Iseda Dirava Badana ida Mamoe Idia Naridia
“Lau ia naria Tauna mamoe naria tauna bamona be Iehova. Gau ta ai do lau dabu lasi. Lauegu mauri ia hagoadaia. Kara maoromaoro daladia ai ia ese lau ia hakaua, iena ladana dainai.”—SALAMO 23:1, 3.
1. Iehova ese ita edena bamona ia hagoadaia mai ena lalokau ida?
SALAMO 23, “David ena ane ta,” ese hesiku taudia momo ia hagoadadia vadaeni, edia lalodia be Sa 23 siri 6 ena hereva hegeregerena do idia goada totona: “Momokani, namo bona hebogahisi ese lau do idia gavaia, egu mauri dinadia iboudiai; bona Iehova ena ruma ai do lau noho hanaihanai.” Oi danu oi ura Iehova ena dubu ai do oi noho ela bona hanaihanai bona iena orea taudia ida do umui lalo-tamona, a? Emui mauri naridia Tauna, iseda Dirava Badana, Iehova Dirava, ese oi do ia durua unai bamona do oi karaia totona.—1 Petero 2:25.
2, 3. (a) Iehova ese ena orea taudia edena bamona ia naridia mai ena lalokau ida? (b) Iehova ena “seri” be edena bamona ia bada ia lao?
2 “Guba matamata bona tanobada matamata” ia karadia Diravana be Keristen ekalesiana ena Biaguna bona ena Naria Tauna Badana. (2 Petero 3:13; 1 Timoteo 3:15) Ia ese ena orea taudia naridia gaukarana ia laloa bada, Isaia 40:10, 11 ena hereva hegeregerena: “Itaia! Pavapava Badana Iehova be mai ena siahu ida do ia mai, . . . ena seri do ia naria, mamoe naria tauna bamona. Ena imana amo mamoe natudia do ia gogodia; bona ena kemena ai do ia rosidia lao. Rata idia henia mamoedia be metairametaira do ia hakaudia.”
3 Hari “seri” lalonai be nega daudau Keristen herevana momokanina ai idia raka taudia bona “mamoe natudia,” vanegai ia gogodia gaudia unai—idia momo be hari idia bapatisodia, Africa bona Eastern Europe ai. Iehova ese ena imana goadana amo ia naridia bona ena kemena ai ia rosidia. Ena be guna idia be boio mamoedia bamona, to hari idia be edia Dirava bona Naridia Tauna ida idia hetura heheni.
Iehova ida Ia Gaukara Hebou Tauna
4 Guba ai iena Tamana ena idiba kahanai ia gaukara tauna, ‘mamoe naridia tauna namona,’ Iesu Keriso, danu ese “mamoe” ia naridia mai ena hebogahisi ida. Iena mauri ia atoa diho, horoa taudia edia “orea maragi” bona iena “mamoe idaudia” danu hamauridia totona. (Luka 12:32; Ioane 10:14, 16) Mamoe Naridia Tauna Badana, Iehova Dirava, ese inai mamoe iboudiai ia hereva henidia, ia gwau: “Itaia! Lau sibogu . . . ese mamoe ta bona mamoe ta padadiai do lau hahemaoro. Lau ese mamoe naridia tauna tamona, egu hesiai tauna David, be idia naridia tauna ai do lau halaoa. Ia ese do ia ubudia bona do ia naridia. Bona lau Iehova be edia Dirava ai do lau lao, bona egu hesiai tauna David be edia lohia ai do ia lao idia bogaragidiai. Lau Iehova lau hereva vadaeni.”—Esekiel 34:20-24.
4, 5. (a) ‘Mamoe naridia tauna namona’ be daika, bona edena bamona idia perovetalaia? (b) Iesu ese daidia ia hapararadia noho, bona unai dainai dahaka gau badana ia vara?
