Emu Tomadiho Gabuna Oi Matauraia, A?

“Evanelia sivarai ia matamaia negana amo, Keristen taudia be mai edia hebou gabuna Dirava idia tomadiho henia totona.” —“Primitive Christianity,” William Cave ia torea.

DIRAVA ena taunimanima be idaunegai amo idia hebou Dirava idia tomadiho henia totona bona unai idia moalelaia. Unai be ia momokani Keristen ginigunadia edia negai bona hari inai negai danu. Idaunegai toretore taudia bona tomadiho stadilaia taudia, hegeregere Lucian, Clement, Justin Martyr, bona Tertullian, idia lalo-tamona, idia gwau tomadiho totona Keristen taudia be mai edia gabu idia hebou hanaihanai totona.

Baibel ese unai ia hahedinaraia danu, ia ese Keristen orea idia hebou sivaraidia momo ia gwauraia. Unai orea idia gwauraidia kongregesen. Unai be maoro badina Baibel idia torea hamatamaia gadona dekenai unai hereva “kongregesen” ena anina be taunimanima idia hebou kara ta eiava gaukara ta idia karaia totona.

Keristen Tomadiho Karaia Gabu Gunadia

Keristen ginigunadia idia hebou neganai dahaka idia karaia? Baibel be unai hebou haida edia sivarai ia kikilaia bona ia hahedinaraia unuseniai taunimanima idia hadibaia be gau badana. (Kara 2:42; 11:26; 1 Korinto 14:​19, 26) Diba henia totona program idia hegaegaelaidia, hereva idia henia, taunimanima hagoadaia ekspiriens idia gwauraidia, bona Ierusalem ena hakaua oreana eiava aposetolo ta amo idia davaria revarevadia idia kikilaidia namonamo.

Kara 15:​22-35 ai, ia gwau Antioka Keristen orea be unai bamona revarevana ta idia duahia murinai, Iuda bona Sila “edia hereva goada amo varavara idia hagoadaia.” Sivarai ma ta ia gwau Paulo bona Banaba be Antioka ai idia ginidae neganai, “ekalesia taudia idia haboua. Bona Dirava danu idia karaia hebou gaudia ibounai ena sivarai idia gwauraia.” Keristen heboudia dekenai Iehova guriguri henia karana be gau badana danu.​—Kara 14:27.

Tomadiho totona Keristen ginigunadia idia hebou gabudia be hari inai negai Kerisendom ena hairai dubu haida bamona lasi. Nega momo, Keristen ginigunadia be taunimanima edia ruma ai idia hebou. (Roma 16:5; 1 Korinto 16:19; Kolose 4:15; Filemona 2) Nega momo taunimanima edia ruma guhina dekenai eiava edia atai daiutuna dekenai idia hebou. Lohiabada Ena Adorahi Anianina be atai daiutuna dekenai idia karaia. Danu Pentekoste dinanai lauma helaga ese hahediba taudia 120 ia horodia neganai, idia be atai daiutuna ta dekenai idia hebou.​—Luka 22:​11, 12, 19, 20; Kara 1:​13, 14; 2:​1-4; 20:7, 9.

Hari inai negai, Iehova ena Witness taudia be aposetolo taudia edia kara idia tohotohoa. Idia hebou gabudia idia gwauraidia Kingdom Hall. Unuseniai idia hadibadia Dirava ena Basileia ena sivarai namona harorolaia taudia ai idia lao totona. (Mataio 24:14) Kingdom Hall ai, Baibel idia stadilaia, idia guriguri, bona idia hahegoada heheni. Unai be Baibel ena hahegani Heberu 10:​24, 25 dekenai hegeregerena, ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi haida ese idia hadokoa bamona. To umui ta ta emui ekalesia varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.”

Iseda Tomadiho Gabuna Gaukaralaia Namonamo

Aposetolo Paulo ena hereva oi laloa, a? Ia gwau: “Dirava be ia ura lasi hereva kava bona heai, ia be maino Diravana” bona, “Gaukara ibounai umui karaia namonamo, mai dala maorona.” Unai karoa ena hereva oi tahua neganai, do oi diba Paulo ese Keristen heboudia karaia dalana ia kikilaia. Aposetolo edia negai hegeregerena, hari inai negai Keristen taudia idia ura edia hebou idia karaia namonamo mai maoro danu.​—1 Korinto 14:​26-40.

