Oi Sibona be Edena Bamona Oi Laloa?

IA BE hekokoroku tauna ta. Gavamani lalonai dagi bada ia abia dainai, taunimanima ese ia idia abia isi bona hanamoa karadia ia moalelaia bada. To ia badu, badina gavamani ofesa ma ta ese unai bamona ia hanamoa lasi. Davana henia totona, unai hekokoroku ofesa tauna ia ura unai tano badana ibounai lalonai unai ofesa tauna ma ta ena bese taudia ibounai ia hadikaia ore. Dala dikana ai sibona ia laloa bada!

Unai dika palania tauna be Hamana, Parasa ena King Ahasuero ena lohia rumana dekenai ia gaukara dagi bada ofesa tauna. Bona ia badu henia tauna be daika? Iuda tauna ladana Morodekai. Ena be Hamana ena palani, bese idauna ta hadikaia ore palanina, be reana momo ese idia karaia karana lasi, to ia hahedinaraia goevagoeva hekokoroku karana ese dika bada ia havaraia diba. Ena hekokoroku lalohadaina ese ma haida dekenai dika ia havaraia sibona lasi, to unai kara dainai Hamana be taunimanima vairanai idia hahemaraia bona dokonai ia mase.​—⁠Eseta 3:​1-9; 5:​8-14; 6:​4-10; 7:​1-10.

Nega Haida Tomadiho Momokani Taudia Danu Idia Hekokoroku

Iehova ia ura “mai manau danu Dirava danu do ita raka hebou.” (Mika 6:⁠8) Baibel lalonai manau lasi dalanai sibona idia laloa taudia momo edia sivarai idia noho. Unai dainai hekwakwanai bona lalohisihisi idia davaria. Unai haheitalai haida ita laloa neganai, do ita itaia laloa maoromaoro lasi karana be aonega dalana lasi bona dika ia havaraia.

Dirava ena peroveta tauna Iona ena laloa maoromaoro dalana ia kerere dainai, Iehova ese Nineva taudia dekenai Iena hahemaoro herevana gwauraia totona ia siaia neganai gabu idauna ta ai ia heau lao. (Iona 1:​1-3) Gabeai, Iona ena haroro gaukara dainai Nineva taudia idia helalo-kerehai neganai, ia badu. Ena peroveta ladana ia laloa bada dainai, Nineva taudia tausen momo edia mauri ia laloa maragi eiava ia laloa lasi. (Iona 4:​1-3) Bema ita hekokoroku bona sibona ita laloa bada, reana taunimanima bona idia vara gaudia ita laloa maoromaoro be auka.

Usaia, guna ia be Iuda ena king namona, mani oi laloa danu. Iena laloa maoromaoro karana ia kerere neganai, mai ena hekokoroku ida hahelaga taudia edia kara haida ia karaia toho. Iena manau lasi bona hekokoroku bada karana dainai, ia gorere bona Dirava ena lalo-namo ia haboioa.​—⁠2 Sivarai 26:​3, 16-21.

Laloa maoromaoro lasi karana ese kahirakahira Iesu ena aposetolo taudia ia tarapua. Sibona edia dagi bona siahu idia laloa bada. Hahetoho badana idia davaria neganai, Iesu idia rakatania bona idia heau. (Mataio 18:1; 20:​20-28; 26:56; Mareko 9:​33, 34; Luka 22:24) Manau lasi karana idia hahedinaraia bona sibona idia laloa bada dainai, kahirakahira Iehova ena ura bona edia gaukara Iena ura lalonai idia laloaboio.

Sibona Laloa Bada Karana Ena Dika Haida

Ita sibona ita laloa maoromaoro lasi karana ese hisihisi ia havaraia bona iseda hetura karana ma haida ida ia hadikaia diba. Hegeregere, reana daiutu ta dekenai ita helai bona ita itaia taunimanima rua be gado regena maragina ai idia herevahereva bona idia kiri. Bema sibona ita laloa bada, reana do ita laloa kerere bena ita laloa idia be ita idia kirikirilaia dainai gado regena maragina ai idia hereva. Iseda lalona ai edia kara ena badina ma ta ita laloa diba lasi. Momokani, ma daika idia herevalaia diba? Reana ita badu bona sibona eda lalona ita hadaia idia ruaosi do ita hereva henia lasi. Unai bamona laloa maoromaoro lasi dalanai ita sibona ita laloa bada dainai gau haida ita laloa kerere bona turadia, ruma bese taudia, bona ma haida ida iseda hetura karana ita hadikaia.

