Singapore ese ta Ena Ura Hegeregerena Ia Tomadiho Karana Ia Moia

FEBRUARY 24, 1995 ena adorahi ai, Singapore siti lalonai, pulisi ese taunimanima edia ruma hani lalonai idia vareai haraga bena taunimanima 69 idia dogoatao.a Idia haida be hahine ta, ena lagani be 71, bona kekeni rua, edia lagani be 15. Badina be dahaka? Raskol karadia eiava gavamani hamorua toho karadia idia karaia dainai, a? Lasi. Idia ta ese taunimanima o gavamani hadikaia karana ta, o matabodaga karana ta, o taunimanima inai henia karana ta idia karaia lasi. Idia ese Singapore taudia edia kara o edia noho idia hadikaia toho lasi. To, pulisi ese unai ruma hani idia tahua murinai, Baibel stadilaia bona hebamo heheni totona idia hebou taudia 69 be pulisi steiseni dekenai idia laohaia. Hanuaboi ibounai unuseniai idia koudia, edia kara idia nanadailaia, bona edia finga-print bona edia foto idia abia​—oibe, idia kara henidia, raskol taudia idia kara henidia hegeregerena! Unai nega lalonai​—hora 18 bamona lalonai gabu dikana ai idia noho​—loea ena heduru tahua dalana idia koua bona idia noho gabuna be telefon amo edia famili hadibaia karana danu idia taravatua. Unai kara ese unai maino bona taravatu idia badinaia taudia ia hametaua bada!

Unai bamona kara be Nazi Germany ena nega dikana ai idia vara karadia bamona bona Komiunis gavamanidia ese Soviet Union bona Eastern Europe idia lohiaia negana ai idia vara karadia bamona. Singapore ia vadivadi henia tauna ta ia laloa lasi unai bamona kara do ia davaria unai siti goevana mai ena kohu momo lalonai. Hari inai negai Singapore be mai ena ladana bada, badina be bisinesi karadia bona taunimanima edia noho dalana hanamoa karadia ia goadalaia. Ia gwau ia be mai ena demokratik gavamanina bona ena taravatu hegeregerena, ena tano taudia be mai edia maoro edia ura hegeregerena idia hereva, idia tomadiho, bona idia hebou.

To, February lalonai pulisi ese unai taunimanima idia dogoatao badina tamona be, idia be Iehova ena Witness taudia, Baibel stadilaia totona bona Keristani hebamo totona idia hebou. Idia samanidia neganai idia gwau edia kerere be “gavamani ese ia taravatua oreana ena hebou lalonai idia vareai.”

Gunaguna, Iehova ena Witness taudia edia Singapore Kongregesen be gavamani dekenai idia rejista, bena lagani 1972 ai Singapore ena gavamani ese edia ladana be rejista amo idia kokia bona edia buka, magasin, bona Baibel danu, Watch Tower Bible and Tract Society ese ia printaia gaudia, idia taravatua. Unai nega amo ema bona hari unai taravatu ia noho. Witness taudia ese gwaumaoro idia abia lasi, kota lalonai gavamani ena kara ena badina do idia henanadailaia totona. Vanegai, Singapore ena kota lalonai Witness taudia ese gavamani ena kara, gwaumaoro idia henidia lasi karana, ena maoro idia henanadailaia. Unai neganai Witness taudia hani idia kota henidia, idia gwau edia kerere be February 1994 ai, gavamani ese ia taravatua bukadia, Baibel idia gwauraia gaudia, be idia dekenai idia noho. August 1994 ai, Witness taudia edia apil herevana be kota lalonai idia kamonai neganai, edia apil herevana idia abia dae lasi. September lalonai High Court ena Chief Justice Yong Pung How ese ena lalohadai ia halasia. Ena lalohadai be pulisi edia kara ese ta ena ura hegeregerena ia tomadiho taravatuna ia utua lasi bona edia samani herevadia be maoro, badina be Iehova ena Witness taudia be ami gaukarana idia karaia lasi dainai, unai amo unai bese ena noho namo idia hadikaia diba. Unai hahemaoro herevana dainai, February 17, 1995 ai, hari Witness taudia hani ese gwaumaoro idia tahua, Singapore Court of Appeal dekenai do idia apil. Gwaumaoro idia abia lasi.

