Basileia Haroro Ripoti
Haheauka Karana ese Dirava Ena Hahenamo Ia Havaraia Malawi Ai
IOSEPA be Iehova ena abidadama hesiai tauna ta. (Heberu 11:22) Ia be haheauka bada tauna danu. Ena be ena tadikaka ese ia idia koia, nega rua igui hesiai idia hoia lao, bona gabeai samania koikoi dainai dibura rumana ai idia atoa, to Iosepa ia manoka lasi. To, lagani momo lalonai hisihisi ia haheaukalaia, mai manau ida Iehova ena hahenamo ia naria.—Genese 37:23-28, 36; 39:11-20.
Unai hegeregerena hari inai negai, Iehova ena Witness taudia Malawi dekenai be Dirava ena hahenamo idia naria mai edia haheauka ida. Lagani 26 lalonai, unai Keristani Witness taudia ese gavamani ena taravatu, dagedage karadia, bona kara dika bada idia haheaukalaia. To edia haheauka karana ese davana namona ia havaraia!
Lagani 1967 ena dokona ai, Malawi dekenai dagedage karana ia matamaia neganai, Basileia pablisa taudia be 18,000. Mani edia moale oi laloa, idia itaia lagani 1997 ena hesiai laganina ia matamaia neganai, pablisa taudia edia namba be 38,393—taravatu idia atoa negana amo nega rua ia bada daekau! Ma danu, Malawi dekenai “Dirava Ena Maino Gwauraia Taudia” edia Distrik Hebouhebou ibounai 13 ai, idia mai taudia be 117,000. Momokani, Iehova ese edia abidadama bona haheauka karana ia hanamoa.
Unai hahenamo ena haheitalai ta be tau matamata ta ladana, Machaka, ena ekspiriens. Machaka be Iehova ena Witness taudia ida Baibel ia stadilaia matamaia neganai, iena tama sina idia badu dikadika. Idia gwau: “Bema oi ura Witness tauna ta ai oi lao, ruma oi rakatania be namo.” To unai hagaria herevana ese ena stadi ia koua lasi. Unai dainai, Machaka ena tama sina ese ena dabua ibounai idia abia oho. Tadikaka ese ia idia durua bona ena dabua ma haida idia hoia. Machaka ena tama sina be unai idia diba neganai, idia hamaoroa: “Bema Witness taudia be oi do idia durua, namona be ruma oi rakatania bona oi lao idia danu do oi noho.” Unai ia laloa namonamo murinai, Machaka ese ruma ia rakatania, bona kongregesen lalonai ia noho Witness ruma bese ta ese ia idia abia dae idia danu do ia noho totona.
Machaka ena tama sina idia badu dikadika dainai, unai gabu idia rakatania Witness taudia amo do idia siri vaitani totona. Unai gauna dainai, Machaka be ia lalohisihisi, to tadikaka ese Salamo 27:10 ena hereva be ia ida idia kikilaia neganai, goada ia davaria. Unai siri ia gwau: “Badina be egu tamana bona sinana, ese lau idia rakatania, to Lohiabada ese lau do ia abia dae.”
Gabeai, Machaka ena tama sina ese edia kara idia hamanaua, bona iena ruma dekenai ia giroa lou. Toana be edia natuna mero ena ura, Iehova do ia hesiai henia ura goadana unai, ese edia lalona ia veria badina idia danu idia ura Iehova ena Witness taudia ida Baibel do idia stadilaia! “Dirava Ena Maino Gwauraia Taudia” Distrik Hebouhebouna ena dina toi ibounai dekenai idia lao, bona unai murinai idia gwau: “Momokani, inai be Dirava ena orea.”
Oibe, dagedage karana be mai ena hekwarahi, to Dirava idia badinaia noho gwaukau taudia idia hesiku lasi. Mai edia boga-auka ida idia gaukara noho, badina idia diba “hisihisi bona nega dika ese iseda haheauka idia hagoadaia diba.” (Roma 5:3, 4) Malawi dekenai, Iehova ena Witness taudia idia hamomokania diba haheauka karana ese Dirava amo hahenamo ia havaraia.