Lalona bona Darana amo Dika Kokia Karana

IEHOVA ese taunimanima na miro ura henia urana ia henidia lasi. Edia noho gabuna, tanobada, ia karaia neganai, ia goeva, ena toana ia namo, bona ia be mai hairaina. Dirava ia ura lasi do ia miro bona momoru gabuna ai do ia lao.​—Genese 2:​8, 9.

To, taunimanima ese Dirava ena hahekau idia dadaraia murinai, tanobada ena oromana be sibodia edia ura hegeregerena idia karaia. Idia be asi edia aonega Dirava ena amo, unai dainai dala idauidau idia tahua. Edia sivarai ese Baibel ena hereva ia hamomokania, ia gwau taunimanima be sibodia idia lohiadia maoromaoro diba lasi; lagani 6,000 bamona lalodiai “taunimanima ese edia bamodia idia biagudia bona idia hahisidia.” (Kohelete 8:9; Ieremia 10:23) Hari inai negai tanobada idia hamiroa bona idia hadikaia, badina be edia lohia dalana ia maoro lasi dainai.

Dirava ena Lalohadai Abia Dae

Dirava hamoalea urana idia ura taudia be idia hekwarahi, Dirava ena taravatu kara goeva dekenai idia badinaia totona. Unai hegeregerena, lagani 1991 ai Iehova ena Witness taudia idia hekwarahi, intenesenel hebouhebouna ta be Strahov Stadium ai, Prague, Czechoslovakia ai idia karaia gwauraia neganai. Idia diba taunimanima 75,000 bamona do idia hebou. To lagani faiv lalodiai unai steidiam ia noho kava dainai ena toana ia dika. Vadaeni, Witness taudia 1,500 bamona be hora 65,000 lalodiai idia gaukara, idia hanamoa bona idia peinia totona. Hebouhebou negana ia ginidae neganai, steidiam ena toana ia hegeregere, unuseniai Iehova Dirava do idia tomadiho henia.

Ena be taunimanima momo ese goeva bona edia gabu edia toana idia laloa bada lasi, to Iehova ena Witness taudia be idau, badina be Baibel ena sisiba idia laloa bada. Baibel ia gwau Keristen taudia ese sibodia edia namo do idia tahua lasi, bona hebogahisi lasi, mataganigani bona lalokau lasi karadia do idia kokidia. Ia gwau: “Emui mauri gunana mai ena dika dabua gunana bamona umui kokia . . . bona mauri matamata umui atoa . . . Inai mauri matamata be Dirava ese ia havaraia.” Mauri matamatana ia atoa tauna ese goeva bona hairai ia ura henidia, hadikaia karadia ia ura henidia lasi.​—Kolose 3:​9, 10; 2 Korinto 7:1; Filipi 4:8; Tito 2:14.

Mauri matamata idia atoa dainai, Keristen taudia ese tanobada hadikaia karadia idia karaia lasi, bona gavamani ena taravatu unai kara dekenai be idia badinadia. Lalohadai kereredia momoru negea karana dekenai idia dadaraidia, bena momoru idia negea kava lasi, sibodia edia ura idia karaia lasi, bona idia lahedo lasi. Taunimanima edia kohu idia matauraia dainai, haba, magu, bona gabu ma haida ai idia toretore kava lasi. Edia ruma, edia motuka, edia dabua, bona edia tauanidia idia goeva.​—Iakobo 1:21 itaia.

Idia ura lasi mauri matamata do idia atoa taudia be Dirava ese do ia koudia bena Paradaiso ai do idia noho lasi. Iena kara ita gwauraia dika diba lasi, badina be bema ta ena lalona ai tanobada hadikaia lalohadaidia idia do noho hehuni, ia ese tanobada ena hairai matamatana do ia hadikaia diba, bena idia ura do idia naria taudia do idia lalohisihisi. Unai dainai, Dirava ese ‘tanobada idia hadikaia vadaeni taudia do ia alaia ore.’ Unai be lalokau karana maoromaorona.​—Apokalupo 11:18; 21:8.

Do Ita Heduru A?

Anina be Keristen taudia ese tanobada hadikaia bona hamiroa karadia koudia karana do idia goadalaia be namo, a?

