Enoka—Gau ta Ia Garilaia Lasi

TAU namona vairanai, unai be nega dika rohorohona. Dirava dadaraia karadia ese tanobada idia hahonua. Taunimanima edia kara idia dika idia lao. Momokani, nega daudau lasi Iehova ese “taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo.”​—⁠Genese 6:5.

Enoka, Adamu ena amo uru namba 7 tauna, be dala idauna dekenai ia raka mai ena boga-auka ida. Kara maoromaoro ia goadalaia mai ena gari lasi. Enoka ena haroro herevana ese kara dika taudia edia lalona ia hahisia bada dainai, idia alaia mase gwauraia, bona Iehova sibona ese ia durua diba.​—⁠Iuda 14, 15.

Enoka Bona Hepapahuahu Badana

Nega daudau ia do noho ela bona Enoka ia vara neganai, Satani ese guba bona tanobada lohiaia karana siahuna ia hepapahuahulaia matamaia. Dirava ese ia lohiadia be maoro, eiava? Satani Diabolo ese ia hahedinaraia ia laloa Dirava ese ia lohiadia be maoro lasi. Ia gwau, bema Dirava ese aneru bona taunimanima do ia lohiaia lasi neganai, namo bada do idia davaria. Iehova Dirava hadikaia totona, Satani ese taunimanima ia veria, ia sibona do idia badinaia. Adamu, mai ena adavana Heva, bona edia natuna ginigunana, Kaino, edia ladadia be dika, badina be Dirava ena lohia siahuna idia dadaraia bona sibodia edia idia abia hidi, unai amo Satani idia badinaia. Taunimanima ginigunadia ruaosi ese Dirava ia taravatua auna ena huahua idia ania, bona Kaino ese ena tadina, kara maoromaoro tauna Abela, ia alaia mase.​—⁠Genese 3:​4-6; 4:8.

Abela ese Iehova ia badinaia mai ena boga-auka ida. Iena kara maoromaoro ese tomadiho goevana ia abia isi, unai dainai, Kaino ese mai ena badu ida ia alaia mase neganai, momokani Satani ia moale bada. Unai nega amo, Satani ese “mase ena gari” be hagaria gauna bamona ia gaukaralaia. Ia ura Dirava momokanina idia tomadiho henia gwauraia taudia iboudiai do ia hagaria.​—⁠Heberu 2:​14, 15; Ioane 8:​44; 1 Ioane 3:​12.

Satani ena lalohadai be taunimanima ese Iehova ena lohia siahuna do idia badinaia lasi, bona Enoka ia vara neganai, toana be unai lalohadai hamomokania gaudia be momo. Abela ia mase vadaeni, bona ena kamonai karana idia badinaia lasi. To Enoka be idau. Ena abidadama be mai ena badina aukana, badina be Eden umana ai idia vara gaudia edia sivarai ia diba momo.a Ia ese Iehova ena peroveta herevana ia laloa bada, badina be unai hereva ese ia hahedinaraia gwauhamata Garana ese Satani bona ena kara do ia haorea!​—⁠Genese 3:​15.

Enoka ese ena helaro ia laloa hanaihanai dainai, Kaino ese Diabolo ena lalo-ani dainai Abela ia alaia mase sivaraina ia garilaia lasi. To ia be Iehova ida ia raka, bona kara maoromaoro dalana ia badinaia ena mauri negana ibounai lalonai. Enoka be tanobada amo ia gini siri bona ena gwau-edeede lalohadaina ia dadaraia.​—⁠Genese 5:​23, 24.

Inai danu, Enoka ia haroro mai ena gari lasi, ia hahedinaraia Diabolo ena kara dikadia do idia moru. Dirava ena lauma helaga, iena gaukara siahuna, ese ia hasiahua neganai, Enoka ese kara dika taudia ia perovetalaia, ia gwau: “Lohiabada do ia mai, bona iena aneru helagadia momo herea be ia danu do idia hedinarai. Lohiabada ese taunimanima ibounai do ia kota henia. Ia ese Dirava idia badinaia lasi taudia edia dika davana do ia gwauraia, Dirava idia negea dainai. Ma idia momo ese Dirava idia hereva dika henia vadaeni. Idia danu be Lohiabada ese edia kerere davana do ia gwauraia.”​—⁠Iuda 14, 15.

