Ruma Bese Lalonai Dirava Ena Maino Umui Tahua
“Tanobada ena bese taudia ibounai e, Lohiabada do umui hanamoa. Iena hairaina bona iena goada badana do umui hanamoa.”—SALAMO 96:7.
IEHOVA ese tau bona hahine ginigunadia be headava lalonai ia haboua neganai, ruma bese maurina ena matamana be mai ena maino bona mai ena moale. Oibe, Adamu ia moale bada dainai, ena moale be idia torea anena ginigunana lalonai ia hahedinaraia, ia gwau: “Harihari lau bamona tauna ia noho. Ia be lauegu turia ena turia, bona lauegu hidio ena hidio. Iena ladana do idia atoa, Hahine, badina be tau dekena amo be ia kokia.”—Genese 2:23.
2 Dirava ese headava bona ruma bese maurina ia hamatamaia neganai, ia ese ena tanobada natudia hamoalea karana sibona ia laloa lasi. Ia ura idia ese iena ura do idia karaia. Dirava ese tau bona hahine ginigunadia ia hamaoroa, ia gwau: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua. Davara ena gwarume bona ataiai manudia, bona mauri gaudia, tanobada dekenai idia marere gaudia ibounai do umui biagua.” (Genese 1:28) Unai be namo bona moale havaraia gaukarana momokani. Adamu, Heva, bona gabeai idia havaraia natudia do idia moale bada, bema unai headava taudia ginigunadia ruaosi ese mai edia kamonai ida Iehova ena ura idia karaia!
3 Hari inai negai danu, ruma bese taudia ese Dirava ena ura idia karaia hebou neganai idia moale bada. Bona unai bamona ruma bese mai edia kamonai be hahenamo momo do idia abia! Aposetolo Paulo ia torea: “Bema Dirava totona ita treinini noho, ia ese iseda lauma do ia hagoadaia, bona inai kara ese ita do ia durua bada herea . . . inai tanobada ena mauri dekenai, bona gabeai do ita abia mauri dekenai danu.” (1 Timoteo 4:8) Mai momokani ida Dirava idia badinaia ruma besedia ese Iehova ena Hereva ena hakaua herevadia idia badinaia bona ena ura idia karaia. Dirava ena maino idia tahua bona unai amo “inai tanobada ena mauri dekenai” moale idia davaria.
Ruma Bese Maurina Ia Dika Ia Lao
4 Momokani, ruma bese ibounai lalonai maino bona moale ita davaria lasi. The New York Times niuspepa ese taunimanima idia stadilaia oreana ta ladana Population Council ese ia davaria gauna ia herevalaia, ia gwau: “Moni momo tanodia bona ogogami tanodia ai danu, ruma bese maurina ena toana be ia idau momokani ia lao.” Unai ripoti ia torea hahinena ta ena hereva ia torea, ia gwau: “Inai lalohadai, ruma bese be orea maragina goadana mai ena lalo-tamona, ia lalonai tamana ia gaukara edia moni abia totona bona sinana ese edia lalona ia hagoadaia lalohadaina, be koikoi. Sivarai momokani be taunimanima idia headava lasi to natudia idia havaraia, headava idia hadokoa momo, [bona] ruma bese maragidia . . . idia karaia tanobada hegegemadai.” Unai bamona karadia dainai, ruma bese milioni momo lalonai noho namo, maino, bona moale be lasi, bona momo idia parara. Lagani 1990 ai, Spain dekenai headava 8 amo tamona idia hadokoa—lagani 25 sibona gunanai, headava 100 amo tamona idia hadokoa, hari ia bada daekau momokani. Europe ena tanodia amo England dekenai headava idia hadokoa momo—headava 10 amo hani idia moru. Unai tano dekenai tamana sibona eiava sinana sibona idia noho ruma besedia edia namba ia bada daekau danu.
