Ita Ia Karaia Diravana Badana Ita Moalelaia
“Israel ese ia ia karaia Diravana do ia moalelaia; Siona ena natunaese edia Pavapava do idia moalelaia.”—SALAMO 149:2.
1. Ena be haida ese edia ura-kwalimu matamatana idia boiboilaia, to taunimanima edia noho be edena bamona?
HARI inai negai “hisihisi” momo be tanobada ai idia vara. Iesu ese ia herevalaidia, “tanobada dokona” negana ia perovetalaia neganai. Inai nega be lagani 1914 ai ia matama, tanobada ibounai tuarina ginigunana ia vara neganai. (Mataio 24:3-8) Politik taudia momo idia laloa nega vairai dika sibona do ia vara. Ena be Eastern Europe ai taunimanima ese edia ura-kwalimu matamatana idia boiboilaia, to unai gabu ena presiden gunana ta ia gwau: “Taunimanima idia momo daekau haraga herea, tanobada ena hodahoda idia hadikaia, AIDS gorerena ia vara, idia gari haida ese niuklia bomu amo do idia hadikadia garina, taga besedia edia taga ia bada ia lao bona ogogami besedia edia ogogami ia bada ia lao, doe idia vara, mauri gaudia edia bese haida idia haoredia bona tanobada ena auri idauidau idia haoredia noho, televisen amo taunimanima momo edia noho idia haidaua, bona tuari maragidia momo idia vara—unai iboudiai, bona ma gau tausen tausen, ese tanobada taudia do idia hadikadia diba.” Unai gau, taunimanima do idia hadikadia ore diba gaudia, be idia ese idia kokidia diba lasi.—Ieremia 10:23.
2 To ita moale, badina be iseda Dirava Badana ese do ia haoredia ela bona hanaihanai. Iesu ia peroveta, ia gwau “tanobada dokona” neganai do ia “giroa mai.” (Mataio 24:3, 37-39) “Guba matamata” karaia totona, guba ai Iehova ese Iesu na ena terona ai ia hahelaia, Mesia Pavapavana ai ia halaoa. Peroveta herevadia ese idia hahedinaraia lagani 1914 lalonai unai bamona ia karaia. (2 Petero 3:13) Hari inai negai Iesu be Pavapava Badana Iehova ida idia lohia hebou, bona Iehova ese siahu ia henia, tanobada besedia do ia hahemaoro henidia, bona mamoe bamona taudia mai manaudia bona nanigosi bamona taudia mai lalo-aukadia do ia hapararadia. “Nanigosi” be “davana ia dika hanaihanai gabuna” do idia lao, bona “mamoe” be mauri hanaihanai do idia abia, Basileia ese do ia lohiaia tanobadana ai.—Mataio 25:31-34, 46.
3 Lauma Israelana orena taudia tanobada ai idia noho, bona unai mamoe hutuma bada herea mai edia kamonai danu, ese Iehova, noho hanaihanai Pavapavana, idia moalelaia, badina be iena Natuna ena Basileia amo iena palani namodia ia hagugurudia noho. Idia gwau: “Lau ese Iehova do lau moalelaia bada. Egu souli ese egu Dirava do ia moalelaia. Badina be ia ese hahemauri dabuadia ai lau ia hadabualaia . . . Tano ese tuhutuhu ia havaradia bona uma ese ia lalonai idia hadodia gaudia ia hatubudia bamona, Pavapava Badana Iehova ese kara maoromaoro bona hanamoa herevadia unai bamona do ia havaradia, bese iboudiai vairadiai.” (Isaia 61:10, 11) Unai hegeregerena, taunimanima milion milion be bese iboudiai edia amo hari idia gogodia noho, Iehova hanamoa anedia do idia abidia totona.
‘Ia Haharagaia Noho’
4 Satana ena tanobada ena dokona be ia kahirakahira dainai, iseda Dirava Badana ese gogodia gaukarana ia haharagaia. Ia gwau: “Emu taunimanima iboudiai do idia kara maoromaoro . . . , lau hadoa uhena, lauegu imana gaukarana, lau do idia hahairaia totona. Maragina be wan tausen ai do ia lao, bona maragimaragina be bese badana ai do ia lao. Lau, Iehova, be ena nega korikori ai do lau haharagaia.” (Isaia 60:21, 22) Iehova ena Witness Taudia Edia Lagani 1992 ena Haroro Gaukara Ripoti, inai magasin ena rau 12 ela bona 15 ai ia hedinarai, ese ia hahedinaraia goevagoeva ia ese unai bamona ia haharagaia.