5 Inai hereva, “egu hesiai tauna David,” amo ia ese Keriso Iesu ia perovetalaia; ia be David ena “garana,” iena terona ia abia tauna. (Salamo 89:35, 36) Hari inai nega be bese iboudiai hahemaoro henidia dinana; Iehova ida mamoe ia naridia Pavapavana, Keriso Iesu, David ena Natuna, ese “mamoe” bona “nanigosi” ia hapararadia noho, herevana unai “nanigosi” haida idia gwau idia be “mamoe.” (Mataio 25:31-33) Dirava ese “mamoe naridia tauna tamona” ai ia halaoa, do ia ubudia totona danu. Inai peroveta herevana ena anina be hari ia vara! Politik taudia ese tanobada taudia edia lalodia hatamonadia karana idia herevalaia sibona, to Mamoe Naridia Tauna tamona ese haroro gaukarana amo bese idauidau iboudiai edia mamoe edia lalodia ia hatamonadia noho. Inai haroro gaukarana be Dirava ena orea mo ese gado idauidau ai ia karaia diba.
6, 7. “Hesiai tauna mai ena kamonai bona mai ena kara maoromaoro” ese dala edena bamona ia karaia, mamoe edia “aniani be nega korikori ai” do idia henidia totona?
6 Basileia sivaraina be gabu matamatadia ai ia vareai noho neganai, horoa Keristen taudia edia “hesiai tauna mai ena kamonai bona mai ena kara maoromaoro,” Mamoe Naridia Tauna tamona ese ia duanaia oreana, ese dala ia karaia, “aniani be nega korikori ai” do idia siaia totona. (Mataio 24:45, NW) Watch Tower Society ena branch 33 ai printa gaukarana idia karaia; idia momo ese edia gaukara idia habadaia noho, badina be taunimanima momo idia ura Baibel gwauraia bukadia bona magasin do idia abidia.
7 Iehova ena Witness taudia edia Hakaua Oreana ese dala idia tahua goadagoada, hereva na gado 200 bamona ai hahegeregeredia gaukarana hanamoa totona, bona gado ma haida ai hahegeregeredia gaukarana hamatamaia totona. Unai be Iesu ese ena hahediba taudia ia henidia haheganina badinaia totona; ia gwau: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai . . . do ia lao bona tanobada ena kahana ibounai.” (Kara 1:8) New World Translation of the Holy Scriptures be gado 14 ai idia halasia vadaeni, bona ma gado 16 ai idia hahegeregerea noho, Europe, Africa, bona Orient gadodia unai.
“Dirava ena Maino” Idia Moalelaia
8 Iena mamoe naridia tauna tamona, Keriso Iesu, ena amo Iehova be ena mamoe ida “maino gwauhamatana” ta ia karaia. Mamoe be Iesu ena rarana idia abidadama henia dainai, diari ai idia raka. (1 Ioane 1:7) ‘Dirava ena maino, eda diba ibounai ia hereaia mainona, ese edia lalodia bona edia daradia ia gimadia, Keriso Iesu dainai.’ (Filipi 4:7, NW) Esekiel 34:25-28 ena hereva hegeregerena, Iehova ese ena mamoe na lauma paradaisona ai ia hakaudia vareai, bena idia noho namonamo bona edia tano ena anina idia habadaia. Ia ese ia gwauraidia, ia gwau: “Idia guilaidia auridia do lau hamotudia bona idia guidia taudia edia imadia amo do lau hamauridia neganai, do idia diba lau be Iehova. Bese idauidau ese do idia hadikadia lou lasi; . . . do idia noho namonamo, bona tau ta ese do ia hagaridia lasi.”
9. Iehova ese ena orea taudia ‘idia guilaidia auridia ia hamotudia’ dainai, dahaka idia karaia diba?
9 Vanegai, tano momo ai, Iehova ena Witness taudia “idia guilaidia auridia” ia hamotudia. Unai dainai idia haroro diba mai edia ura-kwalimu ida. Namona be tano iboudiai lalodiai ita ibounai ese Iehova be ita ia henia nohona namona do ita gaukaralaia namonamo, gaukara do ita karaia guguru totona. Hisihisi bada hereana ia hure mai noho lalonai, Iehova ese iseda abidadama ia hagoadaia momokani!—Daniel 12:1; Mataio 24:21, 22.
10. Iehova ese daidia na Mamoe Naridia Tauna Namona ia henia do idia durua totona, bona Paulo ese idia haida edena bamona ia hereva henidia?
