namonamo totona, idia dekenai hanamoa herevana ta ita gwauraia sibona lasi to ma hereva haida danu, bona memero kekeni maragidia badinai ita helai ita hereva henidia namonamo totona. Bema ita hahedinaraia unai taudia edia namo ita tahua bona nega ita atoa idia dekenai hagoadaia hereva ita henia totona, unai ese ma haida do ia hagoadaia bona idia be Salamo 122:1 dekenai David ena hereva hegeregerena do idia gwauraia diba.

11. (a) Hebou dekenai taunimanima momo be edeseniai idia helai? (b) Dahaka dainai haida idia ura gabu idauidau dekenai idia helai?

¹¹ Hagoadaia hereva gwauraia totona ita ia durua gauna ma ta be hebou dekenai gabu idauidau dekenai ita helai. Hahine ese natuna ubua totona hebou ruma dokona kahana dekenai idia helai, eiava gorere tauna be raka dalana badinai ia noho helai gauna dekenai ia helai be namo. To ita haida be edena bamona? Vaia eda kara dainai reana hanaihanai helai gauna tamona eiava gabu tamona dekenai ita helai; ita be manu bamona, hanaihanai ena ruma dekenai ia giroa lou hegeregerena. (Isaia 1:3; Mataio 8:20) To, helai gabuna be taravatu lasi dainai, namona be gabu idauidau dekenai ita helai​—idibana kahanai, laurina kahanai, vairana kahanai, bona ma gabu haida dekenai danu​—unai amo taunimanima idauidau ita tura henia namonamo diba, ani? Taravatu ia noho lasi unai bamona ita karaia totona, to elda bona lo taudia idia davaria bema edia turadia badinai idia helai sibona, unai be namo momokani lasi, to namona be ma haida badinai idia helai danu, edia hagoadaia hereva be momo dekenai idia henia diba totona.

Hagoadaia Heheni Dirava Ena Dala Dekenai

12. Idau nega amo ia mai hari taunimanima edia ura kererena ta be dahaka?

¹² Keristen tauna ia ura ma haida ia hagoadaia neganai namona be ia ese Dirava ena kara ia tohotohoa, namo lasi taunimanima edia kara ia tohotohoa, idia be taravatu momo idia karaia.a Mai edia kara dika taudia ese idau nega amo taunimanima idia biagudia toho, bona Dirava ena hesiai taudia haida be unai bamona idia karaia toho danu. (Genese 3:16; Kohelete 8:9) Iesu ena nega lalonai, Iuda tomadiho gunalaia taudia ese ‘huaia gaudia mai metau danu taunimanima latanai idia atoa, to heduru taina idia henia lasi.’ (Mataio 23:4) Idia ese kastom namodia idia gwauraidia do idia karaia hanaihanai taravatudia. Taunimanima idia gwauraia taravatu idia laloa momo dainai, Dirava ia gwauraia mai anina bada gaudia idia lalodia lasi. Bible ia gwauraia lasi taravatudia momo idia gwauraia karana ese taunimanima idia durudia lasi; idia abia hidi dalana bona Dirava ia abia hidi dalana be idia idau.​—Mataio 23:​23, 24; Mareko 7:​1-13.

13. Dahaka dainai tadikaka ese taravatu momo idia gwauraia edia Keristen bamodia idia badinadia totona be namo lasi?

¹³ Keristen taudia idia ura momokani Dirava ena taravatu idia badinadia. To, ita danu ita kerere bona taunimanima hametaua taravatudia ita gwauraia diba. Badina be dahaka? Gau tamona be, iseda ura be idauidau, haida idia ura henia gaudia be reana ita ura henidia lasi, bona ita laloa namona be idia karaia lasi. Keristen taudia edia tubu lauma dalanai be idauidau danu. To momokani, taravatu momo gwauraia karana ita karaia, ta ita durua bona ita hagoadaia totona, be Dirava ena dala, a? (Filipi 3:15; 1 Timoteo 1:19; Heberu 5:14) Ena be tau ta ese ia karaia gauna be idau bona unai dala amo reana dika ia davaria diba, to unai kara taravatulaia be dala namona unai tau durua totona, a? Dirava ena dala be diba taudia ese unai raka kerere tauna idia hakaua lou totona, mai manau danu idia durua toho.​—Galatia 6:1.

