Kahana 4

Dirava ese Ena Palani Ita Ia Hadibalaia

1, 2. Dahaka dainai ita diba Dirava idia nanadaia mai edia momokani ida taudia be ia ese ia haere henidia?

LALOKAU Diravana ese ena palani na lalo-momokani taudia, ia idia tahua taudia, ia hahedinarai henidia. Hisihisi ia koua lasi ena badina idia henanadailaia neganai, ia ese ia haere henidia.

² Baibel ia gwau: “Bema [Dirava] oi tahua, do oi davaria.” “Gau hehunidia ia hahedinaraidia Diravana be guba ai.” “Pavapava Badana Iehova ese kara ta ia karaia hehuni lasi, to ena hesiai taudia, peroveta taudia, be ia hadibalaidia guna.”​—⁠1 Sisiga 28:9; Daniel 2:28; Amos 3:⁠7.

Haere be Edeseniai?

3. Inai henanadai​—⁠Dahaka dainai Dirava ese hisihisi ia koua lasi?​—⁠ena haere be edeseniai ita davaria?

³ Inai henanadai​—⁠Dahaka dainai Dirava ese hisihisi ia koua lasi bona dahaka do ia karaia?​—⁠edia haere be Buka Helaga lalonai ita davaridia. Unai buka be Ia ese ena lauma amo ia havaraia ita ia hadibaia totona. “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia.”​—⁠2 Timoteo 3:​16.

4, 5. Dahaka dainai Baibel be buka idau hereana?

⁴ Baibel be buka idau hereana. Ia lalonai, ta⁠nobada besedia edia sivarai idia torea maoromaoro, bona Dirava ese taunimanima ia do havaradia lasi negana ena sivarai danu. Iseda negai idia vara gaudia bona kahirakahira do idia vara gaudia danu be ia lalonai idia perovetalaidia.

⁵ Buka ma ta ena hereva idia hamomokania diba lasi, Baibel ena hereva idia hamomokania diba hegeregerena. Idaunegai idia toredia bukadia idaudia ta ta mo idia noho, to idaunegai Baibel bukadia, Heberu gado ai edia imadia amo idia toredia gaudia, 6,000 bamona idia noho (“Taravatu Gunana” ena buka 39 unai), bona unai bamona bukadia, Greek gado ai idia torea gaudia, 13,000 bamona idia noho (“Taravatu Matamatana” ena buka 27 unai).

6. Dahaka dainai ita diba Baibel hari inai negai be Dirava ese ia havaraia neganai hegeregerena?

⁶ Iena lauma amo Baibel ia havaraia Diravana ese ena hereva be unai buka gunadia lalodiai ia naria. Unai dainai iseda Baibel hari inai negai be gunanai ia havaradia revarevadia hegeregeredia. Unai ita diba, badina be Keristen revarevadia helagadia haida, imadia amo Greek gado ai idia toredia hanai gaudia, be idia do noho, aposetolo ese unai hereva idia toredia guna, bena lagani 100 idia do ore lasi neganai, haida ese unai buka ai idia toredia hanai. Idaunegai bukadia idaudia, edia imadia amo idia toredia gaudia, ta be unai hegeregerena lasi.

Dirava ena Harihari Gauna

7. Baibel hariharilaidia gaukarana be ede badana?

⁷ Baibel bilion toi be gabu momo herea ai idia halasidia; ena momo ese ma buka idauidau iboudiai ta ta edia momo ia hanaia momokani. Baibel ibounai o ena kahana haida be gado 2,000 bamona ai idia torea hanai vadaeni. Unai dainai idia gwau tanobada taudia 100 100 amo 98 98 ese Baibel idia abia diba.

8-10. Dahaka dainai Baibel ena hereva do ita tahua namonamo be namo?

⁸ Unai buka idia torea taudia idia gwau ia be Dirava ena amo, bona gau idauidau ese idia hamomokania, unai dainai do ita tahua namonamo be namo.a Ia sibona ese mauri ena anina, tanobada ai idia vara gaudia edia anina, bona nega vairai do idia vara gaudia ia gwauraidia.

⁹ Oibe, Baibel amo Dirava ese taunimanima ia hereva henidia. Iena gaukara siahuna, iena lauma, amo tatau 40 bamona be Baibel torea gaukarana lalonai ia hakaudia. Aposetolo Paulo ia gwau: “Dirava ena hereva ai mailaia neganai, umui kamonai henia bona umui abia dae. Oibe, umui abia dae momokani, taunimanima edia hereva bamona lasi, to Dirava ena hereva momokani bamona.”​—⁠1 Tesalonika 2:13.

¹⁰ Abraham Lincoln, United States ena president gunana ta, ia gwau, Baibel be “Dirava ese taunimanima ia henidia gauna hereadaena . . . Bema Baibel be lasi, maoro bona kerere edia idau ita diba lasi.” Vadaeni, hisihisi ia matamaia dalana, bona Dirava ese ia koua lasi ena badina, bona do ia haorea dalana, be Baibel ese edena bamona ia herevalaia?

[Footnote]

[Picture on page 10]

Dirava ese Baibel ia havaraia; ia amo taunimanima ia hereva henidia