Singapore ena niuspepa, reidio, bona TV, gavamani ese ia biagua gaudia, ese kota ena hahemaoro herevana ginigabena idia halasia. High Court ena lalohadai, bona niuspepa, reidio, bona TV ese idia gwauraia herevadia ese murinai idia vara gaudia idia hahedinaraia. Dina 7 idia do ore lasi neganai, unai Witness taudia 69 idia dogoatao. Idia hani​—Britain, France, bona Luxembourg taudia korikoridia​—edia kerere be gabeai idia laloa nege. To, ia vara gauna ese idia danu ia hagaria. Tau ta bona ena adavana be lagani momo lalodiai Singapore ai idia noho bona idia gaukara. Edia moni gaukarana bona edia ruma, idia rentaia gauna, be idia haboioa, unai dainai idia ese edia turadia momo idia bamahuta henia bena unai tano idia rakatania.

Tatau bona hahine oredia 63 idia samania, idia gwau edia kerere be idia be gavamani ese ia taravatua oreana taudia, bona idia haida edia kerere ma ta be idia dekenai gavamani ese ia taravatua bukadia idia noho. Edia kara ena davana be lagani toi dibura rumana ai do idia koudia eiava S$3,000 (K2,700) do idia fainidia, eiava unai ruaosi. Lagani 15 kekenidia ruaosi be memero kekeni edia kota ai idia hedinarai, ta ta ena nega ena nega ai.

Bese Ena Ladana Bona Ena Lalo-Tamona Idia Hadikaia Lasi

Tanobada hegegemadai, Iehova ena Witness taudia idia noho tanodia 200 mai kahana lalodiai, taunimanima idia diba idia be kara maoromaoro bona taravatu badinaia taudia. Idia diba gavamani hadikaia eiava hamorua karadia ai idia vareai lasi, lasi vaitani​—unai Keristani lasi karana dainai edia orea murimurinai idia atodia siri diba. Momokani, Singapore ena gavamani ese ia gari henidia be mai badina lasi. Idia edia kara ese Singapore taudia edia noho namo eiava edia bese ena ladana bona ena lalo-tamona ia hadikaia lasi. (Roma 13:​1-7) March 21, 1995 ai, Watch Tower Bible and Tract Society ena presiden, Milton G. Henschel, ese revareva ta be Singapore ena Praiminista Goh Chok Tong dekenai ia siaia, bona ia lalonai unai ia gwauraia goevagoeva. Unai revareva be inai magasin lalonai ai torea hanai, duahia taudia do idia itaia totona.

Ura kwalimu ura henia taudia bisinesi bona gavamani lalonai, bona ma haida danu, idia ura kota herevana dainai Singapore lalonai do idia vara gaudia do idia itaia. Singapore ena gavamani ese taunimanima edia noho namo bona edia ura kwalimu naria taravatudia, sibona ena gavamani bona ma tanobada besedia momo ese idia abia dae taravatudia, hegeregeredia do ia kara eiava? Momokani, Iehova ena Witness taudia tanobada hegegemadai ese edia orea taudia Singapore lalonai idia lalodia momo. Idia dainai idia guriguri bona Baibel ena gwauhamata idia laloatao: “[Iehova] ese, kara maoromaoro ia ura henia noho. Iena abidadama taudia, be ia ese do ia rakatania lasi.”​—Salamo 37:28.