Sibona idia laloa bada taudia be heagi taudia ai idia lao diba, bena edia diba, kara, bona kohu, sibona idia laloa idia hereadae gaudia, idia heagilaia hanaihanai. Eiava ma haida ida idia herevahereva neganai idia kamonai lasi to idia hereva momo, sibodia idia herevalaia loulou. Unai bamona hereva ese ia hahedinaraia idia dekenai lalokau korikori be lasi bona ma haida ia habadua diba. Unai dainai, hekokoroku taudia be ma haida ese nega momo idia dadaraia.​—⁠1 Korinto 13:⁠4.

Ita be Iehova ena Witnes taudia dainai, reana iseda haroro gaukara lalonai ita idia kirikirilaia bona idia dadaraia. Namona be ita laloatao unai bamona dagedage karadia be ita dekenai idia hahedinaraia lasi, to Iehova, ita gwauraia herevana ia halasia Tauna, dekenai idia hahedinaraia. To, bema ita sibona ita laloa maoromaoro lasi reana dika do ia vara. Lagani momo gunanai, tadikaka ta be ruma tauna ta ena hereva dikana ia laloa momo dainai ia badu bona badu herevana ia gwauraia danu. (Efeso 4:29) Unai murinai, unai tadikaka be nega ta ruma-ta-ruma-ta gaukarana ia karaia lasi. Oibe, reana hekokoroku dainai haroro gaukara lalonai do ita badu. Namona be ita hekwarahi unai ia vara lasi totona. To, namona be mai manau ida Iehova ena heduru ita tahua Keristani hesiai gaukara ita karaia diba ena hahenamo ita laloa bada noho totona.​—⁠2 Korinto 4:​1, 7; 10:​4, 5.

Bema sibona ita laloa bada, reana ita dekenai mai anina bada sisibana do ita dadaraia. Lagani haida gunanai, Central America tanona ta ai, mero ta be Keristani kongregesen lalonai Haroro Sikuli dekenai hereva ta ia henia. Sikuli naria tauna ese ia dekenai sisiba sisina aukana ia henia neganai, unai badu merona ese foloa dekenai ena Baibel ia negea bona Kingdom Hall ia rakatania bona ia laloa do ia giroa lou lasi. To dina haida murinai, ena hekokoroku karana ia rakatania, sikuli naria tauna ida maino ia karaia, bona mai manau ida sisiba ia abia dae. Gabeai, unai mero matamatana be lo Keristani tauna ai ia lao.

Bema ita manau lasi bona sibona ita laloa bada, iseda hetura karana Dirava ida ita hadikaia diba. Aonega Herevadia 16:5 ia gwau: “Hekokoroku taudia ibounai, be Lohiabada ese ia badu henidia momokani.”

Sibona Ita Laloa Maoromaoro

Ia hedinarai goevagoeva, namo lasi sibona ita laloa bada. To momokani, ita gwau lasi iseda kara bona hereva do ita laloa bada lasi. Lasi, badina Baibel ese ia hahedinaraia elda taudia, hesiai taudia​—⁠momokani, kongregesen taudia ibounai​—⁠ese edia kara idia laloa be namo. (1 Timoteo 3:​4, 8, 11; Tito 2:⁠2) Vadaeni, edena dala ai Keristani taudia ese mai manau bona laloa maoromaoro ida sibona idia laloa diba?

Baibel ese sibona idia laloa maoromaoro taudia edia haheitalai namodia momo ia hahedinaraia. Iesu Keriso ese ia hahedinaraia manau karana be namo herea. Iena Tamana ena ura ia karaia bona taunimanima ia hamauria totona, Dirava ena Natuna be mai ena ura ida ena dagi badana guba dekenai ia rakatania bona ladana bada lasi tanobada tauna ai ia lao. Ena be ia idia hereva dika henia, idia hadikaia, bona hemarai dalanai idia hamasea, to ia be sibona ena kara ia biagua bona ia kara namo. (Mataio 20:28; Filipi 2:​5-8; 1 Petero 2:​23, 24) Edena dala ai Iesu be unai ia karaia diba? Ia be Iehova dekenai ia tabekau momokani bona ena lalona ia hadaia Dirava ena ura do ia karaia. Iesu ese Dirava ena Hereva ia stadilaia, ia guriguri, bona ia haroro goadagoada. (Mataio 4:​1-10; 26:​36-44; Luka 8:1; Ioane 4:34; 8:28; Heberu 5:⁠7) Bema Iesu ena haheitalai ita badinaia, ita ia durua diba ita sibona ita laloa maoromaoro totona.​—⁠1 Petero 2:⁠21.