5 Ripoti ese ia hahedinaraia gauna badana be inai: Basileia harorolaia taudia idia momo daekau ela bona 4,472,787; anina be 193,967 amo idia momo daekau, lagani gunana ena namba be 4.5 pesen amo idia hanaia unai. Lagani 1992 ai 301,002 ese bapatiso idia abia; unai danu ese ia hahedinaraia momo herea ese Baibel ena hereva idia abia dae. Ita moale, badina be inai “dibura dinana lalonai, . . . bese badana mai ena siahu,” kwadi oreana badana hegeregerena, ese Basileia idia harorolaia “ia lao bona tanobada ena kahana ibounai”! (Ioel 2:2, 25; Kara 1:8) Alaska ai Watch Tower Society ena peleini be nega 50 bamona ia lao sinou ia koua gabudia ai. Unai keru gabuna amo ela bona Mali bona Burkina Faso edia siahu gabudia bona Micronesia ena motumotu maragidia, Iehova ena hesiai taudia be “bese idauidau edia diari” bamona idia tara, “[iena] hahemauri be tanobada dokona ai do ia lao totona.”—Isaia 49:6.
6 Kohoro aukana ta bamona Iehova ese ena orea taudia ia naridia bona ia hagoadadia. Tanobada ena kahana momo ai, nega daudau lalonai Iehova ena Witness taudia ese dagedage bada idia haheaukalaia. (Salamo 37:39, 40; 61:3, 4) To vanegai, tano 21 ai, gavamani ese guna idia koulaidia taravatudia idia kokidia, unai dainai Dirava ena orea taudia be idia haroro diba, idia gwau iseda Dirava Badana ese Keriso na tanobada ena pavapava ai ia halaoa vadaeni.—Salamo 2:6-12.
7 Iehova ena orea taudia ese edia ura-kwalimu matamatana idia gaukaralaia namonamo a? Ripoti ese ia hahedinaraia, Eastern Europe lalonai, Bulgaria bona Romania ai, bona Soviet Union be guna ia noho gabudiai, idia momo daekau, bona Africa lalonai, Angola, Benin, and Mozambique ai danu. Zaire ai danu idia momo daekau haraga. Mai edia moale ida iseda tadikaka be inai salamo ena hereva bamona idia karaia: “Iehova umui hanamoa, badina be ia be namo . . . Sibona hoa bada karadia ia karaia Diravana umui hanamoa; badina be ena hebogahisi be ia hesiriu hanaihanai.” (Salamo 136:1, 4) Ia idia hanamoa totona, mamoe bamona taudia ma haida be Basileia ena kaha ai idia gogodia.
8 Europe lalonai, komiunisi gavamanidia ese guna idia naridia tanodia ai, taunimanima momo herea be Iehova ena orea taudia edia hebouhebou ai idia hebou, bona ripoti ese ia hahedinaraia bamona, momo herea idia bapatisodia. Unai hegeregerena, Togo, Africa ai, taravatu idia kokia December 10, 1991 ai. Bena hua tamona mo murinai hebouhebou idia karadia. Ena be pablisa taudia edia averes be 6,443 mo, to taunimanima 25,467 be unai hebouhebou ai idia hebou, bona 556 be bapatiso idia abia; anina be pablisa 100 100 amo 86 86 ese. Isaia 60:8 ena hereva hegeregerena, “pune ese edia ruma edia matu maragidia idia roho henidia bamona,” Iehova hanamoa taudia matamatadia be Iehova ena orea taudia edia kongregesen lalodiai idia vareai.
9 Eastern Europe bona Africa ai, lauma anianina hitolona idia hitolo taudia be idia ubulaidia noho. Watch Tower Society ena faktori, Germany, Italy, bona South Africa ai, ese buka bona magasin, gado idauidau gaudia, na taraka momo ai idia udadia bena idia siaidia idia dekediai. Guna, Witness taudia momo ese magasin idia abidia diba lasi sibodia edia, to hari idia ese lauma anianina momo idia abia. Idia moale, badina be inai peroveta herevana ia momokani idia ediai: “Do umui aniani, do umui boga-kunu, bona Iehova, emui Dirava, ena ladana do umui hanamoa; ia ese hoa karadia umui dainai ia karadia.”—Ioel 2:26.
