Hui Kurokuro Ena Hairai

BEMA idau negai abidadama tatau bona hahinedia oi hereva henidia diba neganai unai be moale gauna badana! Bema Noa, Abraham, Mose, bona Ioane Bapatiso, bona hahine haida, hegeregere Sara, Rahaba, Ruta, bona Debora oi hereva henidia diba neganai dahaka oi laloa! Reana oi moale dikadika idia ese idau negai idia vara bona idia itaia sivaraidia idia kikilaia neganai, ani?

Hari inai negai danu, gunaguna buruka taudia be hetoho idia davaria neganai, haroro gaukara idia taravatulaia neganai, idia dadabadia neganai, bona edia kara maoromaoro karana dainai dibura lalonai idia atodia neganai, unai buruka taudia ese edia abidadama karana Dirava dekenai idia dogoatao noho, bona ita moale edia sivarai idia kikilaia neganai, ani? Oibe! Edia kudouna ena mamina bona Iehova ese mai lalokau danu idia ia naridia sivaraina idia kikilaia neganai, iseda lalokau Iehova dekenai bona iseda hemataurai karana idia dekenai do ia habadaia.

Dirava ena taunimanima huanai, mai edia abidadama tatau bona hahine burukadia idia mataurai henidia bada, badina edia ekspiriens, diba, bona aonega be bada. Oibe, Dirava be Israel besena dekenai ia henia Taravatuna dekenai inai sisiba ia henia: “Hui kurokuro tauna vairanai oi toreisi bona tau burukana oi matauraia bona emu Dirava garina oi gari. Lau inai Iehova.” (Levitiko 19:32) Heberu gado dekenai buruka idia hahanaia “hui kurokuro ai ia lao” bona ena anina ta be “hui kurokuro tauna.” Unai dainai gau badana be Israel taudia idia gini toreisi buruka tauna idia matauraia totona, bona unai idia karaia Dirava garina idia gari dainai.

Hari inai nega lalonai buruka taudia matauraidia karana ia noho, a? Hegeregere, memero bona kekeni be mai hemataurai danu buruka taudia totona iduara idia kehoa, a? Memero bona kekeni eiava uhau bona ulato be ia honu basi eiava PMV dekenai idia helai neganai, idia gini toreisi buruka tauna ta ia helai totona, a? Idia itaia Keristen taudia be nega haida unai idia karaia lasi.

To, Iehova Dirava hamoalea totona, namona be Keristen taudia ese iena ura hegeregerena idia karaia, namo lasi ‘sibona ena ura idia tahua, tamana bona sinana idia gwau-edeede henia, tanikiu herevana idia gwauraia lasi, bona kara namodia idia ura henia lasi’ namona be unai taudia edia lalohadai, edia hereva, bona edia kara idia dadaraia. (2 Timoteo 3:​1-5) Vadaeni, Dirava ena Hereva lalonai hui kurokuro bona memero kekeni edia kara dekenai dahaka sisiba ia noho?

Memero Kekeni Edia Siahu

Baibel ese memero kekeni edia goada bona edia namo ia herevalaia, ia gwau: “Uhau edia hairai be edia goada.” (Hereva Lada-isidia 20:29) Idau negai Israel lalonai, Levi uhaudia edia goada be dubu lalonai idia gaukaralaia, idia be gaukara metaudia momo idia karaia. Hari inai negai, faktori, Betele rumadia, bona Watch Tower Society construction gabudiai, uhau bona ulato ese edia goada bona diba idia henia Basileia ena gaukara idia habadaia totona. (Mataio 6:33) Unai idia karaia dainai Dirava ena hesiai gaukara dekenai maduna ma haida idia moalelaia diba.

Atai dekenai ita kikilaia vadaeni Hereva Lada-isidia ena siri dokonai ia gwau, “bona tatau burukadia edia hairai be edia hui kurokuro.” Uhau bona ulato edia goada bona lagani momo lalodiai buruka taudia idia abia aonegana idia gaukara hebou neganai, unai be goada bada herea karana.

