Daika Ena Kerere?

TAU ginigunana, Adam, dekenai ia matamaia. Ia kara dika murinai Dirava dekenai ia gwau: “Oi karaia lau dekenai hahine be unai au huahua ia henigu, bona lau ania.” Unai be hegergere, ia gwau: “Unai be lauegu kerere lasi!” Hahine ginigunana, Eva, be Adam ena kara hegegegerena ia karaia, ia gwau: “Gaigai ese lau dekenai ia koikoi, bona lau ania.”​—Genese 3:​12, 13.

Ma ta dekenai kerere atoa karana be Eden lalonai ia hamatamaia. Nega ta unai bamona karana oi karaia, a? Hekwakwanai idia vara negenai, karaharaga ma ta dekenai kerere oi atoa, a? Eiava idia vara gaudia oi lalohadailaia guna bena daika ese kerere ia karaia momokani oi davaria? Nega momo tarapu ta lalonai ita moru; iseda kerere ita atoa ma ta dekenai bona ita gwau, “Unai be lauegu kerere lasi!” Hekwakwanai idia vara neganai, taunimanima momo edia kara mani ita kikilaia. To, mai anina bada gauna be inai: Bema oi dekenai ia vara, dahaka do oi karaia?

Moni Lasi Hekwakwanai

Haida ese moni lasi hekwakwanai idia davaria neganai idia gwau: “Lauegu kerere lasi​—moni bona kohu gaukaralaia dalana ia dika, koikoi momo bisinesi taudia, bona kohu bona aniani edia davana ia bada ia lao dainai kerere ia vara.” Momokani? Reana unai gaudia dainai haida be bisinesi karadia idauna ta ai idia vareai. Nega haida mataganigani ese edia ura namona ia hakererea, bona taunimanima haida be idia diba lasi bisinesi karadia idia tohoa bona edia moni idia haorea mataganigani koikoi taudia dekenai. Idia laloaboio herevana be inai: “Gau ta ena toana be momokani bamona to gauna be ia koikoi.” Idia ura henia herevadia sibodia idia kamonai henia, to, moni bada idia haorea neganai, idia be ma ta dekenai kerere idia atoa. Madi, Keristen kongregesen lalonai danu nega haida unai ia vara.

Haida be idia noho lasi dava bada nadi, o idia karaia lasi televisen drama, eiava ruma haginia tanodia idia hoidia bisinesi idia durua bena edia moni idia haorea kava. Taga idia ura dikadika dainai Baibel ena sisiba idia laloaboio: “Kohu momo idia ura henia taudia be hedibagani dekenai idia moru . . . mai lalohisihisi momo, edia mauri idia hadikaia ore vadaeni.”​—1 Timoteo 6:​9, 10.

Moni biagua namonamo lasi karana ese moni lasi hekwakwanai ia havaraia diba. Haida idia ura dava bada dabuadia idia hahedokilaia bona moni bada idia negea idia laga-ani neganai, aniani gabudia ai, eiava bouti, kamera, o stereo abia totona. Inai gaudia abia totona haida be mai aonega ida palani idia karaia bona edia moni idia naria namonamo. To, ma haida idia ura lasi idia naria bona abitorehai metauna idia abia. Bema unai ia vara, ia be daika ena kerere? Ia hedinaraia idia be Hereva Lada-isidia 13:18 ena hakaua herevadia idia laloa lasi. Unai siri ia gwau: “Sisiba ia dadaraia tauna be ogogami bona dika do ia davaria.”

Natudia Dainai Lalohisihisi

Tama sina haida be reana do idia gwau: “Elda taudia edia kerere dainai lauegu natudia be hereva momokani idia rakatania. Nega idia atoa lasi idia totona.”

Mamoe taudia naria gaukarana be elda taudia edia maduna, to tama sina edia maduna be dahaka? Idia be haheitalai namona badina be lauma helega ena huahua idia hedinaraia hanaihanai edia kara dekenai, a? Wiki iboudiai famili stadi idia karaia, a? Iehova ena hesiai gaukara idia goadalaia bona unai gaukara totona edia natudia idia hegaegaelaia, a? Edia natudia edia hebamo taudia idia namo, a?