October 15, 1969, Gima Kohorona magasin ia gwau: “Kingdom Hall dekenai mai maoromaoro danu lauma gaudia idia tahua, idia ese tomadiho momokanina bona Baibel ena hadibaia hereva idia laloa bada. Bona unai hebou gabu toana ia idau herea lasi dainai idia hebou taudia idia herevahereva bona idia turana heheni, idia gari lasi.” Momokani, idia naria namonamo Kingdom Hall be hemataurai bona laloa bada dalanai idia gaukaralaia noho totona.

Kerisendom oreadia momo be unai bamona idia karaia lasi. Tomadiho orea haida ese edia tomadiho gabudia idia gaukaralaidia moale karadia idia karaia totona. Unuseniai tomadiho miusik ena rock concert bona weight lifting idia karaia, snooker patadia idia noho, natudia idia naridia, bona muvini piksa idia halasidia. Dubu ta ena program dekenai wrestling gadara idia karaia. Unai be aposetolo taudia edia kara bamona lasi.

Keristen ginigunadia edia negai, kara kerere ia vara neganai, karaharaga idia hamaoromaoroa. Hegeregere, Korinto kongregesen dekenai Lohiabada Ena Adorahi Aniani hebouna idia gaukaralaia idia aniani bona idia inuinu totona. Edia aniani idia abia mai hebou dekenai bona hebou idia do kehoa lasi eiava hebou lalonai idia ania, idia haida idia aniani bona idia inuinu bada. Unai be maoro lasi. Aposetolo Paulo ia tore henidia, ia gwau: “Umui be ruma lasi, a? Unuseniai umui aniani bona inuinu be namo.”​—1 Korinto 11:​20-29.

Paulo ena sisiba hegeregerena, Iehova ena Witness taudia be tauanina naria karadia be Kingdom Hall ai lasi to edia ruma dekenai idia karaia. Momokani, hanaihanai ita hebou dainai iseda turadia momo nega tamona ita davaria diba. To, Kingdom Hall be Iehova dekenai ita hahelagaia, unai dainai iena tomadiho mo sibona dekenai do ita gaukaralaia. Unuseniai ita hebou neganai namo lasi bisinesi ita karaia eiava moni gaukaralaia karana ita karaia.

Ma danu, Kingdom Hall ita gaukaralaidia lasi moale karadia karaia totona, moni abia totona, eiava kara haida, hegeregere natudia naridia totona. Gabu haida idia noho unai kara eiava bisinesi ita karaia totona.

Kingdom Hall ta ena elda taudia idia itaia kongregesen taudia edia kara be hebou dekenai gau haida idia abitorehai eiava edia abitorehai gaudia idia henia lou. Danu, Kingdom Hall dekenai, ta ese ta dekenai video kaset muvi teipi idia henia. Ena be moni idia abia lasi unai kara amo, to elda taudia ese idia hadibadia dainai idia lalo-parara sibodia edia ruma dekenai unai idia karaia be aonega karana.

Maoro lasi lalohadaina ia vara garina, bona Kingdom Hall gaukaralaia namonamo totona, namona be sibona dekenai ita gwau: ‘Kingdom Hall dekenai egu tauani karadia haida be ruma dekenai lau naridia diba, a?’ Hegeregere, moale karana ta oi hegaegaelaia noho neganai, namona be unai hereva be ruma dekenai do oi kikilaia, ani? Taunimanima be telefon amo ita hadibadia eiava edia ruma dekenai ita lao diba, ani? Unai neganai Paulo ena hereva hegeregerena ita gwau diba: ‘Ita be mai iseda ruma unai bamona gaukara ita naria totona, ani?’

Nega Bona Gabu Iehova Tomadiho Henia Totona

Baibel ai, Kohelete 3:1 ia gwau: “Gau iboudiai be mai edia nega korikori, bona gaukara iboudiai guba henunai idia karaia be mai edia nega korikori.” Hebou totona Kingdom Hall ai ita lao neganai, mai iseda lalona ibounai ida Keristen gaukara durua karadia do ita karaia. Unai nega idia gwauraia Iehova ita tomadiho henia totona.

