Duahia Taudia Edia Henanadai

Keristen taudia edia maduna be dahaka, tano, davara, bona hodahoda hadikadia karana hamaragia karana ai?

Ita Iehova ena Witness taudia ese tano, davara, bona hodahoda hadikadia karadia ita lalodia momo. Ita diba Dirava ese tanobada goevana ia karaia, bese goevadaena ese do idia noholaia totona. (Genese 1:31; 2:​15-17; Isaia 45:18) Baibel ia gwau Dirava ese ‘tanobada idia hadikaia vadaeni taudia do ia alaia ore.’ (Apokalupo 11:18) Unai dainai namona be do ita kara mai eda diba ida, ita danu ese tanobada do ita hadikaia garina. To Baibel ena hereva hegeregerena, namona be do ita naria namonamo, unai kara koua dalana do ita tahua momo garina.

Aniani havaraia, hegaegaelaia, bona ania karadia ese momoru idia havaraia, to gabeai unai momoru momo be tano ai ia lou lao. (Salamo 1:4; Luka 3:17) Nega ta Iesu ese gwarume ia gabudia iena hahediba taudia edia. Unai kara amo kwalahu bona kahu idia vara, bona momoru, gwarume turiadia, danu. (Ioane 21:​9-13) To unai ese tanobada bona idia noholaia gaudia ia hadikadia lasi.

Dirava ena orea taudia ese tanobada bona mauri gaudia naridia karana idia laloa nege be namo lasi. Idaunegai Iehova ese ena orea taudia ia haganidia edia momoru do idia guria, edia noho gabuna do ia miro garina. (Deuteronomi 23:​9-14) Dirava ena lalohadai tanobada hadikaia taudia dekenai ita diba, unai dainai namona be iseda kara ita naria namonamo, tano, ranu, bona hodahoda do ita hadikadia garina. Namona be gabu maorodia ai momoru ibounai ita negea. Negenege gaudia, kavabu o tini, gaukaralaidia lou karadia ita durudia be namo, bona bema gavamani ese unai ia haheganilaia, unai be mai badina badana. (Roma 13:​1, 5) Taunimanima haida ese gau idia kumidia negadiai pepa idia gaukaralaia, plastik lasi, badina idia diba unai pepa do idia negea murinai do ia dika bena tano ai do ia lou lao; unai dala amo idia ese do idia bodaga diba lasi momorudia senudia idia habadadia lasi.

Bema gavamani ena taravatu be lasi, Keristen tauna ese sibona ena lalona ia hadaia be namo, unai kara do ia goadalaia eiava. To namona be Iesu ena sisiba ia laloa: “Emui lalona dekenai taunimanima umui gwauraia kerere lasi, vadaeni Dirava ese umui do ia gwauraia kerere lasi. Badina be dahaka au ena momoru oiemu tadikakana ena matana lalonai oi itaia, to au badana oiemu matana lalonai ia noho be oi laloa lasi?” (Mataio 7:​1, 3) Unai sisiba ese ita do ia durua, mai anina bada gaudia ma haida do ita lalodia totona.

Peroveta tauna Ieremia ia gwau: “Iehova e, lau diba taunimanima ena dala na ia sibona lalonai lasi. Taunimanima ena raka be ia sibona ese do ia gwauraia hidi diba lasi.” (Ieremia 10:23) Unai hereva idia laloa lasi dainai, taunimanima ese “metau dikadia momo” idia davaridia. (2 Timoteo 3:​1-5) Bona Apokalupo 11:18 ena hereva ese ia hamomokania taunimanima be hegeregere lasi tanobada hadikaia karana do idia hadokoa. Reana gabu haida ai unai kara idia hamaragia sisina, to Dirava mo sibona ese unai kara ia hadokoa vaitani diba.

Unai dainai, eda goada bona eda moni ita gaukaralaia Dirava ena gaukara ai. Unai amo ita ese Iesu ena kara ita tohotohoa; ia ese ena nega bada ia haorea “hereva momokani gwauraia hedinarai totona.” (Ioane 18:37) Tanobada hadikaia karana ia koua toho lasi, to taunimanima bona tanobada hadikadia gaudia iboudiai haoredia vaitani dalana ia gwauraia hedinarai.​—Ioane 6:​10-15; 18:36.

Taunimanima ita lalokau henidia dainai, tano, hodahoda, bona ranu ita hamirodia kava lasi, bona hereva momokani ita gwauraia hedinarai noho. Taunimanima ita hadibadia Baibel ena hereva momokani do idia badinaia totona, unai amo idia ese edia tauanidia na kuku o kekero muramuradia o drag amo do idia hadikadia lasi. Taunimanima hutuma be hahediba taudia ai idia lao neganai, kara goevadia bona taunimanima edia namo tahua karadia idia dibadia. Unai dainai haroro gaukarana ese tanobada hamiroa karana ia hamaragia sisina. To gau badana be inai: Keristen taudia ese edia lalodia bona edia kara idia hamatamatadia toho, do idia hegeregere paradaiso tanobadana goevana do idia noholaia totona; unai tanobada be Dirava ese ia idia tomadiho henia momokani taudia do ia henidia.