Iboudiai be Dirava ese Ia Hahedinaraia Herevadia, A?

DIRAVA ena lauma, ia amo Baibel ia havaraia gauna, ese buka ma haida, taunimanima haida ese buka helaga idia gwauraia gaudia, ia havaraia danu, a? (2 Timoteo 3:​16) Unai henanadai be Jesuit taudia Italy dekenai edia magasin ta (La Civiltà Cattolica) lalonai ia hedinarai. Katolik taudia ese unai magasin ena hereva idia abia dae, badina be “[Vatican] Secretariat of State ena siahu henunai” idia halasia.

Unai magasin, Jesuit taudia edia, ia gwau: “Lauma Helaga ena gaukara amo Dirava ese Hereva ena uhe be Iuda lasi bona Keristani lasi buka helagadia haida lalonai ia negea kava.” Jesuit taudia idia laloa buka “helagadia,” Zoroastrian Avesta eiava Confucian Four Books hegeregerena, be “Lauma Helaga ese ia hasiahua” taudia ese idia torea, “unai dainai, edia hereva haida be ‘Dirava ese ia hahedinaraia herevadia.’ ”

To, unai magasin be ma ia gwau: “Unai buka helagadia edia hereva haida be Dirava ena hereva lasi,” bona ia gwau unai buka idia torea taudia be “dirava momo tomadiho henia taudia edia lalohadai” eiava idia bogaraginai idia noho bona idia kara taudia edia lalohadai ese idia hakereredia reana. Marco Politi, Vatican sivaraina be niuspepa ta ladana La Repubblica ai ia torea tauna, ia gwau inai lalohadai, lauma helaga ese buka helagadia ma haida idia torea taudia ia hasiahua lalohadaina, dainai, “Katolik Tomadiho Oreana bona tomadiho orea badadia, idaunega amo idia noho gaudia, do idia hetura heheni diba, guna idia laloa idia karaia diba lasi karana unai,” bona tomadiho oreadia idauidau do idia guriguri hebou lou diba, lagani 1986 lalonai Assisi dekenai John Paul Iharuana ese mai ena goada ida ia havaraia karana hegeregerena.

Iehova be heiriheiri Diravana lasi. (1 Korinto 14:33) Unai dainai, bema ita gwau Dirava ena Hereva, Baibel, ida idia hahegeregerea diba lasi bukadia idia torea taudia ese idia torea herevadia haida be Dirava ena lauma helaga, iena gaukara siahuna, amo idia torea, unai be maoro lasi. Keristani aposetolo Paulo ese “tomadiho oreadia” idauidau hatamonaia karana ia goadalaia lasi, to ia gwau: “Dirava ese umui ia boiria totona ena davana naria kara . . . be tamona. Lohiabada be tamona, abidadama be tamona, bapatiso be tamona.”​—⁠Efeso 4:​4, 5.

‘Ita naria gauna tamona’ do ita abia dalana be Iesu Keriso do ita abidadama henia. Baibel ia gwau: “Hamauria be Iesu sibona ese ia henia diba taunimanima dekenai. Badina be tanobada ibounai lalonai, ladana idauna ta Dirava ese ia henia lasi, ita do ia hamauria totona.” (Kara 4:​12) “Buka helaga” idauna ta lasi ese ia hahedinaraia Dirava ese Iesu ena amo iena palani edia anina ia havaraia. Bema ita abia dae Baibel be Dirava ena Hereva, unai neganai sibona ia ese Iehova Dirava ena lalokau karana, hahemauri do ita abia totona ia karaia karana, be ita do ia hadibaia diba.​—⁠Ioane 17:3; 1 Tesalonika 2:​13.