“Kohu Namodia” be Iehova Ena Ruma Idia Hahonua Noho
“Lau [Iehova] ese bese ibounai do lau hamarerea, vadaeni bese ibounai edia kohu namodia be iniseni do idia mailaia, bona inai dainai Dubu Helaga be hairai dekenai do ia honu.”—HAGAI 2:7.
1. Dahaka dainai dika ia vara neganai, iseda lalokau taudia ita laloa guna?
EDENA kohu namodia ese oiemu ruma idia hahonua? Oi be mai emu dava bada teibolo bona helai gaudia, kompiuta namo hereana, bona motuka matamatana oiemu motuka atoa gabuna ai, a? Ena be reana unai gaudia oi abia, to do oi gwau oiemu ruma dekenai dava bada gaudia korikoridia be taunimanima—oiemu ruma bese taudia unai, ani? Mani oi laloa, hanuaboi ta ai kwalahu ena bonana ese oi do ia hanogaia. Lahi ese oiemu ruma ia gabua, bona miniti haida sibona idia noho do oi roho mauri totona! Dahaka do oi laloa guna? Oiemu teibolo bona helai gaudia, a? Oiemu kompiuta, a? Oiemu motuka, a? Lasi, oi ese oiemu lalokau taudia do oi laloa, ani? Momokani idia oi laloa guna, badina taunimanima ese kohu idia hereaia.
2. Iehova ese dahaka ia havaraia, bona unai gaudia amo Iesu ese dahaka ia moalelaia bada?
2 Hari, Iehova Dirava bona ena Natuna, Iesu Keriso, mani oi laloa. Iehova be “guba bona tanobada bona davara bona idia lalonai noho gaudia ibounai” ia havaraia Tauna. (Kara 4:24) Iehova ese ena Natuna, “gaukara karaia tauna” namona, amo gau oredia ibounai ia karaia. (Aonega Herevadia 8:30, 31; Ioane 1:3; Kolose 1:15-17) Momokani Iehova bona Iesu ese idia havaraia gaudia ibounai idia laloa bada. (Genese 1:31 itaia.) To emu lalohadai be dahaka, edena idia laloa bada—idia havaraia gaudia eiava idia havaraia taudia? Iesu be aonega bamona idia herevalaia neganai, ia gwau: “Tanobada, mai ena noho taudia ibounai dekenai lau moale noho,” eiava William F. Beck ia hahanaia Baibel ia gwau bamona Iesu ese “taunimanima ia moalelaia.”
3. Iehova ese Hagai amo edena peroveta herevana ia henia?
3 Ita daradara lasi, Iehova ese taunimanima ia laloa bada. Unai ia hahedinaraia gauna ta be lagani 520 B.C.E. ai peroveta Hagai amo ia gwauraia peroveta herevana lalonai ia hedinarai. Iehova ia gwau: “Lau ese bese ibounai do lau hamarerea, vadaeni bese ibounai edia kohu namodia be iniseni do idia mailaia, bona inai dainai Dubu Helaga be hairai dekenai do ia honu. . . . Inai Dubu Helaga matamatana ena hairai ese Dubu Helaga gunana ena hairai do ia hereaia.”—Hagai 2:7, 9.
4, 5. (a) Dahaka dainai do ita gwau lasi “kohu namodia” ena anina be kohu korikori? (b) “Kohu namodia” ena anina be edena bamona oi gwauraia diba, bona dahaka dainai?
4 Dahaka “kohu namodia” be Iehova ena ruma do idia hahonua bona ena hairai idia habadaia, guna bamona lasi? Davana bada kohu korikori bona herahera gaudia, a? Golo, siliva, bona dava bada nadidia, a? Unai bamona ita laloa diba lasi. Mani oi laloatao, dubu helaga gunana, lagani 500 gunanai idia hahelagaia gauna, idia haginia totona dola bilioni momo idia gaukaralaia!a Momokani, Iehova ia laloa lasi idia giroa mai Iuda taudia edia orea maragina ia haginia dubuna ena davana ese Solomona ena dubu helagana ena davana do ia hereaia!
