Lau Sibona to Lau Ia Rakatania Lasi

ADA LEWIS ESE IA GWAURAIA

Lau be nega ibounai sibona egu ura lau karaia hahinena. Gau ibounai dekenai egu ura lau badinaia dainai momo idia gwau lau be kwara auka hahinena. Lau diba danu, egu lalohadai lau gwauraia hedinarai haraga dainai hekwakwanai momo lau davaria vadaeni lagani momo lalonai.

TO, Iehova Dirava ese lau ia dadaraia lasi egu kara kereredia dainai, ia lau tanikiu henia. Iehova ena Hereva lau stadilaia dainai egu kara lau haidaua diba, bona lagani 60 lalonai iena Basileia gaukara lau karaia. Lau maragi neganai ema bona hari, hosi lau lalokau henidia momokani, bona lau laloa, taria varona ese hosi ia biagua bamona, Dirava ese lau ia durua egu kwara auka karana lau biagua namonamo totona.

Lagani 1908 ai, South Australia, Mount Gambier ena gohu hairaina ta kahirakahira ai lau vara. Natu 8 amo lau be kekeni roboana, bona egu tama sina be boromakau idia naridia. Ai ibounai be do maragi neganai, emai tamana ia mase. Unai dainai lau ese boromakau naria gaukara maduna lau huaia, badina egu taihuna badadia rua be gabu daudau ai moni gaukara idia karaia emai ruma bese durua totona. Boromakau naria gaukarana be auka herea.

Nega Ginigunana Hereva Momokani Lau Davaria

Emai bese be Presbyterian Dubu taudia bona nega ibounai idia lao guriguri. Lau be Sunday sikuli tisa ta, bona lau laloa lauma dalanai idia maoro bona mauri dala goevadia be natu dekenai lau hadibadia be egu maduna.

Egu tubuna tau be lagani 1931 ai ia mase, bona ena kohu lalonai Watch Tower Society presiden J. F. Rutherford ena buka haida idia noho. The Harp of God bona Creation buka lau duahidia. Bona lau duahia noho lalonai lau hoa badina lau itaia, lau abidadama henia bona natudia dekenai lau hadibaia gaudia be Baibel ese ia hamomokanidia lasi.

Souli ia mase diba, taunimanima ibounai idia mase neganai guba dekenai do idia lao lasi, bona taunimanima be hel dekenai do idia hisihisi noho lasi; unai lau dibaia neganai, lau hoa bada. Bona lau davaria, wiki ibounai Sunday idia hahelagaia sabati dinana be Keristani hahedibana lasi neganai, lau daradara. Vadaeni, lau ese edena do lau abia hidi: Kerisendom edia sene hahediba do lau badinaia, eiava Baibel ena hereva momokani do lau hadibaia matamaia. Daudau lasi murinai egu lalona lau hadaia, bona Presbyterian Dubu amo lau doko.

Sibona Lau Noho Momokani

Dubu oreana do lau rakatania bona Sunday sikuli hahediba gaukara do lau rakatania herevana lau gwauraia hedinaraia neganai, egu ruma bese, turadia, bona guna dubu dekenai lau bamoa taudia idia moale lasi. Lau idia kikilaia momo, bona idia davaria lau ese Judge Rutherford taudia ida lau hebamo neganai, unai be hegeregere lahi au bamona udu mauri karana dekenai. Lau idia dadaraia vaitani lasi, to egu ruma bese bona turadia gunadia ese lau idia tura henia lasi.

Unai buka lalonai idia torea Baibel siridia lau duahia bona stadilaia noho neganai, haroro gaukara lau karaia be namo, lau lalo-pararalaia matamaia. Lau dibaia, Iehova ena Witness taudia edia haroro gaukara lalonai idia ese ruma ta ruma dekenai idia lao. To unai nega lalonai emai distrik dekenai Witness taudia be lasi. Unai dainai tau ta ese lau ia hagoadaia eiava ia hadibaia lasi, Dirava ena Basileia sivarai namona lau harorolaia totona. (Mataio 24:14) Egu mamina be lau sibona lau noho.

To herevana, Baibel ena oda haroro totona lau laloa hanaihanai dainai, egu lalona lau hadaia haroro gaukara do lau hamatamaia be gau badana. Lau gurigurilaia momo murinai, lau laloa egu dekena taudia do lau vadivadi henidia matamaia, lau stadilaia gaudia do lau hadibadia sibodia edia Baibel amo. Lau hamatamaia ruma ginigunana be guna egu Sunday sikuli gaukarana ia naria tauna ena. Ena vairana be auka bona dubu lau rakatania dainai lau ia badu henia; unai ese lau ia hagoadaia lasi. To ena ruma lau rakatania bona ruma ma haida dekenai lau lao neganai, moale bona goada mamina lau abia.

