“Hamomokania Gauna Korikorina Guba Ai”

LAGANI momo herea idia do noho ela bona tau ginigunana be tanobada ai ia raka neganai, hua be guba ai ia tara. Gunaguna taunimanima momo ese hua idia tomadiho henia, ia be edia dirava hahinena ta. Greek toretore tauna ladana Plutarch ia gwau kara goeva taudia edia lauma idia lao hua. Baltic taudia be edia gori ai idia gwau hua be dina ena adavana, to idia heai bona hua ese ena adavana ia rakatania, bena nega ta ta mo idia hedinarai hebou guba ai!

Hari inai negai, uhau bona ulato ese hua idia raraia bona ura-heni idia laloa. Lagani 1969 ai saiens taudia ese tatau rua be hua ai idia siaidia lao, nadi haida do idia abidia mai totona. Hua enai gau ta ita diba momokani​—dina ta ta iboudiai, ia be nega korikori ai do ia dae bona do ia diho. Ena heau dalana korikorina ia haidaua lasi dainai, lagani tausen tausen gunanai ena toana ia idau negadia bona dina ena diari ia koua negadia ita davaridia diba.

Israel taudia ese hua idia itaia neganai, Dirava ena gwauhamata namona ta idia laloatao. Ia gwau: “Hua hegeregerena [David ena garana] do ia noho ela bona hanaihanai, hamomokania gauna korikorina guba ai bamona.” (Salamo 89:35-37) Inai gwauhamata be Iesu, “Davida natuna,” dekenai ia hamomokania. (Luka 18:38) Iesu ia mase murinai, Dirava ese ia hatorea isi, mase diba lasi laumana ta, bena guba ai ia daekau. (Kara 2:​34-36) Gabeai Dirava ese ena guba Basileiana Pavapavana ai ia halaoa. (Apokalupo 12:10) Unai Basileia be hari ia lohia, bona “do ia gini ela bona hanaihanai.” (Daniel 2:44) Inai dala ai, Iesu, ia mase diba lasi laumana, David ena iduhu tauna unai, be do ia noho hanaihanai, hua, “hamomokania gauna korikorina guba ai,” hegeregerena.

Vadaeni, hua oi itaia negadiai, Dirava ese David ia gwauhamatalai henia gauna oi laloa, bona oi tanikiu henia, badina Iena Basileia be hari ia lohia bona do ia lohia hanaihanai, Dirava hanamoa totona bona kamonai taudia hanamodia hanaihanai totona.​—Apokalupo 11:15.

[Picture Credit Line on page 32]

Frank Zullo