“Moni be Edeseni amo Ia Mai?”

TAUNIMANIMA ese Watch Tower Society ena vidio “Jehovah’s Witnesses​—The Organisation Behind the Name” idia itaia neganai, idia hoa bada herea. Idia itaia, toadia namo herea tatau bona hahine, tano idauidau bona mauri daladia idauidau amo, be mai moale ida idia gaukara hebou. Gaukara taudia mai edia moale sibodia lasi, to ruma badadia danu idia hoalaia; Society ena hedikwota Brooklyn dekenai bona edia uma gabudia Wallkill, New York dekenai idia noho rumadia unai. Unai vidio ese ia hahedinaraia unai ruma badadia lalonai masini matamatadia idia noho​—haraga momokani idia printa masini bona buka idia hakapua masini amo buka bona magasin milioni momo idia karaia hua ta ta lalonai. Kompiuta kohu idauidau bona buka karaia gaukarana durua dipatmen idauidau ia hahedinaraia.

Unai ese ia hahedinaraia moni bona kohu bada herea idia gaukaralaia. Unai dainai haida idia henanadai, idia gwau, “Moni be edeseni amo ia mai?”

Society ena hedikwota opesi idia vadivadi henia taudia danu be idia hoa. Edia aiona idia halataia, 30 stori ruma matamatana ta itaia totona, ia bona ma ruma haida be unuseniai idia gaukara volantia taudia 3,000 bamona ese idia noholaidia. Brooklyn ena not kahana ai, hegeregere kilomita 110 bamona dekenai, Watchtower Educational Center matamatana idia vadivadi henia neganai, idia hoa bada. Unuseniai gaukara taudia 1,200 idia noho bona unai ruma idia do karaia noho. Unuseniai lagani ta ta lalonai misinari oreadia rua rua do idia hadibadia bena do idia siaidia lao tano idauidau dekenai. Unai gabu dekena amo United States lalonai idia noho Iehova ena Witness taudia edia kongregesen 10,000 dekenai hakaua herevadia idia siaia. Tanobada hegegemadai, brens opesi momo danu be vanegai edia opesi idia habadaia o hari idia habadaia noho. Unai gaukara ibounai karaia totona, moni bada idia gaukaralaia. Taunimanima idia henanadai, idia gwau, “Moni be edeseni amo ia mai?”

Unai henanadai ena haere be inai: Unai moni be ita bamona taudia amo ia mai. Tanobada hegegemadai, unai taudia be idia ura Keristani gaukara, haroro bona hahediba gaukarana unai, idia durua bada. Unai bamona kara be guna ia vara danu.

Idaunegai Israelana Ena Haheitalai

Lagani 3,500 gunanai, harihari gaudia momo idia henia be mai badina. Iehova ese Mose ia hamaoroa kalaga helagana eiava ‘hebou kalagana’ do idia haginia bena do idia gaukaralaia Ia idia tomadiho henia totona. Dirava ese ia henia palanina ese dava bada kohu idauidau ia gwauraia. Iehova ese ia oda henidia ia gwau: “Lau Lohiabada dekenai harihari gauna do umui henia. Harihari gaudia idia ura henia taudia ibounai.” (Esodo 35:​4-9) Vadaeni, taunimanima ese dahaka idia karaia? Baibel ia gwau: “Harihari gaudia idia ura henia taudia ibounai ese edia harihari gaudia be Lohiabada dekenai idia mailaia, Palai Dubu do idia haginia totona. Idia ese ma Palai Dubu lalonai do idia noho gaudia bona kohu, bona dabua helagadia karaia gaudia danu idia mailaia.” Edia “ura” dainai idia ‘mailaia gaudia be momo herea, hegeregere momokani Iehova ese ia gwauraia gaukara ibounai karaia totona bona idia hanaia danu.’ (Esodo 35:​21-29; 36:​3-5) Hariharibada karana idia hahedinaraia unai!