Enoka ia haroro mai ena gari lasi dainai, aposetolo Paulo be Heberu Keristani taudia ia tore henia neganai, ia gwau ia be witness taudia hutuma bada ori ta bamona edia kara amo edia abidadama idia hahedinaraia taudia ta.b (Heberu 11:5; 12:​1, NW) Lagani 300 mai kahana lalodiai, abidadama tauna Enoka ese kara maoromaoro dalana ia badinaia. (Genese 5:​22) Iena kamonai ese Dirava ena inai taudia guba ai bona tanobada ai ia habadua momokani! Enoka ena peroveta herevana aukana dainai Satani ese ia badu henia, to unai hereva dainai Iehova ese ia naria.

Dirava ese Enoka Ia Abia​—⁠Edena Dala Amo?

Iehova ese Satani bona ena hesiai taudia tanobada ai be ia koua, Enoka do idia alaia mase garina. Buka Helaga ia gwau: “Dirava ese ia abia.” (Genese 5:​24) Unai kara be aposetolo Paulo ese inai bamona ia gwauraia: “Abidadama dainai, Dirava ese Enoka ia abia hanai, mase do ia itaia lasi totona, bona idia davaria diba lasi, badina be Dirava ese ia abia hanai, badina be ia do abia hanai lasi neganai, ia hadibaia vadaeni Dirava ia hamoalea bada vadaeni.”​—⁠Heberu 11:5, NW.

Dirava ese Enoka be edena bamona ia “abia hanai, mase do ia itaia lasi totona”? Eiava, R. A. Knox ia hahanaia Baibel ena hereva hegeregerena, Enoka be edena bamona “ia abia oho, mase ena mamina ia abia lasi neganai”? Dirava ese maino dalanai Enoka ena mauri ia hadokoa dainai, mase ena hisihisi, bema gorere dainai o ena inai taudia edia dagedage dainai ia mase, ia mamia lasi. Oibe, Enoka ena mauri laganidia be 365 neganai, Iehova ese ena mauri ia hadokoa​—⁠unai neganai ia be tau matamatana ta bamona, ena uru taudia bogaraginai.

Dirava ese Enoka be edena bamona ‘ia hadibaia Dirava ia hamoalea bada vadaeni’? Dahaka ese unai ia hahedinaraia ia dekenai? Reana Dirava ese Enoka dekenai matahanai ia henia, aposetolo Paulo ia “abia daekau,” o abia hanai hegeregerena; unai neganai Paulo ese matahanai lalonai Keristani ekalesiana ena lauma paradaisona, nega vaira gauna, ia itaia. (2 Korinto 12:​3, 4) Reana Dirava ese inai dala amo Enoka ia hadibaia ia hamoalea vadaeni: Matahanai ia henia neganai, tanobada Paradaisona, nega vaira gauna, ia itaia, ia lalonai do idia noho taudia iboudiai ese Dirava ena lohia siahuna do idia badinaia. Reana Enoka be unai matahanai ia abia noho lalonai Dirava ese hisihisi lasi masena lalonai ia abia oho, bena do ia mase ela bona ena toreisi lou dinana. Toana be Iehova ese Enoka ena tauanina ia haboioa, Mose ena ia kara henia hegeregerena, badina be “Enoka idia tahua mase, to idia davaria lasi.”​—⁠Heberu 11:5; Deuteronomi 34:​5, 6; Iuda 9.

Peroveta Herevana Ena Anina Do Ia Vara

Hari inai negai, Iehova ena Witness taudia ese Enoka ena peroveta herevana ena anina idia harorolaia. Buka Helaga amo idia hahedinaraia unai hereva ena anina be edena bamona do ia vara, nega daudau lasi Dirava ese ia idia dadaraia taudia do ia haorea neganai. (2 Tesalonika 1:​6-​10) Edia haroro herevana dainai taunimanima ese idia badu henia, badina be unai hereva be tanobada ena lalohadai bona ia tahua gaudia amo ia idau vaitani. Unai badu idia hoalaia lasi, badina be Iesu ese ena orea taudia ia hamaoroa, ia gwau: “Lauegu ladana dainai taunimanima ibounai ese do idia badu henia umui dekenai.”​—⁠Mataio 10:22; Ioane 17:14.

To, Enoka hegeregerena, Keristani taudia hari inai negai be idia diba momokani Dirava ese edia inai taudia edia amo do ia hamauridia. Aposetolo Petero ia gwau: “Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba. Dirava ese danu kara dika taudia ia guia diba, ela bona Kota Bada Dinana ia ginidae.” (2 Petero 2:9) Reana Dirava be ena ura hegeregerena hekwakwanai ta o hekwarahi ta do ia kokia. Reana dagedage do ia ore. To, bema lasi, “dala ta do ia kehoa” diba, unai dala amo iena orea taudia be hedibagani do idia haheaukalaidia mai edia kwalimu ida. Iehova ese danu “siahu badana,” sibodia edia siahu ia hereaia gauna, ia henidia, unai siahu idia abia be namo neganai.​—⁠1 Korinto 10:13; 2 Korinto 4:7.