5 Unai dainai, edena “kohu namodia” be Iehova ena ruma do idia hahonua? Ia hedinarai goevagoeva, idia be taunimanima. Momokani, siliva bona golo lasi, to mai lalokau ida Iehova idia hesiai henia taudia ese iena kudouna idia hamoalea. (Aonega Herevadia 27:11; 1 Korinto 10:26) Oibe, Iehova ese ia abia dae dalanai ia idia tomadiho henia tatau, hahine, bona natudia ibounai ia laloa bada. (Ioane 4:23, 24) Idia be “kohu namodia,” bona Iehova ena vairanai edia namo ese Solomona ena dubu helaga idia hahairaia kohu ibounai ia hereaia.
6. Dirava ena idaunegai dubu helagana ena anina be dahaka?
6 Ena be dagedage ia vara noho, to dubu helaga be lagani 515 B.C.E. ai idia haginia ore. Unai nega amo ema bona Iesu ese ena boubou gauna ia henia negana, Ierusalema dekenai ia noho dubu helaga be “kohu namodia,” Iuda taudia bona Idau Bese taudia danu, edia tomadiho gabuna badana. To unai dubu helaga ese gau badana ta ia laulaulaia, unai do ita itaia.
Aposetolo Taudia Edia Negai Ia Guguru
7. (a) Dirava ena idaunegai dubu helagana Ierusalema dekenai ese dahaka ia laulaulaia? (b) Kara Dika ena Davana Karaia Dinana ai hahelaga tauna badana ese ia karaia karadia mani oi gwauraia.
7 Ierusalema dekenai ia noho dubu helaga ese tomadiho dalana badana ia laulaulaia. Unai be Dirava ena lauma dubuna, Iehova ese lagani 29 C.E. ai ia haginia gauna bona ena Hahelaga Tauna Badana be Iesu. (Heberu 5:4-10; 9:11, 12) Israela ena hahelaga tauna badana ena maduna bona Iesu ena kara mani oi hahegeregerea. Lagani ta ta iboudiai, Kara Dika ena Davana Karaia Dinana ai, hahelaga tauna badana be dubu ena ariara gabuna dekenai ia noho boubou patana dekenai ia lao bona hahelaga taudia edia kara dika kokia totona boromakau tau ia bouboulaia. Gabeai, dubu lalonai unai boromakau tau ena rara ia abia vareai, ariara gabuna bona Helaga Gabuna huanai idia noho iduara ia hanaia bona Helaga Gabuna bona Helaga Herea Gabuna ia hapararaia dabua ia hanaia. Helaga Herea Gabuna lalonai ia noho neganai, hahelaga tauna badana ese taravatu mauana vairanai unai rara ia negea. Bena, unai dala tamona ai, ia ese nanigosi ia bouboulaia Israela ena hahelaga lasi iduhu 12 taudia edia kara dika kokia totona. (Levitiko 16:5-15) Unai kara ena anina Dirava ena lauma dubuna dekenai be dahaka?
8. (a) Edena dala ai lagani 29 C.E. ena matamana kahanai, Iesu idia bouboulaia? (b) Tanobada dekenai ena hesiai gaukara ia karaia negana ibounai lalonai Iesu ena hetura karana Iehova ida be edena bamona?
8 Lagani 29 C.E. ai, Iesu ia bapatiso bona Dirava ese ena lauma helaga amo ia horoa neganai, unai be hegeregere Dirava ena ura ia laulaulaia patana ai ena mauri ia bouboulaia bamona. (Luka 3:21, 22) Momokani, unai dala ai Iesu ena mauri be boubou gauna bamona ia gaukaralaia matamaia, lagani toi mai kahana lalonai. (Heberu 10:5-10) Unai nega lalonai, Iesu ena hetura karana Dirava ida be lauma amo ia vara lou natuna ena hetura karana bamona. Iesu bona ena guba Tamana edia hetura karana be ma taunimanima ta ese ia lalo-pararalaia goevagoeva diba lasi. Ia be hegeregere koua gauna ta ese edia lalo-parara ia koua, koua gauna ese palai dubu ena ariara gabuna dekenai idia noho taudia amo Helaga Gabuna ia koua bamona.—Esodo 40:28.
9. Dahaka dainai Iesu be taunimanima bamona ia noho neganai guba dekenai ia vareai diba lasi, bona edena dala ai unai idia hamaoromaoroa?