5 Toana be taunimanima haida ese edia headava hadokoa totona, daudau idia naria diba lasi. Japan ai, Tokyo kahirakahira ia noho “Kwatua Varona Utua Dubuna” dekenai idia aru lao. Unai Shinto dubuna ese headava bona idia ura lasi ma hebamo idaudia hadokoa noinoi idia abia dae. Tomadiho taudia ta ta ese sibona edia noinoi be au palakapalaka latanai idia torea, dubu ena magu lalonai idia atoa, bona haere abia totona idia guriguri. Tokyo ena niuspepa ta ia gwau, lagani 100 bamona gunanai unai dubu idia haginia neganai, “unai gabu ena hoihoi taudia mai edia taga edia adavadia ese guriguri herevadia idia torea, idia noinoi edia tau ese idia ura henia kekenidia do idia rakatania bena edia adavadia dekenai do idia giroa lou.” To, hari inai negai, idia torea noinoi momo be headava hadokoa totona, maino havaraia lou totona lasi. Momokani, tanobada hegegemadai ruma bese maurina ia dika ia lao. Keristani taudia ese unai dainai idia hoa be namo, a? Lasi, badina Baibel ese ita ia hadibaia badina be dahaka hari ruma bese momo ese dika idia davaria.
Dahaka Dainai Ruma Bese Momo ese Dika Idia Davaria?
6 Hari inai negai ruma bese momo ese dika idia davaria ena badina ta be inai: “Satani ese tanobada taudia ibounai ia gunalaia noho.” (1 Ioane 5:19) Tau dikana, Satani Diabolo, ena kara be edena bamona? Ia be koikoi tauna dikana mai ena kara bodaga. (Ioane 8:44) Unai dainai ita hoa lasi iena tanobada ese koikoi bona kara bodaga, ruma bese maurina hadikaia karadia, ia moalelaia bada! Dirava ena orea murimurinai, Satani ena siahu ese headava, Iehova ese ia hamatamaia gauna, ia hadikaia ore toho bona ruma bese maurina mai moalena ia hadokoa toho.
7 Ruma bese edia hekwakwanai, hari taunimanima momo ese idia lalohisihisilaia gaudia, edia badina ma ta be 2 Timoteo 3:1-5 ese ia gwauraia. Paulo ena peroveta herevana unai siri lalodiai ese ia hahedinaraia ita be “nega ena dokona” lalonai ita noho. Ruma bese taudia be maino bona moale ai idia noho diba lasi bema ‘edia ura sibona idia tahua, moni idia mataganigani henia, idia hekokoroku bona heagi, idia hereva dika, edia tamana bona sinana idia kamonai henia lasi, tanikiu henia kara idia diba lasi, helaga karadia idia negea, idia be lalokau idia diba lasi, idia bogahisihisi lasi, haida edia ladana idia hadikaia kava, idia lebulebu, idia dagedage, kara namodia idia ura henia lasi, edia turana idia samania henia, idia kara kava, idia gwau idia be tau badadia momokani, vadaeni lebulebu karadia idauidau idia ura henia bada, to Dirava idia ura henia maragi, Dirava badinaia kara be toana sibona idia hedinaraia, to iena anina momokani idia negea.’ Ena be ruma bese lalonai ta sibona be lalokau ia diba lasi eiava ena ruma bese ia badinaia lasi, unai ruma bese ia moale momokani diba lasi. Ruma bese lalonai maino be edena bamona ia vara diba, bema ta ia dagedage bona ia ura lasi lalo-tamona ai ia noho? Danu, edena bamona maino bona moale idia noho diba, bema ruma bese taudia ese lebulebu karadia idia ura henia bada, to Dirava idia ura henia maragi? Unai be inai tanobada, Satani ese ia lohiaia tanobadana, taudia edia kara. Ita hoa lasi inai dina gabedia lalonai ruma bese mai edia moale be momo lasi!
8 Ruma bese momo lalodiai maino bona moale be lasi ena badina ma ta be edia natudia idia kara dika. Paulo ese dina gabedia lalonai do idia vara karadia ia perovetalaia neganai, ia gwau memero kekeni momo ese edia tama sina do idia kamonai henia lasi. Bema oi be mero o kekeni, oiemu kara ese emu ruma bese ia durua umui be maino bona moale ai do umui noho totona, a?