10 Kara dika taudia edia davana do ia henidia dinana totona ia hegaegae totona, Iehova ese tatau haida ia abidia hidi, Mamoe Naridia Tauna Namona, Keriso Iesu, na mamoe naridia gaukarana ai do idia durua totona. Apokalupo 1:16 ai ia gwauraidia “hisiu 7” Iesu ena imana idibana ai. Aposetolo Paulo ese hari mamoe naridia taudia edia orea ta ia hereva henia, ia gwau: “Umui sibona umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana amo ia hoia gauna, umui ubua.” (Kara 20:28) Hari inai negai, tanobada hegegemadai, mamoe naridia taudia tausen tausen be kongregesen 69,557 lalodiai idia gaukara noho.
Naridia Taudia e, Umui Gunalaidia!
11 Tano momo ai, mamoe naridia taudia ese idia gunalaidia, idia haroro loulou vadaeni gabudia ai. Edena bamona idia durudia diba, gaukara idia goadalaia noho totona? Idia durudia namonamo vadaeni dalana ta be inai: Idia hagoadadia, heduru pioneer taudia bona regular pioneer taudia ai idia lao totona. Mamoe naridia taudia momo ese inai gaukara idia karaia, bona idia karaia diba lasi taudia danu ese pioneer lalohadaina idia hahedinaraia; idia gaukara mai edia moale ida dainai idia kwalimu. (Salamo 100:2; 104:33, 34; Filipi 4:4, 5) Ena be kara dika bona heiriheiri ese tanobada idia hahonua, to idia ese mamoe bamona taudia momo na Basileia helarona idia hadibalaidia.—Mataio 12:18, 21; Roma 15:12.
12. Tano haida ai dahaka idia hekwarahilaia, bona unai dainai dahaka idia karaia?
12 Kongregesen momo lalodiai, mamoe naridia taudia, gaukara diba taudia, be momo lasi dainai, orea naria namonamo dalana be lasi. Eastern Europe ai ia vara bamona, orea be ia bada ia lao haraga neganai, kongregesen matamatadia momo lalodiai elda taudia be lasi. Mamoe haida ese unai maduna idia huaia, to idia do manadalaia lasi, bona namona be heduru do idia abia, kongregesen lalodiai idia vareai noho mamoedia do idia hadibadia totona. Unai bamona tanodia ma haida, Brazil, Mexico, bona Zaire, lalodiai, Witness taudia matamatadia idia hagaukaradia, edia bamodia idia hakaudia bona idia hadibadia totona. Pioneer taudia idia heduru bada, bona taihu ese taihu matamatadia idia durudia diba. Iehova ese ena lauma amo edia gaukara ena anina ia hanamoa, bona orea ia bada ia lao noho.—Isaia 54:2, 3.
13. (a) Uiti utua gaukarana be bada dainai, edena bamona do ita guriguri be namo? (b) Iehova ese ena orea taudia edia guriguri edena bamona ia haerelaidia vadaeni?
13 Haroro gaukarana idia haginia auka vadaeni tanodia ai, bona vanegai taravatu idia kokidia tanodia ai, bona idia kehodia matamata gabudia ai, Iesu ena hereva Mataio 9:37, 38 ai be momokani: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” Namona be Iehova ita noia, ia ese danu mamoe naridia taudia ma haida do ia haginidia. Ia hahedinaraia vadaeni unai bamona ia karaia diba. Tanobada Ibounai Tuarina Iharuana negana vairanai bona lalonai, lohia taudia dagedagedia Asuria taudia hegeregeredia ese Iehova ena Witness taudia idia haoredia toho. To edia guriguri dainai, Iehova ese edia orea ia hagoevaia do ia biagua goevagoeva totona, bona mamoe naridia taudia ia henidia, edia dabu hegeregerena. Unai be inai peroveta herevana hegeregerena: “Asuria tauna be iseda tano ai do ia mai bona iseda kohoro do ia moimoilaidia neganai, ita ese mamoe naridia taudia seven do ita haginidia ia do idia koua totona, bona hanua lohiadia eit danu”—anina be elda taudia edia momo do ia hegeregere do idia gunalaidia.—Mika 5:5.