9 Ena be Iesu be Dirava ese ena lauma amo ia horoa Natuna, to taunimanima bamona ia noho neganai guba maurina ia abia diba lasi. Dahaka dainai? Badina tauanina bona rara ese Dirava ena guba Basileia idia abia diba lasi. (1 Korinto 15:44, 50) Iesu ena tanobada tauanina be koua gauna dainai, idaunegai dubu lalonai Helaga Gabuna bona Helaga Herea Gabuna ia hapararaia dabuana ese ia laulaulaia namo herea. (Heberu 10:20) To dina toi Iesu ia mase murinai, Dirava ese lauma maurina ai ia hatorea isi lou. (1 Petero 3:18) Bena ia be Dirava ena lauma dubuna ena Helaga Herea Gabuna dekenai—guba dekenai—ia vareai diba. Bona unai bamona ia vara momokani. Paulo ia gwau: “Keriso [be] taunimanima ese idia karaia Helaga Gabuna dekenai ia raka vareai lasi. Unai be guba gauna ena laulau sibona. Lasi, to Keriso ese maoromaoro guba dekenai ia raka vareai. Unuseni Dirava ena vairanai, ita durua totona ia gaukara noho.”—Heberu 9:24.
10. Iesu be guba dekenai ia giroa lao neganai dahaka ia karaia?
10 Guba dekenai, Iesu ese ia bouboulaia gauna ena ‘rarana ia negea,’ anina be Iehova vairanai mauri ena davana, ena rara ena davana, ia hahedinaraia. To, Iesu be ma gau ta ia karaia danu. Ena mase be kahirakahira neganai, ena murinai idia raka taudia ia hamaoroa: “Lau be do lau lao, gabu ta do lau karaia hegaegae umui emui. Bona lau lao, emui gabu ta do lau karaia hegaegae murinai, lau be do lau giroa mai, lau dekenai do lau abia dae umui, vadaeni lau noho gabuna dekenai be umui danu unuseni do umui noho.” (Ioane 14:2, 3) Unai dainai Helaga Herea Gabuna, eiava guba, dekenai ia vareai neganai, Iesu ese dala ia kehoa ma haida be ia murinai idia vareai totona. (Heberu 6:19, 20) Unai taudia, edia namba be 144,000, be Dirava ena lauma dubuna lalonai idia gaukara hahelaga taudia. (Apokalupo 7:4; 14:1; 20:6) Israela ena hahelaga tauna badana ese hahelaga taudia edia kara dika kokia guna totona boromakau tau ena rara ia abia lao Helaga Herea Gabuna dekenai, bona unai hegeregerena Iesu ia bouboulaia rarana ena davana be hahelaga taudia 144,000 dekenai namo ia havaraia guna.b
“Kohu Namodia” Hari Inai Negai
11. Israela ena hahelaga tauna badana be daidia totona nanigosi ia bouboulaia, bona unai ese dahaka ia laulaulaia?
11 Toana be lagani 1935 ai, horoa taudia gogoa gaukarana ia ore vadaeni.c To Iehova ese ena ruma hahairaia gaukarana ia do haorea lasi. Lasi, “kohu namodia” be ia lalonai do idia vareai mai noho. Mani oi laloatao, Israela dekenai hahelaga tauna badana ese animal rua ia bouboulaia—boromakau tau hahelaga taudia edia kara dika kokia totona bona nanigosi hahelaga lasi iduhu taudia edia kara dika kokia totona. Hahelaga taudia be Iesu ida guba Basileiana lalonai do idia noho horoa taudia idia laulaulaia dainai, hahelaga lasi iduhu taudia be daidia idia laulaulaia? Iesu ena hereva Ioane 10:16 lalonai haere ita davaria, ia gwau: “Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.” Unai dainai, Iesu ena rarana be taunimanima oreadia rua dekenai namo ia havaraia—orea ginigunana taudia be guba dekenai Iesu ida do idia lohia helarona idia abia Keristani taudia, bona orea iharuana taudia be tanobada paradaisona ai do idia mauri hanaihanai helarona idia abia taudia. Hagai ena peroveta herevana lalonai ia gwauraia “kohu namodia” be unai orea iharuana taudia idia laulaulaia.—Mika 4:1, 2; 1 Ioane 2:1, 2.
