Emai Gabu Ena Misinari Teritori Ai Vadivadi Henia

LAU vadivadi henia Keristani kongregesen edia grup dainai Portugal amo China dekenai lau loaloa​—eiava egu mamina be unai bamona. To, egu adavana, Olive, bona lau be Britain ai rakatania lasi.

England ena kahana kahana dekenai idia noho Iehova ena Witness taudia edia gado idauidau kongregesen ai vadivadi henidia bona unai kongregesen edia namba ia bada daekau noho. Emai teritori be Jersey ena motumotu, kilomita 20 bamona France ena kone Normandy amo, ia noho Portugal gado ena grup ta dekenai ia matamaia, ia lao ela bona England ena not kahana Sunderland taoni dekenai, unuseniai ai ese China gado idia hereva kamonai taudia ai vadivadi henia. Unai teritori lalonai kongregesen idia momo daekau, lauma dalanai idia goada idia lao, bona gado idauidau be momo. Edena bamona unai gaukara idauna ai abia? Bona edena gaudia idia vara emai gabu ena misinari teritori dekenai? Mani lau herevalaia sisina.

Olive bona lau ese lagani 20 bamona lalonai sekit gaukara ai karaia, pura ta ta kongregesen idauna ta ai vadivadi henia. Emai laolao lalodiai ai be Britain ena kahana iboudiai, not kahana amo saut kahana dekenai, ist amo west kahanai, bona vanegai laganidia lalonai emai Keristani tadikakadia Mediterranea motumotu Malta, Keristani abia dae karana idia goadalaia momokani gabuna, dekenai ai lao. (Kara 28:⁠1, 2 itaia.) Lagani toi lalonai Malta dekenai ai noho murinai, edeseniai ai do idia siaia ai laloa matamaia. Ai laloa reana England ena gunika gabudia do ai vadivadi henia, bona unai totona sibona emai lalohadai ai hegaegaelaia matamaia. To revareva ai abia neganai ai hoa bada herea, badina gado idauidau 23 dekenai idia hereva grup bona kongregesen edia sekit matamatana dekenai ai idia siaia!

Edena bamona do ai kwalimu ai laloa momo. Ai ese gabu bona bese idaudia taudia be guna ai bamoa momo lasi, Malta dekenai ai noho neganai sibona. English gado idia diba namonamo lasi taudia be momokani do ai hagoadadia diba, a? Edena bamona do ai herevahereva badina gado idaudia ai diba lasi? Edia aniani bona mauri daladia idauidau be edena bamona? Emai kara do ai haidaua diba, a? Unai bamona henanadai ai lalohadailaia, mai emai guriguri ida unai Makedonia amo ia mai bamona noinoi ena haere ai hegaegaelaia neganai.​—⁠Kara 16:​9, 10; 1 Korinto 9:​19-22.

Gado Ena Hekwarahi Ai Hanaia Noho

Olive ia gwau: “Matamanai lau laloa lau hegeregere lasi, badina gado idaudia lau diba lasi dainai. Lau diba lasi edena dala ai lau be taihu do lau durudia diba. Gabeai lau laloatao ai dekenai Baibel stadi idia karaia taudia ginigunadia, tau mai ena adavana, ese ai idia hagoadaia orea ese ia henia gaukarana ta ai dadaraia lasi. Ai idia hadibaia Iehova ese ita karaia diba gaukarana sibona ia henia ita dekenai.” Unai dainai ai ruaosi ese unai gaukara ai abia dae mai emai ura ida.

Idia vara gaudia ai laloa neganai, ai itaia gado ma ta ai diba lasi ese ai ia durua maka tamona dekenai iboudiai ai kara henidia totona. Hegeregere, pura ta ta gado idauna ai idia karaia hebou dekenai ai lao dainai, English gado heboudia dekenai idia helai to idia herevalaia gaudia be idia lalo-pararalaia sisina sibona tadikaka edia hemami ai dibaia matamaia. Hebou totona ai hegaegae namonamo be gau badana, idia herevalaia gaudia do ai lalo-pararalaia totona. Nega ibounai hebou dekenai Olive ese henanadai ta ia haere henia. Ia ese English gado ai haere ia hegaegaelaia bona taihu ta ese ia hahanaia, bona Olive ese do ia gwauraia bamona ia torea. Olive ia gwau haere henia totona ena imana ia abia isi be gari gauna. Nega haida ena haere dainai idia kiri. To unai ese ia koua lasi. Ia gwau: “Lau diba tadikaka ese egu hekwarahi idia laloa bada. Bona egu haere ese gado idia hereva namonamo taudia ia hagoadaia idia danu be hebou dekenai do idia haere.”