Iehova ese ia ‘idia tahua taudia ibounai be davana namona do ia henidia.’ Unai hegeregerena, iena hesiai taudia mai edia kamonai dekenai mauri hanaihanai do ia henia. (Heberu 11:6) Idia momo herea ese mauri hanaihanai tanobada ena paradaiso lalonai do idia abia. Unai dainai, namona be Enoka hegeregerena Dirava ena hereva do ita harorolaia mai eda gari lasi. Abidadama dainai, gau ta do ita garilaia lasi.

[Footnotes]

[Box on page 30]

Dirava Ena Ladana Idia Hamiroa

Lagani 400 bamona idia do noho ela bona Enoka ia vara neganai, Adamu ena tubuna Enosi ia vara. Genese 4:​26 ia gwau: “Unai nega dekenai taunimanima ese Lohiabada ena ladana helagana dekenai guriguri idia hamatamaia.” Heberu gado idia tahua namonamo taudia haida idia laloa unai siri be inai bamona idia torea be maoro: “Dala mirona amo” Dirava ena ladanai idia guriguri matamaia, o “unai neganai Dirava ena ladana hamiroa karana idia hamatamaia.” Ierusalema ena Targum ese unai nega be inai bamona ia gwauraia: “Unai uru ena nega lalonai idia kara kerere matamaia; kaivakuku idia karadia sibodia edia, bona edia kaivakuku edia ladadia idia hatoa, Lohiabada ena Hereva ena ladana hegeregerena.”

Enosi ena nega lalonai momo ese Iehova ena ladana idia gaukaralaia kerere. Reana sibodia edia ladana idia hatoa Dirava ena hegeregerena, o ma taunimanima haida edia ladadia be unai bamona idia hatoa, bena idia edia amo Iehova kahirakahira idia lao idia tomadiho henia koikoi totona. Eiava kaivakuku edia ladadia idia hatoa Dirava ena ladana hegeregerena. Anina be, Satani Diabolo ese taunimanima ia guia auka vadaeni, kaivakuku tomadiho henia karana ena tarapu lalonai. Enoka ia vara neganai, tomadiho momokani taudia be momo lasi. Enoka bamona taudia, hereva momokani idia badinaia bona idia harorolaia taudia, be taunimanima ese idia ura henidia lasi bona unai dainai idia dagedage henidia.​—⁠Mataio 5:​11, 12 itaia.

[Box on page 31]

Enoka be Guba Dekenai Ia Lao, A?

“Abidadama dainai Dirava ese Enoka ia abia hanai, mase do ia itaia lasi totona.” (NW) Baibel haida lalodiai, Heberu 11:5 ai idia torea herevadia ese idia hahedinaraia Enoka be ia mase momokani lasi. Unai hegeregerena, Buka Helaga Hiri Motu gado ai be ia gwau: “Enoka ese Dirava ia abidadama henia, unai dainai Dirava ese guba dekenai ia abia daekau. Ia mase lasi.”

To, lagani 3,000 Enoka ena nega murinai, Iesu Keriso ia gwau: “Tau ta lasi guba dekenai ia daekau vadaeni, guba dekena amo ia diho Tauna sibona, Taunimanima ena Natuna unai.” (Ioane 3:​13) The New English Bible ia gwau: “Tau ta lasi be guba ai ia daekau vadaeni, to guba amo ia diho tauna, Taunimanima ena Natuna, sibona ese.” Iesu be unai hereva ia gwauraia neganai, ia be guba ai ia do daekau lasi.​—⁠Luka 7:​28 itaia.

Aposetolo Paulo ia gwau Enoka bona taunimanima ma momo, Keristani negana be do lasi neganai idia noho witness taudia hutuma, “ibounai idia mase” vadaeni bona “Dirava ena gwauhamata ena anina idia do davaria lasi.” (Heberu 11:13, 39) Badina be dahaka? Badina be taunimanima iboudiai, anina be Enoka danu, ese kara dika be Adamu ena amo idia abia. (Salamo 51:5; Roma 5:​12) Hahemauri dalana tamona be Keriso Iesu ena boubou, taunimanima edia davana ia henia boubouna, amo. (Kara 4:​12; 1 Ioane 2:​1, 2) Enoka ena nega ai Keriso ese unai davana ia do henia lasi. Unai dainai Enoka be guba ai ia daekau lasi, to mase lalonai ia do mahuta noho bona tanobada ai do ia toreisi lou negana ia do naria noho.​—⁠Ioane 5:​28, 29.

[Picture Credit Line on Page 29]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s