Gari​—Oiemu Turana o Inai Tauna?

“Lau ura henia mase dalana lau laloa. Lau ura lasi lau do idia pidia, to bema unai ia vara, lau ura egu kwarana dekenai, iniseniai do idia pidia, bena do lau mase haraga.”

LOS ANGELES TIMES niuspepa ena nius ripoti tauna ta ese lagani 14 kekenina amo unai haere ia abia. Ia be vanegai matamata taudia ese taunimanima badadia bona matamata taudia haida idia aladia dainai, stiuden taudia ia henanadai henidia. Unai ripoti ena ladana be: “Inai Gari Bada Tanobadana.”

Oi diba vadaeni, taunimanima momo be mai gari bada ida inai tanobada dekenai idia noho. Dahaka garina idia gari? Gari gauna tamona ita abia hidi be auka. Lauri kahanai ia noho mauana lalonai mani oi itaia bema oiemu turadia bona oiemu gabu dekenai taunimanima momo be unai gaudia idia garilaia. Unai maua be Newsweek magasin, November 22, 1993 gauna amo, bona ia ese “natudia ibounai 758, edia lagani 10 ia lao 17 taudia, bona edia tama sina danu” idia henanadai henidia bona edia haere ena namba ia hahedinaraia.

Bema unai matamata taudia be hari idia nanadaidia, reana gari gauna ma haida do idia gwauraia, hegeregere tano mareremarere. January 1994 lalonai, Los Angeles dekenai ia vara tano mareremarere murinai, Time magasin ia gwau: “Dika ta murinai ia vara lalohisihisina ida, haida be guna idia vara dika idia lalodia lou, ena be idia ura lasi laloa, nihi dikadia, idia vara gaudia ibounai idia itaia namonamo bona idia badu badina edia mauri lalonai idia vara gaudia idia koua lasi.” Iena lalona ia hadaia unai tano mareremarere gabuna ia rakatania bisinesi tauna ta ia gwau: “Ia hadikaia gaudia be anina lasi. To ia havaraia gari be bada herea. Mai emu tamaka danu bedi dekenai oi hekure. Oi mahuta lasi. Hanuaboi ibounai lalonai oi helai bona oi naria sibona. Dika momokani.”

Tokyo amo idia torea April 11, 1995, ripotina ena ladana be idia gwauraia: “Dika Momo Herea ese Japan Taudia ia Hagaridia.” Ia gwau: “Nerve Gas amo dika idia havaraia karana . . . ese Japan taudia edia lalohadai ia hadikaia bada herea, badina ia be dika haida murinai ia hesiriu karana bona idia ese nega vaira daradaralaia edia badina idia havaraia. . . . Guna, dina ai bona hanuaboi ai mai gari lasi ida dala dekenai idia loaloa diba, to hari unai idia karaia diba lasi.” Bona buruka taudia sibodia idia gari lasi. “Profesa Ishikawa [Seijo University] ia gwau matamata taudia be . . . idia lalo-metau bada, idia momo be nega vaira totona helaro namona idia abia lasi.”

Tahua gaukara ese ia hahedinaraia “ta be ia gari bada herea neganai iena harana lalonai idia noho muramura ia haidaua diba dainai, taunimanima be edia tauanina ese ia havaraia muramura dainai idia gorere diba lagani 10 eiava ma haida idia ore murinai danu.” Saiens taudia be iseda harana idia do lalo-pararalaia lasi, dahaka ia karaia gari gauna ta ia vara neganai​—edena bamona idia vara gaudia ita lalodia, bena gari ia vara. Profesa Joseph LeDoux ia gwau: “Iseda tauanina ena hemami varovarodia ese edena bamona gari karana idia dibaia dalana ai diba neganai, ai ura unai helalo-tao karana be edena bamona ia gaukara do ai gwauraia hedinarai.”

To ita momo be harana ena muramura eiava tauanina edia hemami varovarodia edia gaukara dalana ita laloa bada lasi. Ita ura inai bamona henanadai edia haere ita diba: Dahaka dainai ita gari? Dahaka ita karaia be namo? Gari be gau namona a?

Reana do oi abia dae, gari be nega haida oi ia durua diba. Hegeregere, hanuaboi lalonai emu ruma dekenai oi raka lao. Ena be guna iduara oi koua auka, hari ia kehoa sisina. Bona uindo amo taunimanima idia raka loaloa edia toana oi itaia. Karaharaga oi gini, oi marere lasi, oi mamia gau ta ia kerere. Reana, henao tauna o mai ena kaia tauna be ruma lalonai.

Unai bamona negadia oi mamia gari karana ese oi ia durua bena dika bada lalonai oi vareai lasi. Gari ese oi ia durua oi naria namonamo totona o dika ia do vara lasi neganai heduru oi abia totona. Unai bamona haheitalai be momo: paua bada ia gaukara gabuna hahedinaraia ena saini; medu bona lai bada herea be emu gabu dekenai do ia mai be reidio dekenai idia gwauraia; motuka momo idia heau dalana ai oiemu motuka ese regerege bada herea ia karaia.

Dala haida ai, gari mamina be iseda turana namona bamona. Ita ia durua ita sibona ita naria namonamo o kara maorona ita karaia totona. To, oi diba vadaeni, nega ibounai ita gari o gari bada karana be iseda turana namona lasi. Ia be iseda inai tauna. Gari dainai ita laga-tuna diba, iseda kudouna ia gaukara haragaharaga, ita ura moru, ita heudeheude, bona ita ura mumuta, bona iseda lalona ia boio bamona.

Reana do oi hoa badina Baibel ese iseda nega be ia gwauraia gari bada gaudia do idia vara negana. Dahaka dainai unai ia gwauraia, bona unai hereva dainai oiemu mauri lalonai bona lalohadai dekenai dahaka oi karaia? Bona danu, dahaka dainai ita gwau diba Baibel ena hereva hegeregerena ai, dina ibounai gari ta ena mamina be ita ia durua diba bona ia namo? Mani ita tahua.

[Box on page 3]

Taunimanima badadia bona natu idia nanadaidia idia bona edia famili be dahaka gaudia idia garilaia bada neganai, idia gwau:

NATU TAMA SINA

56% Raskol ese famili tauna ta idia hadikaia 73%

53% Tama o sina ese gaukara ia haboioa 60%

43% Moni lasi aniani hoia totona 47%

51% Moni lasi doketa itaia totona 61%

47% Moni lasi ruma hoia totona 50%

38% Famili tauna ta be drag dikadia ia ania 57%

38% Edia famili do idia noho hebou lasi 33%

Source: Newsweek, November 22, 1993