“Kwalimu Ahuna, Mauri” Davana Ia Abia

APOSETOLO Ioane be hahegani ia abia Semurana kongregesen ena aneru dekenai inai hereva do ia torea totona: “Lau do umui badinaia noho ela bona mase, vadaeni lau ese umui emui kwalimu ahuna, mauri, umui dekenai do lau henia.” (Apokalupo 2:​8, 10) Unai dainai, inai lalohisihisi bona moale sivaraina umui ai hadibaia, Frederick William Franz, Watch Tower Bible and Tract Society of Pennsylvania, bona Watchtower Bible and Tract Society of New York, Inc., bona tiokratic orea ma haida danu edia presiden be ia mase, ena tanobada maurina be December 22, 1992 ena daba kahanai ia ore.

Unai be lalohisihisi sivaraina badina iena tanobada gaukarana be ia haorea bona taunimanima idia lalokau henia bada, to ena abidadama Iehova dekenai be ia bada. To, ia be sivarai namona danu, badina iseda lalokau Tadikaka Franz dekenai Apokalupo 14:13 ena hereva ia momokani, ia gwau: “Harihari ia lao, Lohiabada idia abidadama henia noho neganai idia mase taudia be do idia moale. Ma Lauma Helaga danu ia hereva, ia gwau, ‘Oibe, idia ese edia gaukara mai hekwarahi dekena amo do idia laga-ani, badina be do idia laga-ani kava lasi. To edia kara namodia ena sivarai be idia danu nega tamona ia lao noho.’ ” Tadikaka Franz be ia hekokoroku lasi bona ia manau, ia gaukara auka bona ena haroro gaukara amo huahua momo ia havaraia, bona ia be “hesiai tauna mai ena kamonai bona mai ena kara maoromaoro” oreana ena memba ta, bona Iehova ese unai orea ia gaukaralaia bada lauma aniani ‘ena ruma taudia’ bona idia durudia taudia ia ubudia totona.​—Mataio 24:​45-47.

Tadikaka Franz be September 12, 1893 ai ia vara, Covington, Kentucky dekenai. Iena kakana amo hereva momokani sivaraina ia kamonai. Unai nega lalonai ia be University of Cincinnati dekenai ia lao, bona ia hegaegae Presbyterian Dubu ena haroro tauna ta ai ia lao totona. To, unai gaukara ia rakatania bona Bible Student taudia ia bamodia, Iehova ena Witness taudia edia ladana gunana unai. November 30, 1913 ai bapatiso ia abia, bona murina lagani dekenai, iunivesiti ia rakatania bona colporteur (pioneer) gaukara ia karaia hamatamaia. June 1, 1920 ai, ia be Brooklyn Betele ruma besena lalonai ia vareai. Daudau lasi murinai, colporteur gaukara naria totona opesi gaukara ia karaia, bona lagani 1926 ai, toretore dipatmen dekenai ia hanai, bona unuseniai gaukara bada ia karaia. Lagani 1945 ai, ia be Watch Tower Society bona ena durua orea ma haida edia vice presiden ai ia lao. Lagani 1977 ai, presiden Nathan H. Knorr ia mase neganai, ia be Watch Tower Society ena presiden ai ia lao, bona unai gaukara ia karaia ela bona ia mase. Ia mauri noho lalonai, Tadikaka Franz ia itaia Iehova ena Witness taudia edia namba be tausen haida amo ia bada daekau milion hani mai kahana dekenai. Gaukara dagi idauidau ia moalelaidia, hegeregere, hebouhebou badadia dekenai hereva ia henidia bona tanobada ena kahana idauidau dekenai branch opesi bona misinari rumadia ia vadivadi henidia. Iena mauri sivaraina be May 1, 1987, The Watchtower magasin lalonai idia torea.

Monday hanuaboi ai, December 28, 1992 ai, mase herevana ai karaia Brooklyn Betele ena Kingdom Hall dekenai. Tadikaka Albert D. Schroeder, Hakaua Oreana tauna ta be hebogahisi dalana amo lauma dalanai hagoadaia hereva namona ia henia. Telefon amo Betele ruma bese taudia Watchtower Farms ai, Patterson ai, Mountain Farm ai, bona Kingdom Farm ai, bona Canada branch ena Betele taudia danu be nega tamona unai hereva idia kamonai.

Iboudiai, ia ida idia gaukara hebou taudia danu, idia lalohisihisi Tadikaka Franz ia mase dainai. Ia ida idia gaukara hebou taudia bona ia ida idia loaloa hebou taudia ia hebogahisi henidia, ia hagoadadia, bona mai haheauka danu ia kara henidia. Momokani, orea taudia be idia kara henia Heberu 13:7 hegeregerena, ia gwau: “Umui emui hakaua taudia gunadia do umui laloatao. Idia ese Dirava ena hereva umui idia hadibaia. Edia mauri dalana do umui laloa lou, bona edia abidadama kara hegeregerena do umui badinaia.”

December 30, 1992 ai, Tadikaka Milton G. Henschel idia abia hidi Society ena presiden namba 5 ai ia lao totona, ia be Tadikaka Franz ena gabu ia abia.

[Pictures on page 31]

Frederick W. Franz 1913 ai

Society ena faktori Myrtle Avenue lagani 1920 ai

Lagani 1953 ai Nathan H. Knorr ida Yankee Stadium ai