Lagani 500 murinai, Israela taudia idia boiridia lou harihari gaudia momo do idia henia lou totona. King Davida ena ura, Iehova ena noho hanaihanai rumana be Ierusalema dekenai do ia haginia urana, be iena natuna Solomona ese ia hagugurua gwauraia. Davida sibona ese unai gaukara karaia totona kohu momo herea ia gogoa, ia sibona ia henia gaudia danu. Davida ese ma haida ia boiboi henidia, ‘harihari gaudia be Lohiabada dekenai do idia henia.’ Dahaka ia vara? “Taunimanima ese mai edia laloa namo danu unai harihari gaudia momo Lohiabada dekenai idia henia dainai, idia be mai moale bada danu. King Davida ese danu ia moale bada herea.” (1 Sivarai 22:14; 29:​3-9) Hari inai nega lalonai, unai henia siliva bona golo edia davana be K68 bilioni bamona!​—2 Sivarai 5:1.

Unai haheitalai lalonai ita itaia taunimanima idia doria lasi harihari gaudia idia henia totona. Edia “ura” hegeregerena “mai edia laloa namo danu” harihari gaudia idia henia. Bema edia lalona ibounai ida harihari gaudia idia henia lasi neganai, Iehova be do ia moale lasi. Unai hegeregerena, idia dabu Keristani taudia durua totona moni idia henia gwauraia neganai, aposetolo Paulo ia gwau namo lasi ia oda henidia dainai moni do idia henia. Ia gwau: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.”​—2 Korinto 9:​5, 7.

Kontribusen Karana Hari Inai Negai

Hari inai negai kontribusen do ita henia be mai badina, a? Oibe, bona gabeai unai do ia bada ia lao. Dahaka dainai?

Iesu ese Keristani taudia be oda idauna ia henidia inai nega dokona totona. Iena hahediba taudia ia oda henidia, ia gwau: “Umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.”​—Mataio 28:​19, 20.

Inai “tanobada dokona” momokanina be kahirakahira negana lalonai, unai hahediba bona haroro gaukarana badana karaia totona, nega bona kohu momo ita gaukaralaia. Dahaka dainai? Badina Dirava ena Basileia ena sivarai be “tanobada ena kahana ibounai” dekenai abia lao be gaukara bada herea. (Kara 1:8) Taunimanima momo be Baibel idia diba namonamo lasi, Keristani ginigunadia edia nega lalonai idia noho Iuda taudia bamona. Tanobada dekenai idia noho taudia momo herea be Baibel idia diba lasi, bona idia laloa ia be Dirava ena Hereva lasi. Namona be haroro taudia ita hadibadia bona tano daudaudia dekenai ita siaidia. (Roma 10:​13-15) Bona mani oi laloa, gado momo herea dekenai do idia haroro! Idia haroro henia taudia ese Baibel bona Baibel bukadia be sibodia edia gado dekenai idia duahia bona stadilaia be namo. Ibounai do idia haroro henidia, do idia durudia, lauma dalanai do idia goada idia lao bena ma haida do idia durua diba totona, namona be orea badana ese unai gaukara ibounai ia naria.​—2 Timoteo 2:2.

Iesu ia gwau “Sivarai Namona be tanobada ibounai dekenai do idia harorolaia” guna bena “dokona be do ia ginidae.” (Mataio 24:14) Unai dainai hari be nega namona, iseda goada ibounai be unai mai anina bada gaukarana dekenai do ita gaukaralaia. Iseda moni ena siahu ia do ore lasi neganai, namona be inai gaukara dekenai ita gaukaralaia.​—Esekiela 7:19; Luka 16:9.

Unai Moni be Edena Bamona Idia Gaukaralaia?

Watch Tower Society ese Baibel bukadia be gado 230 bamona idia halasia, bona Braille toretore, matakepulu taudia totona, bona imana saini gado vidio, taia kudima taudia totona. Unai karaia totona, gado ta ta dekenai hereva hahanaia taudia bona sekea namonamo taudia edia orea idia noho be namo. Mani oi laloa, unai gaukara ibounai idia karaia, Gima Kohorona magasin be gado 121 ai idia halasia totona; unai gado 101 ai idia hegeregere gaudia be nega tamona idia halasia. Unai be hoa gauna, ani? To unai gaukara ibounai idia karaia be namo, badina unai amo tanobada hegegemadai ai taunimanima ese hereva tamona idia duahia. Lagani ta ta iboudiai, pepa bona ma gau haida, Basileia sivaraina printaia bona kaset bona vidio karaia totona idia gaukaralaia gaudia, edia davana idia bada idia lao. Tadikaka ese idia henia harihari monidia amo unai gau edia davadia idia karaia.