14. Dirava ese Israel dekenai ia henia taravatudia edia badina be dahaka?

¹⁴ Momokani, iena Israel bese taudia ia gaukaralaidia neganai, Dirava ese idia dekenai taravatu handred momo ia henia, dubu ena tomadiho, boubou karadia, bona danu tauanina hagoevaia karadia idia badinaia totona. Unai be maoro badina idia be bese badana bona idauna dainai, bona unai taravatu momo herea ese kara haida idia perovetalaia bona idia be heduru gauna badina Iuda taudia ia hakaudia Mesia dekenai. Paulo ia torea, ia gwau: “Taravatu be iseda naria tauna bamona, ia mai bona Keriso ia ginidae. To Keriso ia ginidae neganai abidadama dekena amo Dirava vairanai do ita maoromaoro diba. Harihari be abidadama ena nega ia ginidae vadaeni, Taravatu ese ita do ia naria lou lasi.” (Galatia 3:​19, 23-25) Taravatu ena siahu be hisihisi auna dekenai ia ore murinai, Dirava ese Keristen taudia dekenai mauri ena kara ibounai dekenai taravatu momo ia henidia lasi, badina unai be abidadama hagoadaia noho dalana lasi.

15. Keristen tomadiho taudia durudia totona, Dirava ena sisiba idia dekenai be dahaka?

¹⁵ Momokani, taravatu haida idia noho ita badinaia totona. Dirava ese ita ia hagania kaivakuku ita tomadiho henia lasi, sihari kava, heudahanai, bona rara gaukaralaia kerere karadia ita dadaraia totona. Ia ese ala-ala, koikoi, lauma dikadia hereva henia, bona dika karadia ma haida ia taravatulaidia. (Kara 15:​28, 29; 1 Korinto 6:​9, 10; Apokalupo 21:8) Bona iena Hereva lalonai hereva idauidau dekenai ita ia henia sisiba ibounai be hedinarai herea. To, Israel taudia edia kara ita hanaia, ita be mai iseda maduna bada Bible ena taravatu ita diba bona ita badinadia totona. Elda taudia ese haida idia hagoadaia dalana ta be idia durudia unai taravatu edia badina idia diba totona, taravatu sibona idia lalodia eiava idia karaia be namo lasi.

Goada Idia Havaraia Elda Taudia

16, 17. Idia bamoa tomadiho taudia dekenai taravatu henia karana dekenai aposetolo taudia edia haheitalai namona be dahaka?

¹⁶ Paulo ia torea, ia gwau: “Gau badana be inai: guna ita abia dae dalana do ita badinaia noho be namo.” (Filipi 3:16) Unai hereva hegeregerena, aposetolo Paulo ese Dirava ena lalohadai hegeregerena taunimanima ia kara henidia idia ia hagoadaia totona. Hegeregere, inai henanadai ta ia vara: Kaivakuku tomadiho henia dubuna dekena amo vamu idia ania be maoro eiava lasi? Unai elda tauna be lalo-tamona idia abia totona taravatu tamona ia gwauraia kongregesen iboudiai do idia badinaia totona, a? Lasi. Ia hahedinaraia Keristen taudia edia diba bona edia goada lauma dalanai be idia idauidau, unai dainai haida dekenai unai vamu idia ania be namo to ma haida dekenai ia namo lasi. To, ia ura sibona ena haheitalai do ia namo tadikaka ese idia tohotohoa totona.​—Roma 14:​1-4; 1 Korinto 8:​4-13.

¹⁷ Keristen Greek Revarevadia ese idia hahedinaraia aposetolo taudia ese sisiba namodia idia henia taunimanima durudia totona, sisiba haida be dabua bona heduari karadia dekenai, to unai gaudia dekenai taravatu idia gwauraia lasi. Hari inai nega lalonai, unai sisiba badinaia karana be haheitalai namona Keristen naria taudia dekenai, badina idia ura orea taudia idia hagoadaia. Bona Dirava ese unai dala ia gwauraia idau negai Israel taudia ia durudia totona.

