‘Iehova be Iena Bese Taudia Do Ia Rakatania Lasi’
“Kara maoromaoro tauna ena hisihisi be momo, to Lohiabada ese unai tau do ia durua, vadaeni unai hisihisi do ia ore.”—SALAMO 34:19.
1, 2. (a) Edena dala ai Iehova ese ena taunimanima ia hanamoa hari? (b) Keristani taudia momo ese dahaka idia davaria, bona dahaka henanadai idia vara?
BAIBEL ena peroveta hereva hegeregerena, Iehova idia tomadiho henia taudia be lauma paradaisona ai idia noho. (2 Korinto 12:1-4) Iehova ena Witness taudia be lalokau bona lalo-tamona ia hahedinaraia tanobada ibounai oreana ta ena memba taudia. (Ioane 13:35) Idia moale Baibel ena hereva momokanina ena dobu gaudia idia diba namonamo. (Isaia 54:13) Iehova idia tanikiu henia ia henia hahenamo ta dainai, iena lauma palai rumana dekenai vadivadi taudia bamona idia noho diba!—Salamo 15:1.
2 Iehova ena orea taudia ibounai be lauma dalanai idia taga, to haida be maino bona noho namona bamona idia moalelaia diba bona ma haida be hisihisi idauidau idia davaria. Keristani taudia momo idia davaria edia noho be dika herea, bona nega daudau ia be unai bamona, bona toana be do ia idau haraga lasi. Vaia, unai bamona noho idia mamia taudia edia lalona ia manoka. (Aonega Herevadia 13:12) Unai dika badadia idia vara neganai, Dirava ena badu idia hahedinaraia, a? Iehova be Keristani taudia haida ia gimaia namonamo to ma haida ia rakatania, a?
3. (a) Iehova be ena taunimanima idia abia dika badadia ia havaraia, a? (b) Dahaka dainai Iehova ena abidadama hesiai taudia danu be hisihisi idia abia?
3 Baibel ia haere, ia gwau: “Bema tau ta ese dibagani ia davaria, o dika ta ese ia veria noho neganai, inai bamona do ia hereva lasi, ‘Dirava ese lau ia dibagania noho.’ Badina be kara dika ese Dirava ia dibagania diba lasi momokani. Bona Dirava ese tau ta do ia dibagania lasi.” (Iamesi 1:13) Iehova be ena taunimanima edia Mauri Naria bona Durua Tauna. (Salamo 91:2-6) Iehova ese “iena bese taudia do ia rakatania lasi.” (Salamo 94:14) To ita gwau lasi ena anina be Dirava idia tomadiho henia mai kamonai ida taudia ese hisihisi do idia davaria lasi. Hari iseda tanobada idia biagua taudia be mai kara dika danu idia vara taudia. Idia momo edia kara ia gageva, bona idia haida be kara dika rohoroho taudia. Idia ta lasi be Iehova ena aonega ia tahua. Unai dainai taunimanima ese hisihisi bada idia ania. Baibel ia hahedinaraia goevagoeva Iehova ena taunimanima be taunimanima edia kara dika dainai idia vara gau dikadia be hanaihanai do idia reaia lasi.—Kara 14:22.
Abidadama Keristani Taudia Idia Diba Hisihisi Do Idia Abia
4. Keristani taudia be inai tanobada dikana ai idia do noho neganai, idia diba dahaka do ia vara idia dekenai, bona dahaka dainai?
4 Ena be Iesu murinai idia raka taudia be tanobada ena lasi, to tanobada taudia bogaraginai idia noho. (Ioane 17:15, 16) Baibel ia hahedinaraia Satani ese inai tanobada ia gunalaia. (1 Ioane 5:19) Unai dainai, Keristani taudia ibounai idia diba hari eiava gabeai hekwakwanai badadia do idia davaria. Aposetolo Petero ese unai ia laloa inai ia torea neganai, ia gwau: “Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho. Emui abidadama dekenai do umui gini goada, vadaeni umui ese Satani do umui koua. Namo umui diba, emui Keristani varavara taudia tanobada kahana ibounai dekenai, be hisihisi inai bamona idia abia noho.” (1 Petero 5:8, 9) Oibe, Keristani oreana taudia iboudiai ese hisihisi do idia abia.