Tanobada hegegemadai, Iehova ena Witness taudia edia kongregesen ibounai 75,000 ese teritori ta ta ai haroro bona hahediba gaukarana idia karaia. Idia hatamonadia bona hagoadadia totona, sekit naria taudia, idia hadibadia guna taudia unai, ese lagani ta ta lalonai nega rua kongregesen idia vadivadi henidia. Hebouhebou negadia danu be hahediba negadia namodia. Unai abidadama hagoadaia hebouheboudia karaia totona, ruma badadia idia rentaia. Oiemu kontribusen be unai gaukara totona idia gaukaralaia danu.

Lagani tamona lalonai nega toi sibona hebouhebou badadia idia karaia, to edia kongregesen dekenai wiki ibounai, hebou ima idia karaia. (Esodo 34:​23, 24 itaia.) Kamonai matamata taudia momo ese sivarai namona idia abia dae dainai, lagani ta ta ai kongregesen matamatadia tausen momo idia karaia. Society ena amo kina milioni momo idia abitorehai, bona unai heduru amo lagani ta ta lalonai Kingdom Hall matamatadia idia haginia, bona momo idia hanamodia bona habadaidia. Ena be kongregesen momo ese unai moni tamona idia gaukaralaia loulou, to unai heduru idia tahua kongregesen edia momo ia daekau noho.

Momo be hereva momokani lalonai idia vareai noho gabudia ta be Eastern Europe tanodia, guna Soviet Union ese ia biagua tanodia unai. Unai gabu dekenai iseda gaukara idia kehoa neganai, ita moale bada herea! Hari unai tano momo dekenai misinari idia siaidia. Tano haida dekenai brens opesi matamatadia idia haginidia, unai amo tanobada hegegemadai Betele rumadia dekenai idia gaukara volantia taudia edia momo be ia daekau lao ela bona 15,000 ia hanaia. Bona, brens rumadia idia haginidia unai gaukara taudia idia noholaidia totona. Oiemu kontribusen ese unai gaukara ia durua.

Satani bona ena demoni ese inai gaukara ibounai idia itaia noho. Dala idauidau amo idia ese Iehova ena kamonai hesiai taudia edia gaukara idia hadikaia toho o hekwakwanai idia havaraia toho. (Apokalupo 12:17) Unai anina be, nega momo Iehova ena taunimanima be kota dekenai idia lao, gwaumaoro idia tahua, edia haroro gaukara do idia karaia totona bona Iehova ena taravatu hegeregerena ai do idia noho totona. Bona Satani ena tanobada ai idia vara tuaridia bona idia vara kava dika hisihisidia ese iseda tadikaka bona taihu bona ma haida idia hadikaia dainai, aniani, dabua, muramura, bona ma gau haida be nega momo ita siaidia lao be namo. Oiemu kontribusen ese unai gaukara ia durua.

Iehova ese Emu Davana Do Ia Henia

Iseda nega bona iseda moni be Lohiabada ena gaukara durua totona ita henia neganai, unai ese hahenamo ia havaraia. Edena dala amo? Dirava, gau ibounai edia biaguna, ese iseda davana be ita do ia henia. Aonega Herevadia 11:25 ia gwau: “Oiemu moni do oi henia bada noho, vadaeni do oi noho namo. Taunimanima haida do oi durua, vadaeni haida ese oi do idia durua.” Iehova tomadiho henia karana habadaia totona iseda maduna ita huaia neganai, ia moale. (Heberu 13:​15, 16) Iehova ese idaunegai Israela taudia ia gwauhamata henidia Mose ena Taravatu hegeregerena harihari gaudia do idia mailaia neganai do ia hanamodia; ia gwau: “Lau do umui tohoa karaia. Unai kahana ta lau dekenai do umui henia, vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.” (Malaki 3:10) Hari inai negai, Iehova ena hesiai taudia be lauma dalana ai idia taga ese ia hahedinaraia Iehova ese iena gwauhamata ia hamomokania.