[Footnotes]

[Box on page 30]

March 21, 1995

Goh Chok Tong

Prime Minister

Istana Annexe

Singapore 0923

Republic of Singapore

Lee Kuan Yew

Senior Minister Prime Minister’s Office

460 Alexandra Road

37-00 PSA Bldg

Singapore 0511

Republic of Singapore

Lohiamui e:

Reuters niusi ripotina ta, February 25, 1995 ai, Singapore amo idia halasia gauna, ese lauegu lalona ia hahisia bada. Unai ripoti ia gwau pulisi ese Iehova ena Witness taudia edia Baibel stadi heboudia idia hadokoa bona taunimanima 69 idia dogoatao. Unai ripoti dainai tanobada hegegemadai taunimanima ese Iehova ena Witness taudia edia noho Singapore lalonai idia laloa. Unuseniai, lagani 20 mai kahana lalonai gavamani ese edia gaukara bona edia buka ia taravatua.

Inai lau lalo-pararalaia be auka: Tomadiho oreana ta be tano 200 mai kahana lalodiai ia gaukara lalonai, unai tano edia taravatu ese idia naria, to Singapore, demokratik dalana ia abia dae tanona, ese unai orea ia taravatua. Unai ese lauegu lalona ia hahisia bada, badina be Singapore ena konstitusen hegeregerena, ena tano taudia be mai edia maoro sibodia edia ura hegeregerena idia tomadiho.

Nega ta Iehova ena Witness taudia ese bese ta ena noho namo idia hadikaia lasi. Momokani, tanobada hegegemadai idia be mai edia ladana namona, badina be idia maino, idia gaukara auka, idia kara maoromaoro, bona taravatu idia badinaia dainai. Lau laloa unai bamona kara be oiemu tano lalonai oi havaraia toho.

Momokani, Iehova ena Witness taudia ese Baibel ena taravatu Keristani taudia totona idia badinaia auka dainai, nega haida taunimanima ese edia kara edia badina idia lalo-pararalaia lasi eiava edia kara idia gwauraia koikoi. To, Keristani dalana ia haginia tauna ena kara idia gwauraia koikoi danu, ani, idia gwau ia ese “Kaisara,” ena negai ia noho gavamanina, ia inai henia? Iehova ena Witness taudia ese Iesu bona Keristani taudia ginigunadia edia kara idia tohotohoa. Ena siahu henunai idia noho gavamanina idia matauraia, takisi monina idia henia, bona kara maoromaoro idia havaraia. Idia be kara maoromaoro taudia. Nega ta Iehova ena Witness taudia ese gavamani ta hamorua karana idia durua lasi bona umui lau hamaoroa momokani, idia be Singapore ai idia noho dainai unai ese emui bese ena noho namo do ia hadikaia lasi.

Vanegai idia halasia niusi ripotidia dainai, taunimanima momo idia diba emui gavamani ese Singapore ai idia noho Iehova ena Witness taudia ia koudia. Edia bamodia 12 milioni tanobada hegegemadai ese unai idia laloa momo. Lau ese umui lau noia inai, mani umui ese emui dagi namona umui gaukaralaia, ia vara gauna do umui hamaoromaoroa totona bona dala do umui kehoa, emui gavamani ena Konstitusen ena gwaumaoro hegeregerena, Iehova ena Witness taudia emui tano lalonai be edia ura hegeregerena do idia tomadiho bona do idia laloa.

Lau laloa bema umui be Iehova ena Witness taudia haida ida do umui herevahereva namonamo, unai ese lalohadai kereredia emai orea bona emai gaukara dekenai do ia kokidia, bona umui do ia durua do umui diba momokani, Singapore ena gavamani ese Iehova ena Witness taudia ia gari henidia be anina lasi. Egu lalona be hegeregere unai bamona hebouna ta ena dala do lau lailaia.

Emui haere lau naria noho mai egu ura ida.

Mai egu hemataurai ida,

Milton G. Henschel

Presiden

[Picture Credit Line on page 31]

Nik Wheeler/H. Armstrong Roberts