Momokani, tanobada hadikaia gaudia ese taunimanima danu idia hadikadia. Iehova ese Israel taudia ia henidia taravatudia dainai, ita diba ia ese unai ia laloa. (Esodo 21:​28-34; Deuteronomi 22:8; 23:​12-14) To ia haganidia lasi idau bese taudia edia lalodia do idia girodia toho, tauanina naria karana do idia badinaia totona, bona Keristen taudia ginigunadia be unai bamona ia haganidia lasi danu.

Hari inai negai, tanobada hadikaia karadia be politikol pati idauidau ese idia hepapahuahulaidia haraga diba. Gabu haida ai politikol pati haida idia haginidia, tanobada hadikaia karadia koudia totona. Bema Keristen tauna ta ese politikol pati ta ena lalohadai ia goadalaia, anina be politik amo ia gini siri lasi. Iesu ese iena hahediba taudia ia gwauraidia, ia gwau: “Idia be tanobada ena lasi, lau hegeregerena, lau be tanobada ena lasi.” Bema Keristen tauna ta be unai bamona lasi, “tanobada gunalaia taudia . . . edia siahu ia doko lao noho” taudia, edia kahanai ia gini reana.​—Ioane 17:16; 1 Korinto 2:6.

Iesu ese ena tano taudia edia hekwakwanai iboudiai ia kokidia toho lasi, bona ena hahediba taudia be unai ia haganilaidia lasi. Ia henidia haheganina be inai: “Umui lao, bese ibounai be diba tahua taudia do umui halaoa . . . Umui hadibaia, umui dekenai lau henia hereva ibounai be do idia badinaia.” Tanobada hanamoa karadia ia haganilaidia lasi.​—Mataio 28:​19, 20.

Keriso ia gwau namona be Keristen taudia ese ‘Basileia bona iena kara maoromaoro do idia tahua guna.’ (Mataio 6:33) Iehova ese Mesia Basileiana amo ena taravatu maoromaorodia be tanobada hegegemadai do ia ha-aukadia neganai, tanobada hadikaia karadia iboudiai do idia doko ela bona hanaihanai, bona tanobada noholaia taudia iboudiai ese unai do idia moalelaia.

Unai dainai Iehova ena Witness taudia ese lalohadai maorona idia badinaia. Idia diba, Roma 13:​1-7 hegeregerena, idia ese gavamani ena taravatu, tano, hodahoda, ranu, bona mauri gaudia naridia karana dekenai be do idia badinadia be namo. Edia dekena taudia idia lalokau henidia dainai, edia kohu bona gavamani ena danu be idia hadikaia lasi, bona sibodia edia momoru idia negea kava lasi. To Baibel ese ia haganidia lasi tanobada hagoevaia karadia do idia gunalaidia. Dirava ena Basileia sivaraina harorolaia gaukarana idia tahua guna, badina idia diba unai amo ia vara hahenamona be do ia noho daudau.

Lauma Dalanai Hagoevaia

Dirava ese idaunegai Israel taudia ia hadibadia loulou, bema tanobada be rara bubua karana o heudahanai karana o gau helagadia dadaraidia karana amo idia hamiroa, dika do idia davaria. (Numera 35:33; Ieremia 3:​1, 2; Malaki 1:​7, 8) Mai anina bada gauna be inai: Ena be reana tauanina dalanai danu idia hamiroa, to ia gwauraidia dika, badina be lauma dalanai idia hamiroa dainai, tauanina dalanai idia hamiroa dainai lasi.a

Unai dainai, hari inai negai Keristen tauna ese lauma dalanai ia idia hadikaia karadia ia koudia toho. Unai ia karaia totona “mauri matamata” ia atoa, badina unai ese ena lalona bona ena darana idia hadikadia gaudia ia kokidia diba. Iehova ena Witness taudia milion hani mai kahana ese inai lauma hahegoeva karana amo namo idia davaria. Tomadiho karadia mirodia bona kara bodagadia idia kokidia bona tauanina dalanai idia goeva danu.​—Efeso 4:​22-24.

Hari inai nega be lauma dalanai hagoevaia karana ena nega. Gabeai, tanobada hagoevaia karana ena nega be ena nega korikori ai do ia ginidae, bena tanobada be momoru gabuna badana ai do ia lao lasi bona miro ese do ia hadikaia lou lasi.​—Kohelete 3:1.

[Footnotes]