14. Iseda orea ena bapatiso mamaruanedia iboudiai be edena bamona do idia karaia be namo?
14 Inai tanobada ena dokona be ia kahirakahira dainai, gau badana be Witness uhaudia bona tataudia, bapatiso idia abia vadaeni taudia, iboudiai ese kongregesen naria gaukaradia ma haida do idia tahudia. (1 Timoteo 3:1) Habakuku 2:3 ia gwau: “Matahanai be ena nega ia do naria noho, dokona ia heau henia noho, do ia koikoi lasi. Ena be ia mai metairametaira, to oi naria noho; badina be momokani do ia mai. Do ia leiti lasi.” Tadikaka e, dokona ia do ginidae lasi neganai, umui ese mamoe naridia gaukaradia ma haida do umui tahudia diba a?—Tito 1:6-9.
Dirava ena Lohia Siahuna Henunai
Mamoe Idia Naridia
15. Iehova ena orea taudia be edena bamona idia hahedinaraia iena lohia siahuna henunai idia noho?
15 Iehova ena orea habadaia gaukarana ai idia heduru bada totona, iena orea taudia ese iena lohia siahuna idia laloa namonamo bona idia matauraia be namo. Iehova ena taunimanima edia “bese helagana” be ia ese ia lohiaia. (1 Petero 2:9; Isaia 33:22) Keristen taudia momokanidia be unai bese taudia eiava unai bese bamoa taudia; unai dainai edia noho ai bona edia hesiai gaukarana ai idia ese Dirava ena Hereva idia badinaia be namo.
16. Edena bamona ita hahedinaraia Dirava ita kamonai henia?
16 Keristen taudia ese Dirava idia kamonai henia dalana be aposetolo Paulo ese ia gwauraia hedinarai goevagoeva. Ia gwau ‘mauri matamata do idia atoa, dabua matamata idia atoa bamona. Inai mauri matamata dainai edia toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.’ Namona be Dirava ena hahegani maoromaorodia hegeregeredia do idia kara, bona Iehova bona ena taravatu do idia badinadia be namo. Paulo ese unai ia gwauraia murinai, ma ia gwau: “Umui be Dirava ena natuna, iena lalokau. Unai dainai, Dirava ena kara bamona do umui karaia be namo.” (Efeso 4:24–5:1) Unai amo do ita hahedinaraia ia ese momokani ita ia lohiaia!—Kolose 3:10, 12-14 danu itaia.
17, 18. (a) Keristen taudia ese Dirava ena dahaka idia tohotohoa? (b) Iehova ese ena kara badana edena bamona ia gwauraia hedinarai, to dahaka danu ia gwauraia?
17 Iehova ena kara badana, do ita tohotohoa be namo karana, be dahaka? Aposetolo Ioane ia haere, ia gwau: “Dirava be lalokau. Tau ta bema lalokau ena dala dekenai ia noho, ia be Dirava ena lalona dekenai ia noho. Dirava danu be unai tau ena lalona dekenai ia noho.” (1 Ioane 4:16) Mamoe Naridia Tauna Badana, Iehova, be mai ena lalokau bada herea. Mamoe naridia taudia iena siahu henunai idia gaukara ese idia tohotohoa; idia hahedinaraia iena mamoe idia lalokau henidia bada.—1 Ioane 3:16, 18; 4:7-11 itaia.
18 Dirava be sibona Mose ia hahedinarai henia, ia gwau: “Iehova, Iehova, hebogahisi bona hariharibada Diravana; lau badu haraga lasi, egu hebogahisi bona kara momokani be bada herea, taunimanima daha daha lau bogadia hisi, kerere bona dika lau gwaudiatao, to dika davana danu lau henia, tamadia edia kerere edia davana be edia natudia memerodia bona edia tubudia memerodia lau henidia, ela bona uru ihatoina bona ihahanina danu.” (Esodo 34:6, 7) Iehova Dirava ese ena lalokau karadia badadia ia gwauraidia unai, ma ia gwau edia kerere edia davana do ia henidia be mai badina neganai do ia henidia.