Orea be Ma Ia Bada Ia Lao Dainai Idia Karaia Karadia
10 Tanobada ibounai lalonai Iesu ena mase laloa totona idia hebou taudia edia momo, 11,431,171, ita hoalaia. Lagani gunanai idia hebou taudia edia momo be 781,013 amo idia hanaia, 7.3 pesen unai. Umui mai matamata taudia iboudiai e, namo! Kamonai matamata taudia iboudiai be Iehova ena Witness taudia ese do idia stadi henidia be namo! (Isaia 48:17 itaia.) Ripoti ese ia hahedinaraia stadi 4,278,086 be hua ta ta iboudiai idia karadia, 8.4 pesen amo idia hamomodia unai. To unai kamonai taudia momo be unai heduru do idia abia be namo. Iehova ena Witness taudia edia lalodia idia hegeregere, Baibel stadi be edia ruma ai do idia karaia, davana lasi; unai amo do idia durudia, mauri hanaihanai ia lao henia dalana ai do idia raka goadagoada matamaia totona. (Ioane 3:16, 36) Stadi ta oi noia be namo, ani? Kingdom Hall ai oi do idia abia dae mai edia lalokau ida!—Salamo 122:1; Roma 15:7.
11, 12. (a) Tano haida ai dahaka idia hekwarahilaia? (b) Moni momo tanodia bona ogogami tanodia be edena bamona idia ‘hahegeregeredia’?
11 Kongregesen momo be mai edia Kingdom Hall namodia, to tano haida ai gavamani ese Witness taudia edia tomadiho idia taravatulaia dainai, lagani momo lalodiai orea maragidia ai idia hebou hehuni. Hari inai negai, unai tano haida ai idia be mai edia ura-kwalimu, to edia Kingdom Hall be momo lasi. Africa tanona ta ai, kongregesen 93 ese Kingdom Hall toi idia gaukaralaidia. Unai dainai hebou momo be tano paka ai idia karaia. Reana kongregesen ta taudia be 150, to taunimanima 450 bamona be edia hebou ai idia vareai.
12 Eastern Europe ai, tano idia hoia o ruma idia haginia be auka, to idia kwalimu noho. Poland ai, branch rumana matamatana namona be November 28, 1992 ai idia hahelagaia gwauraia. Iehova ena Witness taudia be tanobada ibounai lalonai idia karaia gaukarana durulaia totona idia henia badabada monina, be idia gaukaralaia, Kingdom Hall bona ruma idaudia haginidia totona. Witness taudia iboudiai idia “hegeregere,” badina be ‘mai edia gau’ taudia idia harihari bada; unai amo idia ese ogogami tanodia ai idia noho taudia idia durudia.—2 Korinto 8:13, 14.
Hora Bilion Ta!
13 Hora bilion ta be edena bamona do oi haoredia? Mauri hanaihanai do idia abia taudia iboudiai ese unai hora iboudiai bona ma momo danu be Iehova ena hesiai lao henia karana namona ai do idia haoredia diba. To Iehova ena orea taudia be unai hora iboudiai lagani 1992 lalonai idia haoredia! Basileia harorolaia taudia edia ripoti iboudiai ai haboudia neganai, ai davaria idia ese hora 1,024,910,434 na iseda Dirava Badana hanamoa gaukarana hereadaena lalonai idia haoredia; taunimanima vairadiai bona ruma ta ta ai idia hahediba. (Kara 20:20) Hua ta ta iboudiai, 4,289,865 be idia ripoti. Idia haida ese Basileia gaukarana idia karaia badabada diba lasi; taudia be inai: Famili kwaradia, idia edia ruma taudia idia naridia bona idia ubudia; taunimanima burukadia; gorere taudia; bona memero kekeni, idia do sikuli noho taudia. To idia ta ta iboudiai edia ripoti ese edia lalokau Iehova enai idia hahedinaraia.—Luka 21:2-4 itaia.
