Basileia Haroro Ripoti

Idia Gini Auka Dainai Davana Namona Idia Abia

IESU ia gwau ia murinai idia raka taudia be do idia dagedage henidia, bona Paulo be 2 Timoteo 3:12 ai ia gwau: “Keriso Iesu danu idia hakapua dainai Dirava badinaia idia ura taudia ibounai ese dagedage ena hisihisi do idia abia.” To Iehova Dirava ena hesiai lao henia karana ai idia gini auka taudia ese davana namona idia abia.

◻ Unai bamona ia vara Malaysia ai. Tau ta, ena be ia be Budis tomadihona ia goadalaia bona ena natuna ia sisiba henidia auka, to ia hegeregere lasi, idia 6 be Iehova ena Witness taudia ida Baibel idia stadilaia karana do ia koua. Ena adavana danu ese hereva momokani ia ura henia. Dina ta ena dekena tauna ta ese ia hevasehalaia, ia gwau: “Edena bamona, emu natuna oi biagudia diba lasi, bona hari idia be Iehova ena Witness taudia ai idia lao, ani? Egu natuna iboudiai ese lau bona iseda Budis tomadihona idia badinaia. Oi be madi o!”

Tau be ena ruma ia lao haraga, bona ia gwau ena natuna ia stadi henidia hahinena be do ia dadabaia. To, ena natuna ese ena lalona idia hakerua, bena Iehova ena Witness taudia ida Baibel idia stadilaia noho bona hebou idia lao henidia loulou. Edia sinana ese ia durudia.

Gabeai, tau ese ena ruma bese ibounai ia haboudia, bena ia gwau: “Inai dala rua umui vairanai lau atodia, ta umui abia hidi: Lau do umui badinaia bona inai ruma ai do umui noho, eiava Keristen taudia ai do umui lao bona inai ruma do umui rakatania.” Natuna roboana, hemarai merona unai, ese ena kohu ia haboua matamaia, ruma ia rakatania gwauraia. Tamana ia boiboi, ia gwau: “Lasi! Umui ibounai be gwau-edeede taudia, unai dainai do lau mase be namo.” Bena ruma amo ia heau lasi, to ena famili ese idia gavaia, idia noia sibona do ia hamasea lasi. Edia noinoi ia hoalaia, unai dainai ia lou lao ruma.

Gabeai, tau ia itaia Baibel ena hereva momokani ese ena natuna edia kara ia hanamoa. Dina ta guna ia hevasehalaia tauna ese ia hereva henia, ia gwau: “Egu natuna dainai egu lalona ia hisihisi. Lau idia koia bona egu gau idia henaodia.” To Iehova ena Witness taudia ida idia stadi taudia edia tamana ia gwau: “Egu natuna be idau. Lau idia kara namo henia bona lau gaukara lasi neganai lau idia durua, egu motuka ena abitorehai monina idia haloua.”

Hari, kekeni toi bona edia sinana be bapatiso idia abia vadaeni. Mero ta be special pioneer tauna. Edia tamana, guna ia badu dikadika tauna, be hari ia manau bona Memorial hebouna ia lao vadaeni.

Unai mero bona ena taihuna toiosi bona edia sinana be Iehova dekenai idia gini auka dainai ia hanamodia. Hari idia be Basileia harorolaia taudia goadadia bona Iehova ena lalona idia hamoalea.​—Hereva Lada-isidia 27:11.