19. Keristen mamoe naridia taudia be edena bamona idia kara be maoro?
19 Orea ena dagi taudia be Dirava ena lohia siahuna henunai idia noho, anina be dahaka? Iesu ese toretore taudia bona Farisea taudia iena negai idia noho ia gwauraidia, ia gwau: “Idia ese huaia gaudia mai metau danu idia kwatua, taunimanima latanai idia atoa, to edia imana kwakikwakina sibona dekena amo durua taina idia henia lasi.” (Mataio 23:4) Idia hahekwarahidia bada mai edia lalokau lasi! Dirava ena lohia siahuna ena anina be, Baibel ena lalokau herevadia hegeregeredia orea idia naria, sibodia edia taravatu momo amo mamoe idia hametaudia lasi. (Mataio 15:1-9 itaia.) Dirava ena lohia siahuna henunai mamoe idia naridia taudia ese danu kongregesen idia naria namonamo, do ia goeva noho totona.—Roma 2:11; 1 Petero 1:17 itaia.
20. Mamoe naridia taudia be dahaka idia abia dae bona dahaka idia matauraidia?
20 Mamoe naridia taudia momokanidia idia abia dae inai dina gabedia ai Iesu ese ena hesiai tauna mai ena kamonai bona mai ena kara maoromaoro na iena kohu ibounai naria tauna ai ia halaoa vadaeni, bona lauma helaga ese hari hesiai tauna ia hakaua, elda taudia abidia hidi karana ai. (Mataio 24:3, 47; Kara 20:28) Dirava idia kamonai henia, anina be hari hesiai tauna, bona orea ia naria daladia, bona elda taudia edia gaukara dalana kongregesen lalonai, be idia matauraidia bada.—Heberu 13:7, 17.
21. Iesu be edena bamona ia kara, ia do idia tohotohoa totona?
21 Iesu ese sisiba na Iehova dekenai bona Iena Hereva lalonai ia tahua loulou. Ia gwau: “Lau be sibona gau ta do lau karaia kava lasi. Dirava ese lau ia hamaoroa hegeregerena kota henia gaukara lau karaia, bona egu kota henia gaukara be maoromaoro, badina lau sibona egu ura lau karaia lasi, to Dirava ena ura sibona lau karaia.” (Ioane 5:30) Mamoe naridia taudia Lohiabada Iesu Keriso henunai idia gaukara be unai bamona idia manau be namo. Ia karaia bamona, bema elda ta ese sisiba na Baibel lalonai ia tahua loulou, ia be Dirava kamonai henia tauna momokanina.—Mataio 4:1-11; Ioane 6:38.
22. (a) Ita ibounai be edena bamona do ita kara be namo? (b) Iesu ese mamoe edena bamona ia boiridia mai ena hebogahisi ida?
22 Umui mamaruane iboudiai e, kongregesen gaukaradia umui tahudia! Umui mamoe iboudiai e, Dirava umui kamonai henia, bona Dirava bona Keriso hegeregeredia lalokau umui hahedinaraia! Umui mamoe bona umui idia naria taudia danu do umui moale, badina be Iesu ena hereva umui abia dae; ia gwau: “Lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”—Mataio 11:28-30.
Oi Gwauraia Hedinarai Diba A?
◻ Iehova ena “seri” be dahaka, bona daidia be ia lalonai?
◻ ‘Mamoe Naridia Tauna Namona’ be edena bamona ia kara, tanobada ai ia noho neganai, bona hari inai negai?
◻ Mamoe naridia taudia ese edena dala badana amo idia naridia?
◻ Dirava ena lohia siahuna henunai ita noho, anina be dahaka?
◻ Keristen taudia be dahaka kara amo idia hahedinaraia Dirava ese ia biagudia?
8. Iehova ena maino gwauhamatana dainai, mamoe ese dahaka hahenamo badadia idia abidia?
11. Idia haroro loulou vadaeni gabudia ai, mamoe naridia taudia haida ese edena bamona idia gunalaidia namonamo?
[Picture on page 20]
Mamoe naridia tauna namona bamona, Iehova ese ena seri ia naria
[Picture on page 23]
Iehova ena lalokau tohotohoa be kamonai henia dalana ta