12. Edena dala ai hari inai negai “kohu namodia” momo be Dirava ena ruma dekenai idia mai?
12 Unai “kohu namodia” ese Iehova ena ruma idia hahonua noho. Vanegai laganidia lalonai, Eastern Europe ai, Africa ena kahana haida ai, bona ma tano haida ai taravatu idia kokia dainai, guna idia haroro lasi teritori idauidau dekenai hari Dirava ena Basileia, ia lohia vadaeni gauna, ena sivarai namona idia harorolaia diba. Kohu namodia bamona taudia be Dirava ena dubu bamona ia noho tomadiho dalana ai idia vareai, bona idia danu be Iesu ena hahegani hegeregerena taunimanima ma haida be hahediba taudia ai idia halaoa. (Mataio 28:19, 20) Unai idia karaia lalonai, taunimanima momo, matamata taudia bona buruka taudia, idia davaria bona idia be Iehova ena ruma do idia hahairaia “kohu namodia” ai idia lao diba. Unai ia vara ena sivarai haida mani oi laloa.
13. Bolivia dekenai kekeni maragina ta ese Basileia ena sivarai harorolaia totona ena ura goadana be edena dala ai ia hahedinaraia?
13 Bolivia dekenai, Witnes tama sina edia natuna, mauri lagani ima kekenina, ese ena tisa ena gwaumaoro ia noia sekit naria tauna ena vadivadi purana lalonai sikuli dekenai ia lao lasi totona. Dahaka dainai? Ia ura unai pura idauna ibounai lalonai haroro gaukara do ia karaia. Ena tama sina be idia hoa, to idia moale badina lalohadai namona ia hahedinaraia. Hari unai kekeni maragina ese Baibel stadi ima ia karaia, bona ia stadi henia taudia haida be Keristani heboudia dekenai idia lao. Ia ese ena sikuli tisa danu be Kingdom Hall dekenai ia hakaua lao. Reana gabeai, iena Baibel stiuden taudia haida be “kohu namodia” ai do idia lao bona Iehova ena ruma do idia hahairaia.
14. Korea dekenai, toana be ia ura lasi tauna ia hereva henia noho dainai, taihu ta ese edena dala ai anina namona ia havaraia?
14 Korea dekenai, Keristani hahine ta be trein steiseni dekenai ia naria noho neganai, taiana gauna amo miusiki ia kamonai stiuden tauna ta ia hereva henia. Ia henanadai: “Oi be mai emu tomadiho, a?” Stiuden tauna ia haere: “Lau be tomadiho lau laloa bada lasi.” Ena haere ese taihu ia koua lasi. To ma ia gwau: “Nega ia hanaia lalonai, reana ta ia ura tomadiho do ia abia hidi. To bema tomadiho dekenai ena diba be bada lasi, reana tomadiho kererena do ia abia hidi.” Unai stiuden tauna ena vairana ena toana ia idau, bona mai ena ura ida iseda taihu ena hereva ia kamonai matamaia. Taihu ese ia dekenai Is There a Creator Who Cares About You? bukana ia henia bona ia gwau ena tomadiho ia ura abia hidi neganai unai buka ese do ia durua. Stiuden tauna ese mai ena ura ida buka ia abia dae. Vaira purana ai, Iehova ena Witnes taudia ida Baibel ia stadilaia matamaia, bona hari kongregesen hebou iboudiai ia lao henia.
15. Japan dekenai, edena dala ai kekeni maragina ta ese Baibel stadi haida ia hamatamaia, bona edena dala ai ena hekwarahi ese anina ia havaraia?
15 Japan dekenai, mauri lagani 12 Megumi ia laloa iena sikuli be gabu namona haroro bona hadibaia gaukara karaia totona. Ia ese Baibel stadi momo ia hamatamaia danu. Megumi be edena dala ai unai ia karaia? Dina tubua aniani negana ai Baibel ia duahia eiava hebou totona ia hegaegae dainai, nega momo iena sikuli turadia ese idia nanadaia dahaka ia karaia. Haida be Megumi idia nanadaia dahaka dainai ia be sikuli karadia haida lalonai ia vareai lasi. Megumi be edia henanadai ia haerelaia bona ia gwau Dirava be mai ena ladana. Nega momo unai ese idia kamonai taudia edia lalona ia veria. Bena idia dekenai Baibel stadi ia hahedinaraia. Hari Megumi be Baibel stadi 20 ia karaia—idia 18 be iena klas turadia ida.
