Hahemauri Oi Abia Vadaeni, A?

JOHNNY ena lagani be 10 neganai, show gabuna ta dekenai tau ta ese ia nanadaia, ia gwau: “Tauhau e, Iesu Keriso oi abia dae, ia be oiemu Lohiabada bona Hahemauri Tauna, a?” Unai henanadai ena mamina Johnny dekenai be idau bamona, badina be ena mauri laganidia ibounai lalonai ia be Iesu ia abia dae. Unai dainai ia haere, ia gwau: “Oibe, lau abia dae.” Iboudiai do idia kamonai totona unai tau ia boiboi, ia gwau: “Lohiabada hanamoa! Tau ma ta be Keriso totona hahemauri ia abia vadaeni!”

Unai sibona amo ta be hahemauri do ia abia, a? Herevana Johnny be ena mauri orena ibounai lalonai dahaka do ia karaia, to unai hereva ia gwauraia negana amo ia be “hahemauri” ia abia vadaeni, a? Lalo-momokani taudia momo do idia gwau oibe. Tomadiho pepadia haida idia gwau “hahemauri” oi abia vadaeni dinana oi torea bena do oi laloaboio lasi.

Haroro tauna ta be ena toretore ai ia gwau: “Ta ese Keriso abia dae toana sisina ia hahedinaraia negana ai . . . Dirava ese iena vaira negana ia gwauraia hidi vadaeni.” Ia gwau Bible ese ia gwauraia hahemauri abia dalana be nega ta ai “abidadama karana [tamona] dainai, to abidadama hanaihanai dainai lasi.” Tomadiho herevadia torea tauna ma ta be inai ia torea: “Unai be idia haorea vadaeni gaukarana. Oi totona idia hagugurua vadaeni . . . Oiemu ‘tuari ia ore vadaeni.’ Oiemu ‘kara dika idia kokia vadaeni.’ ” To unai hereva idia abia dae vaitani taudia danu be reana hekwakwanai ta idia itaia. Ia hedinarai goevagoeva taunimanima momo, ena be idia hamaorodia “hahemauri” idia abia vadaeni, to edia noho dalana be Baibel ena hereva hegeregerena lasi. Unai ena badina badana be reana Iesu idia “abia dae” momokani lasi.

Vadaeni, ta ese Iesu ia “abia dae” ena anina korikori be dahaka? Anina be nega tamona ai ia karaia abidadama karana a, eiava ena mauri lalonai ia badinaia hanaihanai dalana? Namona be iseda abidadama ena goada ia hegeregere dainai kara do ita karaia, a? Bema Iesu murinai ita raka lasi, iena boubou karana ena namo ita abia dae momokani, a?

Taunimanima momo be hahenamo idia ura, to idia ura lasi Iesu murinai idia raka bona idia kamonai henia. Momokani, unai hereva “kamonai henia” ese edia lalona ia hahekwarahia. To Iesu ia gwau: “Oi mai, egu murina dekenai do oi raka.” (Luka 18:​18-23) Bona Baibel ia gwau: “Lohiabada Iesu ena Sivarai Namona idia abia dae lasi taudia dekenai davana metau do ia henidia. . . . Dirava ese idia do ia hadikaia ore momokani, bona inai bamona do idia noho hanaihanai.”​—⁠2 Tesalonika 1:​8, 9; Mataio 10:38; 16:24.

Baibel ese ia gwauraia gaudia momo dainai, haida ese idia hahedibalaia hahemauri herevana dekenai daradara badadia momo idia noho. Bema oi ura unai hereva dekenai Baibel ese ia gwauraia herevadia oi hamomokania, rau gabedia edia hereva do oi ura henia. Oiemu Baibel oi kehoa, bena idia gwauraia siridia lalonai Iesu bona ena aposetolo ese unai mai anina bada herevana dekenai idia hahedibalaia herevadia mani oi duahia.