Unai hegergerena, tama sina be natuna ena sikuli gaukara idia gwauraia diba: “Tisa taudia edia kerere dainai lauegu natuna ia kwalimu lasi sikuli dekenai. Ia idia ura henia lasi. Unai be sikuli namona lasi.” Tama sina be tisa danu idia herevahereva hebou, a? Dahaka ia stadilaia be idia diba bona idia laloa bada, a? Sikuli gaukara be ruma dekenai ia abia mai neganai, nega, gabu bona heduru idia henia, a? Hekwakwanai ena badina be natuna eiava tama sina be unai gaukara idia laloa momo lasi, eiava idia lahedo dainai, a?

Namona be tama sina be kerere idia atoa lasi sikuli ena heau dalana dekenai, to heduru karana be natudia idia hagoadaia lalohadai maorona idia abia bona sikuli dekenai idia gaukara goadagoada.

Lauma Dalanai Idia Tubu Lasi

Nega haida inai bamona ita kamonai: “Lauegu kerere lasi dainai lauma dalanai lau goada lasi. Elda taudia be nega idia atoa lasi lau dekenai. Lau be turadia lasi. Inai kongregesen lalonai Dirava ena lauma helaga be lasi.” Ena be unai bamona idia hereva to kongregesen taudia ma haida be mai edia turadia, lauma dalanai idia tubu daekau; bona kongregesen ia bada ia lao bona lauma dalanai huahua ia havaraia. Bema unai ia vara dahaka dainai haida be mai edia hekwakwanai?

Hereva auka bona maumau momo taudia be turadia momo lasi. Ena malana amo taunimanima ia gwauraia dika eiava ia hadikaia tauna ese ma haida edia lalona ia hamanokaia diba. Idia ura lasi lauma dalanai idia manoka dainai tadikaka haida be ia do idia bamoa momo lasi. Reana do ia laloa unai kongregesen ena lalokau be bada lasi bona do ia lao kongregesen ma ta, bena ma ta, bena ma ta dekenai. Idia be Africa ena animal hutumadia bamona, hanaihanai idia loaloa bona ava namodia idia tahua noho. Unai “loaloa” Keristen taudia ese kongregesen maorona idia tahua noho. To, moale momokani do idia davaraia bema edia tadikaka edia namo idia itaia bona sibodia edia mauri lalonai Dirava ena lauma helaga ena huahua idia hedinaraia!​—Galatia 5:​22, 23.

Tadikaka haida be edia lalona idia hadaia hebou ta ta ai tadikaka ta do idia hereva henia bona iena kara namona ta idia hanamoa. Reana iena natudia edia hemataurai karadia, hanaihanai ia mai Keristen hebou dekenai, Gima Kohorona Stadi lalonai haere namona ia henia, Buka Stadi eiava haroro hebou idia karaia ena ruma dekenai, bona ma gau haida dainai idia oi hanamoa. Bema oi hekwarahi tadikaka edia kara dika sibona oi itaia lasi to edia kara namodia oi tahua, edia kara namodia momo do oi davaria. Unai ese oi do ia hanamoa bona turadia namodia momo do oi davaria.

Eksikius Badana

“Ia be Dirava ena ura.” “Diabolo dekenai kerere ita atoa.” Eksikius badana be Dirava eiava Diabolo dekenai iseda kerere ena badina ita atoa. Momokani idia be mai edia siahu iseda mauri lalonai. To, haida idia laloa gau iboudiai edia mauri lalonai, namo bona dika, be Dirava eiava Satana edia kara ta amo ia vara. Idia laloa lasi edia kara be edia mauri ia haidaua diba. Idia gwau: “Bema Dirava ena ura be motuka matamata lau abia, do lau abia.”

Unai bamona taudia be idia laloa namonamo lasi bena abia hidi badadia idia karaia, badina idia laloa Dirava ese idia do ia naria. Bema abia hidi dikana idia karaia bona edia mauri idia hadikaia o edia moni idia haorea, idia gwau unai be Diabolo ena kerere dainai. Bema kara ta ‘ena davana ita laloa guna lasi’ to ita karaia kava haraga, Satana dekenai kerere ita atoa, eiava Iehova ese unai hekwakwanai do ia kokia totona ita naria, unai be hekokoroku karana bona Baibel ena hereva hegeregerena lasi.​—Luka 14:​28, 29.

