Duahia Taudia Edia Henanadai
Aposetolo edia negai Dirava ese bese tamona taudia mo, Iuda taudia unai, ia abia hidi, hakaua oreana taudia ai do idia lao. Unai be taunimanima edia toana ia laloa dainai, a?
Lasi bona lasi vaitani. Iesu ese ia boiridia guna iena hahediba taudia ai do idia lao taudia iboudiai be Iuda taudia. Bena, Pentekoste 33 C.E. ai, Iuda taudia bona Iuda ai idia halaoa taudia be Dirava ese ia horoa guna, bona dala ia kehoa idia edia, Keriso ida do idia lohia hebou guba lalonai. Samaria taudia bona kopina utua lasi Idau Bese taudia be unai orea taudia ai ia halaoa lasi, ela bona Pentekoste negana murinai. Unai dainai, Kara 15:2 ena hereva hegeregerena, unai neganai hakaua oreana lalonai be Iuda taudia mo, “aposetolo bona kwarana taudia,” Ierusalema ai. Buka Helaga ena hereva idia diba momo bona tomadiho momokanina idia manadalaia vadaeni, bona Iesu ese ia boiridia guna dainai, idia be mai edia nega bada, lo Keristani elda taudia ai do idia lao.—Roma 3:1, 2 itaia.
Hakaua oreana taudia be Kara karoa 15 ese ia sivarailaia hebouna idia karaia neganai, Iuda Lasi taudia momo be Keristani taudia ai idia lao vadaeni. Idia be Africa taudia, Europe taudia, bona tano idaudia taudia. To Baibel ia gwau lasi Idau Bese tauna ta be hakaua oreana tauna ai idia halaoa, Iuda Lasi taudia edia lalona do idia veria, Keristani dalana do idia abia dae totona. Unai Idau Bese taudia danu, vanegai sibona idia helalo-kerehai bena Keristani taudia ai idia lao taudia, be “Dirava ena Israela” taudia korikoridia. To idia ese Iuda Keristani taudia, aposetolo bona hakaua oreana taudia oredia unai, be idia matauraidia, badina be lauma dalanai idia lo bona tomadiho momokani idia manadalaia bada dainai. (Galatia 6:16) Kara 1:21, 22 ese ia hahedinaraia idia be unai dainai idia matauraidia bada.—Heberu 2:3; 2 Petero 1:18; 1 Ioane 1:1-3.
Lagani handred momo lalodiai Dirava ese Israela besena be dala hereana amo ia kara henia, bena Iesu ese ena aposetolo be unai bese amo ia abidia hidi. Aposetolo ta be South America o Africa o China amo ia abia hidi lasi, to iena kara be kerere lasi. Gabeai ia ese dala ia kehoa unai tano taudia edia, tatau bona hahine ese dagi hereadia do idia abia diba; unai dagi ese aposetolo edia dagi tanobada dekenai bona edia nega lalonai ia noho hakaua oreana taudia edia dagi, bona hari inai negai Dirava ena orea lalonai haida ese idia abia dagidia, iboudiai do idia hereaia momokani.—Galatia 3:27-29.
Aposetolo ta ia gwau: “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” (Kara 10:34, 35) Oibe, Keriso ena boubou ena hahenamo be iboudiai ese idia abia diba, edia toana be herevana. Bona taunimanima haida, iduhu idauidau, gado idauidau, bona bese idauidau amo, be guba Basileiana lalonai do idia vareai, bona hutuma bada herea be tanobada dekenai do idia mauri ela bona hanaihanai.
Taunimanima momo ese ma haida edia bese o edia gado idia laloa momo. Kara 6:1 dekenai ita duahia sivaraina ese unai ia hahedinaraia, ia gwau kerere ta ia vara dainai Helene gado idia hereva Keristani taudia ese Heberu gado idia hereva Keristani taudia idia maumauraia. Ita tubu daekau lalonai eiava unai murinai ita abia lalohadaidia dainai, reana ita ese gado idaudia, kopi idaudia, o bese idaudia taudia edia idau, eiava tatau bona hahine edia dagi edia idau, be ita laloa momo. Unai dainai, namona be Dirava ena lalohadai ita abia dae toho mai eda goada ida. Iena lalohadai be inai: Herevana ita taunimanima eda toana be edena bamona, to ia vairanai ita ibounai be hegeregere. Dirava ese Paulo ena revareva amo ia hahedinaraia edena bamona taudia be hegeregere elda taudia bona hesiai taudia ai do idia lao; unai neganai edia bese ia herevalaia lasi. Lasi, lauma dalanai idia hegeregere daladia mo ia gwauraia. Hari inai negai danu, kongregesen edia elda taudia, sekit bona distrik naria taudia, bona brens naria taudia be Dirava ese unai dala amo ia laloa, aposetolo edia negai hakaua oreana ai ia halaoa taudia ia laloa bamona.