Memero Kekeni, ‘Iehova Idia Abidadama Henia’ Taudia
MEMERO kekeni mo sibodia lasi be mai edia hairai, bona burukadia mo sibodia lasi be mai edia aonega. (Hereva Lada-isidia 11:22; Kohelete 10:1 itadia.) Ia doko lasi hairaina bona aonega korikorina idia abia taudia be inai: Iehova idia abidadama henia bona mai edia lalona ibounai ida idia gwau: “Oi be egu Dirava.”—Salamo 31:14; Hereva Lada-isidia 9:10; 16:31.
Tanobada hegegemadai taunimanima mai hairaidia momo herea, matamatadia bona burukadia, ese edia aonega idia hahedinaraia, Dirava ena hesiai lao henia bona iena Basileia ena sivarai namona harorolaia karadia amo. Idia ta be Sabrina, iena lagani be 8.
Sabrina be Germany ai ia noho; ia be greid 2 ai. Ia be Iehova ena Witness kekenina ginigunana iena sikuli ai. Madi, iena klas taudia ese idia gwaugwau henia, ela bona dina ta tisa ese klas taudia ia hamaorodia idia ura henia bada bukana do idia mailaia klas dekenai. Sabrina ia laloa Lau Egu Bible Sivarai Buka do ia mailaia. Ena be ia gari, to hanuaboi ai ia hegaegae namonamo. Ena klas taudia iboudiai be 26, unai dainai ia laloa reana nega sisina mo iena buka do ia hahedinaraia diba. To ena lalona ia hadaia auka ena hereva ibounai do ia gwauraia, bona ia diba Iehova ese do ia durua. Buka mailaidia dinana ai tisa ese klas taudia ia nanadaidia, daika daika ese idia mailaidia bona daika ia ura ena buka do ia hahedinaraia guna. Hoa gauna be inai: Sabrina mo sibona ese buka ia mailaia. Klas vairanai ia gini bena buka ena sivarai ia gwauraia, ena hereva haida ia duahidia hedinarai bona ena laulau ia hahedinarai henidia, bona ia gwau ena sivarai ibounai be Baibel ena amo. Dokonai ia gwau: “Daika ia ura inai buka do ia abia?” Ia ese buka ta iena tisa ia henia, bena gabeai buka ma 10 be ena klas taudia ia henidia. Tisa ese ena buka hahedinaraia karana be inai bamona ia gwauraia: “Inai bamona karana be guna lau itaia lasi.” Ia ese A makana Sabrina ia henia.
Witness memerodia kekenidia momo be sikuli ai sivarai namona idia harorolaia. Idia ta be Erika, Mexico ai ia noho, ena lagani be 11. Ia beibi negana amo ena tamana sinana ese Iehova lalokau henia karana idia hadibalaia. Iena sikuli gaukarana be namo herea. Tisa ese ia henia gaukarana ta be AIDS gorerena bona kuku bona kekero muramurana manadalaidia karana edia sivarai do ia torea. Ia hegaegaelaia neganai Noga! magasin ia gaukaralaia, bena tisa ese maka badana ia henia. Ia nanadaia ena hereva be edeseniai ia abia, bena unai sivarai idia gwauraidia magasinidia ia henia. Gabeai, tisa ese unai magasin ia gaukaralaidia, unai gau be klas taudia ida herevalaidia totona. Erika ena kara namodia bona ena maka badadia dainai, bona ena tisa ia matauraidia dainai, ia be hegeregere, harihari gaudia, setifiket, bona ena sikuli davana kahana do ia abidia. To, ia laloa iena kara mai anina bada be, sibona ia hahedinaraia ia be Iehova ena Witness kekenina ta, Baibel sivaraina idia gwauraia bukadia ia hariharilaidia, bona Dirava ena ladana ia hanamoa.
Mero ta ladana Shannon be New Zealand ai ia noho, ena lagani be 10. Ena matana tamona sibona ia namo, badina be ia beibi neganai kensa gorerena ese ta ia hadikaia. Shannon ena lagani be 7 neganai, ena sinana be Iehova ena Witness taudia ida Baibel idia stadilaia matamaia. To, nega daudau lasi murinai ia be tau ta ida idia noho hebou matamaia dainai, ena stadi ia hadokoa. Shannon ese ia noia gwaumaoro do ia henia do ia stadi noho. Ena ura gauna ia abia. Witness taudia ese idia vadivadi henia noho, bena gabeai ruma taudia toiosi ese Baibel idia stadilaia bona lauma dalanai idia goada idia lao. Shannon ena sinana ese ena turana ia adavaia bena idia ruaosi ese bapatiso idia abia.
Dina ta Shannon be sekit naria tauna ena adavana ida haroro gaukarana idia karaia. Ruma tauna ta ese Shannon ia nanadaia, ia gwau: “Dahaka ia vara emu matana dekenai?” Ia gwau: “Kensa gorerena ese ia hadikaia dainai, doketa ese ia kokia. Kahirakahira Iehova ese matamatana lau do ia henia Paradaiso ai, bona hari ai mai, unai do ai gwauraia totona.”