Duahia Taudia Edia Henanadai

Keristen taudia be moni idia henia lasi, moni gadara dekenai idia kwalimu totona, unai dainai tiketi ta idia abia eiava fom ta idia torea hahonua harihari gauna ta idia abia totona be maoro, eiava?

Unai henanadai be nega ta ta ai idia henanadailaia, unai dainai iseda buka bona magasin ai idia gwauraia vadaeni. Gado haida dekenai, iseda buka bona magasin edia index idia karaia, hegeregere Watch Tower Publications Index 1930-1985 (bona 1986-1990 index danu). Bema Keristen tauna ta be ena gado dekenai unai index bukadia idia noho, unai ese ia do idia durua bena haere namodia do ia davaria haraga diba.

Ataiai idia gwauraia henanadai be haheitalai namona. Lagani 1930-1985 ena index buka lalonai, hereva kwarana “Duahia Taudia Edia Henanadai” henunai hereva kwarana maragina “ ‘drawings,’ may Christian accept ticket for?” herevana do oi davaria. Unai hereva be “Duahia Taudia Edia Henanadai” The Watchtower, February 15, 1973, rau 127 amo idia abia.a Witness taudia momo be mai edia 1973 The Watchtower, ena bound volume (eiava 1973 Gima Kohorona, magasin ta ta idia noho), eiava Kingdom Hall momo edia laiberi ai do oi davaria.

Lagani 1973 ai idia halasia magasin ese ia hahedinaraia goevagoeva, Keristen taudia ese moni gadara iboudiai eiava moni amo (tiketi ta eiava fom ta) idia hoia harihari gauna ta idia kwalimulaia totona be maoro lasi. Moni gadara ibounai ita dadaraia, badina unai be mataganigani ena toana.​—1 Korinto 5:11; 6:10; Efeso 4:19; 5:​3, 5.

Sitoa ta eiava bisinesi ta ese tiketi eiava fom hahonua karana idia gaukaralaia edia kohu idia hoihoilaia totona. Taunimanima ese edia ladana idia henia, eiava fom ta eiava tiketi ta idia hahonua bena idia siaia lao unai sitoa eiava bisinesi dekenai harihari gauna ta idia abia totona, to moni amo idia hoia lasi. Unai fom eiava tiketi be idia henia edia sitoa dekenai taunimanima idia veria totona; unai kara amo idia diba lasi daika ese harihari gauna do ia abia. Keristen taudia haida idia laloa reana unai fom eiava tiketi idia hahonua bena harihari gauna ta do idia abia be namo badina unai be moni gadara lasi, unai be hegeregere bisinesi eiava sitoa taudia ese gau haida eiava harihari gaudia idia henia kava taunimanima dekenai, bona idia laloa Keristen tauna ta ese unai kohu eiava harihari gauna ia abia be kerere lasi.

To, Keristen taudia haida idia hahekwakwanaia eiava idia hadaradaradia garina, haida ese harihari gauna do idia abia lalohadaina idia dadaraia, bona idia ura lasi unai kara idia abidadama henia. Isaia 65:11 ese ia hahedinaraia, Dirava ena hesiai taudia be ‘Laki diravana’ eiava ‘Dina Vaira Gwauraia diravana’ amo idia gini siri. Bona reana idia ura lasi harihari gauna idia abia taudia hegeregerena edia laulau be niuspepa eiava gau haida dekenai idia halasia. Bema Keristen tauna ta ena lalona ena mamina ia hegeregere lasi unai fom eiava tiketi ia hahonua totona, namo lasi unai kara idia karaia taudia idia gwauraia dika.​—Roma 14:​1-4 itaia.

[Footnotes]