9 Natudia haida edia kara ia namo lasi. Hegeregere, mero matamata ta ese ena tamana dekenai inai revareva dikana ia torea, ia gwau: “Bema Alexandria dekenai lau do oi abia lao lasi oi dekenai revareva do lau torea lasi, do lau hereva lasi, eiava bamahuta do lau gwauraia lasi, bona bema do oi lao Alexandria dekenai, oiemu imana do lau dogoatao lasi eiava oi do lau hedavari henia lasi momokani. Unai do ia vara bema lau oi abia lao lasi . . . To lau noinoi [gita] ta do oi siaia lau dekenai. Bema oi siaia lasi, do lau aniani eiava inuinu lasi. Mamina do oi abia!” Unai be hari ia vara diba gauna bamona, a? To, unai revareva be lagani 2,000 gunanai, Aigupito ai, mero ta ese ena tamana dekenai ia torea.
10 Unai Aigupito mero matamatana ena kara ese ruma bese ena maino ia habadaia lasi. To momokani, inai dina gabediai ruma bese lalodiai be unai kara idia hanaia kara dikadia idia vara. To, umui matamata taudia ese emui ruma bese umui durua diba Dirava ena maino do umui tahua totona. Edena bamona? Inai Baibel sisiba umui badinaia amo, ia gwau: “Memero, kekeni e, nega ibounai emui tamana bona sinana do umui kamonai henia, badina inai kara be Dirava ia ura henia.”—Kolose 3:20.
11 Umui tama sina e, umui be edena bamona? Mai emui lalokau ida emui natudia umui durua, Iehova ena hesiai taudia mai edia kamonai ai do idia lao totona. Aonega Herevadia 22:6 ia gwau: “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.” Tama sina ese Baibel ena hereva hegeregerena edia natudia idia hadibaia namonamo bona edia kara amo haheitalai namona idia henia dainai, memero bona kekeni momo be idia bada neganai dala maorona amo idia raka siri lasi. To Baibel amo idia hadibaia namonamo loulou bona natuna ena kudouna ese unai ia abia dae be gau badadia.
12 Bema iseda ruma bese taudia iboudiai ese Iehova ena ura idia karaia toho, Dirava ena maino ita moalelaia noho. Namona be Keristani ruma be ‘maino taudia’ amo ia honu. Luka 10:1-6 ese ia hahedinaraia Iesu ese unai bamona taudia ia laloa, hahediba taudia 70 be hesiai gaukarana karaia totona ia siaia neganai, ia siaia taudia ia hamaoroa, ia gwau: “Do umui daekau rumana dekenai do umui hereva, do umui gwau, ‘Maino inai ruma dekenai do ia noho.’ Unai ruma dekenai bema maino tauna ta ia noho, emui maino be iena latanai do ia noho.” Iehova ena hesiai taudia ese mai edia maino ida “maino ena Sivarai Namona” be ruma ta ruma ta dekenai idia abia lao neganai, maino taudia idia tahua. (Kara 10:34-36; Efeso 2:13-18) Bema Keristani ruma bese be maino taudia momokani, idia be maino ai idia noho.
13 Ruma be maino bona laga-ani gabuna be namo. Vabu burukana Naomi ia ura Dirava ese ena ravana hahine matamatadia, idia vabu vadaeni Ruta bona Oropa, dekenai adavana namona bona ruma ia henia, laga-ani bona noho namona do idia abia totona. Naomi ia gwau: “Lohiabada ese umui ruaosi dekenai adavana matamatadia do ia henia, ruma namodia [“laga-ani,” NW] danu.” (Ruta 1:9) Naomi ena ura gauna ia herevalaia neganai, diba tauna ta ia torea unai bamona ruma lalodiai Ruta bona Oropa be “heiriheiri bona lalo-hekwarahi amo do idia siri. Laga-ani do idia davaria. Unai gabu dekenai do idia lalo-hekwarahi lasi, bona edia hemami bona ura maragidia danu ta ese ia laloa bona maino do idia davaria. Unai bamona herevadia [Isaia 32:17, 18] ai, ese Heberu herevana . . . ena hemami idauna ia hedinarai namonamo.”
