“Ia be Lai Maorona Lasi” Neganai

“VANAGI taria tauna bema ia diba lasi edena hetu gabuna ia lao henia be namo, herevana lai be edena kaha amo ia toa, to ia be lai maorona lasi.” Haida idia gwau unai hereva be Roma ena diba momo tauna ta ladana Lucius Annaeus Seneca, aposetolo edia negai ia noho tauna, ese ia gwauraia. Unai hereva ese nega daudau lalonai taunimanima ese idia abia dae herevana ia hamomokania: Ta ena mauri be mai anina totona, namona be ia laloa guna dahaka do ia tahua be namo.

To, taunimanima momo be mai edia palani lasi, idia hure kava bamona. Dina ta ta idia hedinarai nadidia bona davara ia giroagiroa gabudia amo bema idia siri diba, edia lalodia be hegeregere. Idia diba lasi edena gabu idia lao henia be namo, unai dainai idia be hurehure bamona, “nega ta lai ese ia doria lao, nega ta ia doria mai.” (Iamesi 1:​6, “Phillips”) “Herevana lai be edena kaha amo ia toa, to ia be lai maorona lasi” unai bamona taudia dekenai.

Baibel ese mai anina gaudia idia tahua taudia haida, Keristani taudia hari inai negai ese idia tohotohoa be namo taudia, ia herevalaia. Mose ese “Dirava do ia henia davana namona ia laloa.” (Heberu 11:26) Paulo ia gwau: “Dokona be maoromaoro lau heau henia, davana do lau abia totona.” Ia ese Keristani taudia ia hagoadaia “unai bamona lalohadai do idia abia” danu.​—Filipi 3:​14, 15, “Today’s English Version.”

Namona be Baibel ena gwauhamata ita raraidia bona mai anina gaudia idia tahua taudia edia abidadama ita tohotohoa be namo.​—Heberu 13:7 itaia.