Basileia Haroro Ripoti

“Gaukara Idia Hadokoa Lasi”

IESU KERISO bona ena aposetolo edia nega amo ema bona hari, tomadiho gunalaia taudia idia gaukara goadagoada Dirava ena Basileia ena sivarai namona harorolaia gaukarana koua totona. Nega momo, kaunsolo taudia Ierusalema dekenai ese ‘taravatu idia atoa Iesu ena ladana dekenai idia hadibaia lasi’ totona. (Kara 5:​27, 28, 40) Ena be unai ia vara, to Baibel ia gwau, “Dirava ena hereva ia bada daekau, bona diba tahua taudia idia momo daekau Ierusalema dekenai.”​—Kara 6:7.

Lagani 2,000 idia orea vadaeni, to Israel dekenai tomadiho gunalaia taudia ese gavamani taudia edia lalona idia ania unai tano lalonai Keristani taudia edia gaukara idia hahekwakwanaia totona. November 1987 lalonai, dagedage tomadiho taudia ese Tel Aviv dekenai, Israel ena gavamani taudia idia doria dainai, Iehova ena Witness taudia idia oda henidia Watch Tower Society brens opesi ena Kingdom Hall dekenai edia Keristani hebou idia hadokoa totona. October 1989 lalonai unai oda ena siahu ia hamatamaia. Unai taravatu hegeregerena, lagani toi lalonai, Witness taudia be idia rentaia rumadia dekenai idia hebou. Edia Kingdom Hall be ia noho kava, idia gaukaralaia lasi.

Unai ia vara noho lalonai, edia hekwakwanai be Israel ena Kota Badana dekenai idia abia lao. Gavamani ena loea taudia ese Witness taudia edia hereva idia kamonai murinai, idia gwau do idia kwalimu, taunimanima ese edia tomadiho inai henia karana dikana idia itaia diba dainai. Unai dainai unai gabu ena gavamani taudia ese edia hahemaoro herevana idia haidaua, bona Iehova ena Witness taudia be mai moale ida edia Kingdom Hall dekenai idia giroa lou.

Unai hekwakwanai ia vara lalonai, Baibel ena hereva momokani harorolaia gaukarana ia maragi, a? Lasi momokani! Kingdom Hall idia koua neganai, Tel Aviv dekenai kongregesen be rua bona buka stadi grup tamona Lod taoni dekenai. To, lagani toi Kingdom Hall idia kehoa murinai, Iehova ena Witness taudia edia kongregesen be hani bona buka stadi grup matamatana be Beersheba dekenai idia karaia.

Israel dekenai Witness taudia edia namba ia bada ia lao Arab bona Hebrew gado taudia dekenai sibona lasi. Guna Soviet Union tano taudia be Israel dekenai idia hanaia lao dainai, hari Russia gado dekenai idia hereva Iehova ena Witness taudia ese idia dekenai sivarai namona idia harorolaia noho. Russia gado heboudia haida be kongregesen toi ai idia karaia, bona vanegai Russia gado hebouhebouna dekenai taunimanima 100 mai kahana idia mai.

Oibe, ita diba tomadiho ma haida idia inai henia taudia ese tomadiho momokani do idia koua toho. To Basileia idia harorolaia taudia ese Keristani ginigunadia idia tohotohoa. Ena be idia dagedage henidia, to, idia ese “Sivarai Namona idia gwauraia noho. Inai gaukara idia hadokoa lasi.”​—Kara 5:42.