Idia Laloa Idia Henia be Namo, A?

REANA oi diba vadaeni nega momo taunimanima be edia kastom dainai harihari gaudia idia henia. Bese momo lalodiai, idia laloa nega haida harihari gaudia do idia abia be maoro. Reana unai harihari gaudia be hemataurai o lalokau edia toana. Unai gau momo be idia abia taudia ese idia iusilaia lasi; ma haida amo heduru bada idia abia bona idia lalodia bada.

Denmark ai beibi ta ia vara neganai, ena tamana bona sinana edia turadia bona edia varavara ese idia vadivadi henidia bona harihari gaudia idia mailaia; idia laloa unai gau amo beibi do idia durua. Tano ma haida ai beibi ia do vara lasi neganai, ena tamana bona sinana edia turadia be pati idia karaia bona unai bamona harihari gaudia idia henidia.

Lagani ta ta lalodiai dina haida be harihari gaudia henia negadia korikoridia idia gwauraia. Ena be Keristani taudia ginigunadia be unai bamona idia kara lasi, to sibodia be Keristani idia gwauraia taudia momo bona Keristani lasi taudia momo ese unai kara idia moalelaia bada. Bese haida lalodiai, natu idia bada daekau lalonai, edia vara dinadia ai harihari gaudia henidia karana be reana idia hamaragia, to Greek taudia edia kastom be idau. Idia ese vara dinadia idia laloa bada. Ta ena “ladana dinana” ai danu harihari gaudia idia henia. Unai dina be dahaka? Edia tomadiho dalana hegeregerena idia gwau lagani ena dina iboudiai ta ta be “helaga taudia” ta ta edia, bona taunimanima momo edia ladadia be “helaga taudia” edia ladadia hegeregeredia idia hatoa. “Helaga tauna” ta ena dina ia ginidae neganai, iena ladana idia abia taudia ese harihari gaudia idia abia.

Korea taudia ese edia natudia edia vara dinadia idia moalelaia, bona edia bese ena holide ladana Natu Edia Dina danu idia moalelaia. Unai dina ai edia famili ida idia loaloa, bona herevana edia natudia be edena negai idia vara, to unai dina ai harihari gaudia idia henidia. Korea ai, Tama Sina Edia Dina ai natu ese edia tamadia bona sinadia be harihari gaudia idia henidia, bona Tisa Edia Dina ai stiuden taudia ese edia tisa idia hanamodia bona harihari gaudia idia henidia. Korea taudia edia kastom ai, ta be lagani 60 ia abia neganai pati badana idia karaia. Iena famili bona ena turana ese idia hanamoa, idia gwau idia ura ia be nega daudau do ia mauri bona do ia moale, bona harihari gaudia idia henia danu.

Headava negadiai danu momo be edia kastom hegeregeredia harihari gaudia idia henia. Kenya ai idia gwau headava matamata tauna ese harihari gauna ta be ena adavana ena bese taudia ia henia be namo. Vadivadi taudia danu ese harihari gaudia idia mailaia. Bema headava matamata hahinena bona ena adavana ese kastom idia badinaia, pata ta latanai idia helai, bona vadivadi taudia ese edia harihari gaudia idia mailaia idia dekenai. Idia henidia negadia ta ta ai, ta ia boiboi, ia gwau “Ma . . . danu ese harihari gauna ta be ruaosi dekenai ia mailaia.” Bema henia taudia be unai bamona ia boiboilaidia lasi, idia momo be idia badu bada herea.

Lebanon taudia bogaragidiai, ta ia headava gwauraia neganai, dina momo idia do noho neganai ena turana bona ena dekena taudia, ia bona ena maoheni kekenina idia diba namonamo lasi taudia danu, ese harihari gaudia idia mailaia. Idia maragi negana amo, idia hadibadia harihari gaudia henia karana be edia maduna ta, abitorehai haloua karana hegeregerena. Lebanon tauna ta ia gwau: “Bema ai karaia lasi, emai mamina be dika. Ia be aiemai kastom.”

To tano momo ai idia laloa harihari gaudia henia negana badana be Kerisimasi. Oi noho gabuna be unai bamona, ani? Lagani 1990 ai idia gwau lagani ta ta iboudiai America taudia ese dola 40 bilioni be Kerisimasi ena harihari gaudia hoia karana ai idia haorea. Japan ai, Buddhist taudia bona Shinto taudia danu ese unai holide idia moalelaia mai edia lalona ibounai ida, bona Europe, South America, bona Africa ena kahana haida ai taunimanima ese dala idauidau ai idia moalelaia.

Taunimanima idia laloa Kerisimasi negana ai do idia moale be namo, to idia momo be idia moale lasi. Bona momo ese idia davaria, harihari gaudia hoia bona edia davana karaia karana ai idia abia lalo-hekwarahina be bada, nega sisina lalonai idia abia moalena be maragi.

To Baibel ia gwau henia karana be mai ena moale. Momokani, bema ta ese henia karana be lalohadai maorona ai ia karaia, unai ia moalelaia.​—Kara 20:35.