14 Uru matamatana be idia tubu daekau noho neganai, Iehova ena hesiai idia lao henia, bona ita moale badina be idia momo ese Solomon ena hereva ta idia badinaia: “Oi ia karaia Diravana Badana be emu tauhau dinadia ai oi laloatao.” (Kohelete 12:1) Edia sikuli gaukarana idia goadalaia, bona edia tamadia sinadia ese lauma gaudia idia hadibalaidia. Ita moale, badina be vanegai memero bona kekeni momo be hebouhebou ai idia gini, bapatiso idia abia totona. Bona ita moale, badina be idia momo ese moni gaukaradia idia dibalaidia, unai amo idia hegaegae, sikuli amo do idia doko neganai pioneer gaukarana do idia karaia totona. Edia dabu gaudia be sibodia edia imadia gaukaradia amo do idia abidia, aposetolo Paulo ese palai rumadia karaia gaukarana amo ia karaia bamona.—Kara 18:1-4.
15 Pioneer taudia bona Dirava ena hesiai idia lao henia hanaihanai taudia ma haida ese Basileia gaukarana ena anina idia habadaia momokani! Lagani 1992 lalonai pioneer taudia idia momo daekau ela bona 931,521. Ruma ta ruma ta ai idia haroro noho bona Baibel stadi be taunimanima edia ruma lalodiai idia karadia noho, unai dainai Baibel ena hereva idia gwauraia goevagoeva diba. Momo idia hegeregere do idia lao Pioneer Gaukara School; unai sikuli ese ia durudia, edia diba bona edia moale Dirava ena gaukara enai idia habadaia totona.
16 Unai pioneer taudia ta ta iboudiai be Isaia 50:4 ena hereva idia hamomokania diba: “Ia hadibadia taudia edia malana be Pavapava Badana Iehova ese lau ia henia, hesiku tauna be egu hereva amo do lau haere henia totona.” Hari inai negai taunimanima momo ese inai tanobada dikana idia hesikulaia, to iseda pioneer taudia edia hereva ese idia hagoadadia lou.—Hereva Lada-isidia 15:23; Esekiel 9:4 itaia.
Ruma Haginidia Gaukarana Badana
17 Tanobada hegegemadai Iehova ena Witness taudia edia lauma tagana be ia bada ia lao dainai, idia ese printa rumadia, opesi rumadia, bona Betele rumadia idia habadadia, bona Kingdom Hall bona Assembly Hall idia haginidia danu. Unai bamona gaukarana be King Solomon ena nega lalonai idia karaia. Solomon ese Iehova ena dubu helagana ia karaia, Dirava ese ena lauma helaga amo Solomon ena tamana, King David, ia hadibalaia palanina hegeregerena. (1 Sisiga 28:11, 12) Solomon ese ena aonega herevadia amo taunimanima ia hagoadadia sibona lasi, to ia ese danu ruma namo hereadia haginidia gaukarana ia biagua; unai ruma ese tanobada taudia idia haginidia rumadia iboudiai idia hereadia.—1 Hanua Pavapavadia 6:1; 9:15, 17-19.
18, 19. (a) Iehova ena orea taudia ese dahaka dahaka idia haginidia haraga noho? (b) Unai gaukara lalonai Iehova ena lauma be edena bamona ia hedinarai?
18 Hari inai negai, Iehova ena Witness taudia be Dirava ese ena lauma amo ia hahedinaraidia palanidia hegeregeredia ruma idia haginidia lasi; gau tamona Dirava ena lauma idia abia. Israel ena nega lalonai hegeregerena, unai ese ia hasiahudia, tanobada taudia ese idia hoalaia dalanai ruma idia haginidia totona. (Sekaria 4:6) Nega be ia kwadogi. Kingdom Hall bona ruma ma haida idia haginidia haraga be namo. Hanaia laganidia 10 lalodiai Canada ai hall 306 idia haginidia; ta ta be dina rua lalodiai idia haoredia. Tanobada hegegemadai Iehova ena gaukara ia bada ia lao haraga dainai, tano 43 ai branch rumadia idia haginidia noho o idia habadadia noho, eiava unai gaukara idia palanilaia noho. Brooklyn ai ruma ta mai ena sitori 30 be kahirakahira do idia haorea; Betele taudia daha ta bamona ese do idia noholaia. New York State ai, Patterson ai, Baibel hahedibalaia gabuna ta idia karaia noho; unai gaukara be bada herea, Watch Tower Society ena gaukara gunadia iboudiai ia hereadia.