5. Edena dala ai Iesu ia hahedinaraia goevagoeva, abidadama Keristani taudia be edia mauri lalonai lalohisihisi gaudia do idia davaria?
5 Ena be Iehova ita lalokau henia momokani bona ena hakaua herevadia ita badinaia, to iseda mauri lalonai lalohisihisi gaudia do idia vara. Iesu ese unai ia hahedinaraia goevagoeva ena parabole Mataio 7:24-27 ai, iena hereva idia kamonai bona idia kamonai lasi taudia ia hahegeregerea neganai. Ia gwau kamonai hahediba taudia be aonega tauna ta bamona, iena ruma be nadi goadana latanai ia haginia. Iena hereva idia badinaia lasi taudia be kavakava tauna ta bamona, iena ruma be miri latanai ia haginia. Lai badana ia ore murinai, nadi latanai ia noho ruma sibona ia do gini noho. To aonega tauna ena ruma dekenai dahaka ia vara mani oi laloa: “Medu bada ia diho, sinavai ia abata, lai bada ia botaia unai ruma dekenai. To unai ruma be ia moru lasi, badina ia be nadi latanai tau ese ia haginia.” Iesu ia gwauhamata lasi aonega tauna be hanaihanai maino bona noho namona do ia moalelaia sibona. Lasi, to ena aonega ese do ia hegaegaelaia lai lalonai do ia gini auka totona. Unai bamona lalohadai ita davaria uhe hadoa tauna ena parabole lalonai. Iesu ia gwau “lalona maoromaoro bona goevagoeva” abidadama tomadiho henia taudia be hekwakwanai negana ai “idia hesiku lasi, ela bona edia huahuana idia havaraia.”—Luka 8:4-15.
6. Paulo ena lahi ia gabua diba lasi gaudia parabolena lalonai, daidia be lahi bamona hahetoho idia abia?
6 Korinto taudia ia tore henia neganai, aposetolo Paulo be laulau amo ia hahedinaraia namona be idia ore haraga lasi karadia ita abia, hekwakwanai haheaukalaidia totona. Unai Dirava badinaia karadia be lahi ese ia gabua diba lasi gaudia, golo, siliva, bona dava bada nadidia ida ia hahegeregerea. (Aonega Herevadia 3:13-15; 1 Petero 1:6, 7 itaia danu.) To tauanina karadia be lahi ese ia gabua haraga diba gaudia hegeregerena. Bena Paulo ia gwau: “To taunimanima ta ta edia gaukara be Keriso ena Kota Badana Dinana dekenai do idia hedinarai. Badina unai Dina dekenai, lahi ese tau ibounai edia gaukara do ia hedinaraia. Lahi ese ta ta edia gaukara do ia tohoa, vadaeni ibounai edia gaukara be do ita diba, namo o dika. Bema tau ta ese du ena latanai ia haginia gauna be lahi ese ia araia lasi, unai tau ese davana namona do ia abia.” (1 Korinto 3:10-14) Unuseniai danu, Baibel ia hahedinaraia ita ibounai be lahi bamona hahetoho do ita davaridia.
7. Roma 15:4 hegeregerena, Baibel be edena dala ai ita ia durua hahetoho haheaukalaidia totona?
7 Dirava idia badinaia taudia be nega haida nega daudau lalonai dika idia haheaukalaia, bona edia sivarai momo be Baibel lalonai ita davaria. To, Iehova ese idia ia rakatania lasi. Aposetolo Paulo ese edia haheitalai ia laloa noho, ia gwau: “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada, bona Dirava ena namo dekenai do ita naria, mai haheauka danu.” (Roma 15:4) Mani tatau toi edia haheitalai oi laloa, Dirava idia tura henia momokani, to hisihisi momo idia ania.