Haheitalai ta be inai: Mero ta ese kapenta gaukara idia hadibaia noho, bona idia hamaoroa haba dekenai au do ia kokoa kau bona mai goada danu ia karaia. Lagani momo kapenta gaukara ia diba tauna ia itaia ena be unai mero be mai ena goada, to ikoko be nega haida ia botaia murinai au dekenai ia vareai. Unai lagani momo gaukara tauna ese mero ia hamaoroa namo lasi hama ia gaukaralaia neganai hama ena auri kwarana kahirakahira dekenai ia dogoatao, to hama ena imana duduna dekenai ia dogoatao. Unai ese mero ia durua ikoko ia botaia auka totona, bona ena nega bona ena goada ia haorea kava lasi.

Unai hegeregerena, mai ena goada kekenina ese guna ia kerere dainai ia diba bema dabua dekenai idia gwauraia huria dalana ia badinaia lasi, dabua do ia hadikaia diba. To, dabua huria ia manadalaia hahinena, ia diba dabua do ia sekea namonamo guna be gau badana, badina idia haida be sibona sibona do ia huridia idia dika lasi totona. Danu, ia diba bema dabua be laini amo eiava dabua hakaukaudia masini amo ia kokidia neganai maoromaoro ia lokudia namonamo, do ia iron henidia lasi.

Gaukara idia manadalaia vadaeni taudia dekena amo diba oi abia be oiemu mauri do ia durua bada. To, nega do ia ginidae bena tau eiava hahine be hari ia karaia diba gaukara haida be gabeai ia karaia diba lasi. Toretore tauna ta ia gwau: “Matamata taudia ese buruka taudia edia diba idia abia, bona buruka taudia be matamata taudia edia goada idia abia bema namo.” To, buruka taudia ese matamata taudia edia goada idia moalelaia neganai, bona mai haheauka danu lagani momo lalodiai buruka taudia ese idia abia dibana be matamata taudia dekenai idia hadibaia neganai​—bona matamata taudia be mai edia manau danu unai heduru herevadia idia badinaia neganai, unai be namo herea momokani! Unai dala amo, matamata taudia bona buruka taudia be namo idia davaria.

Hairai Abia Dalana

Lagani momo tauna ta ai oi lao be hegeregere lasi. Mero matamata tauna Elihu ia gwau: “Aonega be lagani momo taudia edia gauna sibona lasi, bona tatau burukadia sibona lasi be hereva maoromaorodia idia diba.” (Iobu 32:9; Kohelete 4:13) Taunimanima ese hui kurokuro tauna idia matauraia totona, ita gwau lasi unai lagani momo tauna ena mauri lalonai televisen raraia, spot gadara lao henia, eiava kara idauidau ia moalelaia sibona lasi. Bona idia buruka neganai unai taudia be diba ma haida idia tahua noho be gau badana.

Taunimanima haida ese sibodia edia ura idia karaia karana idia heagilaia, eiava idia gwau: “Oi sibona oi karaia toho gaudia amo diba oi abia be dala namona.” To, Dirava ena Hereva ena sisiba be inai: “Aonega tauna ia hakala bona hahediba herevadia momo ia kamonai henia, bona lalo-parara tauna ese diba momo ia davaria.” (Hereva Lada-isidia 1:5; 1 Korinto 10:11 itaia danu.) Nega haida ita sibona ita karaia toho gaudia amo diba ita abia be dala namona lasi, namona be haida edia kara ita itaia bona guna idia karaia kereredia do ita karaia lasi. Ma danu, namona be Keristen tauna ia laloaboio lasi “hui kurokuro be kwara gauna mai hairaina, kara maoromaoro dalanai ia noho neganai.” (Hereva Lada-isidia 16:31) Taunimanima ta ese ena mauri ibounai lalonai mai ena abidadama danu Iehova ena hesiai gaukara ia karaia neganai, Iehova vairanai ia be mai hairaina, bona ena kara be haheitalai namona dainai taunimanima idia matauraia be namo. Oibe, Dirava dekenai diba ita abia bona “kara maoromaoro dalanai [ita] noho” totona, namona be iseda maragi negana amo ela bona ita mase neganai diba ita tahua.​—Roma 11:​33, 34.

Sweden dekenai ia noho lagani 7 merona ena sivarai ese unai ia haheitalaia. Unai mero ese kongregesen ena Haroro School naria tauna ia hamaoroa ia ura unai school lalonai ia vareai. School naria tauna ia gwau, “Dahaka dainai oi ura vareai?” Mero ia haere ia gwau: “Namo lasi egu mauri ibounai dekenai anina bada lasi gaudia lau karaia!” (Kohelete 12:1) Iena haheitalai namona ese memero, kekeni, bona buruka taudia ia hagoadaia!