14 Ia herevalaia gauna, Isaia 32:17, 18, mani oi itaia. Unuseniai ita duahia: “Taunimanima ibounai ese kara maoromaoro sibona idia karaia dainai, idia ese, mai maino bona mauri namona do idia noho hanaihanai. Dirava ena taudia do idia laloa hekwarahi lasi, bona mai hadikaia gauna ta lasi do ia noho.” Namona be Keristani ruma be kara maoromaoro, regerege lasi, noho namona, bona Dirava ena maino idia noho laga-ani gabudia. To edena bamona bema hahetoho, hepapahuahu, eiava ma hekwakwanai haida idia vara? Unai neganai ruma bese lalonai moale havaraia dalana ita diba be gau badana.
Hakaua Hereva Badadia Hani
15 Tanobada dekenai, ruma bese iboudiai be Iehova Dirava, ruma bese Havaraia Tauna, dekena amo edia ladana idia abia. (Efeso 3:14, 15) Unai dainai ruma bese lalonai moale idia ura henia taudia ese iena sisiba idia tahua bona ia idia hanamoa be namo, salamo torea tauna ia karaia hegeregerena, ia gwau: “Tanobada ena bese taudia ibounai e, Lohiabada do umui hanamoa. Iena hairaina bona iena goada badana do umui hanamoa.” (Salamo 96:7) Ruma bese ena moale korikori davaria dalana be Dirava ena Hereva, Baibel, lalonai bona ena hakaua herevadia badinaia karana lalonai. Unai hakaua herevadia idia badinaia ruma bese taudia do idia moale bona Dirava ena maino do idia moalelaia danu. Unai dainai hakaua herevadia badadia hani mani ita laloa.
16 Unai hakaua herevadia ta be inai bamona: Tauanina ena ura koua karana be gau badana ruma bese lalonai Dirava ena maino abia totona. King Solomona ia gwau: “Ia badu neganai mai ena haheauka lasi tauna, be hanua ta mai ena magu lasi bamona, idia hadikaia ore vadaeni.” (Aonega Herevadia 25:28) Haheauka—tauanina ena ura koua karana—be gau badana, bema ita ura iseda ruma bese lalonai maino bona moale do idia vara. Ita be goevadae lasi, to namona be Dirava ena lauma helaga ena huahua ta, tauanina ena ura koua karana, ita hahedinaraia. (Roma 7:21, 22; Galatia 5:22, 23) Unai lauma ese ita lalonai tauanina ena ura koua karana do ia havaraia, bema ita ese unai kara totona ita guriguri, Baibel ia sisibalaia herevana ita badinaia, bona bema unai kara idia hahedinaraia taudia ita bamoa. Unai kara ese ita do ia durua, ‘heudahanai karadia do ita rakatania.’ (1 Korinto 6:18) Danu tauanina ena ura koua karana ese ita do ia durua, dagedage do ita dadaraia, inuinu momo karana do ita dadaraia eiava do ita negea, bona hekwakwanai idia vara negadiai manau karana do ita hahedinaraia.
17 Hakaua herevana ma ta mai anina bada be inai bamona ita gwauraia diba: Kwara dagina abia dae karana ese ita do ia durua, iseda ruma bese lalodiai Dirava ena maino do ita tahua. Paulo ia torea: “Lau ura umui diba, tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.” (1 Korinto 11:3) Unai ena anina be tau ese ruma bese ia gunalaia, ena adavana ese ia badinaia bona durua, bona natudia ese idia kamonai henidia. (Efeso 5:22-25, 28-33; 6:1-4) Unai karadia ese ruma bese lalonai Dirava ena maino do idia havaraia momokani.