Baibel Sivarai amo Ita Dibaia Gaudia
8. Iosepa ena sivarai ita laloa neganai, Iehova ese dahaka kara ia koua lasi, bona ena daudau be edena bamona?
8 Iakabo ena natuna Iosepa be ia maragi negana amo Iehova ese ia lalo-namo henia. To, sibona ena kerere dainai lasi, dika badadia momo ia haheaukalaia. Iena kakadia ese ia idia henaoa bona idia kara dika henia. Igui hesiai tauna bamona ia idia hoia idau gabu taudia dekenai. Unuseniai ia idia samania koikoi bona “dibura ruma dekenai” idia koua. (Genese 40:15) Dibura dekenai “iena aena be seini dekena amo idia kwatua, unai be mai hisihisi, bona iena aiona dekenai auri dekena amo idia guia.” (Salamo 105:17, 18) Unai igui hesiai bona dibura negana lalonai, Iosepa be Iehova ia noia loulou ia ruhaia totona. Lagani 13 lalodiai, ena be Iehova be dala idauidau ai Iosepa ia hagoadaia, to daba daba ibounai, Iosepa ia noga neganai, ia be igui hesiai tauna o dibura tauna ai ia do noho.—Genese 37:2; 41:46.
9. Lagani haida lalodiai, Davida ese dahaka ia haheaukalaia?
9 Davida ena sivarai be unai bamona. Iehova ese Israela do ia lohia tauna namona ta ia abia hidi neganai, ia gwau: “Davida, Iese ena natuna lau davaria vadaeni, egu lalokau tauna, egu ura kara ibounai do ia karaia.” (Kara 13:22) Ena be Iehova ena matana ai ia be tau namona, to Davida ese hisihisi bada ia ania. Ena mauri ia haorea diba hekwakwanai ta dainai, lagani haida lalodiai ororo matudia, koura, bona idau bese taudia edia gabu ai ia hunia. Uda boroma bamona idia labana henia dainai ia lalo-manoka bona ia gari. To, Iehova ia henia goada dainai ia haheauka. Davida be mai maoro ida ena mauri lalonai idia vara gaudia dainai ia gwau diba: “Kara maoromaoro tauna ena hisihisi be momo, to Lohiabada ese unai tau do ia durua, vadaeni unai hisihisi do ia ore.”—Salamo 34:19.
10. Dahaka dika bada hereana be Naboto bona ena ruma bese taudia dekenai ia vara?
10 Elia ena nega ai, Israela taudia 7,000 sibona be koikoi diravana Bala vairanai idia tui diho lasi. (1 King Taudia 19:18; Roma 11:4) Naboto be idia ta, to ma ta ena kara gageva dainai dika ia davaria. Samania herevana koikoina ena hemarai ia haheaukalaia. Idia gwau kerere ia karaia, unai dainai king ena ladana ai nadi amo idia hodoa mase, bena sisia be ena rara idia demaria. Iena natudia memero idia alaia danu! To ia kerere lasi. Uitnesi taudia be koikoi taudia. Unai palani dikana ibounai be Kwini Iesebele ena amo ia mai, bona ia ese ia karaia king be Naboto ena vain umana ia abia diba totona.—1 King Taudia 21:1-19; 2 King Taudia 9:26.
11. Aposetolo Paulo ese abidadama tatau bona hahine edia sivarai Baibel lalonai ia herevalaia neganai, dahaka ia gwau?
11 Baibel be hisihisi idia abia abidadama tatau bona hahine momo edia sivarai ia gwauraia, bona Iosepa, Davida, bona Naboto be idia toi. Aposetolo Paulo be Iehova ena hesiai taudia haida edia histori ia torea. Ia sivarailaia, ia gwau: “Idia dagedage henidia taudia ese idia kirikirilaidia, idia kwadidia, auri dekenai idia guidia, bona dibura ruma lalonai idia koudia. Nadi dekenai idia hodoa, idia mase, iri dekenai idia utua kahana rua, idia mase, tuari kaia dekena amo idia aladia mase. Idia haida madi, mamoe kopina bona nanigosi kopina, dabua bamona idia karaia, idia loaloa. Idia be ogogami, hisihisi idia abia, bona taunimanima ese idia hadikadia. Unai dainai taunimanima idia noho lasi gabudia bona ororo dekenai idia loaloa.” (Heberu 11:36-38) To Iehova ese idia ia rakatania lasi.