Taunimanima ese lau idia dagedage henia lasi, to lau hoa badina guna lau bamoa dubu taudia lau hereva henidia neganai, idia laloa egu hereva be anina lasi. To lau hoa bada bona lau lalohisihisi badina egu taihuna badana ese lau ia dagedage henia bada; ena kara dainai Iesu ena hereva lau laloa: “Emui tamana, emui sinana, emui tadikakana, emui varavarana, emui turana, ese umui do idia samania, . . . Taunimanima ibounai ese do idia badu henia umui dekenai lau dainai.”​—Luka 21:​16, 17.

Lau maragi neganai, hosi guia dalana lau diba namonamo dainai, taunimanima edia ruma lau lao henidia haraga totona, hosi do lau guia. Unai amo lau ese idia daudau sisina gabudia dekenai lau lao diba. To, adorahi ta ai, dala ia dedidedi dainai, egu hosi ia dedi bona ia moru, bona egu kwarana dekenai bero dikana lau abia. Nega sisina lalonai idia laloa reana do lau mauri lasi. Lau moru murinai, bema dala idia paripari eiava idia dedi neganai, sulky sibona amo lau lao, hosi lau guia lasi.a

Orea ida Lau Hebamo

Daudau lasi, lau moru murinai, ful-taim gaukara taudia, hari idia gwauraidia painia taudia, ese Mount Gambier distrik idia vadivadi henia. Unai be nega ginigunana, abidadama tadikaka lau itadia bona lau hereva henidia diba. Idia do lao lasi neganai, lau idia hagoadaia Watch Tower Society brens opesi do lau tore henia bona lau henanadai edena bamona dala maorona ai haroro gaukara do lau karaia diba.

Society lau tore henia murinai, buka, buklet, bona haroro herevana kadi ta idia siaia taunimanima dekenai egu gaukara lau herevalaia totona. Brens opesi ese lau idia tore henia dainai egu mamina be lauma dalanai lau be egu tadikaka bona taihu kahirakahira dekenai. To, painia taudia be ma taoni ta dekenai idia lao neganai, egu mamina be lau sibona lau noho lou.

Egu distrik dekenai, dina iboudiai hosi bona sulky amo lau haroro dainai momo ese lau idia diba. Bona, nega tamona ai, boromakau naria gaukara lau karaia diba danu. Unai nega ai, egu bese taudia be edia dagedage karana idia hadokoa bona egu gaukara idia koua toho lasi. Lagani hani lalodiai, lau bapatiso lasi bona lau bamodia taudia be lasi, to sivarai namona lau harorolaia.

Hebouhebou, Bena Bapatiso

April 1938 lalonai, Tadikaka Rutherford ese Australia ia vadivadi henia. Tomadiho gunalaia taudia edia dagedage karana dainai, Sydney Town Hall ai abia murinai, gwaumaoro idia kokia lou. To, gabeai, gwaumaoro idia henia Sports Grounds ai gaukaralaia totona. Inai dagedage karana dainai emai palani ai haidaua ese namo ia havaraia, Sports Grounds ia bada dainai, taunimanima tausen momo be unuseniai idia helai diba. Taunimanima 12,000 bamona idia mai, bona tomadiho gunalaia taudia edia dagedage karana idia kamonaia dainai, taunimanima momo idia mai emai hebou dekenai.

Tadikaka Rutherford ia vadivadi neganai, Sydney ena taoni ta dekenai dina 7 hebouhebouna ai abia. Unai hebouhebou dekenai egu gwauhamata Iehova Dirava dekenai lau hamomokania ranu bapatiso amo. Australia ibounai amo idia mai tadikaka bona taihu ida lau hebou dainai lau mamia moalena oi lalo-pararalaia diba, a?

Mount Gambier Dekenai Lau Giroa

Egu hanua dekenai lau giroa lou neganai, sibona lau noho mamina lau abia bada, to lau goada noho Basileia gaukara lau karaia totona. Daudau lasi murinai, Agnew ruma besena lau hedavari henia. Hugh, ena adavana, bona edia natudia hani. Idia be Millicent taoni dekenai idia noho, Mount Gambier amo ia be kilomita 50 bamona. Bona idia danu Baibel stadi karaia totona, hosi bona sulky amo lau lao bona lau giroa mai kilomita ibounai 100 lau heau. Idia ese hereva momokani idia abia dae neganai, sibona lau noho mamina ia ore.

Daudau lasi murinai, ai ese haroro grup maragina ai havaraia. Lau moale badina egu sinana ese hereva momokani ia ura matamaia bona lau ia bamoa kilomita 100 bamona ai lao unai grup matamatana danu ai stadi totona. Unai nega amo, ena be ia bapatiso haraga lasi, Sinagu ese nega ibounai lau ia hagoadaia bona ia durua. Hari lau sibona lau noho lasi!