18 Namona be Keristani tau ia laloatao Baibel ia gwauraia kwara dagina be siahu ibounai dagina lasi. Namona be ia ese Iesu, iena Kwarana, ia tohotohoa. Ena be Dirava ese Iesu “kwarana momokani” ai ia halaoa to “ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai.” (Efeso 1:22; Mataio 20:28) Unai hegeregerena, Keristani tauna ese lalokau dalanai kwara dagina ia gaukaralaia, unai amo ena ruma bese ia naria namonamo diba. Bona Keristani hahine ia ura ena adavana ida idia gaukara hebou. Ia be ena tau ena “durua tauna” bona “bamona,” bona ena kara haida be ena tau ena kara amo idia idau dainai, ena tau dekenai heduru ia henia diba. (Genese 2:20; Aonega Herevadia 31:10-31) Kwara dagina gaukaralaia namonamo karana ese tatau bona hahine ia durua mai hemataurai ida idia kara heheni bona natudia ia durua do idia kamonai henidia. Oibe, kwara dagina abia dae karana ese ruma bese maurina lalonai Dirava ena maino ia havaraia.
19 Hakaua herevana badana ihatoina be inai bamona ita gwauraia diba: Herevahereva hebou karana namona be mai anina bada, ruma bese lalonai maino bona moale do idia noho totona. Iamesi 1:19 ia gwau: “Umui ta ta ibounai ese hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi.” Ruma bese lalonai herevahereva karana be mai kahana rua dainai, ruma bese taudia idia hereva heheni bona idia kamonai heheni be namo. Ena be ita gwauraia herevana be maoro, to bema mai eda dagedage, hekokoroku, eiava hebogahisi lasi ida ita gwauraia, namo do ia havaraia lasi, to reana dika bada do ia havaraia. Namona be “mai gado namo” ida ita hereva. (Kolose 4:6) Baibel ena hakaua herevadia idia badinaia bona idia herevahereva hebou namonamo ruma besedia ese Dirava ena maino idia tahua noho.
20 Hakaua herevana ihahanina be inai: Lalokau be gau badana ruma bese ena maino bona ena moale dekenai. Tau bona hahine ese idia hahedinaraia heheni lalokauna be mai anina bada headava lalonai, bona ruma bese taudia idia ura heheni diba. To, unai ia hereaia gauna be Greek gado herevana a·gaʹpe bamona lalokauna. Unai lalokau amo ita ese Iehova, Iesu, bona iseda badibadinai tauna ita lalokau henidia. (Mataio 22:37-39) Dirava ese unai lalokau ia hahedinaraia taunimanima dekenai bona ‘Iena Natuna tamona sibona ia vara, ia henia, do idia abidadama henia taudia ibounai be do idia mase lasi, to mauri hanaihanai do idia abia.’ (Ioane 3:16) Unai bamona lalokauna amo iseda ruma bese taudia ita lalokau henia diba be namo herea momokani! Unai lalokau hereadaena dainai do ita “noho hebou namo herea.” (Kolose 3:14) Ia ese tau bona ena hahine ia kwatua hebou bona ia dainai idia kara namo heheni bona edia natudia idia kara namo henia danu. Hekwakwanai idia vara neganai, lalokau ese ia durudia, unai hekwakwanai do idia hanaia mai edia lalo-tamona ida. Unai ita diba momokani, badina “lalokau be sibona ena gau ia tahua lasi, . . . taunimanima durua kara dekenai ia hesiku lasi. Nega ibounai iena abidadama ia goada noho. Nega ibounai Dirava ena nega namona ia naria noho mai moale danu. Bona metau ibounai lalonai ia gini goada noho. Lalokau be do ia noho hanaihanai doko lasi.” (1 Korinto 13:4-8) Edia ruma bese lalodiai edia lalokau heheni karana be Iehova lalokau henia karana ese ia hagoadaia, unai taudia idia moale momokani!