Iehova ese Hisihisi Idia Abia Taudia Ia Naria
12. Hari inai nega ai, Iehova ena Witness taudia idia davaria hisihisi be dahaka dahaka?
12 Hari Iehova ena taunimanima be edena bamona? Dirava be iena orea do ia gimaia bona dina gabedia bona hisihisi badana amo do ia hamauria. (Isaia 54:17; Apokalupo 7:9-17) To, ita diba taunimanima ibounai dekenai bona ita ta ta dekenai danu, “dika ia vara kava noho” diba. (Hadibaia Tauna 9:11) Hari inai negai abidadama Keristani taudia momo ese dika badadia idia haheaukalaia. Haida ese ogogami bada herea nohona idia haheaukalaia. Baibel ia gwau Keristani “tamana bona sinana lasi maragidia bona vabu be mai edia hisihisi.” (Iamesi 1:27) Ma haida be idia vara kava dikadia, tuari, raskol karadia, siahu idia gaukaralaia kerere taudia, gorere, bona mase dainai hisihisi idia mamia.
13. Ripoti haida be dahaka hekwakwanai idia kikilaia?
13 Hegeregere, Iehova ena Witness taudia edia Hakaua Oreana idia abia lagani 1996 ripoti lalonai, Watch Tower brens opesi idia gwau, iseda tadikaka bona taihu haida be dibura ruma dikadia ai idia atoa, Baibel ena hakaua herevadia idia badinaia noho dainai. South America ena tano ta ai, tuari taudia be Witness taudia handred momo idia lulua dainai, kongregesen toi idia ore. West Africa ena tano ta ai, gavamani dagedage henia tuarina lalonai Witness taudia haida idia hamasea. Central America tanona ta ai, idia ogogami vadaeni tadikaka be lai dikana dainai be hari idia ogogami bada herea. Gabu ma haida ai, ogogami bona aniani be lasi hekwakwanai idia vara lasi, to hekwakwanai ma haida ese edia moale idia hamaragia. Ma haida be hari inai nega ai idia vara hekwakwanai idia davaria dainai, edia mauri idia hametaua. Taunimanima momo be Basileia ena sivarai namona idia ura lasi idia kamonai dainai, reana ma haida be idia lalo-manoka.
14. (a) Iobu ena haheitalai amo, dahaka ita dibaia? (b) Hisihisi ita abia neganai, lalo-manoka lalohadai ita laloa lasi, to dahaka ita karaia be namo?
14 Namo lasi ita laloa unai gaudia idia vara ena badina be Dirava ese ita ia badu henia. Iobu ena sivarai bona ia haheaukalaia hisihisi momo ita laloatao be namo. Ia be “kerere ta lasi, bona kara maoromaoro tauna.” (Iobu 1:8) Elipasa ia gwau Iobu be kerere tauna neganai, mani Iobu ena lalo-manoka mamina oi laloa! (Iobu, karoa 4, 5, 22) Namo lasi karaharaga ita gwau hisihisi ita abia badina Iehova ia moale lasi, eiava Iehova be ena hahenamo ia kokia dainai. Hahetoho negana lalonai, hagoadaia lasi lalohadaina ese iseda abidadama do ia hamanokaia diba. (1 Tesalonika 3:1-3, 5) Hisihisi negana ai, namona be ita laloa noho, herevana dahaka ia vara, Iehova bona Iesu be kara maoromaoro taudia kahirakahira do idia noho.