19 Unai gaukara idia karaia namo herea dainai, tanobada ena kampani, unai gaukara idia diba momo oreadia, ese idia hoalaia. Badina be dahaka? Badina be Iehova ena Witness taudia idia heduru bada mai edia lalodia iboudiai ida dainai. Iena lauma ese ia hasiahudia dainai, edia moni mo sibona lasi, to edia nega bona edia goada danu idia hedurulaia. Edia gaukara idia diba goevagoeva taudia idia gaukara goadagoada; idia sitraiki lasi bona gaukara ai idia lahedo lasi. Iehova ena lauma ese ia hasiahudia, Mose ena negai kalaga helagana idia karaia taudia bona Solomon ena negai dubu idia haginia taudia ia hasiahudia hegeregerena. Unai gaukara taudia be lauma dalanai idia goada be gau badana.—Esodo 35:30-35; 36:1-3; 39:42, 43; 1 Hanua Pavapavadia 6:11-14 itaia.
20. (a) Sivarai namona do idia harorolaia ela bona edena negai? (b) Iehova ena taunimanima ese dahaka hahenamo do idia abia?
20 Dubu ia haorea murinai, Solomon ese ruma ma haida ia haginidia, bona hanua haida danu. (2 Sisiga 8:1-6) Ita diba lasi witness taudia be edena bamona do idia momo daekau bena unai dainai hall bona ruma ma haida do idia haginidia be namo. To ita diba, inai Basileia sivaraina namona be Iehova ena oda hegeregerena do idia harorolaia guguru neganai, dokona, “hisihisi bada herea” unai, be do ia ginidae. (Mataio 24:14, 21) Tanobada hadikaia karana do ia ore, bena Iehova ena “guba matamatana bona tanobada matamatana” ese hahenamo momo do idia mailaidia taunimanima dekediai. Unai dainai namona be ita ese ‘Dirava ia karadia noho gaudia do ita moalelaidia,’ bona ita ia karaia Diravana Badana do ita hanamoa bada!—Isaia 65:17-19, 21, 25.
Oi Gwauraia Hedinarai Diba A?
◻ Badina be dahaka iseda Dirava Badana ita moalelaia?
◻ Dahaka dahaka be lagani 1992 lalonai idia momo daekau?
◻ Haroro gaukarana be guna idia taravatulaia tanodia ai, dahaka hahenamo idia abidia?
◻ Memero kekeni bona pioneer taudia ese Iehova ena orea habadaia gaukarana edena bamona idia durua?
◻ Iehova ena orea taudia ese ruma haginidia gaukarana bona lauma gaukarana danu edena bamona idia goadalaidia?
2. Daika ese taunimanima edia hekwakwanai ia haoredia diba, bona dahaka ia karaia vadaeni?
3. Dahaka dainai Keristen taudia momokanidia idia moale?
4, 5. (a) Dirava ese ena taunimanima gogodia karana edena bamona ia perovetalaia? (b) Lagani 1992 lalonai edena bamona idia momo daekau?
6, 7. Dahaka hoa gauna be vanegai ia vara, bona unai dainai Iehova ena hesiai taudia be dahaka idia karaia?
8. Edena bamona Iehova hanamoa taudia matamatadia be “ori bamona idia heau mai” Eastern Europe ai? Africa ai?
9. Dahaka idia karaia, Keristen taudia unai bamona tanodia ai idia noho be ‘do idia aniani, do idia boga-kunu’ totona?
10.Momo herea be Memorial ai idia hebou dainai, kamonai taudia iboudiai edena bamona ita boiridia?
13. Lagani 1992 lalonai daidia be haroro bona hahediba gaukaradia ai idia hekwarahi, bona idia be hora hida unai gaukara ai idia haoredia?
14. Memero kekeni ese ‘ia karadia Diravana Badana’ edena bamona idia laloatao?
15, 16. Pioneer taudia bona Dirava ena hesiai idia lao henia hanaihanai taudia ma haida ese Basileia gaukarana ena anina edena bamona idia habadaia, bona haida ese dahaka hahenamo idia abia?
17. Vanegai laganidia lalodiai dahaka idia haginidia?
[Box on page 17]
Lagani gunanai hora bilion ta mai kahana be haroro bona hahediba gaukarana ai idia haoredia
[Chart on page 12-15]
IEHOVA ENA WITNESS TAUDIA EDIA LAGANI 1992 ENA HARORO RIPOTI
(For fully formatted text, see publication.)
[Picture on page 10]
Lagani gunanai 301,002 idia bapatisodia; unai ese ia hahedinaraia Iehova ese haroro bona hahediba gaukarana ia hanamoa
[Picture on page 16]
Memero kekeni momo ese ‘ia karadia Diravana Badana’ idia laloatao