Lau dekenai, hereva lau henia neganai ia idau danu, badina sentens iboudiai murinai, gado dekenai ia hahanaia tauna totona nega lau henia be namo. Egu lalohadai lau haboioa haraga. Lau davaria egu lalona lau biagua auka be namo bona gau momo lau herevalaia diba lasi. To unai hereva henia karana lau moalelaia.

Emai Haroro Gaukara Idauna

Britain ena taoni momo dekenai, gado idauidau taudia be gabu ena kahana kahana ai idia noho, dala tamona ai reana rua idia noho, bena sisina daudau do oi lao ma haida davaria totona. To, edia gado ai idia oi hedavari henia bena edia hemami oi itaia neganai, emu hekwarahi be herevana. Bema lau bamoa tadikaka ese Basileia ena sivarai be ruma tauna ena gado ai ia herevalaia, nega momo ruma tauna ia moale dikadika.

Momokani, lagani 40 lalonai Basileia hesiai gaukarana ai karaia, to emai gaukara inai gado idauidau teritori dekenai ai moalelaia bada herea. Kamonai taudia momo herea idia noho. Taunimanima momo ese hereva momokani idia dibaia haraga bona idia laloa bada, bema ta ese edia gado korikori dekenai ia hadibadia. (Kara 2:⁠8, 14, 41) Emai kudouna ia hamarerea gauna be hebou murinai tadikaka bona taihu be moale dainai idia tai, badina reana nega ginigunana idia ese idia kamonai program ibounai idia lalo-pararalaia diba.

Ruma ta ruma ta ai haroro neganai, emai hamatamaia herevana be ruma tauna ena gado dekenai do ai gwauraia toho, ena be nega haida hekwakwanai ia havaraia. Hegeregere, Gujarati gado ruma besena hanamoa herevana be Kemcho, ena anina be “Namo.” Nega ta lau gwauraia namonamo lasi dainai toana be lau ese taunimanima idia ura henia kofi ena namo lau hahedinaraia. To, ruma ta dekenai tau mai ena adavana be Gujarati gado ai lau hanamoa henia neganai, idia ruaosi idia kiri. Maoromaoro ruma lalonai ai idia boiria bona mai edia hebogahisi ida kofi idia henidia​—bona unai be hereva lau gwauraia kerere dainai lasi. Ai davaria idia be ai vadivadi henia grup ena Iehova ena Witness taudia haida edia varavara, bona mai momokani ida hereva momokani idia ura henia.

Lagani momo lalonai English gado taihu ta ese China gado hahine ta dekenai magasin ia henia loulou. Nega haida unai hahine dekenai davana lasi Baibel stadi ia herevalaia, to ia ura lasi. Dina ta China gado dibaia taihuna ta ese ia bamoa bona unai hahine dekenai Mauri Hanaihanai Paradaiso Lalonai bukana China gado dekenai ia hahedinaraia, bona unai kamonai ruma hahine ese buka ia abia dae haraga.a Hari ena gado korikorina ai buka ia abia dainai, ia ura Baibel stadi ia abia. Unai hereva kwadogina be unai hahine ena gado korikorina ai idia karaia dainai, ena lalona idia veria.

Bese Idaudia Edia Kara

Guna ai diba lasi bese idaudia haida edia tatau idia ura lasi adorahi ai edia hahine be ruma idia rakatania. Unai dainai taihu momo dekenai, adorahi ai idia karaia hebou dekenai idia lao be auka herea. Asia taudia haida idia laloa idia ura lasi headava bona idia ura tama sina ida idia noho kekenidia, be edia ruma bese idia hahemaraia. Taihu matamata ta ena tamana ia ura poisini amo sibona ia hamasea, badina ruma bese taudia ese idia abia hidi tauna ia ura lasi ia adavaia. Momokani, unai bamona taihudia idia haheaukalaia gaudia be idau momokani! To, oi itaia hereva momokani ese ruma bese ena mauri ia haidaua bona unai taihu edia Iehova badinaia noho karana ese tama sina edia lalona ia veria neganai, unai be hoa gauna badana!