Iesu ena tadina Iakobo ese sisiba ia henia Keristen kongregesen lalonai ta ita laloa bada bona ta ita laloa maragi garina. (Iakobo 2:​1-9) Iseda Kingdom Hall lalodiai unai sisiba be edena bamona ita badinaia diba? Bema hebou gabunai moale karana ta do idia karaia totona taunimanima boiria pepadia be haida sibona dekenai idia haridia neganai, unai ese ia hahedinaraia unai taudia sibodia idia lalodia bada. Kongregesen ta dekenai, unai pepadia be hebou taudia edia buka udaia baege eiava Baibel lalonai idia atodia. Momokani, unai be dala haragana, to mail amo eiava edia ruma dekenai laohaidia be mai hekwarahina. To, unai pepa idia henia lasi taudia idia itaia haida ese idia abia neganai edia mamina be edena bamona? Reana idia laloa unai taudia idia laloa bada, ani?

To, ita gwau lasi Kingdom Hall lalonai tau ta dekenai revareva ta eiava gau ta ita henia be mai taravatuna. Bona Kingdom Hall lalonai dina lalonai idia vara gaudia eiava ita karaia gaudia ita kikilaia, ta ita boiria iseda ruma dekenai, eiava moale karana ta karaia totona ta oi boiria be kerere lasi. To hehuni dala namonai do ita karaia. Namo lasi siboda eda tauani karadia ita tahua dainai Kingdom Hall dekenai ita hebou ena badina ita laloaboio, ita hebou ena badina be lauma dalanai diba ita abia.​—Mataio 6:33; Filipi 1:10.

Edia Haheitalai Namo Tataudia

Elda bona hesiai taudia idia goada karaia Kingdom Hall matauraia karana dekenai idia be haheitalai namodia totona. Nega momo elda tamona eiava rua bona hesiai taudia idia abidia hidi Kingdom Hall naria gaukarana idia biagua totona. Bema kongregesen rua eiava toi ese hebou ruma tamona idia gaukaralaia, elda orea komiti taudia ese unai gaukara idia biagua.

Ena be taunimanima idia abidia hidi unai gaukara idia naria totona, to namona be hesiai taudia bona elda taudia iboudiai idia hahedinaraia hebou rumana idia laloa bada. Idia diba Iehova dekenai Kingdom Hall idia hahelagaia bona iena tomadiho idia karaia unuseniai.

Ruma kahana ta ia dika neganai namo lasi elda taudia idia naria daudau idia hanamoa totona. (2 Sisiga 24:​5, 13; 29:3; 34:8; Nehemia 10:39; 13:11) Kongregesen haida lalodiai edia Kingdom Hall rumana idia sekea momo bona dika sisina idia davaria neganai idia hanamoa haraga. Idia ura gaudia be lista dekenai idia torea bona idia hegaegae ruma hanamoa kohudia idia noho bona idia gaukaralaidia diba totona. Bema ruma hanamoa kohudia, gaukara kohudia, bona ruma hagoevaia gaudia haboua tamona gabuna ta ia noho, namona be elda bona hesiai taudia iboudiai be idia ura nega ibounai unai gaudia idia atoa namonamo. Namona be buka bona magasin idia naria taudia be katon idia negea kava lasi, unai amo idia hahedinaraia hebou gabuna idia laloa bada.

Edia haheitalai namona amo, elda bona hesiai taudia be kongregesen taudia idia durudia bena mai goada danu Kingdom Hall do idia naria namonamo. (Heberu 13:7) Hebou rumana hagoevaia gaukarana idia durua neganai, iboudiai idia hahedinaraia idia ura hebou gabu ena toana ia namo.

Mataio 18:20 ai Iesu ia gwau: “Bema lauegu ladanai tau rua o toi idia hebou gabu ta dekenai, lau danu be idia dekenai lau noho.” Oibe, Iehova tomadiho henia totona ita hebou neganai, Iesu ia ura diba dahaka ita karaia. Herevana ita hebou tau ta ena ruma ai eiava hebouhebou badadia dekenai, to ita ia laloa.

Iehova ena Witness taudia milion momo idia laloa bada gauna be edia Kingdom Hall dekenai idia tomadiho. Unai gabu idia mataurai henia bada. Idia goada karaia idia naria namonamo totona, bona nega ibounai idia ura dala maoronai idia gaukaralaia. Namona be oi danu be Iehova ia henia sisibana do oi badinaia, ia gwau: “Dirava ena dubu lalonai oi raka vareai neganai emu aena oi naria namonamo.”​—Kohelete 5:1.