Daniela Ena Buka Ia Gwauraia Hedinarai!
HEBOUHEBOU idia lao henia taudia be mai edia ura bada danu idia halasia rau 320 buka matamatana ladana, Pay Attention to Daniel’s Prophecy! ena kopi ta idia abia. Unai buka be edena bamona idia laloa? Haida edia hereva mani ita kamonai.
“Memero kekeni momo bamona, lau hekwarahi bada idaunegai sivaraidia stadilaia karana lau moalelaia totona. Unai dainai, lau sibona egu buka matamata, Pay Attention to Daniel’s Prophecy! ena kopi lau abia neganai, duahia totona lau moale bada herea momokani lasi, to lau duahia toho. Momokani, lauegu lalohadai be maoro lasi! Lau duahia bukadia amo unai buka be buka hereadaena ta. Lau ura dikadika unai buka lau duahia noho! Lau laloa lasi lau be lagani tausen haida gunanai ia vara sivaraina lau duahia. Nega ginigunana, lau laloa lau be Daniela ena gabu lau abia. Lau laloa, unai be emu ruma bese amo oi idia abia bona idau gabu dekenai idia siaia lao bamona, bona emu abidadama idia tohoa loulou. Tanikiu bada unai buka dainai.”—Anya.
“Lau ia hagoadaia bada herevana be Iehova ese ena taunimanima edia dala ia biagua namonamo. Daniela ena matahanai bona nihi bona ma haida edia nihi, ia ese edia anina ia gwauraia gaudia, ese idia hahedinaraia ia koua lasi gaudia be hanaihanai ena ura hegeregerena do idia vara. Unai ese Baibel lalonai ita abia helarona, nega matamata ia perovetalaia herevana ia hagoadaia.”—Chester.
“Lau be Daniela umui herevalaia dalana lau moalelaia bada. Ia karaia bona laloa bada gaudia umui gwauraia dalana amo toana be ia lau diba namonamo. Lau lalo-parara goevagoeva dahaka dainai Iehova ese ia ura henia bada. Ia davaria hekwakwanai bona dagedage iboudiai lalonai, ia be sibona ia laloa bada lasi. Ia laloa bada gauna be Iehova bona Iena ladana hairaina. Unai hereva badadia umui gwauraia hedinaraia namonamo dainai, umui lau tanikiu henia.”—Joy.
“Ai naria noho gauna be inai! Daniela ena buka be mai anina bada ita ta ta dekenai be guna unai bamona idia hahedinaraia lasi. Buka matamata lau abia murinai, hanuaboi ai ena hereva momo lau duahia, to lau hadokoa bona guriguri amo Iehova lau tanikiu henia.”—Mark.
“Unai buka ese aiemai natuna dekenai ia havaraia gauna be ai laloa lasi. Edia mauri lagani be 5 bona 3. . . . Ena be Lau Egu Bible Sivarai Buka dekenai edia ura bada sivaraina ta be, Daniela, Hananaia, Misaela, bona Asaraia edia sivarai, to ai laloa lasi dalana ai Daniel’s Prophecy bukana ese idia ia durua. Herevana idia do maragi, to unai kara maoromaoro tataudia idia gwauraia diba. Aiemai natudia dekenai idia be haheitalaia namo hereadia! Tulu hereadaena ta ai dekenai umui henia! Tanikiu, tanikiu bada herea!”—Bethel.
“Toana be unai Heberu memero matamatadia be edia abidadama idia tohoa neganai, lau danu lau noho; bona unai ese lau ia hagoadaia egu abidadama lau laloa namonamo totona. Riviu mauana ladana “Dahaka Oi Dibaia?” amo unai karoa ena anina be egu kudouna dekenai lau atoa diba. Inai gau hereadaena ma ta dainai, umui lau tanikiu henia lou.”—Lydia.