Hui Kurokuro Matauraia Karana

Hari inai nega lalonai, taunimanima edia tauanina idia goada totona eksasais idia karaia, bona spot gadara dekenai idia kwalimu idia gwauraia bada, to kerere gauna be idia laloa buruka taudia idia hereaia. To, namona be kongregesen lalonai idia noho hui kurokuro taudia dekenai edia lalohadai be dahaka?

Namo lasi Keristen buruka taudia ita lalodia boio, to ita lalodia bona nega haida ita bamodia. Hegeregere, pura ta ta iboudiai Iehova ena Witness taudia edia Kingdom Hall dekenai, buruka taudia oi hereva henidia, a? Idia moale bada herea natudia maragi bona tadikaka ma haida ese hanamoa herevadia idia henia neganai. Bona Witness taudia ese moale karana ta idia karaia neganai unai buruka taudia ese lagani idauidau taudia idia bamodia dainai idia moale! Ena be headava taudia ese edia lagani hegeregeredia headava taudia ma haida idia ura bamodia momo, to moale karana ta idia hegaegaelaia neganai bema buruka taudia haida idia boiridia mai, namo bada do ia havaraia.​—1 Tesalonika 3:12; 5:15.

Buruka taudia ita hereva henidia neganai, hemataurai karana be gau badana! Tadikaka ta be lagani 40 lalodiai Iehova ena hesiai gaukara ia karaia, bona ia ese elda ta ia hamaoroa neganai edena bamona kongregesen ia durua diba, unai lagani bada lasi elda tauna ia gwau: “Oiemu diba eiava aonega be ai ia durua diba lasi.” Unai be hebogahisi lasi herevana! Ena be unai buruka tadikakana ena goada be guna ena goada bamona lasi, bona ena haroro gaukara ena bada be ia diho ia lao, bona ia hegeregere lasi ena maduna haida ia huaia totona, to ia do henia heduru be bada herea. Lagani momo lalodiai ia ese kara maoromaoro dalana dekenai iena aonega bona diba be bada herea. Unai buruka taudia be idia do goada neganai Basileia harorolaia gaukara idia karaia goadagoada, dagedage karana idia haheaukalaia, Keristen ena maduna metauna idia huaia, bona taunimanima ma haida idia hadibaia, unai dainai harihari Dirava ena orea be ia goada bona Dirava ena lauma helaga ese ia durudia. Unai dainai, namona be nega ibounai unai buruka taudia ita matauraidia, badina aonega sisiba idia henia, lalokau dalanai mamoe idia naria, bona idia be hahediba taudia namodia dainai.

Buruka taudia edia heduru herevadia ita lalodia namonamo be mai ena badina. Hegeregere, gaukara ia manadalaia lo tadikakana ta ia gwau idia haginia Kingdom Hall ena iduara be ruma ena west kahana dekenai idia atoa be namo lasi. Lagani bada lasi tadikakadia ese ruma ena hairai toana idia laloa dainai, unai lo tauna ena hereva idia abia dae lasi. To lagani haida murinai, unai iduara idia kokia bona kahana ma ta dekenai idia atoa badina hanaihanai lai bona medu be west kahana amo ia mai bona iduara ia hadikaia. Unai tau ia diba dainai mai aonega danu ia hereva bona unai ese ruma toana ena namo herevana ia hanaia. Bema lagani bada lasi taudia be buruka taudia idia matauraidia, edia lalohadai bona aonega herevadia do idia hakala henia namonamo, unai neganai reana nega bona moni do idia haorea kava lasi. Bema buruka tauna ena hereva do idia abia dae lasi, hemataurai idia hahedinaraia totona, do idia hamaoroa ena hereva idia kikilaia to ma gau haida dainai dala idauna ta idia abia hidi.​—Hereva Lada-isidia 1:8 itaia danu.

Guna Negana Lasi, to Vaira Negana Laloa

Buruka taudia haida edia lalohadai be inai, idia gwau: “Oi bona lau ita matamata negana be nega namona.” Namo lasi ia ore negana ita laloa bada, to, namona be unai buruka taudia ita hagoadaia vaira negana do idia laloa totona, unai neganai edia guba davana do idia abia eiava Dirava ena Basileia lohia siahuna henunai do idia matamata bona goada lou. Unai nega ita naria noho lalonai, namona be idia diba idia buruka dainai gaukara haida idia karaia diba lasi. Unai idia diba bona mai moale danu idia noho neganai, bema idia dekenai lasi, to ma tau ta dekenai gaukara maduna ta idia henia, do idia lalohisihisi lasi.