Satana ia ura Iesu be unai bamona do ia laloa bona ena kara ena davana do ia laloa lasi to do ia kara kava. Mataio 4:​5-7 ese hedibagani iharuana ia herevalaia, ia gwau: “Satani ese Hanua Helaga dekenai ia hakaua lao, Dubu Helaga ena atai dekenai ia haginia. Vadaeni ia gwau, ‘Bema oi be Dirava ena Natuna neganai, inai gabu dekena amo oi roho diho, badina be Buka Helaga ia gwau, “Dirava ese ena aneru dekenai do ia hereva henidia, vadaeni edia imana dekenai do idia abia isi oi, oiemu aena nadi dekenai do oi botaia garina.” ’ ” Iesu ia diba bema sibona hamasea karana ia karaia, kavakava karana unai, Iehova ese do ia durua lasi. Unai dainai, ia haere, ia gwau: “Lohiabada oiemu Dirava dekenai do oi dibagania lasi.”

Edia kerere idia atoa Dirava eiava Satani dekenai taudia be hisiu dekenai toa idia laloa taudia bamona, unai taudia dekenai idia vara gaudia edia badina be hisiu edia toana bona heau dalana dekenai idia atoa. Idia laloa herevana dahaka idia karaia to do ia vara gauna be, do ia vara sibona, bona idia haidaua diba lasi. Unai lalohadai kererena idia abia dae dainai, Galatia 6:7 ena taravatu idia laloaboio: “Bema tau ta aniani uhena ia hadoa, vadaeni unai bamona aniani sibona be do ia abia.”

Ita Sibona Ita Koia Lasi

Goevadae lasi tanobadana dekenai ita noho be ta ese do ia hepapahuahulaia lasi. Ita herevalaia vadaeni gaudia, do idia vara. Kara dika taudia be iseda moni idia henaoa. Biagudia haida edia kara ia maoro lasi. Hebamo dikana ese iseda natudia idia hakaua kerere. Tisa bona sikuli haida idia hanamoa be namo. Nega haida Reana elda taudia edia lalokau idia habadaia be namo. To, ita ibounai be kara dika ena siahu ita mamia bona ia havaraia kerere momo ita diba, bona Baibel ia gwauraia hegeregerena, “Satani ese tanobada taudia ibounai ia gunalaia noho.” Bema ita laloa mauri ena dala do ia auka lasi hanaihanai, ita sibona ita koia.​—1 Ioane 5:19.

Danu, namona be ita laloatao ita be kara dika taudia bona kerere do ita karaia diba, bona namona be ita abia dae nega momo iseda kavakava karana dainai hekwakwanai momo ita sibona dekenai ita havaraia. Paulo be Roma Keristen taudia ia hamaoroa, ia gwau: “Umui ta ta dekenai lau hamaoroa do umui hekokoroku lasi, to do umui manau.” (Roma 12:3) Unai sisiba be mai anina ita dekenai danu. Iseda mauri lalonai bema gau dikana ta ia vara neganai, karaharaga iseda tubudia Adam bona Eva bamona, do ita gwau lasi: “Unai be lauegu kerere lasi!” To, sibona do ita nanadaia, ‘Bema dahaka lau karaia neganai be inai dika lau reaia vadaeni? Aonega taudia edia sisiba lau tahua bona abia hidi namona lau karaia, a? Hepapahuahu ia vara neganai, kerere lau atoa haraga ma ta dekenai eiava lau laloa idia ura lasi lau idia hahisia?’

Keristen taravatu ita badinaia bona dala maorona ai ita laloa namonamo neganai, iseda turadia be do idia momo bona hekwakwanai be do idia momo lasi. Iseda mauri ena hekwakwanai momo do ita hanamoa diba dainai ma haida ita kara henia neganai mai moale ida do ita karaia bona inai henanadai ese ita do ia hahisia lasi: “Daika ena kerere?”

[Picture on page 28]

Tama sina be gau momo idia karaia diba edia natudia idia durudia lauma dalanai idia tubu goadagoada totona