Dirava Ena Maino Umui Tahua Noho
21 Ataiai idia noho hakaua herevadia bona ma haida, Baibel amo ita abia gaudia, be Iehova ese mai ena hebogahisi ida “hesiai tauna mai ena kamonai, bona mai ena kara maoromaoro” oreana amo ia henia buka bona magasin lalodiai idia hedinarai. (Mataio 24:45) Hegeregere, unai gaudia be rau 192 bukana The Secret of Family Happiness lalonai ita davaria, idia ese lagani 1996/97 ai tanobada hegegemadai Iehova ena Witness taudia edia “Dirava Ena Maino Gwauraia Taudia” Distrik Hebouheboudia dekenai idia halasia. Sibona emui Baibel stadi bona famili stadi be unai bamona buka ena heduru ida umui karaia dainai, hahenamo momo do umui davaria diba. (Isaia 48:17, 18) Oibe, Baibel ena sisiba umui badinaia karana ese emui ruma bese ena maino bona moale do ia habadaia.
22 Iehova ese gau namo hereadia ia hegaegaelaia iena ura idia karaia ruma besedia totona, bona unai dainai ia ita hanamoa bona ita hesiai henia be namo. (Apokalupo 21:1-4) Unai dainai, namona be emui ruma bese maurina lalonai Iehova Dirava tomadiho henia karana be gau badana. Bona ai ura Dirava ena maino be emui ruma bese lalonai do umui tahua neganai, iseda Tamana lalokauna guba ai, Iehova, ese umui do ia hanamoa bada!
Edena Bamona Oi Haere?
◻ Dirava do idia badinaia totona, ruma bese taudia ese dahaka idia karaia be namo?
◻ Hari inai negai ruma bese maurina ia dika ia lao ena badina be dahaka?
◻ Ruma bese lalonai moale davaria dalana be dahaka?
◻ Edena hakaua herevadia haida ese ita do idia durua, ruma bese lalonai maino bona moale ita habadaia totona?
[Study Questions]
1. Iehova ese ruma bese maurina ia hamatamaia neganai, ia be edena bamona?
2. Dirava ia ura headava ese ena tanobada natudia ia hamoalea, to dahaka ia ura danu?
3. Dirava do idia badinaia totona, ruma bese taudia ese dahaka idia karaia be namo?
4, 5. Dahaka dainai ita gwau diba tanobada hegegemadai ruma bese maurina ia dika ia lao hari?
6. Hari inai negai, ruma bese momo ese dika idia davaria lalonai, 1 Ioane 5:19 ena anina be dahaka?
7. Inai dina gabedia lalonai, taunimanima edia kara ese ruma bese momo edia mauri be edena bamona ia haidaua diba?
8, 9. Natudia edia kara ese dahaka ia karaia diba ruma bese ena moale dekenai?
10. Matamata taudia ese edia ruma bese be edena bamona idia durua diba, Dirava ena maino tahua totona?
11. Tama sina ese edia natudia be edena bamona idia durua diba, Iehova ena hesiai taudia mai edia kamonai ai idia lao totona?
12. Dahaka dainai Keristani ruma lalonai maino ia noho be namo?
13, 14. (a) Naomi ena ura gauna Ruta bona Oropa totona be dahaka? (b) Namona be Keristani ruma be edena bamona laga-ani gabuna?
15. Ruma bese lalonai moale davaria dalana be edena bamona oi gwauraia diba?
16. Tauanina ena ura koua karana ena anina ruma bese maurina lalonai be dahaka?
17, 18. (a) Korinto Ginigunana 11:3 ena anina ruma bese maurina lalonai be dahaka? (b) Kwara dagina abia dae karana ese ruma bese lalonai Dirava ena maino tahua karana be edena bamona ia durua?
19. Dahaka dainai herevahereva hebou karana namona be mai anina bada ruma bese lalonai, maino bona moale idia noho totona?
20. Dahaka dainai oi gwau diba lalokau be gau badana ruma bese ena maino dekenai?
21. Dahaka kara ese emui ruma bese ena maino bona moale do ia habadaia diba?
22. Namona be iseda ruma bese maurina lalonai gau badana be dahaka?
[Picture on page 24]
Herevahereva hebou karana namona ese ita ia durua ruma bese lalonai Dirava ena maino tahua totona