Duahia Taudia Edia Henanadai

Hari Iesu be Aramagedono ena dina ia diba vadaeni, a?

Toana be ia diba vadaeni lalohadaina ita abia dae be mai badina.

Reana taunimanima haida be unai henanadai ia vara ena badina idia daradaralaia. Reana Iesu ena hereva Mataio 24:36 dekenai dainai ia vara, ia gwau: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.” Mani inai hereva, “Natuna ia diba lasi,” oi laloa.

Unai siri be Iesu ena haere ena kahana ta aposetolo taudia dekenai, edia henanadai be: “Mani oi hamaoroa ai dekenai, oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?” (Mataio 24:⁠3) Iesu ena peroveta herevana badana lalonai, unai “toana” ena kahana idauidau ia herevalaia neganai, ia gwau tuari, hitolo, tano mareremarere, Keristani momokanidia dagedage henia karana, bona iena noho idia hahedinaraia gaudia idauidau ma haida be tanobada ai do idia vara. Unai toa amo, ia murinai idia raka taudia do idia diba dokona be kahirakahira. Fig auna ia gaukaralaia unai ia haheitalaia totona; iena rau idia tubu matamaia neganai, toana be siahu negana be kahirakahira. Ma ia gwau: “Inai gau ibounai idia vara do umui itaia neganai, do umui diba Taunimanima ena Natuna be ia kahirakahira vadaeni, iduara dekenai ia noho.”​—⁠Mataio 24:⁠33.

To Iesu be edena nega ai dokona do ia vara ia gwauraia hedinarai lasi. Lasi, to Mataio 24:36 ai ita duahia herevadia ia gwauraia. New World Translation of the Holy Scriptures bona hari iseda negai idia hahanaia Baibel momo lalodiai edia hereva be unai bamona. To guna idia hahanaia Baibel haida lalonai inai hereva, “Natuna ia diba lasi,” ia noho lasi.

Haheitalai ta be Katolik Douay Version Baibel, ia gwau: “To unai dina bona hora, ta ia diba lasi, guba anerudia idia diba lasi, to Tamana sibona ia diba.” King James Version Baibel idia torea unai bamona. Dahaka dainai unai hereva, “Natuna ia diba lasi [eiava, ia danu ia diba lasi]” idia kokia, to Mareko 13:32 dekenai ia noho? Badina be lagani 1600 C.E. sisina murinai, unai Baibel ruaosi idia hahanaia neganai, hahanaia taudia ese idia gaukaralaia idaunegai revarevadia ai unai hereva ia noho lasi. Unai nega murinai, idaunegai momokani Greek revarevadia idia davaria. Idia be Mataio ena buka ia torea negana kahirakahira dekenai idia torea hanai gaudia, bona idia dekenai, Mataio 24:36 lalonai “Natuna ia diba lasi” herevana ia noho.

Katolik Jerusalem Bible lalonai unai hereva ia noho, bona unai Baibel ena futnout ia gwau Latin Vulgate Baibel lalonai, “reana edia tomadiho ena hahediba herevadia dainai,” unai hereva idia kokia. Oibe, ena badina be unai! Toi Tamona hahediba herevana idia abia dae taudia, Baibel idia hahanaia eiava idia torea hanai taudia, be reana do idia ura unai hereva, Iesu ena diba be maragi, Tamana ena diba hegeregerena lasi herevana, idia kokia. Bema Iesu bona ena Tamana ruaosi be Toi Tamona Diravana ena kahana, Iesu be unai nega ta ia diba lasi be edena bamona?

Unai hegeregerena, A Textual Commentary on the Greek New Testament, B. M. Metzger ia torea bukana ia gwau: “Inai hereva ‘Natuna danu ia diba lasi’ be Mataio ena hamomokania gaudia [idaunegai revarevadia] momo ai do oi davaria lasi; gabeai idia torea hanai Byzantine herevana lalonai be lasi danu. To idau, Alexandrian, Western, bona Caesarean toretore namo hereadia lalonai, unai hereva ia noho. Ai laloa hereva idia kokia edia tomadiho ena hahediba herevadia dekenai hekwakwanai do ia havaraia dainai, to ai laloa lasi unai hereva be haida ese idia atoa” Mareko 13:32 dekenai.

Unai idaunegai momokani revarevadia amo idia abia “toretore namo hereadia” ese daika ena diba be bada idia hahedinaraia namonamo. Aneru ese nega dokona ena hora idia diba lasi; Natuna ia diba lasi; to Tamana sibona. Bona unai be Iesu ena hereva Mataio 20:​23 ai hegeregerena, badina unuseniai ia hahedinaraia iena siahu be hegeregere lasi, dagi badadia Basileia lalonai ia henia totona, to Tamana ese.

Unai dainai, Iesu be sibona ena hereva amo ia hahedinaraia tanobada dekenai ia noho neganai ‘tanobada ena dokona’ dinana ia diba lasi. Unai murinai ia dibaia, a?

Apokalupo 6:2 ia gwau Iesu be hosi kurokuro ai ia helai bona “mai goada danu ia lao, do ia kwalimu totona.” Ia murinai, tuari, hitolo, bona daihanai goreredia idia laulaulaia hosi guia taudia idia lao; lagani 1914 amo, Tanobada Ibounai Tuarina Ginigunana ia matamaia negana ema bona hari, ita mamia gaudia unai. Iehova ena Witness taudia idia abia dae gauna ta be inai: Lagani 1914 ai, Iesu be Dirava ena guba Basileiana ena King ai ia lao, ia be tanobada dekenai kara dika do ia haorea tuarina do ia biagua. (Apokalupo 6:​3-8; 19:​11-​16) Hari Iesu be siahu ia abia Dirava ena ladana ai do ia kwalimu totona. Unai dainai, toana be dokona do ia mai negana, Iesu ena “kwalimu” do ia hagugurua negana, be Iesu dekenai ena Tamana ese ia herevalaia vadaeni.

Ita tanobada taudia dekenai unai dina ia hahedinaraia lasi, unai dainai Iesu ena hereva be do mai anina ita dekenai: “Umui naria namonamo, umui noga noho, badina be inai gaudia idia mai nega umui diba lasi. . . . Inai hereva lau hamaoroa umui, taunimanima ibounai dekenai danu lau hamaoroa, lau gwau, ‘Umui naria noho.’ ” ​—⁠Mareko 13:​33-​37.