Hegeregere, lagani gunadia ai reana hanaihanai buruka tauna ta idia abia hidi distrik hebouhebou ena program dekenai hereva ta ia henia totona. To hari, mai edia diba elda taudia momo idia noho bona hahediba dalana idia diba momo tadikakadia danu idia abidia hidi totona. Ena be unai elda taudia haida edia lagani be bada lasi, to idia hahedinaraia goevagoeva idia be mai edia goada, mai edia diba, hahediba idia karaia namonamo, bona mai hebogahisi danu sisiba idia henia diba, bona haida idia hagoadaia diba. (1 Tesalonika 5:​12, 13; 1 Timoteo 5:17) Unai dainai, buruka tadikakana be hebouhebou program dekenai hereva ta ia henia lasi neganai, reana do ia laloa ia idia laloa lasi, bona do ia lalohisihisi badina unai maduna idia henia lagani bada lasi elda taudia dekenai. To, unai hagoadaia lasi lalohadaina ia abia ia be goevadae lasi tauna ta dainai, to unai lalohadai ia hanaia diba. Oibe, kongregesen taudia iboudiai idia heduru diba dalana be buruka taudia idia hamaorodia kongregesen lalonai idia noho dainai idia moale, bona edia abidadama karana dainai idia lalokau henidia, bona edia hereva idia lalodia bada.

Momokani, namona be buruka tauna ia laloatao ia bamoa tomadiho tadikakadia ia mataurai henidia ia idia mataurai henia hegeregerena be gau badana. (Mataio 7:12; Roma 12:10) Namo lasi idia laloa idia buruka dainai idia doridia edia maduna idia rakatania totona bona namo lasi hagoadaia lasi lalohadaina idia abia, to namona be buruka taudia idia moale idia be lagani momo lalodiai mai edia abidadama danu hesiai gaukara idia karaia dainai. Danu, namona be ita ibounai ita moale badina Iehova ena hahenamo dainai idia lo elda taudia be idia momo idia lao, bona “mamoe idaudia” momo be Keristen kongregesen lalonai idia vareai noho lalonai, unai elda taudia idia heduru diba gaukara bona kongregesen maduna idia huaia totona.​—Ioane 10:16; Isaia 60:​8, 22; 2 Timoteo 2:2.

Hisihisi, gorere, eiava ma gau ta dainai, nega haida hui kurokuro taudia be idia badu. Unai ia vara neganai namona be edia ruma bese taudia eiava kongregesen taudia idia hebogahisi henidia. Danu, namona be buruka taudia idia goada karaia hagoadaia lalohadaidia idia abia totona, namona be edia kudouna bona lalona be matamata tauna ena bamona. Iehova ena Witness edia Hakaua Oreana ena buruka tauna ta ena daiutu dekenai ia mahuta matamata tauna be Betele ia rakatania gwauraia neganai, unai buruka tauna ese ia hamaoroa namona be iena gabu do ia abia tauna namona do ia gwauraia, unai buruka tauna ia gwau ia ura ia lo lagani bada lasi tauna be iena daiutu dekenai do ia noho, badina unai ese ia durua matamata tauna ena lalohadai ia abia totona bona ia gaukara noho totona. Unai horoa buruka tadikakana ia ura lasi ia ritaia eiava ia laga-ani, badina gaukara momo ia noho. Ia be haheitalai namona badina hagoadaia lalohadai ia abia noho bona vaira negana ia laloa!

Ita daradara lasi, “uhau edia hairai be edia goada, bona tatau burukadia edia hairai be edia hui kurokuro.” Matamata taudia ese edia goada idia gaukaralaia bona buruka taudia ese edia aonega idia gaukaralaia kara maoromaoro dalana dekenai be moale gauna! Buruka bona matamata Keristen taudia danu be moale bada idia abia bema lalo-tamona dekenai idia ese Iehova Dirava, “Idau Negai ena Taubada,” ena tomadiho momokanina ena gaukara idia karaia.​—Daniel 7:13.

[Picture on page 28]

Hui kurokuro Keristen taudia edia heduru be bada ma haida ese namo idia davaria totona