“Lau Nihi Lasi, A?”
Inai ripoti be Malawi amo ia mai, ia ese lagani 1995 ena siahu negana ai unuseniai idia karaia Iehova ena Witness taudia edia “Dirava Hanamoa mai Moale Ida” Distrik Hebouhebouna ia herevalaia.
“LAGANI 29 gunadia ai ia vara lasi, to hari dala badana kahirakahira, Lake Malawi ena west konena ai, nega ginigunana saini ta idia haginia. Ia gwau ‘Iehova Ena Witness Taudia Edia Distrik Hebouhebou.’
“Unai saini kahirakahira dekenai taraka badana ta ia noho, bona Mzuzu ena taoni amo idia mai hebouhebou taudia 200 mai kahana be iena treila amo idia raka lasi. Idia ese dabua, bilankesi, uro, baketi, aniani, lahi au, bona Baibel idia mailaia edia tadikaka bona taihu, gabu ma haida amo idia mai taudia, 3,000 bamona ida idia hebou totona.
“Taraka amo idia mai tadikaka ai hedavari henidia noho lalonai, George Chikako, ena mauri lagani be 63, ia ginidae, ena baisikele be tano ena miri dekenai ia doria, ia be dina rua Nkhotakota amo ena baisikele amo ia mai. Idia hanaia laganidia lalonai, Tadikaka Chikako ia ura lasi Baibel ena taravatu ia utua dainai nega hani dibura dekenai idia siaia. Iena varavara ta be dibura dekenai ia mase. Tadikaka Chikako ia henanadai, ‘Lau nihi lasi, a? Inai hebou be dina ena diari lalonai ita karaia, bona inai taunimanima be Basileia ena ane mai rege bada ida idia abia! Lagani momo lalodiai, ai be hanuaboi ena dibura lalonai ai hebou, Basileia ena ane be mai rege lasi ida ai abia, bona ai ura imana ai patapataia neganai ai dahua sibona. Hari ita be taunimanima idia itaia diba dalanai ita hebou, bona idia hoa ita be hutuma dainai badina idia laloa ita be haida sibona!’
“Hebou gabuna be rei maguna amo idia hagegea bona rei amo guhi sisina idia karaia dina ia koua totona. Rei amo ruma maragidia bona patapata idia karaia, hebou taudia idia mahuta totona. Hanuaboi be gado namo edia ane amo ia honu, badina hari idia be dagedage garina idia gari lasi.
“Hebouhebou ena sinado, ‘Dirava Hanamoa mai Moale Ida,’ be maoro momokani!”
[Credit Line]
Mountain High Maps® Copyright © 1995 Digital Wisdom, Inc.