Nega Daudau Oi Badu Lasi

TAU TA ese ita ia kara dika henia neganai, iseda badu koua totona be mai hekwarahi bada. Baibel be mai ena sisiba namona unai bamona hekwakwanai negadia totona. Aposetolo Paulo ia gwau: “Umui badu neganai, kara dika do umui karaia lasi. Bona dina do ia diho lasi neganai, emui badu do umui haorea.”​—Efeso 4:26.

Tau ta ese ita ia kara dika henia neganai, vaia ita badu. Paulo ena hereva, “umui badu” anina be nega haida badina maorona dainai ita badu diba​—reana unai be ita idia kara henia maoromaoro lasi dainai, eiava ita idia hahemaoro henia kerere dainai. (2 Korinto 11:29 itaia.) To, ena be emu badu be mai ena badina maorona, to bema oi haorea toho lasi, kerere badana do ia vara dainai kara dika badana oi karaia diba. (Genese 34:​1-31; 49:​5-7; Salamo 106:​32, 33) Vadaeni, bema badu mamina oi abia, dahaka oi karaia be namo?

Nega momo, hekwakwanai maragidia be emu lalona dekenai oi laloaboio diba bona ‘badu ena laloa oi koua’ diba, eiava oi ia kara dika henia tauna oi lao henia diba bena unai hekwakwanai umui herevalaia hebou diba. (Salamo 4:4; Mataio 5:​23, 24) Herevana edena dala oi badinaia, namona be unai hekwakwanai umui hamaoromaoroa haraga, unai amo do oi badu noho lasi bona dika bada do ia vara lasi.​—Efeso 4:31.

Iehova ese iseda kara dikadia ia gwaudiatao, ita lalo-parara lasi negadiai ita karaia karadia danu. Unai dainai, iseda bamodia edia kara dika maragidia ita gwaudiatao be namo, ani?​—Kolose 3:​13; 1 Petero 4:8.

Inai Greek gado herevana “gwauatao” ena anina korikorina be “kahua nege.” Ta ena kara dika oi gwauatao anina be ena kara dika oi hamaragia lasi eiava oi gwau lasi ia be gau ta lasi. Nega haida ena anina be unai hekwakwanai do oi “kahua nege,” badina be oi diba bema nega daudau lalonai oi badu, unai ese metau do ia havaraia bona Keristani kongregesen ena lalo-tamona do ia hadikaia. Danu, bema nega daudau lalonai oi badu, unai ese oi do ia hagorerea bada herea diba!​—Salamo 103:9.