Baibel—Buka Idau Hereana Ta

Ia be tanobada ai idia hoihoilaia momo bukana badana bona unai bamona idia gwauraia be maoro. Baibel idia duahia bona idia ura henia taudia be momo herea, buka iboudiai ia hereaia. Idia gwau Baibel (ibounai eiava kahana) bilioni hani be gado 2,000 mai kahana ai idia halasia vadaeni. To, Baibel ena momo ia hereaia gauna be inai: Idia gwauraia Dirava ese ia havaraia. Keristani aposetolo tauna Paulo ia gwau: “Buka Helaga ena hereva ibounai be Dirava ena Lauma ese ia havaraia.” (2 Timoteo 3:16) Anina be dahaka? Inai hereva “Dirava ena lauma ese ia havaraia” (Greek gado, the·oʹpneu·stos) ena anina korikori be, “Dirava ese laga ia henia.” Unai bamona hereva Greek gado dekenai be pneuʹma, ena anina be “lauma.” Unai dainai, Paulo ena hereva ena anina be inai: Dirava ena lauma helaga ese torea taudia ia hasiahudia, idia latanai laga ia henia bamona, unai dainai idia torea herevadia be Dirava ena Hereva idia gwauraia be momokani, idia be taunimanima edia lasi. Momokani, Baibel idia tahua vadaeni taudia momo idia hoalaia gaudia be inai: Ena buka iboudiai idia hamomokania heheni, saiens dalanai ia maoro, torea taudia edia hereva be momokani bona maoromaoro, bona gau badana be, ena peroveta herevadia momo edia anina idia vara vadaeni​—⁠unai ibounai dainai mai edia lalo-parara ida idia duahia taudia milioni momo idia diba momokani inai buka be Dirava ena amo.a

To Dirava ese Baibel torea gaukarana be edena bamona ia biagua? Haida idia gwau ia ese Baibel ena hereva ta ta iboudiai ia gwauraia. Ma haida idia gwau ia ese Baibel lalonai ita davaria lalohadai sibodia be ena lauma amo ia hadibadia, to ena hereva ta ta ia biagua lasi. To, momokani, ita gwau diba lasi dala tamona amo ia havaraia, badina be Dirava ese “dala idauidau momo dekena amo iseda sene taudia dekenai ia hereva henidia, peroveta taudia dekena amo.” (Heberu 1:1; 1 Korinto 12:6 itaia.) Vadaeni, Dirava ese Baibel torea taudia 40 bamona ia hereva henidia daladia be hereva gabena lalonai do ita tahua.

[Footnotes]