15. Edena bamona ita diba Iehova be ena taunimanima idia mamia dika badadia ia laloa momokani?
15 Aposetolo Paulo ese ita ia hagoadaia, ia gwau: “Daika ese Keriso ena lalokau ita dekena amo do ia kokia diba? Nega dika ese, a? O hisihisi ese, a? O dagedage ese? O hitolo ese? O ogogami ese? O gari bada gauna ese? O mase ese? . . . Lau diba momokani vadaeni, gau ta ia goada lasi, mase o mauri, o aneru, o lohia herea taudia, o guba ena siahu gaudia, o harihari idia noho gaudia, o gabeai do idia vara gaudia, o ataiai gaudia, o dobu gabuna gaudia, o tanobada dekenai karaia gaudia, ta ese Dirava ena lalokau, Keriso Iesu iseda Lohiabada ese ia hedinaraia vadaeni gauna, dekena amo ita do ia kokia diba lasi.” (Roma 8:35, 38, 39) Iehova ese ita ia laloa bada bona iseda hisihisi ia itaia. Davida ia do heau oho neganai, ia gwau: “Lohiabada ese kara maoromaoro taudia ia naria noho. Edia taitai be ia ese ia kamonai henia noho. Lohiabada be lalohisihisi taudia kahirakahira ia noho.” (Salamo 34:15, 18; Mataio 18:6, 14) Iseda guba Tamana ese ita ia naria bona hisihisi ania taudia ia hebogahisi henia. (1 Petero 5:6, 7) Ia ese ita ia durua ita haheauka diba totona, herevana edena bamona hisihisi ita davaria.
Iehova Ena Harihari Gaudia ese Ita Idia Hagoadaia
16. Ita haheauka totona, Iehova be dahaka heduru ia henia, bona edena bamona ia durua?
16 Ena be inai tanobada ai ita diba hekwakwanai lasi maurina do ita moalelaia lasi, to ‘Dirava ese ita do ia rakatania lasi.’ (2 Korinto 4:8, 9) Iesu be ena hahediba taudia dekenai ia gwauhamata, durua gauna do ia henia. Ia gwau: “Lau ese Tamana do lau noia, ia ese Durua Tauna ta do ia henia umui dekenai, umui dekenai do ia noho hanaihanai, hereva momokani Laumana unai.” (Ioane 14:16, 17) Pentekoste 33 C.E. ai, aposetolo Petero ese idia kamonai taudia ia hamaoroa, “Lauma Helaga do umui abia, Dirava ena harihari gauna.” (Kara 2:38) Lauma helaga be hari ita ia durua, a? Oibe! Iehova ena siahu ese ita dekenai inai huahua namodia ia henia: “Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.” (Galatia 5:22, 23) Unai dava bada karadia ibounai ese ita idia durua ita haheauka totona.
17. Edena hereva momokanidia Baibel lalonai ese iseda abidadama bona Iehova naria lalohadaina idia hagoadaia?
17 Lauma helaga ese ita ia durua dainai ita lalo-parara ‘hari ita abia noho hisihisi be metau lasi gaudia, bona do idia noho nega daudau lasi,’ bema davana namona, mauri hanaihanai ida ita hahegeregerea. (2 Korinto 4:16-18) Ita diba momokani Dirava ese iseda gaukara bona iseda lalokau ia totona do ia laloaboio lasi. (Heberu 6:9-12) Baibel ena hereva ita duahia neganai, dika badadia idia haheaukalaia to idia moale noho idaunegai abidadama taudia edia sivarai ese ita idia hagoadaia. Iamesi ia gwau: “Lauegu varavara taudia e, peroveta taudia do umui laloa. Lohiabada ena ladana dekenai idia hereva neganai, hisihisi lalonai idia haheauka bona idia goada. Edia kara bamona do umui karaia be namo. Ita diba inai haheauka taudia ese moale idia davaria vadaeni, ani?” (Iamesi 5:10, 11) Baibel ia gwauhamata “siahu badana” do ita abia, hahetoho ita haheaukalaia totona. Iehova ena hahenamo ma ta be toreisi lou helarona. (2 Korinto 1:8-10; 4:7) Dina ta ta iboudiai Baibel ita duahia bona ena gwauhamata herevadia ita laloa loulou ese iseda abidadama bona Dirava naria noho lalohadaina do idia hagoadaia.—Salamo 42:5.