Emai grup maragina dekenai painia hani idia noho, Agnew kekeni toi​—Crystal, Estelle, bona Betty​—bona lau. Lagani 1950 lalonai, unai kekeni toi ese Watchtower Bible School of Gilead dekenai idia lao. Murinai idia siaidia lao India bona Sri Lanka dekenai misinari gaukara idia karaia totona. Mai abidadama ida idia do gaukara noho.

January 1941 lalonai Australia dekenai Iehova ena Witness taudia edia gaukara idia taravatulaia, unai dainai kara haida ai karaia haraga. Haroro gaukara lalonai ai gaukaralaia buka, rekoda, bona Baibel hereva rekodi ibounai be maua badana lalonai ai udaia. Bena unai maua be kohu atoa rumana lalonai ai atoa bona boromakau idia ania ava henunai ai hunia.

Herevana idia taravatulaia, to aonega dalanai ruma ta ruma ta dekenai ai haroro bona Baibel sibona ai gaukaralaia taunimanima ai hereva henidia neganai. Hosi dekenai egu helai gauna henunai, magasin bona buklet lau hunia bena Basileia ena sivarai idia ura henia momokani neganai, lau hahedinaraidia. Bena, June 1943 ai, taravatu idia kokia bena taunimanima ibounai vairanai buka ai hariharilaidia diba.

Gaukara Gabuna Matamata

Lagani 1943 lalonai, lau ura ma gabu haida dekenai painia gaukara lau karaia matamaia; bena unai lagani murinai Mount Gambier lau rakatania bona gabu ma ta dekenai lau lao. Guna, lau idia boiria Society ena brens opesi Strathfield dekenai bona nega sisina lalonai unuseniai lau gaukara. Unai murinai, New South Wales ena saut kahanai bena Victoria ena west kahanai, taoni maragidia daudau dekenai lau painia. To lauma dalana ai hahenamo badana ta lau davaria Melbourne ena kongregesen badana ta dekenai lau painia neganai. Unuseniai gau momo lau dibaia badina lau be hanua maragina dekena amo lau mai dainai.

Victoria ena Gippsland distrik dekenai lau painia neganai, lau bona egu painia turana Helen Crawford ese Baibel stadi momo ai karaia, bona daudau lasi murinai, kongregesen ta ia vara. Unai distrik ena gabu be bada herea, bona ia heau namonamo lasi motuka gunana ta ai gaukaralaia unai gabu dekenai lao totona. Nega haida motuka dekenai ai guia, to nega momo ai pusia. Lau ura hosi ta lau abia! Nega haida lau hereva momokani: “Gau ibounai do lau henia (Basileia lasi) hosi ta lau abia totona!” Hari, unai distrik ena taoni momo dekenai kongregesen goadadia bona Kingdom Hall namodia idia noho.

Lagani 1969 lalonai, Canberra, Australia ena taoni badana, dekenai lau idia siaia. Tano idauidau edia opesi dekenai idia gaukara taudia ai haroro henidia dainai, emai aonega ibounai ai gaukaralaia dala idauidau dekenai ai haroro totona. Unuseniai lau do gaukara noho, to vanegai lau ese unai siti ena faktori gabudia dekenai lau haroro matamaia.

Lagani 1973 lalonai, United States edia hebouhebou badadia dekenai lau lao. Egu mauri lalonai ia vara gau namona ma ta be, lagani 1979 lalonai, Israel bona Jordan edia hebouhebou dekenai lau lao bona unai gabu lau itadia. Baibel ese ia herevalaia gabudia dekenai lau lao bona idia vara gaudia lau laloa be egu lalona idia hamarerea momokani. Mase Davarana mai ena damena bada herea latanai lau hure bona Jordan lalonai, Petra dekenai, hosi lau guia. Unai lau karaia neganai, nega gunadia lau laloa. Hosi ese lau idia durua hanua daudau dekenai Basileia sivaraina lau harorolaia totona.

Ful-Taim Hesiai Gaukara Lau Karaia Noho

Painia Gaukara Sikuli bona sekit hebouhebou dekenai idia karaia painia heboudia, bona sekit taudia edia hahegoada hereva ese lau idia durua ful-taim hesiai gaukara lau karaia totona, ena be lau buruka lau lao. Lau hereva momokani diba, Iehova ena hebogahisi dainai, guna lau sibona lau noho dinadia idia ore vaitani.

Hari lauegu lagani be 87, bona lagani 60 lalonai Iehova ena hesiai gaukara lau karaia. Idia kwara auka taudia bona sibodia edia ura idia badinaia taudia dekenai egu sisiba herevana be inai: Nega ibounai Iehova ena hakaua dalana umui badinaia. Namona be Iehova ese ita ia durua, iseda lalohadai ita gwauraia hedinaraia karana ita biagua namonamo totona. Bona namona be ita ura nega ibounai ia ese ita ia hahelaloatao, reana ena be nega momo ita laloa ita sibona ita noho, to Iehova ese ita do ia rakatania lasi.

[Footnotes]