Inai gaukara ai karaia dainai, emai kara haida ai haidaua. Sekit naria gaukara ai do hamatamaia lasi neganai, lau ese England taudia edia aniani mai siahuna lasi lau ura henia sibona, to hari lau laloa aniani mai siahuna bada herea be namo herea. Madi, lagani momo ai negea kava ela bona aniani idauidau​—hegeregere idia nadua lasi gwarume bona kari gaudia​—ai moalelaia matamaia.

Vaira Negana Namona

Ia hedinarai goevagoeva hari be nega namona gado idauidau teritori momo ai anina do idia havaraia totona. Gado idauidau buka bona magasin edia momo idia bada daekau. Kongregesen matamatadia idia haginia neganai, Iehova ena hahenamo unai gaukara dekenai oi mamia. Gado idaudia idia diba tadikakadia be daudau amo idia mai idia durudia totona.

Haheitalai namona be Basileia ena sivarai namona harorolaia gaukarana France gado dekenai. Vanegai laganidia lalonai Zaire bona Africa ena tano ma haida idia heautania taudia be Britain dekenai idia mai. France gado kongregesen ginigunana be London dekenai idia haginia neganai, ia lalonai Basileia pablisa taudia be 65. Lagani ta murinai edia namba ia bada daekau ela bona 117, bona idia 48 be ful-taim painia taudia. Gabeai kongregesen iharuana idia haginia kamonai taudia be momo dainai. Hari kamonai taudia idia durua namonamo diba, idia 345 be lagani 1995 Memorial dekenai idia mai. Guna Benin, Côte d’Ivoire, Morocco, bona Zaire dekenai idia gaukara Gilead sikuli taudia ese hari edia diba idia gaukaralaia inai teritori, ia bada ia lao teritorina, idia naria totona bona anina bada ia vara.

Nega ta France gado kongregesen lau vadivadi henia neganai, Africa amo ia mai hahine matamata ena Baibel stadi ta dekenai lau lao. Ai rakatania gwauraia neganai, unai matamata hahine ia noinoi: “Mani umui lao lasi. Nega sisina do umui noho.” Ia ura bada ena diba ia habadaia. Iena noinoi dainai aposetolo taudia edia negai ia noho hahinena Lidia lau laloa.​—⁠Kara 16:​14, 15.

Emai gaukara ginigunana be gado idauidau grup maragidia ai durua idia be kongregesen ai idia lao totona. Tadikaka be pura ta ta Kongregesen Buka Stadi idia karaia gabudia ai, hua ta ai nega tamona Haroro Sikuli kwadogina ai hamatamaia. Unai ese idia ia durua haroro gaukara lalonai do idia hereva namonamo. Bena idia hekwarahi noho ela bona pura ena hebou ima iboudiai do idia karaia diba. China (Canton), France, Gujarati, Japan, Portugal, Punjabi, Tamil, bona Welsh gado kongregesen matamatadia idia noho vadaeni.

Danu, ai be taia kudima tadikakadia edia hebou dekenai ai lao bona ai moalelaia. Tadikaka ese edia imana amo ane idia abia karana ai itaia ese emai kudouna ia hamarerea. Haroro gaukara lalonai edia imana amo idia hereva dainai, edia hekwarahi Basileia haroro gaukarana lalonai lau laloa bada. Idia taia kudima bona idia matakepulu taudia be saini amo idia hadibaia taudia idia noho danu. Toana be Iehova ia naria namonamo iboudiai ese diba idia abia.

Bema noinoi ta ai gwauraia ia be Iesu ese ia gwauraia noinoina hegeregerena, ia gwau: “Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” (Mataio 9:38) Tadikaka momo idia hekwarahi edia kongregesen teritori dekenai idia noho idau bese taudia edia gado idia dibaia totona. Ena be hoa karana amo gado idauidau ai hereva diba lasi, to Iehova ese haroro gaukarana ia habadaia emai gabu ena misinari teritori ai​—unai teritori dekenai anina utua negana be hari. (Ioane 4:35, 36)​—Colin Seymour ese ia sivarailaia.

[Footnotes]