18. Iehova ese Israel taudia dekenai dahaka taravatu ia henia edia dabua dekenai?

¹⁸ Dirava ese Israel taudia dekenai taravatu momo dabua dekenai ia henidia lasi. Unai nega lalonai tatau bona hahine edia dabua toana be tamona, to reana hahine edia dabua dekenai ma gau haida idia turia kau eiava ena kala be idauidau. Tatau bona hahine danu be edia dabua henunai sa·dhinʹ, eiava piripou, idia karaia. (Hahemaoro Taudia 14:12; Hereva Lada-isidia 31:24; Isaia 3:23) Dabua dekenai Dirava ese ia gwauraia taravatudia be dahaka? Tatau be hahine edia dabua idia karaia lasi bona hahine be tatau edia dabua idia karaia lasi, badina reana unai be tatau be tatau danu bona hahine be hahine danu mahuta hebou karana ena toana. (Deuteronomi 22:5) Edia kara be idia kahirakahira dekenai idia noho idau bese taudia edia kara amo idia idau idia hahedinaraia totona, Israel taudia be edia dabua rimuna idia karaia, bona unai rimuna ataiai varo gadokagadokana idia turia kau, bona reana edia kouti daiguni dekenai varo kwatukwatu herahera gaudia idia turia kau. (Numera 15:​38-41) Dirava ena Taravatu dabua ena sitailo dekenai be unai sibona.

19, 20. (a) Dabua bona iduari dekenai Bible ena sisiba Keristen taudia dekenai be dahaka? (b) Namona be haida edia dabua dainai taravatu karaia dekenai elda taudia edia lalohadai be dahaka?

¹⁹ Ena be Keristen taudia be Taravatu henunai idia noho lasi, to dabua bona herahera gaudia dekenai Bible ena taravatu ma haida idia noho do ita badinadia totona, a? Lasi. To, Dirava ese dala maorodia ia gwauraia ita tohotohodia totona. Paulo ia torea, ia gwau: “Lau ura danu hahine taudia ese mai manau bona mai hemataurai danu dabua do idia kwatua. Edia huina danu herahera bamona karaia momo lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi.” (1 Timoteo 2:9) Petro ese Keristen hahine ia hagoadadia tauanina ena herahera gaudia idia laloa bada lasi totona, ia gwau edia ‘hairai korikori be edia lalona dekenai ia noho. Herahera namodia, do idia dika diba lasi gaudia, hegeregere laloa manau . . . edia lalona dekenai do idia atoa.’ (1 Petero 3:​3, 4) Unai sisiba idia torea ese ia hahedinaraia Keristen ginigunadia edia nega lalonai, haida be edia dabua bona heduari dekenai hemataurai kara bada idia karaia lasi. Ena be aposetolo taudia idia haganidia lasi, eiava taravatu idia henidia lasi sitailo haida idia karaia lasi totona, to idia ia hagoadaia sisiba herevana idia henidia.

²⁰ Edia dabua be mai hemataurai danu idia karaia dainai, taunimanima ese Iehova ena Witness taudia idia matauraidia bona unai be namo. To, tano idauidau, gabu idauidau, bona kongregesen idauidau dekenai sitailo karadia be idauidau. Momokani, elda tauna be mai ena maoro ia sibona bona ena ruma bese taudia totona dabua dekenai ena lalohadai ia gwauraia hedinarai. To, orea taudia ma haida edia kara ia laloa neganai, namona be Paulo ena hereva ia laloatao, ia gwau: “Ai ese umui emui abidadama ai biagua lasi. Ai diba umui emui abidadama lalonai umui gini goada noho. Unai dainai ai be umui danu ita gaukara hebou, emui moale do ai havaraia totona.” (2 Korinto 1:24) Oibe, elda taudia ese kongregesen taudia totona taravatu idia atoa karana idia dadaraia, namona be idia hekwarahi kongregesen taudia edia abidadama karana idia hagoadaia totona.

21. Ta ena dabua ia idau momokani neganai, elda taudia be edena bamona hagoadaia hereva idia henia diba ia idia durua totona?