Inai gaukara badana, taunimanima ibounai dekenai hahemauri dinana harorolaia bona kudou maoro taudia be mauri ena dala dekenai idia raka totona durudia gaukarana, be do ia noho hanaihanai lasi. (Mataio 7:14; 2 Korinto 6:2) To Lohiabada ena “mamoe idaudia” ibounai ita gogoa be namo. (Ioane 10:16) Hari inai negai, unai gaukara ita karaia be mai anina bada! Bona kara maoromaoro tanobada matamatana lalonai ita ta ta be mai moale ida do ita hereva do ita gwau: ‘Nega dokona ai gogoa gaukarana ginigabena lalonai lau gaukara’!​—2 Petero 3:13.

[Box on page 30, 31]

Haida ese Basileia-Harorolaia Gaukarana Idia Durua Daladia

KONTRIBUSEN MONIDIA, TANOBADA IBOUNAI GAUKARA DURUA TOTONA: Momo ese edia moni idia atoa hegaegae, maua ta ladana “Basileia Gaukarana Kontribusen Monina” lalonai do idia udaia totona. Hua ta ta iboudiai, kongregesen ese unai moni be Society ena hedikwota Brooklyn, New York dekenai, eiava ena brens opesi ta dekenai idia siaia.​—Mataio 24:14.

HARIHARI GAUDIA: Taunimanima ese kontribusen monina idia siaia diba Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483 dekenai, eiava oiemu gabu ia naria Society ena opesi dekenai. Herahera gaudia mai davana bada eiava dava bada gaudia idaudia danu idia henia diba. Revareva ta ida idia siaidia be namo, unai revareva ai idia gwau idia be harihari gaudia.

KONTRIBUSEN MONINA MAI TARAVATUNA: Taunimanima ese moni be Watch Tower Society idia henia diba, trust fund ai do idia naria totona ela bona idia mase, to bema nega ta idia dabu, idia be mai edia gwaumaoro do idia abia lou.

INSURENS: Bema ta ese life insurens ia hoia o moni be retirement fund ta ai ia atoa, Watch Tower Society ena ladana ia torea diba, bena ia mase neganai eiava ia buruka neganai unai moni do idia abia. Namona be unai bamona ia karaia tauna ese Society ia hadibaia.

BANIKA AKAUN: Ta ena banika ena taravatu hegeregerena, dala ia karaia diba Watch Tower Society ese ena moni do idia gaukaralaia ia do mauri lalonai, eiava ia mase neganai do idia henia Society dekenai. Namona be unai bamona ia karaia tauna ese Society ia hadibaia.

SHARE MONINA: Ta ena share monina be Watch Tower Society ia harihari henia diba, eiava dala ia karaia diba unai share be idia edia, to ato-kau monina be ia ese do ia abia.

TANO BONA RUMA: Bema ta be mai ena ruma o tano, ia hoia diba gauna, Watch Tower Society ia henia vaitani diba, harihari gauna bamona, eiava do ia noholaia diba ela bona ia mase bena Society ese do ia abia vaitani. Bema ta ia ura unai bamona do ia karaia, namona be Society ia hadibaia guna.

WILLS BONA TRUSTS: Bema ta ena ura be ia mase neganai Watch Tower Society ese ena tano, ruma, kohu, o moni do idia abia, loea dekenai ia lao be namo, will pepana, mase murinai kohu hariharilaia gwaumaoro pepana ai, iena ura do ia torea totona. Eiava bema ena moni be trust fund ai ia noho, ia ese Society ena ladana be trust agreement pepana ai ia torea diba unai moni do idia abia totona. Tano haida ai, bema ta ese ena trust monina be tomadiho oreana ta ia henia, takisi monidia haida do ia henia lasi. Namona be will eiava trust pepana ena kopi ta be Society dekenai ia siaia.

Bema oi ura ataia ai gwauraia gaudia dekenai ma hereva haida oi diba namona be International Bible Students Association of Papua New Guinea Inc., Box 636, N.C.D. 111, eiava Society ena opesi oiemu tano dekenai oi tore henia.