16. Edena dala ai Cameroon dekenai tadikaka ta ese ia idia kirikirilaia taudia haida dekenai Baibel stadi ia hamatamaia?
16 Cameroon dekenai, ruma haginia gabuna ta dekenai idia gaukara tatau 8 be dala dekenai ia haroro tadikakana ta idia boiria. Idia ura tadikaka idia kirikirilaia dainai idia nanadaia dahaka dainai ia be Toi Tamona, hel ena lahi, eiava ia mase diba lasi soulina herevadia ia abia dae lasi. Iseda tadikaka ese Baibel amo haere namodia ia henia. Unai ia karaia dainai, idia amo tatau toi be Baibel stadi idia abia dae. Idia ta, Daniel, be hebou ia lao henidia matamaia bona ena meamea gaudia ibounai ia hadikaia ore. (Apokalupo 21:8) Lagani ta ia do hanaia lasi neganai, bapatiso ia abia.
17. Tadikaka haida El Salvador dekenai ese edena aonega dalana idia gaukaralaia, guna Basileia ena sivarai ia ura lasi kamonai tauna dekenai idia haroro totona?
17 El Salvador dekenai, tau ta ese ena noho gabuna ai Witnes taudia ia itaia neganai, iduara vairanai iena sisia dikana ia kwatua. Tau be do ia naria ela bona Witnes taudia be unai gabu idia rakatania, bena ruma dekenai iena sisia do ia abia vareai lou. Tadikaka be unai tau idia hereva henia diba lasi. Unai dainai dina ta idia be dala idauna ta idia gaukaralaia. Idia diba unai tau ese edia hereva ia kamonai diba dainai, idia laloa unai sisia dekenai do idia haroro. Idia mai ruma dekenai, sisia idia hanamoa, bona idia gwau idia moale badina ia dekenai idia hereva diba. Idia gwau nega ta tanobada dekenai paradaiso do ia vara bona tau ta do ia badu lasi—oibe, animal danu be maino ai do idia noho. Bena dala namona ai sisia dekenai bamahuta herevana idia gwauraia bona idia raka lao. Idia hoa bada, badina unai tau be ena ruma amo ia mai bona Witnes taudia ese ia idia hereva henia totona nega ia henia lasi dainai ena sori herevana ia gwauraia. Ia ese magasin ia abidia, bona Baibel stadi idia hamatamaia. Hari unai tau be iseda tadikaka ta—“kohu namodia” ta!
“Do Umui Gari Lasi”
18. Keristani taudia momo be edena hekwakwanai idia davaria, to edena dala ai Iehova ese ia idia tomadiho henia taudia ia laloa?
18 Mai anina bada Basileia gaukarana, haroro bona hahediba taudia halaoa gaukarana, oi karaia danu, a? Bema oi karaia, oi ese hahenamo badana oi abia unai. Oibe, Iehova ese unai gaukara amo ena ruma dekenai “kohu namodia” ia veria. (Ioane 6:44) Momokani, reana nega haida oi hesiku eiava oi lalo-manoka. Nega haida, taunimanima haida—Iehova ena kamonai hesiai taudia haida danu—idia laloa idia be anina lasi. To namona be oi goada noho! Iehova ese ia idia tomadiho henia taudia ta ta ia ura henia bada, bona ia ura dikadika mauri do oi abia.—2 Petero 3:9.