²¹ Keristen ginigunadia edia nega lalonai hegeregerena, nega ta ta ai vareai matamata eiava lauma dalanai ia manoka hahine eiava kekeni ena dabua, ena vairana penia karana, eiava herahera gaudia atoa karana be ia namo lasi eiava aonega lasi karana. Vadaeni, dahaka ia vara? Galatia 6:1 ena sisiba ese heduru idia tahua Keristen elda taudia ia durudia. Elda ese heduru tau ta ia do henia lasi neganai, aonega dalana be elda ma ta danu unai kara idia kikilaia hebou guna, namona be iena lalohadai bona iena ura hegeregerena ia abia dae elda tauna ta dekenai ia lao lasi. Bema kongregesen lalonai tadikaka bona taihu momo ese tanobada gunana ena dabua bona iduari idia tohotohoa, kongregesen ena elda orea taudia do idia hebou edena bamona idia durudia diba do idia kikilaia namonamo totona, hegeregere hebou dekenai mai ena hebogahisi, hagoadaia herevana ta idia dekenai do idia henia eiava ta ta iboudiai sibona sibona dekenai idia lao, heduru hereva idia henia totona. (Hereva Lada-isidia 24:6; 27:17) Idia ura ta ta iboudiai idia hagoadaia 2 Korinto 6:3 ena hereva idia badinaia totona, ia gwau: “Kara ta ai karaia lasi, tau ta ena mauri hadikaia totona. Oibe, tau ta ai hadikaia lasi, do idia gwau aiemai gaukara be dika garina.”

22. (a) Bema haida edia lalohadai idia idau sisina, dahaka dainai unai be gau badana ta lasi? (b) Paulo ena haheitalai namona be dahaka?

²² Keristen elda taudia ese ‘Dirava ia henidia mamoe orea do idia naridia namonamo’ totona, namona be Petro ena hereva idia badinaia, ia gwau ‘lohia bamona emui orea do umui gunalaia lasi.’ (1 Petero 5:​2, 3) Mai edia lalokau danu edia gaukara idia karaia noho neganai, reana gau haida dekenai henanadai do idia vara bona edia lalohadai unai gaudia dekenai do idia tamona lasi. Reana oiemu gabu dekenai tadikaka edia kara be idia gini toreisi Gima Kohorona Stadi ena paragraf idia duahidia totona. Reana nega idia gwauraia haroro totona ita hebou bona haroro gaukara karaia totona kara idauidau idia hegaegaelaia. To, bema ma gabu ta dekenai idia karaia negana bona dalana be ia idau sisina unai be ia kerere, a? Mai edia lalokau naria taudia idia ura “gaukara ibounai [idia] karaia namonamo,” Paulo be lauma ena harihari hoa gaudia be unai bamona ia herevalaidia. To, unai karoa ena hereva ma haida idia hahedinaraia Paulo ia laloa bada gaukarana be ‘kongregesen taudia do ia hagoadadia.’ (1 Korinto 14:​12, 40) Ia ese taravatu momo karaia karana ia ura lasi, iboudiai be kara tamona bona gaukara karaia dalana tamona idia karaia ia laloa bada lasi. Ia torea, ia gwau: “Lohiabada ese ai dekenai siahu ia henia, umui emui abidadama do ai hagoadaia totona. Inai siahu be umui hadikaia totona lasi.”​—2 Korinto 10:8.

23. Paulo ese taunimanima ia hagoadaia noho, to ia ita tohotohoa diba daladia haida be dahaka?

²³ Ita daradara lasi, Paulo be mai goada danu bona hereva namodia amo ia hekwarahi taunimanima ma haida do ia hagoadadia totona. Ia bamoa taudia be iena turadia mo sibona lasi, to dala ia tahua tadikaka bona taihu idauidau ia vadivadi henidia totona, idia haida be lauma dalanai idia goada taudia bona idia haida be manoka taudia danu, to iboudiai ia hagoadadia. Bona ia ese lalokau karana ia gwauraia momo​—taravatu ia gwauraia momo lasi—​badina “lalokau ese goada ia havaraia noho.”​—1 Korinto 8:1.

[Footnotes]

Hereva Badadia Ita Riviulaia

◻ Bema hagoadaia lasi hereva eiava maumau herevadia ita gwauraia dahaka dainai unai kara ita haidaua be namo?

◻ Dahaka ita karaia diba kongregesen lalonai hagoadaia hereva ena kara ita habadaia totona?

◻ Taravatu karaia taunimanima ma haida idia badinaia totona ena kara be Dirava ena kara, a?

◻ Dahaka ese elda taudia ia durudia bena idia ese taunimanima edia taravatu idia karaia lasi orea taudia idia badinaia totona?