King Saulo ena natuna Ionatana ena haheitalai namona mani oi laloa danu. Iena tamana ena kamonai lasi karana dainai, Ionatana be Saulo murinai king dagina do ia abia lasi. (1 Samuela 15:​10-29) Unai dagi ia haboioa dainai Ionatana ia badu, a? Davida, iena gabu ai do ia lohiaia tau matamatana, dainai ia mama, a? Ena be Ionatana ena mauri lagani bona ena diba ese Davida ena ia hereaia, mai ena laloa maoromaoro bona manau ida Iehova ena dala ia badinaia bona Davida ia durua. (1 Samuela 23:​16-18) Bema Dirava ena ura ita diba goevagoeva bona mai eda ura ida ita badinaia, ita ia durua ‘do ita hekokoroku lasi bona do ita laloa lasi ita be bada momokani.’​—⁠Roma 12:⁠3.

Iesu ese laloa maoromaoro bona manau hahedinaraia karana ena namo ia hadibaia. Unai ia haheitalaia totona ia gwau ena hahediba taudia be headava ariana lalonai idia noho neganai, namo lasi “helai gabudia namo momokani” dekenai idia helai, badina dagi bada tauna be do ia mai bona helai gabu dikana dekenai idia do idia siaia bena idia hemarai garina. Ia hadibaia gauna ia hedinarai goevagoeva totona, Iesu be ma ia gwau: “Badina be sibona ia habadaia tauna be Dirava ese do ia hamaragia, to sibona ia hamaragia tauna be Dirava ese do ia habadaia.” (Luka 14:​7-11) Aonega dalana be Iesu ena sisiba ita badinaia bona ‘manau be dabua bamona do ita atoa.’​—⁠Kolose 3:12; 1 Korinto 1:⁠31.

Laloa Maoromaoro Karana ese Ia Havaraia Hahenamo Idauidau

Laloa maoromaoro bona manau karadia idia hahedinaraia dainai, Iehova ena hesiai taudia ese edia gaukara lalonai moale korikorina idia davaria diba. Bema elda taudia ese mai edia manau ida mamoe oreana idia kara namo henia, tadikaka be idia dekenai idia mai be auka lasi. (Kara 20:​28, 29) Bena kongregesen taudia ibounai be idia dekenai idia ura hereva bona edia heduru idia ura tahua. Unai dala ai kongregesen taudia be lalokau, bona abidadama dalanai do idia noho hebou namo herea.

Sibona ita laloa bada lasi neganai, turadia namodia do ita abia. Laloa maoromaoro bona manau karadia ese ita idia durua kara helulu lalohadaina ita koua totona, bena ita laloa lasi iseda kara bona iseda kohu ese ma haida edia ia hereaia be gau badana. Unai Dirava badinaia karadia dainai ma haida edia namo do ita laloa, bona unai dainai idia dabu taudia ita hagoadaia bona durua be auka lasi. (Filipi 2:​3, 4) Taunimanima ese lalokau bona kara namo idia mamia neganai, do idia kara namo. Bona unai bamona sibona eda namo tahua lasi karana be badina namona hetura karana goadana ita haginia totona, ani? Sibona ita laloa bada lasi karana be hahenamo namona ta!​—⁠Roma 12:⁠10.

Sibona ita laloa maoromaoro dainai, ma haida ita habadua neganai eda kerere ita gwauraia hedinarai be auka lasi. (Mataio 5:​23, 24) Unai dainai eda hetura karadia idia namo, maino ita karaia diba bona ita hemataurai heheni. Gaukara naria taudia, Keristani elda taudia bamona, bema idia manau bona laloa maoromaoro, ma haida dekenai namo bada idia havaraia diba. (Aonega Herevadia 3:27; Mataio 11:29) Danu, manau tauna ese ia dekenai idia kara dika taudia edia kerere ia gwauatao be auka lasi. (Mataio 6:​12-15) Bema ia laloa ta ese ia dekenai dika ta ia karaia, do ia badu dikadika lasi, bona do ia abia dae momokani ma dala ta ai ia hanamoa diba lasi gaudia be Iehova ese do ia hanamoa.​—⁠Salamo 37:5; Aonega Herevadia 3:​5, 6.

Mai eda laloa maoromaoro bona manau ida sibona ita laloa karana ena hahenamo badana be Iehova ena lalo-namo do ita moalelaia. “Dirava ese hekokoroku taudia edia dala ia koua, to manau taudia dekenai iena hariharibada ia henia.” (1 Petero 5:⁠5) Sibona ita laloa bada tarapuna dekenai ita moru lasi be namo. To, namona be sibona eda gabu Iehova ena dala dekenai ita abia dae mai eda manau ida. ‘Mai manau ida Dirava ida idia raka’ taudia ese hahenamo badadia do idia abia.

[Picture on page 22]

Mai manau ida Ionatana ese Davida ia durua