19. Iehova ese Hagai amo edena hagoadaia herevadia ia henia, bona edena dala ai unai hereva ese ita idia hagoadaia diba?
19 Ita lalo-manoka neganai, herevana dagedage karana eiava idia vara gaudia dikadia dainai, Iehova ena hereva edia tano ai idia giroa Iuda taudia dekenai ese ita idia hagoadaia diba. Hagai 2:4-6 ena hereva ia gwau: “Lohiabada ia hereva inai, ia gwau, ‘Serubabele e, do oi goada! Hahelagaia Tauna Badana, Iosua Iehosadaka e, do oi goada! Umui tano taudia ibounai e, do umui goada, bona gaukara do umui karaia, badina lau, Siahu Ibounai Lohiabada be umui dekenai lau noho. Umui ese Aigupito umui rakatania neganai, unai bamona lau gwauhamata, bona egu Lauma be umui emui huanai ia do noho, unai dainai do umui gari lasi.’ Ma Siahu Ibounai Lohiabada ia gwau, ‘Lau ese inai kara ta ma do lau karaia: Lau ese guba bona tanobada bona davara bona tano kaukau gabudia do lau hamarerea, do idia heudeheude.’ ” Mani oi itaia Iehova ese ita ia hagoadaia sibona lasi to goada ita abia totona dala ia kehoa danu. Unai dala be dahaka? Mani inai hagoadaia herevana oi itaia, ia gwau: “Umui dekenai lau noho.” Ita lalo-parara, herevana dahaka hekwakwanai ita davaria to Iehova be ita ida do ia noho, unai ese iseda abidadama ia hagoadaia momokani!—Roma 8:31.
20. Edena dala ai hari Iehova ena ruma ena hairai ia bada herea noho?
20 Iehova ese ia hamomokania vadaeni ia be ena taunimanima ida ia noho. Momokani, unai be peroveta tauna Hagai amo ia gwauraia bamona, ia gwau: “Inai Dubu Helaga matamatana ena hairai ese Dubu Helaga gunana ena hairai do ia hereaia. Bona inai gabu dekenai . . . maino do lau henia.” (Hagai 2:9) Oibe, hari inai negai hairai hereadaena be Iehova ena lauma dubuna lalonai ita davaria diba. Lagani ta ta iboudiai taunimanima tausen momo be tomadiho momokanina lalonai idia vareai. Lauma dalanai aniani namona idia abia noho, bona inai tanobada dikana lalonai danu, maino idia moalelaia, unai maino be Dirava ena tanobada matamatana lalonai do ia vara mainona sibona ese ia hereaia.—Isaia 9:6, 7; Luka 12:42.
21. Namona be iseda lalona ita hadaia dahaka ita karaia totona?
21 Iehova ese Aramagedono lalonai taunimanima besedia do ia hamarerea karana be ia vara gwauraia. (Apokalupo 16:14, 16) Unai dainai namona be ia do noho negana ita gaukaralaia, taunimanima ita durua mauri idia abia totona. Namona be ita goada noho bona Iehova ita abidadama henia momokani. Namona be iseda lalona ita hadaia iena lauma dubuna lalonai ia do ita tomadiho henia noho, bona “kohu namodia” amo ita hahonua noho ela bona Iehova ia gwau unai gaukara ia ore.
[Footnotes]
a Solomona ena dubu helagana idia haginia totona idia henia gaudia edia davana hari inai negai be dola bilioni 40 bamona. Haginia gaukarana lalonai idia gaukaralaia lasi gaudia be dubu ena kohu haboua daiutuna dekenai idia atoa.—1 King Taudia 7:51.
b Iesu be Israela ena hahelaga tauna badana amo ia idau badina ia be kara dika ta lasi, do ia kokia totona. To, ia ida hahelaga gaukarana do idia karaia taudia be mai edia kara dika badina kara dika taudia amo idia ia hoia.—Apokalupo 5:9, 10.
Oi Laloatao, A?
• Iehova ese kohu ia laloa bada lasi to dahaka ia laloa bada?
• Iesu ena rarana amo edena orea rua be namo idia davaria?
• Hairai amo Iehova ena ruma idia hahonua “kohu namodia” be daidia?
• Dahaka gaudia ese idia hamomokania Hagai ena peroveta herevana be hari inai negai ia guguru noho?
[Diagram on page 16]
(For fully formatted text, see publication)
Iehova ena idaunegai dubu helagana ese ia laulaulaia gaudia oi diba, a?
Helaga Herea Gabuna
Dabua
Helaga Gabuna
Vareai Gabuna
Boubou Patana
Ariara Gabuna
[Picture on page 17]
Hahelaga tauna badana ese hahelaga taudia edia kara dika kokia totona boromakau tau bona Israela ena hahelaga lasi iduhu taudia edia kara dika kokia totona nanigosi ia bouboulaia
[Picture on page 18]
Tanobada ibounai Basileia harorolaia gaukarana ese taunimanima hutuma Iehova ena ruma dekenai ia veria mai