18. (a) Korinto Iharuana 1:3, 4 ese ita ia hagoadaia dahaka ita karaia totona? (b) Keristani elda taudia be edena bamona idia hahedinaraia idia be heduru bona goada henia taudia?
18 Danu, Iehova ese lauma paradaiso ia henia bona ia lalonai iseda Keristani tadikaka bona taihu edia lalokau korikorina ita moalelaia. Ita ta ta be mai iseda maduna ita durua heheni totona. (2 Korinto 1:3, 4) Keristani elda taudia be heduru bona goada henia taudia. (Isaia 32:2) Elda taudia be “harihari gaudia taunimanima dekenai,” idia abia gaukara be ‘lalo-metau taudia idia gado namo henia bona idia hagoadaia, bona manoka taudia idia durua.’ (Efeso 4:8, 11, 12; 1 Tesalonika 5:14, NW) Elda taudia ai hagoadaia Gima Kohorona bona Awake! magasin, bona ‘hesiai tauna mai ena kamonai bona mai ena kara maoromaoro’ oreana idia henia buka ma haida idia gaukaralaia namonamo. (Mataio 24:45-47) Idia lalonai Baibel ena sisiba ia noho; ita ia durua lalo-hekwarahi havaraia gaudia hanaia totona, bona nega haida unai hekwakwanai ia koudia diba danu. Namona be hekwakwanai negadia ai Iehova ita tohotohoa iseda durua bona hagoadaia heheni karadia amo!
19. (a) Dahaka ese ita do ia durua dika badadia haida ita reaia totona? (b) Daika ita abidadama henia be gau badana, bona hahetoho ita davaria neganai, dahaka ese ita do ia durua?
19 Dina gabedia edia dokona ai ita noho bona tanobada be ia dika ia lao momokani neganai, Keristani taudia idia hekwarahi, dika badadia amo idia raka siri toho totona. (Aonega Herevadia 22:3) Aonega dalana ita abia hidi totona, laloa namonamo karana bona Baibel ena hakaua herevadia dibaia karana ese ita do idia durua. (Aonega Herevadia 3:21, 22) Iehova ena Hereva ita kamonai henia bona ita badinaia neganai, ita reaia diba kerere do ita karaia lasi. (Salamo 38:4) To, ita diba unai hekwarahi karana ese iseda mauri lalonai idia vara hisihisi iboudiai do ia haorea lasi. Inai tanobada ai, kara maoromaoro taudia momo ese hahetoho dikadia do idia davaria. To, iseda hekwakwanai ita haheaukalaia diba badina ita diba vaitani Iehova ese “iena bese taudia do ia rakatania lasi.” (Salamo 94:14) Bona ita diba inai tanobada dikana bona ena hisihisi be kahirakahira do idia ore vaitani. Unai dainai, namona be iseda lalona ita hadaia “kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.”—Galatia 6:9.
Dahaka Ita Dibaia?
◻ Keristani orea taudia iboudiai ese edena bamona hahetoho do idia davaridia?
◻ Baibel lalonai, edena sivarai idia hahedinaraia dika badadia idia vara neganai, Iehova ese ta ia badu henia dainai idia vara lasi?
◻ Iehova ena taunimanima idia hisihisi neganai, ena lalohadai be dahaka?
◻ Iehova ese hahetoho haheaukalaidia totona ia henia harihari gaudia haida be dahaka dahaka?
[Picture on page 10]
Davida, Naboto, bona Iosepa be dika badadia idia davaria tatau toi